1 In cʼu riʼ, Moroni. Quintzʼibaj jujun tak tzij ri utz quinwilo. Quintzʼibaj we tzij chque ri wachalal, are ri aj Lamanitas. Y quinwaj chi cäquichʼob na chi ocʼowinak chic ri junab cuatrocientos veinte chuwäch ri kʼij ri xyaʼ retal u petibal ri Cristo.

2 Y are nu tzijom chi jujun tak tzij chiwe, rumal jun nu pixab, te cʼu riʼ quintzʼapij canok we tak tzʼib.

3 Chiwilampeʼ, quinwaj quixinpixabaj chi aretak quisiqʼuij u wäch waʼ, we tä jewaʼ riʼ cubij u noʼjibal ri Dios chi quisiqʼuij u wäch, chinatajisaj ri nimalaj tokʼobisanic ri u banom ri Ajawaxel chquiwäch ri calcʼual ri winak. Are u banom waʼ tzpa ri u tiquiribal ri Adán cʼä pa ri jun kʼij ri quicʼam we tzij, y quichomaj pa iwanimaʼ.

4 Y aretak cʼut quicʼam we tzij, quinwaj quixinpixabaj chi quitaʼ che ri Dios, ri junalic Tataxel, pa ri u biʼ ri Cristo, we tä man kastzij tä waʼ. Y we quitaʼ rucʼ jun sucʼalaj iwanimaʼ, y rucʼ jun kastzijalaj i rayibal, y we chi cʼo i cojobal che ri Cristo, ri areʼ cukʼalajisaj na ri kastzij chiwäch rumal ri u cuinem ri Uxlabixel.

5 Y rumal ri u cuinem ri Uxlabixel, quixcuinic quiwetamaj ronojel ri kastzij.

6 Y apachique jasäch ri utz, xukujeʼ are sibalaj sucʼ, sibalaj sak u banic. Rumal laʼ, man cʼo tä jun utzil ri cuxutuj ri Cristo. Xane ronojel utzil cucʼutu chi cʼaslic ri areʼ.

7 Cʼu ri ix quixcuinic quichʼob chi cʼaslic ri areʼ rumal ri u cuinem ri Uxlabixel. Rumal cʼu laʼ, quixinpixabaj chi man quixutuj tä ri u cuinem ri Dios. Ri areʼ cʼut cächacunic rucʼ ri u cuinem je jas u beyal ri qui cojobal ri calcʼual ri winak. Jewaʼ riʼ cächacunic camic, chuek, y che junalic.

8 Y xukujeʼ, wachalal, quixinpixabaj chi man quixutuj tä ri tak u sipanic ri Dios, rumal e qʼui, y kas quepe ulok chuwäch ri areʼ, ri Dios. Cʼo jalajoj tak u beyal rech queyaʼic tak we sipanic riʼ. Are cʼu riʼ kas ri areʼ, ri Dios, ri cächacun pa ronojel. Yatal cʼut we sipanic rumal ri cʼutwächinic ri Ruxlabal ri Dios chquiwäch ri winak. Y jewaʼ riʼ cuban utzil chque ri e areʼ.

9 Chiwilampeʼ, yatal ulok che jun cucʼut ri tzij re noʼjibal rumal ri Ruxlabal ri Dios.

10 Y che jun chic, yatal ulok cucʼut ri tzij re etamabal, xaʼ junam rumal ri jun Uxlabal riʼ.

11 Y che jun chic, yatal ulok jun nimalaj cojobal. Are che jun chic, yatal ulok ri tak sipanic re ri cunanem, are xaʼ junam rumal ri jun Uxlabal riʼ.

12 Are cʼu riʼ, yatal ulok che jun chic cuban nimalaj tak mayibal.

13 Are cʼu riʼ, yatal ulok che jun chic cukʼalajisaj ri cäpe na chrij ronojel ri jastak.

14 Je cʼu riʼ, yatal ulok che jun chic queril ri angelib y ri tak uxlabal ri quepataninic.

15 Je cʼu riʼ, yatal ulok che jun chic cätzijon pa juleʼ tak tzijobal chic.

16 Je cʼu riʼ, yatal ulok che jun chic cukʼaxaj tak tzijobal y cukʼaxaj juleʼ tak chʼabal.

17 Y quepe ulok ronojel tak we sipanic riʼ rumal ri Ruxlabal ri Cristo. Y quepe ulok je jas u beyal ri u rayibal chquijujunal achijab.

18 Are cʼut quixinpixabaj wachalal, chi cänataj chiwe chi ronojel utzalaj sipanic cäpe ulok chuwäch ri Cristo.

19 Quixinpixabaj cʼut lokʼalaj wachalal, chi quinatajisaj waʼ: Ri areʼ xak junam u banic iwir, camic, y che junalic. Y conojel tak we sipanic riʼ, ri nu tzijom chic, are e aj ri uxlabal, y mawi jumul quesax bi na, are cäcʼojiʼ ri uwächulew. Xak xuwi quesax bi na we man cʼo tä qui cojonic ri calcʼual ri winak.

20 Rumal waʼ, rajwaxic chi cʼo na ri cojobal, y we rajwaxic chi ri cojobal riʼ, xukujeʼ rajwaxic chi cʼo na ri eyenic pa animaʼ. Y we rajwaxic chi cʼo na eyenic pa animaʼ, xukujeʼ rajwaxic chi cʼo na ri lokʼokʼebal cʼuxaj.

21 Y man quixcuin tä quixcolotajic pa ri rajawibal ri Dios we man cʼo tä ri lokʼokʼebal i cʼux. Mawi xukujeʼ quixcuinic quixcolotajic pa ri rajawibal ri Dios, we man cʼo tä ri i cojobal, mawi xukujeʼ we man cʼo tä eyenic pa iwanimaʼ.

22 Y we man cʼo tä eyenic pa iwanimaʼ, kʼalaj chi cätʼujuw ri iwanimaʼ rumal rech ri etzelal.

23 Y ri Cristo xebutzijobej ri ka tataʼib, y kastzij xubij jewaʼ riʼ: We quixcojon chwe, te cʼu riʼ quixcuinic chubanic ronojel jastak ri utz quilic wumal.

24 Y wachanim, quebintzijobej conojel ri winak cʼä pa ri tak u cʼulbat ri uwächulew. Quinbij chi we tä cäpe ri kʼij ri quesataj bic chiwäch ix ri u cuinem u ri u sipanic ri Dios, are cʼut cäbanic rumal chi man cʼo tä i cojobal.

25 Y we tä kas jeʼ u banic, ¡tokʼob cʼu qui wäch ri calcʼual ri winak! Are cʼut man cʼo tä na mawi jun chiwe ri cäbanow utzil, kastzij, man cʼo tä na majun. Rumal we tä cʼo jun chiwe ri cäbanow utzil, are riʼ cäbanowic na cumal ri u cuinem y ri tak u sipanic ri Dios.

26 Y ¡tokʼob qui wäch ri queqʼuisow u banic ronojel waʼ y quecämic! Areʼ cʼut quecämic pa ri qui mac. Y jewaʼ cʼut man cuyaʼ taj quecolotajic pa ri rajawibal ri Dios. Y quintzijon je jas ri u beyal ri tak u tzij ri Cristo, y man quinban tä tzij.

27 Quixinpixabaj cʼut, chinatajisaj ronojel tak waʼ. Chanim cʼut cäjetet ri kʼij ri quichʼob na chi man quinban tä tzij. Ix cʼut quiwil na nu wäch chilaʼ chuwäch ri kʼatbal u tzij ri Dios. Y ri Ajawaxel Dios cubij na chiwe: ¿La man xintzijoj tä nu tzij chiwe rumal ri xutzʼibaj we achi, jacha jun ri xsiqʼuinic chquixol ri cäminakib, kastzij riʼ, jacha jun ri cätzijonic ulok tzpa ri cʼajcʼaj ulew?

28 Y quinkʼalajisaj waʼ che u tzʼakatisaxic ri tak u tzij ri Dios ri u kʼalajisam canok chi cäpe na. Chiwilampeʼ cʼut, quel bi na we tzij pa u chiʼ ri junalic Tataxel. Ri u tzij cʼut cäxuban na apanok che jun ijaʼlil cʼä che jun ijaʼlil chic.

29 Y ri Dios cucʼut na chiwäch chi kastzij riʼ ronojel ri nu tzʼibam.

30 Y jumul chic quixinpixabaj, chixkebok rucʼ ri Cristo. Chixcojon che ronojel utzalaj sipanic, y michap ri itzelalaj sipanic, mawi ri jasäch ri man sak tä u banic.

31 Chatcʼastajok lokʼalaj Jerusalén, y chatwalijok chupam ri cʼajcʼaj ulew. Jeʼ, chacojoʼ ri jeʼlalaj tak awatzʼiak, lokʼalaj u mial ri Sión. Chachʼicʼa ri a cheʼ, ri awocʼowibal, y chi junalic chanimarisaj u wäch ri tak a cʼulbat, rech man cäsach tä chic ri a cʼux. Y jewaʼ rech quetzʼakatisax na ri yabal tak u tzij ri junalic Tataxel ri u banom ulok chiwe, lokʼalaj tinimit re Israel.

32 Jeʼ, tisaj rucʼ ri Cristo, chixtzʼakatisaxok rumal ri areʼ. Chixutuj ronojel ri man rech tä ri Dios. We quixutuj ri man sucʼ taj, y we quilokʼokʼej ri Dios rucʼ ronojel i cuinem, ronojel i chomanic, y ronojel i chukʼab, ri u tokʼob cuban na chi quixux tzʼakat pa ri Cristo. Y we tä rumal ri u tokʼob ri Dios ix tzʼakat pa ri Cristo, man quixcuin taj quixutuj ri u cuinem ri Dios.

33 Y jumul chic, we rumal ri u tokʼob ri Dios quixux tzʼakat pa ri Cristo, y man quixutuj tä ri u cuinem, te cʼu riʼ ix quixchʼajchʼojarisaxic pa ri Cristo, rumal cʼut chi xturuw u quiqʼuel ri Cristo. Are riʼ cʼo pa ri u beyal ri yabal tak u tzij ri Tataxel. Y jewaʼ quesax na ronojel i mac, rech chi quixux na chʼajchʼoj, y man quil tä na jun tzʼilol chiwäch.

34 Wachanim, quinbij chiwe ix iwonojel, quinbe na. Chanim quinuxlan na chilaʼ pa ri lokʼalaj cʼolbal re ri Dios. Quinuxlan na chilaʼ cʼä pa ri kʼij aretak cäquicʼam na quib ri wuxlabal y nu tiojil. Y quincʼam na bic pa cakʼikʼare in chʼecanil. Cäkarik na kib chuwäch ri utzalaj kʼatbal tzij re ri nimalaj Jehová, ri Junalic Kʼatal Tzij paquiwiʼ ri e cʼaslic y ri e cäminak. Amen.