1 Wachanim cʼut, quintzijon na chrij ri kasbal xeʼ jaʼ. Chiwilampeʼ, xbantajic ri kasbal xeʼ jaʼ chque ri élderes, y chque ri tewichinelab y ri tijonelab. Y xak xuwi xekasax xeʼ jaʼ we kastzij xquicʼut nabe u wäch ri utzalaj qui banom rech cäquicʼutu chi takal chque cäquicʼulaj ri kasbal xeʼ jaʼ.

2 Xukujeʼ man xequicʼulaj tä i winak che ri kasbal xeʼ jaʼ, we tä ma tä xbison ri canimaʼ che ri Dios y xniman qui cʼux che, y chi xquikʼalajisaj chuwäch ri winakil chi kas jeʼ qui qʼuexom qui cʼux che ronojel ri qui mac.

3 Y man xequicʼulaj tä mawi jun ri winak che ri kasbal xeʼ jaʼ, we tä ma tä xquicʼam ri u biʼ ri Cristo paquiwiʼ, y xquichomaj cäquipatanij baʼ cʼä pa ri qʼuisbal kʼij.

4 Cʼäte xecʼulaxic che ri kasbal xeʼ jaʼ, xpe cucʼ ri u chukʼab ri Uxlabixel, y xechʼajchʼojarisaxic rumal. Banom chic waʼ, xeriktaj ri e areʼ chquixol ri u Winakil ri Cristo. Y xtzʼibax can ri qui biʼ, rech cʼo natabal quech, y xukujeʼ rech cäyaʼic chukʼab chque rumal ri utzalaj u tzij ri Dios. Y jelaʼ quecʼojiʼ na pa ri sucʼumalaj be. Y jelaʼ quecʼolic chi junalic rech cänataj chque cäquiban ri qui chʼawem rucʼ ri Ajawaxel, rech cäquicojo xak xuwi che ri rutzil ri Cristo, ri jun banel y tzʼakatisanel re ri qui cojobal.

5 Cʼu amakʼel xquimulij quib ri winakil chubanic ri jun kʼij re majwaʼim y chubanic ri chʼawem che ri Dios. Y xquimulij quib rech chi cäquitzijoj chbil quib chrij ri rutzil ri canimaʼ.

6 Y amakʼel xquimulij quib chucʼamowaxic ri cäxlan wa y xukujeʼ ri u waʼl uvas che ri u natabal ri Ajawaxel Jesucristo.

7 Y xquilij chbil quib rucʼ sucʼumal che rilic chi man cʼo tä etzelal chquixol. Y apachinak ri xbanow itzel, xkʼat tzij puwiʼ chquiwäch ri élderes cumal oxib kʼalajisanelab re ri winakil, y we man xuban tä kʼalaj ri u mac y man xuqʼuex tä u cʼux che ri u mac, kastzij xchuptaj ri u biʼ cho tak ri wuj, y man xriktaj tä chic chquixol ri u winak ri Cristo.

8 Tzare we tä xuqʼuex u cʼux che ri u mac, y xutaʼ ri cuyubal u mac rucʼ sucʼalaj u rayibal, xcuyic ri u mac.

9 Y ri tak kʼalajisanem re ri Uxlabixel xcʼam u be che ri mulim ib ri u winakil ri Jesucristo, y rumal ri u chukʼab ri lokʼalaj Uxlabixel. Rumal kastzij, jachaʼ ri xubij ri Uxlabixel chque, we tä che u tzijobexic ri u tzij ri Dios, o che qui pixabaxic ri winak, o chubanic chʼawem rucʼ ri Dios, o che u taʼic jun jasäch, o che u bixoxic tak bix, jeriʼ xbanowic.