1 Are waʼ jun wuj ri xutzʼibaj in tat, ri Mormón, chwe in, ri Moroni. Xutzʼibaj chwe we wuj riʼ cʼäte xinsiqʼuixic che ri lokʼalaj chac. Y jewaʼ riʼ u beyal ri xutzʼibaj chwe, xubij:

2 Moroni, at ri lokʼalaj nu cʼojol, y sibalaj quinquicotic chi ri Awajawal Jesucristo at u natajisam, at u siqʼuim che ri lokʼalaj u pataninem, che ri chʼajchʼojalaj u chac.

3 Tza at natal chwe pa ri nu chʼawem rucʼ ri Dios. Amakʼel quinbanalaʼ chʼawem che ri Dios Tataxel pa ri u biʼ ri Lokʼalaj Ralcʼual, ri Jesús. Quintzʼonoj che ri areʼ chi catutoʼo rumal ri rutzil y ri u tokʼob ri man cʼo tä qui qʼuisic, rech jewaʼ cʼu cakʼiʼ na cʼä pa ri qʼuisbal kʼij rumal ri a cojobal che ri u biʼ.

4 Wachanim cʼut, nu cʼojol, catintzijobej che jas ri sibalaj quinbisoj. Quinbison che ri oyowal yacatajinak chixol.

5 We tä kastzij ri nu chʼobom, are cʼo tak oyowal yacatajinak chixol chrij ri kasbal xeʼ jaʼ ri cäban lo chque ri alaj tak iwalcʼual.

6 Wacamic, nu cʼojol, quinrayij chi sacʼaj catchacunic, rech quesax bi na we jun nimalaj itzel chixol. Rumal cʼu waʼ, nu tzʼibam we wuj chawe.

7 Aretak nu chʼobom chi laʼ, chanim cʼut xintaʼ u noʼj ri Ajawaxel chrij. Xpe cʼu ri u tzij ri Ajawaxel chwe rumal ri u cuinem ri Uxlabixel, xubij:

8 Chatatabej ri u tzij ri Cristo, ri Tojol a mac, ri Awajawal, y ri a Dios. Chawilampeʼ, man xinpe tä ulok cho ri ulew chquisiqʼuixic ri sucʼumalaj tak winak che qʼuexbal quib, xane cʼu ri ajmaquib. Ri winak ri man cʼo tä qui yabil, man cächacun tä ri ajcun chque, xak xuwi ri e yawabib. Are cʼut sibalaj sucʼ ri alaj tak acʼalab, y areʼ man quecuin taj quemacunic. Rumal cʼu laʼ, ri cʼokonic ri xkaj puwiʼ ri Adán quesax bic paquiwiʼ wumal ri in, y man cʼo tä u cuinem paquiwiʼ. Xukujeʼ quesax bic ri pixab rech cojbal retal che ri qui cowil ri achijab.

9 Y jewaʼ cʼut xkʼalajisax chwe ri u tzij ri Dios rumal ri Uxlabixel. Rumal cʼu laʼ, lokʼalaj nu cʼojol, wetaʼm chi are jun nimalaj tzeʼben u wäch ri Dios we caban ri kasbal xeʼ jaʼ chque ri alaj tak acʼalab.

10 Chawilampeʼ, quinbij chawe, chatijoj na waʼ: Chquiqʼuexaʼ qui cʼux y chquibanaʼ ri kasbal xeʼ jaʼ conojel ri winak ri yatal chque chi quechʼobanic y ri quecuinic chubanic ri qui mac. Kas jeʼ chebatijoj ri nan tat chi rajwaxic cäquiqʼuex na ri qui cʼux, y cäquiban ri qui kasbal xeʼ jaʼ, chi cäquimachʼachʼej quib je ri alaj tak calcʼual. Je cʼu riʼ, quecolotaj na cucʼ ri alaj tak calcʼual.

11 Y man rajwaxic tä chque ri alaj tak calcʼual ri qʼuexbal cʼuxaj, mawi ri kasbal xeʼ jaʼ. Chawilampeʼ, cäban ri kasbal xeʼ jaʼ che ri qʼuexbal u cʼux jun chutzʼakatisaxic ri takbal rech quesataj na ri u mac.

12 Tzare ri alaj acʼalab e cʼaslic rumal ri Cristo, tzpa ri u tiquiribal ri uwächulew. We tä ma tä jewaʼ riʼ, ri Dios xak cuyaʼ u toʼbanel chque jujun winak, y cäqʼuex ri u chomanic ri Dios, y xukujeʼ man junam taj queril conojel ri winak. ¡Are cʼut, janipaʼ tak ri acʼalab e cäminak y man xban tä ri kasbal xeʼ jaʼ chque!

13 Rumal laʼ, we tä rajwaxic ri kasbal xeʼ jaʼ che qui colotajic ri alaj acʼalab, e benak chic we alaj acʼalab riʼ pa jun xibalba ri man cʼo tä u qʼuisic.

14 Kastzij, cʼo ri quinbij chawe. Ri winak ri cuchomaj chi rajwaxic ri kasbal xeʼ jaʼ chque ri alaj acʼalab, are riʼ cʼo jun nimalaj cʼayil rrucʼ, y ximatalic che ri etzelal. Areʼ man cʼo tä ri u cojobal, mawi ri eyenic pa ranimaʼ, mawi ri lokʼokʼebal u cʼux. Rumal laʼ, we tä cäcäm na rucʼ ri u chomanic, jewaʼ, kastzij kʼalaj cäbe pa ri xibalba.

15 Are jun cʼäqxalaj etzelal we cuchomaj jun chi ri Dios cucol na jun acʼal ri u banom ri kasbal xeʼ jaʼ, y cuyaʼ chi cäsach na u wäch jun acʼal chic rumal man u banom tä kasbal xeʼ jaʼ.

16 Cʼa cäban chque ri quejechʼbenic ri tak u beyal ri Kajawal je jas waʼ. Kstzij cäsach na qui wäch we man cäquiqʼuex tä qui cʼux. Chawilampeʼ, quintzijonic rucʼ u chukʼab nu cʼux rumal chi cʼo takanic yatal pa nu kʼab rumal ri Dios. Man quinxej tä wib cho ri quecuinic cäquiban ri achijab, rumal ri tzʼakatalaj lokʼokʼenic cuqʼuiäk apan ronojel ri xen ib.

17 In cʼut quinnojisax che ri lokʼokʼebal cʼuxaj, are ri junalic lokʼokʼenic. Y rumal laʼ, conojel ri acʼalab e junam pa nu cʼux in. Y rumal laʼ, quebinlokʼokʼej ri alaj acʼalab rucʼ jun tzʼakatalaj lokʼokʼenic. Conojel e areʼ junam qui banic, y conojel cäquirik ri qui colotajic.

18 In cʼut wetaʼm chi ri Dios man xak xuwi quebutoʼo jujun winak. Areʼ man cuqʼuex tä u banic. Ri areʼ man cuqʼuex taj tzpa ronojel junalic cʼä pa ronojel junalic.

19 Ri alaj acʼalab man quecuin tä cäquiqʼuex qui cʼux che ri mac. Rumal laʼ, are jun cʼäxalaj etzalal we cäxutux chque ri sakalaj tak u tokʼob ri Dios. Conojel areʼ e cʼaslic pa ri areʼ rumal ri tokʼobisan wächaj cubano.

20 Y apachin ri cubij chi rajwaxic cäban ri kasbal xeʼ jaʼ chque ri alaj acʼalab cuxutuj ri tokʼobisan wächaj ri cuban ri Cristo. Xukujeʼ cuxutuj ri tojbal macaj ri xubano ri Cristo y ri u cuinem ri resabal macaj.

21 Tokʼob qui wäch ri quebanow jewaʼ. Are riʼ cäquijach quib che ri cämical, che ri xibalba y che jun cʼäxcʼolil ri man cʼo tä u qʼuisic. Quinbij waʼ, man quinxej tä wib. Ri Dios u yaʼom u takbal chwe. Chitatabej we tak tzij y chinimaj. We tä man quiban tä jewaʼ, cäkʼalajisax cʼu na we tak tzij chiwij ix pa ri tʼuyubal jawi cäkʼat wi tzij rumal ri Cristo.

22 Kastzij, conojel ri alaj tak acʼalab e cʼaslic pa ri Cristo, are xukujeʼ conojel ri man cʼo tä ri takbal cucʼ. Rumal chi ri cuinem re ri esabal macaj cäkaj paquiwiʼ conojel ri man cʼo tä ri takbal cucʼ. Rumal laʼ, are riʼ man quecuin tä chuqʼuexic qui cʼux we man cʼokonic taj, o we man e cʼo tä chuxeʼ ri etzebal, man cʼo tä u patan ri kasbal xeʼ jaʼ chque ri winak riʼ.

23 Are cʼu riʼ jun tzeʼben u wäch ri Dios. Are riʼ jun xutubal re ri tokʼobisan wächaj ri cuban ri Cristo, y re ri u cuinem ri lokʼalaj Ruxlabal. Are riʼ u cuʼbisaxic u cʼux jun che ri cäminak tak chac.

24 Chawilampeʼ, nu cʼojol, are man utz taj cäban jewaʼ riʼ. Ri qʼuexbal cʼuxaj takal chque ri winak ri e cʼo chuxeʼ ri etzelatajic, ri e cʼo chuxeʼ ri cʼok re jun takbal xalkʼaltim canok.

25 Y ri nabe u wächinic ri qʼuexbal cʼuxaj are ri kasbal xeʼ jaʼ. Ri kasbal xeʼ jaʼ cäpetic we cʼo cojobal che u nimaxic ri takbal. Y ri u nimaxic ri takbal cucʼam ulok ri esabal macaj.

26 Ri esabal macaj cucʼam ulok ri camelal y ri machʼachʼem pa animaʼ. Cʼu rumal chi cʼo camelal y machʼachʼem pa animaʼ, cusolij ri Uxlabixel. Are riʼ ri cuʼbisanel cʼuxaj, y cunojisaj ri cʼuxaj che jun eyenic, y che jun tzʼakatalaj lokʼokʼenic. We lokʼokʼenic riʼ man cäqʼuis taj we jun cäsacʼajin pa ri chʼawem rucʼ ri Dios, cʼä cäpe ri qʼuisbal kʼij aretak conojel ri chʼajchʼojoxelab quecʼojiʼ na rucʼ ri Dios.

27 Chawilampeʼ, nu cʼojol, quintzʼibaj chi na jun wuj chawe we man quinel tä bi chanim chubanic chʼoʼj chquij ri aj Lamanitas. Kastzij, we tinimit riʼ, ri aj Nefitas, are kas qui nimarisam quib. Rumal cʼu laʼ, are kʼalaj cäsachtaj na qui wäch we tä man cäquiqʼuex tä qui cʼux.

28 Nu cʼojol, chatzʼonoj che ri Dios rumal quech chquicʼulmaxic na jun qʼuexbal qui cʼux. Tzare cʼut kas quinoc il chque rumal we ne ri Uxlabixel man cächacun tä chi cucʼ. Y waral pa waʼ jun chʼakap ri ulew, cäquicoj qui chukʼab chusachic apan ronojel cuinem y takanic ri petinak ulok chuwäch ri Dios. Y xukujeʼ cäquixutuj ri Uxlabixel.

29 Are riʼ, nu cʼojol, qui xutum jun mayilaj quetamabal. Rumal laʼ, chanim cäsachtaj na ri qui wäch chutzʼakatisaxic ri kʼalajisabal ri bim canok cumal ri kʼaljisanelab che ri äpe na. Are waʼ xukujeʼ cutzʼakatisaj ri tak u tzij ri ka Colonel.

30 Chʼabej chic, nu cʼojol, cʼä pa ri kʼij quintzʼibaj chi jun wuj chawe, o quinwil chic ri a wäch. Amen.