1 Lokʼalaj nu cʼojol, quintzʼibaj jun chi wuj chawe, rech cachʼobo chi cʼä ri in cʼaslic. Tzare cʼut quintzʼibaj ri jas cäyow cʼäx chwe.

2 Chawilampeʼ, ka banom jun cʼäxalaj chʼoʼj chquij ri aj Lamanitas, y man xekachʼec taj. Ri Arcanteo xcämisax che jun chʼichʼ, y xukujeʼ ri Luram y ri Emrón. Kas jeʼ e sachom qʼui achijab ri e utz chke.

3 Chawilampeʼ cʼut, nu cʼojol, quinoc il chque we tinimit rumal cäraj ne ri aj Lamanitas cäquisach na qui wäch. Man cäquiqʼuex tä qui cʼux we winak, y ri Satanás amakʼel cunim rib pa canimaʼ rech cäpe coyowal chbil quib.

4 Chawilampeʼ, amakʼel quebinpixabaj. Aretak quinkʼalajisaj chquiwäch ri u tzij ri Dios rucʼ nu chukʼab, cäpe coyowal chwij y quebirbatic. Y we man quincoj tä nu chukʼab che nu tzij, te cʼu riʼ cäquicowirisaj ri canimaʼ chrij. Rumal laʼ quinoc il chque, rumal chi we ne man cächacun tä chic ri Ruxlabal ri Ajawaxel chquixol.

5 Are sibalaj nim na ri coyowal, y quinchʼob ri in chi man cäquixej tä quib cho ri cämical. Sachinak ri qui lokʼokʼenic chbil quib. Amakʼel cächakiʼj qui chiʼ che ri quicʼ y cäquirayij riʼ.

6 Je cʼu riʼ, lokʼalaj nu cʼojol, chujchacunok rucʼ sacʼajil, pune sibalaj co ri canimaʼ. We cäkayaʼ canok ri ka chac, cujkaj chuxeʼ jun cʼokenic. Rumal cʼo jun ka chac cäkabano aretak cʼä cʼo ri uj pa ri ka tiojil je ri u banic jun ja banom che xokʼol. Rajwaxic cäkachʼec na ri u cʼulel ronojel ri suqʼuilal, y jewaʼ cäkayaʼ na uxlanem che ri kanimaʼ pa ri rajawibal ri Dios.

7 Y wachanim quintzʼibaj jujun tak tzij chrij ri cʼäx ri qui rikom we winak. Chawilampeʼ, ri aj Lamanitas xquichʼec qʼui tak winak, pa ri tzʼak ja u biʼ Sherriza. Xequicʼam bic tak achijab, ixokib y acʼalab. Quinbij waʼ je jas u beyal ri xubij ri Amorón chwe.

8 Y areʼ qui cämisam ri cachajil y qui tat ri ixokib y acʼalab riʼ. Cäquiyaʼ chi quib ri ixokib rucʼ ri tiʼj que ri cachajil, y quequitzak ri acʼalab rucʼ ri tiʼj que ri qui tat. Y man cäquiyaʼ tä joron, xaʼ jubikʼ cäquiyaʼ chque.

9 Pune tä sibalaj itzel ri qui banom ri aj Lamanitas, man nim tä na cho ri itzel ri cäquibano ri ka winak ri e cʼo pa ri Moriántum. Chawilampeʼ, qui chapom sibalaj tak qui mial ri aj Lamanitas, xemacun cucʼ, y jeriʼ xquesaj ri qui chʼajchʼojil we alitom riʼ. Cʼu ri chʼajchʼojil are kastzij nim na chquiwäch ronojel jastak.

10 Te cʼu riʼ, xequicämisaj che jun itzelalaj u beyal, xquiban cʼäx che qui tiojil cʼä ri xecämic na. Cʼäte qui banom chi waʼ, xequiwak qui pam ri qui tiojil je jas u banic jun awaj re ri juyub. Cäquiban waʼ rumal chi sibalaj co ri canimaʼ. Cäquibano che retal ri u chukʼab ri canimaʼ.

11 O lokʼalaj nu cʼojol, we tinimit riʼ man cʼo tä u sucʼumal ri cäquibano.

12 (Xak xu jujun junab ocʼowinak chi aretak ri e areʼ jun jeʼlicalaj tinimit y cʼo ri u sucʼumal ri cäquibano.)

13 Tzare, O nu cʼojol, we tinimit riʼ xak xuwi quequicotic che ri itzel tak qui banom.

14 ¿Jas u banic cujcuinic cäkachomaj chi ri Dios man cuyuk tä na ri u kʼab chubanic jun kʼatan tzij pakawiʼ.

15 Chawilampeʼ, ri rokʼej ri wanimaʼ cubij: ¡Tokʼob qui wäch we winak! ¡Chel la ulok lokʼalaj Dios, banaʼ la kʼatow tzij! Cʼuʼuʼ la ri tak qui mac, ri quetzelal, y ri itzel tak qui banom cho ri wäch la.

16 Y xukujeʼ, nu cʼojol, cʼo qʼui ixokib malcaʼnib cucʼ ri qui mial ri xecanaj can pa Sherriza. Y ri rajchʼoʼjab ri Zenefí qui cʼamom bic ri qui wa ri man xcʼam tä bi cumal ri aj Lamanitas. Rumal cʼu riʼ, quebinic apawijeʼ quecuinic cäquirik ri qui wa. Are cʼo qʼui riʼjalaj chichuʼib ri xetukaric chuchiʼ ri be, y quecämic cʼut.

17 Are man qʼui taj ri ajchʼoʼjab ri cʼo wucʼ. Y ri tak cajchʼoʼjab ri aj Lamanitas cʼo chkaxol uj y ri tinimit Sherriza. Y conojel ri e elinak ulok chque ri rajchʼoʼjab ri Aarón e kajinak pa qui kʼab. Y xquiban ri xibinalaj cʼäx y itzel chque.

18 ¡Sibalaj itzel ri canimaʼ ri nu winak! Man cʼo tä u sucʼumal ri cäquibano, y man cʼo tä tokʼobisan wächaj chquixol. Chawilampeʼ, in xak jun achi. Y nu chukʼab xak ri chukʼabil re jun achi. Y man quincuin tä chic quintak chque chi cäquinimaj ri nu takanic.

19 Xux nim na ri etzelal ri cʼo pa canimaʼ. Conojel areʼ xak junam ri itzelalaj qui banom. Man cäquiyaʼ tä can jun pa ri utzil, chi riʼjab chi acʼalab. Y quequicotic chrij ronojel ri man utz taj. Ri kixokilal y ri kalcʼual qui rikom cʼäx cho ronojel u wäch we ulew riʼ. Ri cʼäx riʼ, are nim na chuwäch apachique cʼäx ri bantajinak canok. Kas jeʼ, man cuyaʼ tä u bixic, mawi ri u tzʼibaxic.

20 Are cʼu riʼ, nu cʼojol, man quintzijon tä chic chrij we xibinalaj cʼäx ri bantajinak. Chawilampeʼ, at awetaʼm ri etzelal ri cäban cumal we winak. Awetaʼm chi man cʼo tä utzalaj tak qui noʼj, mawi ri qui naʼic pa canimaʼ. Ri etzelal ri cäquibano, are nim na chuwäch ri etzelal ri cäban cumal aj Lamanitas.

21 Kastzij, nu cʼojol, man cuyaʼ taj quintaʼ che ri Dios chebucʼamaʼ. Quinxej wib chi we ne cucʼajisaj nu wäch.

22 Tzare kastzij nu cʼojol, quintaʼ che ri Dios chatucʼamaʼ, y cʼul nu cʼux che ri Cristo, chi ri areʼ catucol na. Y quintzʼonoj che ri Dios chi ri areʼ catrilij na rech man catcäm taj cʼä cawilo chi cäquiqʼuex qui cʼux we winak, o chi cäsach qui wäch conojel. Ri in cʼut wetaʼm chi cäsach na qui wäch we tä man cäquiqʼuex tä qui cʼux y quetzelej rucʼ.

23 Y we tä cäsach na qui wäch, are xak junam rucʼ ri sachibal qui wäch ri aj Jareditas. Cäsach na qui wäch rumal ri itzel tak noʼj ri cʼo pa canimaʼ, y rumal ri qui rayibal che quicʼ, y che ri u tzelexic cʼäx paquiwiʼ ri nicʼaj winak chic.

24 Y we tä jewaʼ ri cäcʼulmataj chi cäsach na ri qui wäch, ketaʼm chi qʼui chque ri kachalal e kʼaxinak chi cucʼ ri aj Lamanitas. Y ketaʼm chi qʼui winak quekʼax na chi cucʼ. Rumal laʼ, chatzʼibaj baʼ jujun tak tzij, we cuyaʼ chawe chi man catcäm taj. Ri in cʼut, in quincäm na, y man quinwil tä na ri a wäch. Tzare cʼut cʼul nu cʼux chi chanim quinwil na a wäch. Cʼo jujun lokʼalaj tak wuj wucʼ ri quinwaj quinjach na pa ri a kʼab.

25 Nu cʼojol, chabanaʼ xuqʼuilal chuwäch ri Cristo. Mabisonic rumal ri tzij nu tzʼibam chawe. Man rumal tä we bis catcämic. Xane chuyaʼaʼ ri Cristo a chukʼab. Areʼ xurik cʼäx, xcämic, xucʼut ri u tiojil chquiwäch ri ka tataʼib. Chutokʼobisaj a wäch, sibalaj cuyaʼ ri utzilal chiwe cʼä pa ri cʼäxcʼol, y chcʼojiʼ ri eyenic pa awanimaʼ che qui rikic ri u juluwem y ri junalic cʼaslemal. Chcanaj can ronojel laʼ che junalic awucʼ.

26 Dios ri Tataxel, cʼo ri u tʼulibal nim akʼanok chilaʼ chicaj. Y ri Kajawal Jesucristo cätʼuyiʼc chuwiquiakʼab ri u cuinem, cʼä coc na ronojel chuxeʼ ri u takanic. Quinrayij chi cäcʼojiʼ na qui tokʼob awucʼ che junalic. Amen.