1 Ut kik’ulman sa’ li xkaalaju roxk’aal chihab’ ke’wan k’iila jachok-ib’ sa’ li iglees, ut kiwan ajwi’ jun ^awech’ok-ib’ sa’ xyanq li tenamit, jo’kan naq kiwan naab’al li hoyok kik’.

2 Ut li jun raqal aj po’resihom ch’oolej ke’kamsiik ut ke’alinasiik chaq sa’ li ch’och’, ut xkoheb’ rik’in lix reyeb’ laj Lamanita.

3 Ut kik’ulman naq ke’xyal xq’e chireek’asinkileb’ laj Lamanita sa’ pleet rik’ineb’ laj Nefita, a’b’an k’ehomaq reetal, eb’ laj Lamanita q’axaleb’ xxiw, jo’kan naq ink’a’ ke’raj ab’ink chiru raatineb’ a’an li ke’risi chaq rib’.

4 A’b’an kik’ulman sa’ li waqlaju roxk’aal chihab’ rawa’b’ejileb’ laj raqol aatin, wankeb’ li ^ake’risi chaq rib’ rik’ineb’ laj Nefita li ke’taqe’ rik’ineb’ laj Lamanita, ut eb’ a’an rochb’een li jun ch’ol chik ke’ru chireek’asinkileb’ chi josq’o’k rik’ineb’ laj Nefita, ut chiru chixjunil li chihab’ a’an yookeb’ chixkawresinkil rib’ choq’ re li pleet.

5 Ut sa’ li xwuqlaju roxk’aal chihab’ ke’kub’e sa’ xb’eeneb’ laj Nefita re pleetik, ut ke’xtikib’ li k’anjel re kamsink; relik chi yaal, jo’kan naq sa’ li xwaqxaqlaju roxk’aal chihab’ rawa’b’ejileb’ laj raqol aatin ke’ru chireechaninkil li ch’och’ Tzarahemla, relik chi yaal, ut jo’kan ajwi’ chixjunil li ch’och’, toj sa’ li ch’och’ li nach’ wan rik’in li ch’och’ Naab’alil.

6 Ut eb’ laj Nefita ut eb’ li teep aj pleet re laj Moronihah ke’tiikisiik toj sa’ li ch’och’ Naab’alil.

7 Ut aran ke’xk’e kawilal re xpleetinkileb’ laj Lamanita, chalen sa’ li palaw sa’ rokeb’ saq’e, toj sa’ li wan sa’ releb’aal, a’an jun kutan li b’eek choq’ re jun aj Nefita, chiru li nub’aal li ke’xk’e wi’ xkawil ut ke’xk’ojob’eb’ wi’ lix teep aj pleet re xkolb’al rix lix ch’och’eb’ sa’ xnim li saq’e.

8 Ut chi jo’kan eb’ a’an li ke’risi chaq rib’ rik’ineb’ laj Nefita, chi tenq’anb’il xb’aan jun teep aj pleet reheb’ laj Lamanita li nim rajlankil, ke’xchap chaq chixjunil li reechanihomeb’ laj Nefita li wan sa’ li ch’och’ sa’ xjayal lix tz’e li saq’e. Ut kib’aanuman chixjunil a’in sa’ li xwaqxaqlaju roxk’aal chihab’ rawa’b’ejileb’ laj raqol aatin.

9 Ut kik’ulman sa’ li roxk’aal chihab’ rawa’b’ejileb’ laj raqol aatin, laj Moronihah rochb’een lix teep aj pleet kiru chixchapb’al k’iila raqal re li ch’och’; relik chi yaal, ke’xchap wi’chik k’iila tenamit li ke’t’ane’ chaq sa’ ruq’eb’ laj Lamanita.

10 Ut kik’ulman sa’ li xjun xkaak’al chihab’ rawa’b’ejileb’ laj raqol aatin ke’ru chixk’ulb’al wi’chik xyijach ajwi’ li reechanihomeb’ chaq.

11 Anajwan li nimla sachk a’in reheb’ laj Nefita, ut li nimla kamsink li kiwan sa’ xyanqeb’, ink’a’ raj kik’ulman wi ta ink’a’ xb’aan lix maa’usilaleb’ ut lix tz’eqb’eetalileb’ li kiwan sa’ xyanqeb’; relik chi yaal, ut kiwan ajwi’ sa’ xyanqeb’ li ke’xye rib’ naq wankeb’ sa’ lix iglees li Dios.

12 Ut kiwan xb’aan ^axq’etq’etileb’ xch’ool, xb’aan xnumtajenaqil lix ^bb’ihomaleb’, relik chi yaal, a’an xb’aan naq neke’xrahob’tesi li ^cneb’a’, ink’a’ neke’xk’e lix tzakemq reheb’ li te’tz’okaaq, ink’a’ neke’xk’e li raq’ reheb’ li t’ust’uukeb’, ut neke’xsak’ li ras riitz’in tuulaneb’ xch’ool sa’ xk’atqeb’ li re, neke’xk’e chi eetz’uuk li k’a’ru loq’, neke’xtz’eqtaana xyaalal li musiq’ej re profeetil aatin ut re k’utb’esink, neke’kamsin, neke’poqlen, neke’tik’ti’ik, neke’elq’ak, neke’xb’aanu li muxuk sumsu, neke’wakli sa’ ninqi wech’ok-ib’, ut neke’xik aran sa’ li ch’och’ Nefi, sa’ xyanqeb’ laj Lamanita—

13 Ut xb’aan a’in, lix nimal lix maa’usilaleb’, ut lix ^animahomeb’ rib’ chirix tz’aqal xmetz’eweb’, ke’kanab’aak yal rik’in tz’aqal lix metz’eweb’, jo’kan naq ink’a’ ke’usa; ke’tawasiik ut ke’sak’e’ b’an, ut ke’alinasiik xb’aaneb’ laj Lamanita, toj reetal naq kisach reechanihomeb’ sa’ ka’ch’in chik ma chixjunil lix ch’och’eb’.

14 A’b’an k’ehomaq reetal, laj Moronihah kixjultika k’iila aatin chiru li tenamit xb’aan lix maa’usilaleb’, ut jo’kan ajwi’ laj ^aNefi ut laj Lehi, a’aneb’ ralal laj Helaman, ke’xjultika k’iila aatin re li tenamit, relik chi yaal, ut ke’xch’olob’ jo’ profeet k’iila aatin chiruheb’ chirix lix maa’usilaleb’, ut k’a’ru taachalq sa’ xb’eeneb’ wi ink’a’ te’xjal xk’a’uxl chirixeb’ lix maak.

15 Ut kik’ulman naq eb’ a’an ke’xjal xk’a’uxl, ut a’ yaal jo’ ke’xjal xk’a’uxl ke’ok chi usaak.

16 Naq kiril ut laj Moroni naq ke’xjal xk’a’uxl kichal xch’ool xb’eresinkileb’ sa’ li junjunq chi na’ajej, ut sa’ li junjunq chi tenamit, toj reetal ajwi’ naq ke’xk’ul wi’chik xyijach li reechanihomeb’ ut xyijach chixjunil lix ch’och’eb’.

17 Ut chi jo’kan kiraqe’ li jun xkaak’al chihab’ rawa’b’ejileb’ laj raqol aatin.

18 Ut kik’ulman sa’ li xkab’ xkaak’al chihab’ rawa’b’ejileb’ laj raqol aatin, naq laj Moronihah maajun chik reechanihomeb’ kiru chixtawb’al rik’ineb’ laj Lamanita.

19 Jo’kan naq ke’xkanab’ lix k’oxlahomeb’ naq te’xtaw rela’ lix ch’och’eb’, xb’aan naq q’axal k’iheb’ laj Lamanita jo’kan naq ink’a’ kiru chiruheb’ laj Nefita xtawb’al chik xwankil sa’ xb’eeneb’; jo’kan naq laj Moronihah kiroksi chixjunileb’ lix teep aj pleet re xk’uulankil xwankil sa’ xb’een li jar raqal a’an li ak kixchap chaq.

20 Ut kik’ulman, xb’aan xnimal rajlankileb’ laj Lamanita, kiwan xnimaleb’ xxiw laj Nefita, maare anchal te’numtaaq sa’ xb’eeneb’, ut te’yeq’iiq, ut te’kamsiiq, ut te’sache’q.

21 Relik chi yaal, ki’ok chi jultiko’k reheb’ lix profeetil aatin laj Alma, ut jo’kan ajwi’ raatin laj Mosiah, ut ke’ril naq ke’wan chaq choq’ jun tenamit jip xk’a’uxl, ut naq ke’xk’ul chi yal jo’maajo’ lix taqlahom li Dios;

22 Ut naq ke’xjal chaq ut ke’xyeq’i chaq rub’el roqeb’ lix ^achaq’rab’ laj Mosiah, malaj ut li k’a’ru kixtaqla li Qaawa’ chixk’e re li tenamit; ut ke’ril naq po’jenaq ru lix chaq’rab’eb’, ut naq okenaqeb’ choq’ jun tenamit aj maak, jo’kan naq aj maakeb’ chanchaneb’ ajwi’ laj Lamanita.

23 Ut xb’aan lix maa’usilaleb’ ki’ok chaq chi ^alajk li iglees, ut ke’ok chixkanab’ankil xpaab’ankil li musiq’ej re profeetil aatin ut li musiq’ej re k’utb’esink, ut kiwan lix raqb’a-aatin li Dios chi k’utk’u sa’ rilob’aaleb’.

24 Ut ke’ril naq ke’kana chi ^aq’uneb’ xmetz’ew, chanchan li ras riitz’ineb’ aj Lamanita, ut naq lix Musiq’ li Qaawa’ ink’a’ chik naxkoleb’ rix; relik chi yaal, isinb’il chaq rik’ineb’ xb’aan naq lix ^bMusiq’ li Qaawa’ moko nawan ta sa’eb’ li ^cochoch moko sant ta—

25 Jo’kan naq li Qaawa’ kixkanab’ xkolb’aleb’ rix rik’in lix wankilal li sachol ch’oolej ut maak’a’ xjuntaq’eetankil, xb’aan naq eb’ a’an ke’t’ane’ sa’ jun wanjik chi ^amaak’a’eb’ xpaab’aal ut chi xuwajel xmaa’usilaleb’; ut ke’ril naq eb’ laj Lamanita numtajenaq wi’chik xk’ihal li rajlankileb’ chiruheb’ a’an, ut wi ink’a’ ^bneke’jilok rik’in li Qaawa’ lix Dios, tento te’oso’q chi maak’a’ xjalb’al.

26 Xb’aan naq k’ehomaq reetal, ke’ril naq lix metz’eweb’ laj Lamanita juntaq’eet chik xnimal, li junjunq ajwi’ chi winq, rik’in xmetz’eweb’ a’an. Ut chi jo’kan ke’t’ane’ sa’ li nimla q’etok aatin a’in, relik chi yaal, chi jo’kan ke’q’uno’ xmetz’ew, xb’aan li q’etok aatin ke’xb’aanu, chiru xnumik ^amoko naab’al ta chihab’.