Ebʼ li loqʼlaj hu
Helaman 11


Ch’ol 11

Laj Nefi naxq’unb’esi xch’ool li Qaawa’ re tixk’e li we’ej ruuchil li pleet—Naab’al li tenamit neke’oso’—Neke’xjal xk’a’uxl, ut Laj Nefi naxtz’aama li hab’ chiru li Qaawa’—Laj Nefi ut laj Lehi neke’xk’ul k’iila na’leb’ chi k’utb’esinb’il—Eb’ laj elq’ re laj Gadianton neke’xk’ojob’ rib’ sa’ li ch’och’. Wan na 26–6 chihab’ ma nayo’la li Kristo.

1 Ut anajwan kik’ulman naq sa’ li xkab’laju xkaak’al chihab’ rawa’b’ejileb’ laj raqol aatin, naq ke’niman li wech’ok-ib’, jo’kan naq ke’wan li pleet chiru chixjunil li ch’och’ sa’ xyanq chixjunil lix tenamit laj Nefi.

2 Ut a’an li amuqmuukil molam a’in chi aj elq’ li ke’b’aanunk re li k’anjel a’in re sachok ut maa’usilal. Ut kikana li pleet a’in chiru chixjunil li chihab’ a’an, ut sa’ li roxlaju xkaak’al chihab’ kikana ajwi’.

3 Ut kik’ulman naq sa’ li chihab’ a’in laj Nefi ki’elajin chiru li Qaawa’, ut kixye:

4 At Qaawa’, maakanab’ naq li tenamit a’in taasache’q rik’in yok’leb’ ch’iich’; chiwanq b’an at Qaawa’, jun awe’ej sa’ li ch’och’, re reek’asinkileb’ xch’ool chixjultikankil li Qaawa’ lix Dios, ut maare te’xjal xk’a’uxl ut te’sutq’iiq aawik’in.

5 Ut jo’kan kib’aanuman, jo’ chanru li raatin laj Nefi. Ut kiwan jun nimla we’ej sa’ xb’een li ch’och’, sa’ xyanq chixjunil lix tenamit laj Nefi. Ut chi jo’kan sa’ li xkaalaju xkaak’al chihab’ toj yoo li we’ej, ut kiraqe’ li k’anjel re sachok rik’in li yok’leb’ ch’iich’, a’b’an kiraho’ rik’in we’ej.

6 Ut li k’anjel a’in re sachok toj kiwan ajwi’ sa’ li ro’laju xkaak’al chihab’. Xb’aan naq kisak’e’ li ch’och’ jo’kan naq kichaqik, ut ink’a’ kiruuchini li iyaj nak’uxman sa’ xq’ehil li iyaj; ut chixjunil li ch’och’ kisak’e’, sa’ xyanqeb’ ajwi’ laj Lamanita jo’ ajwi’ sa’ xyanqeb’ laj Nefita, jo’kan naq ke’sak’e’ toj reetal naq ke’kam chi mil sa’eb’ li jar raqal chi ch’och’ li q’axaleb’ aj maak.

7 Ut kik’ulman naq eb’ li tenamit ke’ril naq oso’keb’ re xb’aan we’ej, ut ki’ok chi ajultiko’k reheb’ li Qaawa’ lix Dios; ut ki’ok chi jultiko’k reheb’ li raatin laj Nefi.

8 Ut eb’ li tenamit ke’ok chi tz’aamank chiru xb’eenileb’ lix raqol aatin ut lix jolomineleb’, naq te’xye re laj Nefi: K’e reetal, naqanaw naq laa’at jun winq re li Dios, ut chi jo’kan chat-elajinq chiru li Qaawa’ li qaDios naq tixsutq’isi chaq sa’ qab’een li we’ej a’in, re naq ink’a’ taatz’aqloq ru chixjunil li aaatin kaye chirix qasachlijik.

9 Ut kik’ulman naq eb’ laj raqol aatin ke’xye re laj Nefi, jo’ chanru li aatin li tz’aamanb’il. Ut naq kiril laj Nefi naq eb’ li tenamit ke’xjal chaq xk’a’uxleb’ ut ke’xtuulanob’resi rib’ rik’in q’es ruhil t’ikr, kik’ulman naq ki’elajin wi’chik chiru li Qaawa’, ut kixye:

10 At Qaawa’, k’e reetal, li tenamit a’in xjal xk’a’uxl; ut ke’xmesu sa’ xyanqeb’ li jun molam re aj Gadianton jo’kan naq oso’jenaqeb’ a’an, ut ke’xmuq sa’ ch’och’ lix muqmuukil k’uub’anb’il na’leb’eb’.

11 Anajwan, at Qaawa’, xb’aan a’in lix tuulanileb’ xch’ool ma taasutq’isi chaq taxaq laa josq’il, ut taakanab’ chi ch’anaak aajosq’il rik’in lix sachlijikeb’ li winq a’an aj maak li ak kasach.

12 At Qaawa’, ma taasutq’isi chaq taxaq aajosq’il, relik chi yaal, laa nimla josq’il, ut taak’e taxaq xraqik li we’ej a’in sa’ li ch’och’.

13 At Qaawa’, ma tat-ab’inq taxaq chiwu, ut taak’e chi b’aanumank jo’ chanru li waatin, ut chaataqla li ahab’ chiru lix b’een li ch’och’, re naq a’an taaruuchini li ruuchinihom, ut li iyaj nak’uxman sa’ xq’ehil li iyaj.

14 At Qaawa’, kat-ab’in chiru li awaatin naq kinye, Chiwanq we’ej, re naq taa’oso’q li rahob’tesiik xb’aan li yok’leb’ ch’iich’; ut ninnaw naq tat-ab’inq, sa’ li kutan ajwi’ a’in, chiru li waatin, xb’aan naq laa’at kaye naq: Wi eb’ li tenamit a’in te’xjal xk’a’uxl tinkoleb’ xyu’am.

15 Relik chi yaal, at Qaawa’, ut nakawil naq ke’xjal xk’a’uxl, xb’aan li we’ej ut li yajel ut li sache’k li xchal reheb’.

16 Ut anajwan, at Qaawa’, ma taasutq’isi chaq aajosq’il, ut taayal wi’chik ma te’k’anjelaq chawu? Ut wi jo’kan, at Qaawa’, taaruuq taawosob’tesiheb’ jo’ chanru laa waatin li kaye.

17 Ut kik’ulman naq sa’ li xwaqlaju xkaak’al chihab’ li Qaawa’ kixsutq’isi chaq lix josq’il sa’ xb’een li tenamit, ut kixk’e chi t’ane’k li ahab’ sa’ xb’een li ch’och’, jo’kan naq kiruuchini li ruuchinihom sa’ xq’ehil li uuchink. Ut kik’ulman naq kiruuchini li iyaj nak’uxman sa’ xq’ehil li iyaj.

18 Ut k’ehomaq reetal, eb’ li tenamit ke’saho’ xch’ool ut ke’xnima xloq’al li Dios, ut kinujak chixjunil lix b’een li ch’och’ rik’in saho’k ch’oolej; ut ink’a’ chik ke’xsik’ xsachb’al laj Nefi; ke’xk’oxla b’an jo’ animla profeet, ut jun winq re li Dios, li wan xnimal xwankil ut wankilal k’eeb’il re xb’aan li Dios.

19 Ut k’ehomaq reetal, laj Lehi, li riitz’in, moko q’axb’il ta ru xb’aan a’an chi yal ta ajun miin raqal chirix li k’a’aq re ru re li tiikilal.

20 Ut chi jo’kan kik’ulman naq lix tenamit laj Nefi ke’ok wi’chik chi usaak sa’ li ch’och’, ut chixkab’lankil lix sachenaqil na’ajeb’, ut ke’ok chi k’ihank ut chi jek’imank, toj reetal naq ke’xnujob’resi chixjunil lix b’een li ch’och’, sa’ xjayal lix nim li saq’e jo’ ajwi’ sa’ xjayal lix tz’e, chalen sa’ li palaw sa’ rokeb’ saq’e toj sa’ li palaw sa’ releb’.

21 Ut kik’ulman naq li xwaqlaju xkaak’al chihab’ kiraqe’ sa’ tuqtuukilal. Ut li xwuqlaju xkaak’al chihab’ kitikla sa’ tuqtuukilal; ut li aiglees kijek’iman chiru xb’een chixjunil li ch’och’, ut lix k’ihaleb’ li tenamit, laj Nefita jo’eb’ ajwi’ laj Lamanita, ke’wan sa’ li iglees, ut numtajenaq nim li tuqtuukilal ke’wan wi’ sa’ li ch’och’, ut chi jo’kan kiraqe’ li xwuqlaju xkaak’al chihab’.

22 Ut ke’wan ajwi’ sa’ tuqtuukilal sa’ li xwaqxaqlaju xkaak’al chihab’, ka’ajwi’ naq kiwan junjunq li wech’ok-ib’ chirixeb’ li jar raqal chi tzol’leb’ li kik’ojob’aak chaq xb’aaneb’ li profeet.

23 Ut sa’ li xb’elelaju xkaak’al chihab’ ki’ok chi wank naab’al li wech’ij-ib’. A’b’anan kik’ulman naq laj Nefi ut laj Lehi, ut naab’al reheb’ lix komon li neke’xnaw chirix li jar raqal chi tzol’leb’ li tz’aqal yaaleb’, xb’aan naq k’iila na’leb’ anak’utb’esiik chiruheb’ chi wulaj wulaj, jo’kan naq ke’jultikan aatin chiruheb’ li tenamit, ut chi jo’kan ke’xk’e xraqik lix wech’ihomeb’ sa’ li chihab’ ajwi’ a’an.

24 Ut kik’ulman naq sa’ li xkaak’al chihab’ rawa’b’ejileb’ laj raqol aatin sa’ xb’een lix tenamit laj Nefi, wan junjunq rajlankileb’ li ke’risi chaq rib’ rik’in lix tenamit laj Nefi, li jarub’aq chihab’ chaq xq’axonikeb’ rik’ineb’ laj Lamanita, ut ke’xk’ul sa’ xb’eeneb’ xk’ab’a’eb’ laj Lamanita, ut jo’kan ajwi’ junjunq rajlankileb’ li tz’aqal ralal xk’ajoleb’ laj Lamanita, li eek’asinb’ileb’ chi josq’o’k xb’aaneb’, malaj xb’aaneb’ a’an li ke’risi chaq rib’, jo’kan naq ke’xtikib’ jun li pleet rik’ineb’ li ras riitz’in.

25 Ut ke’xb’aanu li kamsink ut li poqlenk, toja’ ut naq neke’xsutq’isi rib’ sa’eb’ li tzuul, ut sa’ li yamyookil ch’och’ ut li muqmuukil na’ajej, ut ke’xmuq rib’ re naq ink’a’ ke’ru chi tawe’k, ut wulaj wulaj neke’xk’ul xtiqb’al ru li rajlankileb’, a’ yaal jo’ chanru wankeb’ li neke’risi chaq rib’ ut neke’xik rik’ineb’.

26 Ut chi jo’kan chirix xnumikeb’ li kutan, relik chi yaal, chirix xnumikeb’ moko naab’al ta chihab’, ke’ok choq’ jun molam chi aj elq’ numtajenaq nim, ut ke’xsik’ chaq chixjunil lix muqmuukil k’uub’anb’il na’leb’ laj Gadianton, ut chi jo’kan ke’ok choq’ aj elq’ re laj Gadianton.

27 Anajwan k’ehomaq reetal, eb’ laj elq’ a’in k’a’jo’ li po’ok ke’xb’aanu, relik chi yaal, nimla sachok sa’ xyanq lix tenamit laj Nefi, ut sa’ xyanq ajwi’ lix tenamiteb’ laj Lamanita.

28 Ut kik’ulman naq ki’ajman ru naq taak’ehe’q xraqik li k’anjel a’in re sachok; jo’kan naq ke’xtaqla jun teep chi winq aj pleet kaweb’ xmetz’ew sa’ li yamyookil ch’och’ ut sa’ xb’eeneb’ li tzuul re xsik’inkil li molam a’in chi aj elq’, ut re xsachb’aleb’.

29 A’b’an k’ehomaq reetal, kik’ulman naq sa’ li chihab’ ajwi’ a’an ke’sutq’isiik wi’chik chirix, toj sa’ xch’och’eb’ a’an. Ut chi jo’kan kiraqe’ li xkaak’al chihab’ rawa’b’ejileb’ laj raqol aatin sa’ xb’een lix tenamit laj Nefi.

30 Ut kik’ulman naq sa’ xtiklajik li xb’een ro’k’aal chihab’ xkoheb’ wi’chik chixpleetinkil li molam a’in chi aj elq’, ut ke’xsach naab’al; ut ke’ula’aniik ajwi’ rik’in naab’al li sache’k.

31 Ut jun sut chik ke’mine’ ru chi elk chaq sa’ li yamyookil ch’och’ ut sa’eb’ li tzuul toj sa’ xch’och’eb’ a’an, xb’aan naq numtajenaq nim rajlankileb’ laj elq’ a’an li neke’wanje’ sa’eb’ li tzuul ut sa’ li yamyookil ch’och’.

32 Ut kik’ulman naq chi jo’kan kiraqe’ li jun chihab’ a’in. Ut eb’ laj elq’ toj ke’tam ut ke’niman xmetz’ew, jo’kan naq ke’xnima rib’ chiru anchal li teepeb’ aj pleet reheb’ laj Nefita, ut reheb’ ajwi’ laj Lamanita, ut xb’aaneb’ a’an kichal nimla xiw sa’ xb’een chixjunil li tenamit chiru chixjunil lix b’een li ch’och’.

33 Relik chi yaal, xb’aan naq ke’rula’ani k’iila raqal re li ch’och’, ut ke’xb’aanu nimla sachok reheb’; relik chi yaal, ke’xkamsi naab’al, ut wankeb’ chik li ke’xk’am chi preexil sa’ li yamyookil ch’och’, relik chi yaal, ut q’axal wi’chik li rixqilaleb’ ut lix kok’aleb’.

34 Anajwan li nimla rahilal a’in, li kichal sa’ xb’eeneb’ li tenamit xb’aan xmaa’usilaleb’, kireek’asiheb’ wi’chik xch’ool chixjultikankil li Qaawa’ lix Dios.

35 Ut chi jo’kan kiraqe’ li xb’een ro’k’aal chihab’ rawa’b’ejileb’ laj raqol aatin.

36 Ut sa’ li xkab’ ro’k’aal chihab’ ke’ok wi’chik chi asachk sa’ xch’ooleb’ li Qaawa’ lix Dios. Ut sa’ li rox ro’k’aal chihab’ ke’ok chi kawuk sa’ li maa’usilal. Ut sa’ li xkaa ro’k’aal chihab’ ink’a’ ke’xtuqub’ li b’e wankeb’ wi’.

37 Ut kik’ulman naq sa’ li ro’ ro’k’aal chihab’ k’a’jo’ wi’chik naq ke’ok chi nimank sa’ xq’etq’etileb’, ut xmaa’usilaleb’, ut chi jo’kan yookeb’ wi’chik chi q’ano’k choq’ re li sache’k.

38 Ut chi jo’kan kiraqe’ li ro’ ro’k’aal chihab’.