1 Ao e a koro bukina bwa n te ririki naba arei ao e a waaki te buaka riki imarenaia Nibwaite ao Reimwanaite. Ao e ngae ngke I bon rangi n ataei, e bon bubura rabwatau; ngaia are a rineai ana botanaomata Nibwaai bwa N na riki bwa aia tia kairiri, ke te tia kairiia aia taanga ni buaka.

2 Ngaia are e a koro bukina bwa n au katebwi ma onoua n ririki ao I a bon mwananga mai moaia aia taanga ni buaka Nibwaite, ni kaaitaraia Reimwanaite; ngaia ai tenibubua ao uabwi ma onoua te ririki ae a tia n nako.

3 Ao e a koro bukina bwa n te katenibubua ao uabwi ma itiua n ririki ao a bon roko iaora Reimwanaite ma te korakora ae bati, n te aro are a maaku kaain au taanga ni buaka; ngaia are a bon aki kan un, ao a kerikaaki nakon aaba ake i meang.

4 Ao e koro bukina bwa ti bon roko n te kaawa are Angkora, ao ti bon taua te kaawa, mani katauraoi ibukin kawakinara mai irouia Reimwanate. Ao e a koro bukina bwa ti bon kamatoatoa te kaawa ni korakorara; ma e ngae ngke ti kamatoatoai a bon roko naba Reimwanaite iaora ma ni kakioira nako man ara kaawa.

5 Ao a bon kakioira nako naba ma n te aba are Tawita.

6 Ao ti mwananga nako ma n roko n te aba are Iotua, are e mena n te tia i maeao i rarikin taari.

7 Ao e koro bukina bwa ti bon ikotiia ara aomata ni kawaekoaira n aron are ti kona, bwa ti aonga n ikotiia n ti teuana te rabwata.

8 Ma nooria, e a onrake te aba irouia taan kamwarua ao irouia Reimwanaite; ao e ngae ngke e a bon korakora te urubwai are e na roko nakoia au botanaomata, a bon aki rairinanoia man aia mwakuri aika a bubuaka; ngaia are e a buta te aba ni kabane n te raraa ao te urubwai nakon te maiu, irouia Nibwaite ao Reimwanaite; ao aomata a katiteuanaki ni kaitara te tua n aron aia babaire ni kabuta te aba.

9 Ao ngkai, iai aia uea Reimwanaite, ao arana bon Aaron; ao e roko ni kaaitaraira ma ana taanga ni buaka ae abwi ma aua te ngaa mwaitin kaaina. Ao nooria, I kaaitaraia ma raou aika abwi ma uoua te ngaa mwaitia. Ao e a koro bukina bwa I tokanikai iaona ma au taanga ni buaka n te aro are e a birinako mai matau. Ao nooria, a bane n riki bwaai aikai, ao a tia ni bane tenibubua ao tenibwi te ririki.

10 Ao e a koro bukina bwa a waaki n rairinanoia Nibwaite man buakakaia, ao a tang, n aron are e taetae ni burabetiaki iroun Tamuera are te burabeti; bwa akea te aomata ae e kona ni kawakina oin ana bwai, ibukina bwa iai taan iraa, kamwarua, ao taan tiriaomata, ao te mwakuri ni kakaraoi, ao te tabunea are e mena n te aba.

11 Ao ngaia are e a waaki te tang ni wenei ao te bwaebwaeti n te aba ni kabane ibukin bwaai aikai, ao ai moaraara riki i buakoia ana botanaomata Nibwaai.

12 Ao e a koro bukina bwa ngke Ngai, Moomon, I noora aia bwaebwaeti ma aia tang ni wenei ao nanokawakia imatan te Uea, e bon kimwareirei nanou inanou, bwa I ataa ana nanoanga ao ana taotaonaki n nano te Uea i nanon te tai ae maan, ngaia are I taku inanou bwa ngkana e nanoangaiia ao a na manga riki bwa aomata aika a raraoi.

13 Ma nooria, e bon matebuaka kimwareireiu aei, ibukina bwa ^ananokawakia bon tiaki ibukin te rairannano, ibukin raoiroin te Atua; ma bon te nanokawaki ibukina bwa a ^bkabuakakaaki, ibukina bwa te Uea e bon aki kariaia bwa a na ^ckukurei i nanon karaoan te bure.

14 Ao a bon aki nako nakon Iesu ma te ^anano ae uruaki ma n raraoma, ma a bon ^btataebuaka te Atua, ao a tangiria ni mate. Ma e ngae n anne a bon korakai ma aia kabaang ibukin iangoan maiuia.

15 Ao e a koro bukina bwa e a manga oki riki nanokawakiu nakoiu, ao I nooria bwa te ^abong n ^bakoi e ^ca tia n nako mai irouia, n te maiu n rabwata ao n te maiu n tamnei; bwa I nooria ngaa ma ngaa aika a koreaki ni kabwakaki ibukin tereteren kaitaraan te Atua irouia, ao a bwarietata n aron te maniua iaon te aba. Ao ngaia are bon tenibubua ao abwi ma aua te ririki aika a tia ni bane

16 Ao e a koro bukina bwa n te katenibubua ao abwi ma nimaua n ririki ao Nibwaite a waaki ni biri nako mai irouia Reimwanaite; ao a bon kakioaki ni karokoa ae a roko n te aba are Iation, i mwaain are e kona n reke katokaia n te tai are a kekerikaki iai.

17 Ao ngkai, te kaawa are Iation e mena i rarikin n te ^aaba are Amaron e taunii iai rongorongo iroun te Uea, bwa aonga n aki uruakaki. Ao nooria I a tia n nako n aron ana taeka Amaron, n anai ana bwaatua Nibwaai, ma ni karaoa te reekoti n aron ana taeka Amaron.

18 Ao iaon ana bwaatua Nibwaai ao I bon karaoa te rongorongo ae bwanin ibukin mwakuri aika a buakaka ma mwakuri aika bati n ribaki ni kabane, ao iaon ^abwaatua aikai ao I bon keiaki ni kabwanina rongorongon buakakaia ma aia mwakuri aika bati n ribaki, bwa nooria, e reiti nako nooran te aro ae buakaka ma mwakuri aika bati n ribaki imatau man te tai are I a tau iai n noora ana waaki te aomata.

19 Ao ai kananoangara ngai ibukin buakakaia; bwa e a onrake nanou n te nanokawaki ibukin buakakaia, i nanon au bong ni kabane; ma e ngae n anne, I ataia bwa N na ^auotaki rake n te kabanea ni bong.

20 Ao e a koro bukina bwa n te ririki aei ao a manga ukoukoraki ma ni kakiokioaki ana botanaomata Nibwaai. Ao e a koro bukina bwa ti a bon kakioaki ni karokoa ae ti a roko i meang n te aba are arana Teem.

21 Ao e a koro bukina bwa ti bon kamatoatoa aon te kaawa are Teem, ao ti bon ikoikotiia ara botanaomata n aron ae riai, bwa ti aonga ni kamaiuia man te tiringaki.

22 Ao e a koro bukina bwa n te katenibubua ao abwi ma onoua n ririki ao a waaki riki n roko iaora.

23 Ao e a koro bukina bwa I bon taetae nakoia au botanaomata, ma ni kakorakoraai ni kairoroia, bwa a na ninikoria imataia Reimwanaite ma n ^aun ibukiia buuia, natia, ao bataia ma mwengaia.

24 Ao au taeka a bon kakiriwea nanoia bwa a na marurung, n te aro are a bon aki biri nako ma imataia Reimwanaite, ma a bon tei ma te ninikoria ni kaitaraia.

25 Ao e a koro bukina bwa ti bon buaka ma ara taanga ni buaka ae kaaina bon tenibwi te ngaa ni kaitaraa te taanga ni buaka ae mwaitia nimabwi te ngaa. Ao e a koro bukina bwa ti bon tei n nene imataia n te aro are a bon biri nako ma imatara.

26 Ao e a koro bukina bwa ngke a tia ni biri nako ti bon kakioia ma ara taanga ni buaka ao ti kaitibo ma ngaiia riki, ao ti tokanikai i aoia; ma e ngae n anne e bon aki mena korakoran te Uea iroura; eng, ti a bon katukaki i bon iroura, n te aro are e a aki tiku iroura Tamnein te Uea; ngaia are ti a mamaara n aekaia tarira.

27 Ao e nanokawaki nanou ibukin aroia aei au botanaomata ae kananokawaki, ibukin buakakaia ma aia mwakuri aika bati n ribaki. Ma nooria, ti bon mwananga ni kaaitaraia Reimwanaite ma ana taan iraa Kateanton, ni karokoa ae ti a manga tauii abara ake ti bwaibwai iai.

28 Ao e a bane tenibubua ao abwi ma ruaiwa te ririki. Ao i nanon te katenibubua ao nimabwi n ririki ti bon karaoa te boraraoi ma Reimwanaite ao ana taan iraa Kateanton, are ti a karekea iai bwenauakin abara ake ti bwaibwai iai.

29 Ao Reimwanaite a bon anganiira te aba are i meang, eng, nakon naba te ^akawai are e wariki are e kaineti nakon te aba are i maiaki. Ao ti bon anganiia Reimwanaite aaba ni kabane ake i maiaki.