1 Are cʼu ri in, Moroni, quintzʼibaj jujun chque ri tzij ri xubij ri in tat, Mormón, chrij ri cojobal, y chrij ri eyenic pa animaʼ, y chrij ri lokʼokʼebal cʼuxaj. Areʼ cʼut xtzijon chque ri winak ri tajin quebutijoj che ri u tzij aretak e cʼo pa ri ja jawi cäquitijoj wi quib. Y qui yacom we jun ja rech cʼo jawi cäquinimarisaj u kʼij ri Dios.

2 Cʼu ri in, Mormón, quintzijoj we tzij chiwe ix, lokʼalaj wachalal. Y quinbano rumal ri u tokʼob ri Dios Tataxel, y rumal ri u tokʼob ri Kajawal Jesucristo, y ri lokʼalaj u rayibal, rumal cʼut chi xusipaj ri u siqʼuinem chwe. Y rumal laʼ, yatal chwe quintzijon chiwe wachanim.

3 Rumal cʼu waʼ, quinwaj quintzijon chiwe ri ix, ri u winakil ri Cristo. Ix ri camelalaj tak terenelab che ri Cristo. Ix i cʼamom jun utzalaj eyenic pa iwanimaʼ. Rumal riʼ, quixcuinic quixoquic pa ri lokʼalaj uxlanem re ri Kajawal. Tzpa camic, cäcanaj na we jun eyenic pa iwanimaʼ cʼä pa ri kʼij ri quixuxlan na rucʼ ri areʼ chilaʼ chicaj.

4 Y wachanim wachalal, pa nu cʼux quinbij waʼ rumal ri in wilom ri camelelaj i binem ri quiban ix chque ri calcʼual ri winak.

5 In quinnatajisaj ri u tzij Dios, ri cubij chi rumal ri qui banom ri achijab, quiwetamaj na jas ri qui cholaj. We tä utz ri qui banom, areʼ e utz xuku jeʼ.

6 Chiwilampeʼ cʼut, ri Dios u bim canok chi jun itzel achi man cäcuin tä cuban utzil. We tä cuchiʼj jun u sipanic, o we tä cuban chʼawem che ri Dios, are we man kastzij tä u rayibal, waʼ xak junam we tä man u banom taj.

7 Kastzij, man quilitaj tä riʼ che u sucʼumaxic ri jun achi.

8 Chiwilampeʼ, we tä jun itzel achi cuyaʼ jun sipanic, cusipaj rucʼ u xuʼyal ri ranimaʼ. Are quil riʼ junam we man u yaʼom taj ri jun sipanic. Rumal laʼ, itzel quil wi ri jun achi riʼ chuwäch ri Dios.

9 Xukujeʼ xaʼ itzel quilic we jun winak cuban chʼawem rucʼ ri Dios, y man cuban tä rucʼ jun sucʼumalaj ranimaʼ. Kastzij, man cʼo tä u patan che, rumal ri Dios itzel cäril riʼ.

10 Rumal cʼu riʼ, jun itzel winak man cäcuin tä chubanic ri utzil. Xukujeʼ man cuyaʼ taj utzalaj u sipanic.

11 Chiwilampeʼ, jun u cʼux ri cʼayilaj jaʼ man cuyaʼ tä ri utzalaj joron. Are xukujeʼ jun u cʼux ri utzalaj jaʼ man cuyaʼ tä ri cʼayilaj joron. Are cʼut we jun achi cuban pataninel che ri itzel, areʼ man cäcuin tä chuterenexic ri Cristo. Junam riʼ, we jun achi cunimaj ri Cristo, are man cäcuin tä cuban pataninel che ri itzel.

12 Kastzij, ronojel ri utzilal cäpe ulok chuwäch ri Dios. Y ronojel ri etzelal cäpe ulok chuwäch ri jun itzel. Are cʼu ri itzel jun cʼulel chrij ri Dios, y amakʼel cuban chʼoʼj rucʼ. Amakʼel cuchiʼj chke, y cujutakchij che ri mac y che ri u banic ri etzelal.

13 Tzare kastzij, ronojel rech ri Dios amakʼel cuchiʼj chke y cujutak chubanic ri utzil. Rumal cʼu riʼ, ronojel ri cuchiʼj chke y cujutak chubanic ri utzil, y chulokʼoʼkʼexic ri Dios, y chupatanixic, are cäpe ulok chuwäch ri Dios.

14 Chiwilaʼ cʼu iwib, lokʼalaj wachalal, michomaj chi ri etzelal cäpe ulok chuwäch ri Dios. Xukujeʼ michomaj chi ri rutzil ri Dios cäpe ulok chuwäch ri itzel.

15 Chiwilampeʼ wachalal, yatal chiwe quikʼat tzij. Jewaʼ cʼut quixcuinic quichʼobo jas ri utz chuwäch ri man utz taj. Kastzij kʼalaj ri u beyal chukʼatic tzij, je jas kʼalaj ri sakil pa ri kʼij chuwäch ri kʼekum re ri chakʼab, are waʼ rech quixcuinic quichʼob rucʼ jun tzʼakatalaj etamabal.

16 Chiwilampeʼ cʼut, cäyaʼic ri Ruxlabal ri Cristo chquijujunal achi rech cäcuinic cuchʼobo ri utz y ri man utz taj. Rumal cʼu waʼ, quincʼut chiwe ri u beyal ri quikʼat tzij. Ronojel ri cuchiʼj chiwe ri utzil, y chi quiban ronojel ri quixutakchij che u cojobal che ri Cristo, cäpe ulok rumal ri u cuinem y ri u sipanic ri Cristo. Jewaʼ cʼut quixcuinic quichʼobo rucʼ jun sakalaj etamabal chi are laʼ re ri Dios.

17 Tzare apasach ri quebutakchij ri winak chubanic ri etzelal, y chi man quecojon tä che ri Cristo, y chi cäquixutuj ri areʼ, y chi man cäquipatanij tä ri Dios, are laʼ re ri itzel. Y quixcuinic quichʼobo rucʼ ri jun sakalaj etamabal chi ronojel laʼ re ri itzel. Rumal jewaʼ riʼ cächacunic ri itzel. Man cutakchij tä mawi jun achi chubanic ri utzil, kastzij man cutakchij tä ma jun chubanic laʼ. Xukujeʼ ri rangelib y ri winak ri queboc chuxeʼ ri u takanic, are man cäquitakchij tä mawi jun winak chubanic ri utzil.

18 Wachanim cʼut wachalal, quinwilo chi iwetaʼm ri sakil ri cäyaʼ chiwe rech chi quikʼat tzij. Ri sakil riʼ are ri u sakil ri Cristo. Rumal laʼ, quiwil iwib, mikʼat tzij man sucʼ taj. Are cäkʼat na tzij piwiʼ je ri quiban ri ix.

19 Rumal waʼ, quixinboʼchiʼj wachalal, chitzucuj rucʼ säcʼajil chupam ri u sakil ri Cristo. Y jewaʼ quichʼob na jas ri utz y ri man utz taj. Y we quixcojon che ronojel utzil, y we man quiqʼuiak tä waʼ pa itzel, kastzij quixux na alcʼualaxelab rech ri Cristo.

20 Are cʼut wachalal, ¿jas modo quixcuinic quixcojonic che ronojel utzil?

21 Wacamic cʼut quintzijonic chrij ri jun cojobal ri xinbij chic chiwe chi quintzijon na che riʼ. Y quincʼut na chiwe jas ri u beyal quixcuinic quixcojonic che ronojel utzil.

22 Chiwilampeʼ, ri Dios retaʼm ronojel, y areʼ kas cʼaslic che junalic. Chiwilampeʼ, xebutak ulok ri angelib chquipatanixic ri alcʼualaxelab que ri winak. Y xquikʼalajisaj ri u petibal ri Cristo, y xquikʼalajisaj chi cäpe na ronojel utzil rumal ri Cristo.

23 Y pa ri u chiʼ ri Dios, xkʼalajisax chquiwäch ri kʼalajisanelab che ri cäpe na chi kas cäpe na ri Cristo.

24 Y kastzij cʼo qʼui tak u beyal ri xuyaʼ kʼalajisanem ri e utz chquiwäch ri alcʼualaxelab que ri winak. Y ronojel tak ri jastak ri e utz cäpe ulok chuwäch ri Cristo. We tä ma tä jewaʼ riʼ, e tzakinak baʼ ri winak, y man cuyaʼ taj cäpe jun utzil paquiwiʼ.

25 Are cʼu ri winak xquijek ri qui cojobal che ri Cristo rumal ri angelib xequipatanij, y rumal ronojel tak tzij ri xel ulok pa u chiʼ ri Dios. Y jewaʼ cʼut, xeketic rucʼ ronojel ri utzil, rumal ri qui cojobal. Y xbantaj jelaʼ cʼä pa ri u petibal ri Cristo.

26 Cʼäte petinak chic ri areʼ, xukujeʼ xecolotaj ri winak rumal qui cojobal che ri u biʼ. Y rumal ri qui cojobal, xebux ri u cʼojol ri Dios. Y kastzij cʼaslic ri Cristo. Junam riʼ, kastzij xubij we tak tzij chque ri ka tat ka mam: Apasäch ri quitaʼ na che ri Tataxel pa nu biʼ, are cʼut cäbantaj na chiwe, we utz u banic ri tabal, y we quitaʼ rucʼ cojobal, y we quicojo chi kas jeʼ quicʼam na.

27 Rumal cʼu riʼ, lokʼalaj wachalal, ¿la e qʼuisinak chic ri tak mayibal xak xu rumal benak chic ri Cristo chicaj, y cätʼuyic pa ri u wiquiakʼab ri Dios, chucʼamic pa u kʼab ri Tataxel ri tokʼobisam wächaj ri yatal ulok chque ri calcʼual ri achijab?

28 Ri areʼ u tzʼakatisam ri u taʼic ri pixab y cucoj u chukʼab chquicʼamic conojel ri quicojon che. Y ri e areʼ ri quecojon che xukujeʼ quecojon che ronojel utzil. Rumal laʼ, ri areʼ quebutoʼ ri alcʼualaxelab que ri winak. Y cʼasal chi junalic chicaj.

29 Je cʼu riʼ lokʼalaj wachalal, ¿la e qʼuisinak chic ri tak mayibal xak xuwi rumal ri areʼ u banom laʼ? Chiwilampeʼ, quinbij chiwe chi man e qʼuisinak taj. Ri angelib xukujeʼ man qui qʼuisom taj ri qui patanixic ri alcʼualaxelab re ri Dios.

30 Chiwilampeʼ cʼut, ri areʼ e cʼo chuxeʼ ri u takanic, rech quepatanin je jas ri u beyal ri cätanic. Cäquicʼut quib chquiwäch ri winak ri cʼo nim, y utz ri qui chomabal pa ronojel u wäch ri suqʼuilal.

31 Y ri jasche re ri qui patanixic, are tak waʼ: Cäquisiqʼuij ri winak che ri qʼuexbal qui cʼux. Y cäquitzʼakatisaj y cäquibano ri chac re ri yabal tak u tzij ri Tataxel, ri u yaʼom ulok chque ri alcʼualaxelab que ri winak. Y chi cäquisucʼumaj ri u beyal chquixol ri alcʼualaxelab que ri winak rumal ri u kʼalajisaxic ri u tzij ri Cristo chquiwäch ri chaʼom tak winak re ri Dios, rech chi jewaʼ cäquibij ri qui kʼalajisabal chrij.

32 Y jewaʼ ri Ajawaxel Dios cusucʼumaj u beyal chque ri nicʼaj chic winak rech quecuinic quecojon che ri Cristo, rech chi cʼo u cʼolbal ri Uxlabixel pa canimaʼ, je jas u beyal ri u cuinem. Y jewaʼ cutzʼakatisaj ri Tataxel ri yabal tak tzij ri u yaʼom ulok chque ri alcʼualaxelab que ri winak.

33 Y ri Cristo u bim canok: We tä quixcojon chwe, cʼo na i cuinem chubanic apachique jasäch ri utz quilitaj wumal in.

34 Xukujeʼ u bim: Chiqʼuexaʼ i cʼux iwonojel ix cʼo pa tak u cʼulbat ri uwächulew. Tisaj, y chibanaʼ ri kasbal xeʼ jaʼ pa ri nu biʼ. Y chixcojon chwe, rech quixcuinic quixcolotajic.

35 Y wachanim lokʼalaj wachalal, we quichomaj chi kastzij ronojel ri nu tzijom chiwe, y ri Dios cucʼut na chiwe chi kastzij ronojel waʼ, jeʼ, cucʼutu rucʼ ri u chukʼab y rucʼ ri nimalaj u kʼij, y we kastzij ronojel waʼ, ¿la e qʼuisinak ne lo ri kʼijal re tak mayibal?

36 ¿La xqʼuis cʼu lo waʼ ri qui cʼutbal quib ri angelib chquiwäch ri alcʼualaxelab que ri winak? ¿La u qʼuisom ne lo u yaʼic ri cuinem re ri Uxlabixel chque? ¿La kas cuban lo riʼ cʼä pa ri u cʼolic ri kʼij y ri uwächulew? ¿La kas cuban ne lo riʼ cʼä pa ri u takem ri kʼij, o cʼä pa ri u tacʼalem ri uwächulew? ¿La kas cuban ne lo ri we tä xaʼ cʼo jun winak cho ri uwächulew ri cäcolotajic.

37 Kastzij quinbij chiwe: Man are tä riʼ. Kastzij rumal ri cojobal cäcʼulmatajisax ri tak mayibal. Y rumal ri cojobal cäquicʼut quib ri angelib chquiwäch ri winak, quequipatanij. We tä kastzij e qʼuisinak chic ronojel waʼ, tokʼob qui wäch ri alcʼualaxelab que ri winak rumal chi man cʼo tä chic qui cojobal, y man cʼo tä u patan ronojel chquiwäch.

38 Ri u tzij ri Cristo cubij chi majun winak cäcuinic cäcolotajic we tä man cäcojon tä che ri u biʼ. Rumal waʼ, we qʼuisinak lo riʼ, qʼuisinak chic xukujeʼ ri cojobal, y cʼäx ri u cʼolem ri achi rumal ri e areʼ quecanaj can chrij ri tojbal macaj jas tä man banom taj.

39 Tzare, lokʼalaj wachalal, utz na ri quinchʼob chiwij. Quinchʼobo chi cʼo ri i cojobal che ri Cristo rumal ri camelal cʼo pa iwanimaʼ. Y we man quixcojon che ri areʼ, ix cʼut man takal tä chiwe chi quixrikitaj na chquixol ri u winakil.

40 Y xukujeʼ lokʼalaj wachalal, quinwaj quintzijon iwucʼ chrij ri eyenic pa animaʼ. ¿Jas u banic cʼo na i cojobal we tä man cʼo tä ri eyenic pa iwanimaʼ?

41 Y jas ri quiweyej na pa iwanimaʼ? Kastzij quinbij chiwe, cʼo na ri eyenic pa iwanimaʼ rumal rech ri tojbal macaj ri xuban ri Cristo, y rumal rech ri cuinem re ri cʼastajibal u wäch. Jewaʼ quixakʼan na cʼä pa ri junalic cʼaslemal rumal rech ri i cojobal che ri areʼ jas ri u beyal ri yabal u tzij.

42 Rumal riʼ, we jun achi cʼo u cojobal, cʼo na xukujeʼ ri eyenic pa ranimaʼ. Rumal we man cʼo tä u cojobal, xukujeʼ man cʼo tä ri eyenic pa ranimaʼ.

43 Y xukujeʼ quinbij chiwe chi man cäcuin tä churikic ri cojobal, mawi ri eyenic pa ranimaʼ, we tä ma tä jun camel winak, y we man cʼo tä machʼachʼem pa ranimaʼ.

44 We tä ma tä jewaʼ riʼ, man cʼo tä qui patan ri u cojobal ri eyenic pa ranimaʼ. Majun winak cäcʼulaxic rumal ri Dios, we man camel tä ri areʼ y we man cʼo tä machʼachʼem pa ranimaʼ. Tzare, we jun winak cʼo ri u camelal y cʼo ri machʼachʼem pa ranimaʼ, y cukʼalajisaj rumal ri u cuinem ri Uxlabixel chi ri Jesús are ri Cristo, rajwaxic baʼ cʼo na ri lokʼokʼebal u cʼux. Ri areʼ cʼut man cʼo tä u patan we man cʼo tä ri lokʼokʼebal u cʼux. Rumal waʼ, rajwaxic chi cʼo ri lokʼokʼebal u cʼux.

45 Ri lokʼokʼebal cʼuxaj curik cʼäx rumal are sibalaj camel. Man itzel tä cäril jun chic, man cunimarisaj tä rib, man xak xuwi tä cärilij rib ri re, man cäpe tä royowal, man cächoman tä chrij ri itzel. Man cäquicot tä chrij ri etzelal, xane cäquicot che ri sakalaj tzij. Cukʼiʼ ronojel, cäcojon che ronojel, curayij ronojel, cuchʼij ronojel.

46 Rumal riʼ, lokʼalaj wachalal, we man cʼo tä ri lokʼokʼebal i cʼux, man cʼo tä cʼu i patan, rumal chi man cʼo tä u qʼuisic ri lokʼokʼebal cʼuxaj. Chixkebok na rucʼ ri lokʼokʼebal cʼuxaj. Are riʼ ri mas nim na u banic, rumal ronojel ri jastak cäqʼuis na u wäch.

47 Ri lokʼokʼebal cʼuxaj are laʼ ri chʼajchʼojalaj lokʼokʼebal re ri Cristo, y cäcanajic chbe kʼij sak. Y apachin ri cʼo lokʼokʼebal u cʼux cʼä ri qʼuisbal kʼij, are riʼ cäpe na jun utzil rucʼ.

48 Rumal cʼu laʼ, lokʼalaj wachalal, chibanaʼ chʼawem che ri Tataxel rucʼ ronojel ri chukʼab re ri i cʼux. Chibanaʼ waʼ rech quixnojisax na che we jun lokʼokʼebal cʼuxaj, ri u yaʼom ulok ri Tataxel chque conojel ri sakalaj cojonelab che ri u Cʼojol, ri Jesucristo. Chibanaʼ waʼ rech chi quixux na ri cʼojolaxelab rech ri Dios, rech chi cujcaʼy na junam rucʼ are cucʼut rib chkawäch. Kastzij cäkil na u wäch je jas cäcaʼyic. Chcʼojiʼ na we jun eyenic pa kanimaʼ, chujchʼajchʼojok je jas chʼajchʼoj ri areʼ.