Ebʼ li loqʼlaj hu
Helaman 9


Ch’ol 9

Eb’ laj taql neke’xtaw li xb’eenil aj raqol aatin chi kamenaq sa’ li raqleb’aal aatin—Neke’k’ehe’ sa’ tz’alam ut moqon neke’ach’ab’aak—Chi musiq’anb’il laj Nefi naxk’ut xyaalal naq laj Seantum kikamsink—Wankeb’ li neke’k’ulub’an re laj Nefi jo’ profeet. Wan na 23–21 chihab’ ma nayo’la li Kristo.

1 K’ehomaq reetal, kik’ulman anajwan naq chirix naq laj Nefi kixye li aatin a’in, junjunq li winq li wankeb’ sa’ xyanqeb’ xkoheb’ sa’ aanil sa’ li raqleb’aal aatin; relik chi yaal, oob’eb’ ajwi’ li xkoheb’, ut ke’xye chirib’ileb’ rib’ naq yookeb’ chi xik:

2 K’ehomaq reetal, anajwan taqanaw chi ch’olch’o ma profeet li winq a’in ut ma li Dios xtaqlank re chixxch’olob’ankil chiqu jo’ profeet xkomon li sachb’a-ch’oolejil na’leb’ a’in. K’ehomaq reetal, ink’a’ naqapaab’ naq xb’aanu; relik chi yaal, ink’a’ naqapaab’ naq a’an profeet; a’b’anan, wi yaal li k’a’ru a’in kixye chirix li xb’eenil aj raqol aatin, naq kamenaq, rik’in a’an taqapaab’ naq yaal li jun ch’ol chik chi aatin kixye.

3 Ut kik’ulman naq ke’alinak rik’in xmetz’eweb’, ut ke’ok sa’ li raqleb’aal aatin, ut k’ehomaq reetal, li xb’eenil aj raqol aatin t’anenaq sa’ ch’och’, ut ayokyo sa’ xkik’el.

4 Ut anajwan k’ehomaq reetal, naq ke’ril a’in, sachsookeb’ xch’ool chi numtajenaq, jo’kan naq ke’t’ane’ chi ch’och’, xb’aan naq ink’a’ ke’xpaab’ chaq li aatin kixye chaq laj Nefi chirix li xb’eenil aj raqol aatin.

5 A’b’an anajwan, naq ke’ilok ke’paab’an, ut kichal li xiw sa’ xb’eeneb’ maare anchal chixjunil li raqb’a-aatin li kixye laj Nefi taachalq sa’ xb’een li tenamit; jo’kan naq ke’chenchot, ut ke’t’ane’ chi ch’och’.

6 Anajwan, sa’ junpaat naq kikamsiik laj raqol aatin—ut k’ob’b’il xb’aan li riitz’in chi jalb’il li raq’ sa’ muqmu, ut a’an ki’eelelik, ut eb’ li moos ke’alinak ut ke’xye re li tenamit, ut ke’xjek’i resil li kamsink sa’ xyanqeb’;

7 Ut k’ehomaq reetal, eb’ li tenamit ke’xch’utub’ rib’ sa’ xna’aj li raqleb’aal aatin—ut k’ehomaq reetal, sachsookeb’ xch’ool ke’kana chirilb’al li oob’ chi winq li t’anenaqeb’ chi ch’och’.

8 Ut anajwan k’ehomaq reetal, eb’ li tenamit maak’a’ neke’xnaw chirix li ch’uut chi tenamit li ke’xch’utub’ chaq rib’ sa’ li arawimq laj Nefi; jo’kan naq ke’xye chirib’ileb’ rib’: A’ineb’ li winq li ke’kamsin re laj raqol aatin, ut li Dios kixsak’eb’ re naq ink’a’ ke’ru chi eelelik chiqu.

9 Ut kik’ulman naq ke’xchapeb’, ut ke’xb’ak’eb’ ut ke’xtz’apeb’ sa’ tz’alam. Ut kitaqlaman xjek’inkil jun li aatin naq kamsinb’il laj raqol aatin, ut naq eb’ laj kamsinel chapb’ileb’ ut tz’apb’ileb’ sa’ tz’alam.

10 Ut kik’ulman naq wulajaq chik a’an, eb’ li tenamit ke’xch’utub’ rib’ re yaab’ak ut akuyuk sa’, sa’ xmuqlajik li nimla xb’eenil aj raqol aatin li kikamsiik chaq.

11 Ut chi jo’kan ajwi’ eb’ laj raqol aatin li ke’wan chaq sa’ li rawimq laj Nefi, ut ke’rab’i li raatin, ke’ch’utla ajwi’ sa’ li muquk.

12 Ut kik’ulman naq ke’patz’ok sa’ xyanqeb’ li tenamit, ut ke’xye: B’ar wankeb’ li oob’ li ke’taqlaak chi patz’ok chirix li xb’eenil aj raqol aatin, chirix ma kamenaq? Ut eb’ a’an ke’chaq’ok ut ke’xye: chirix li oob’ li keye naq ketaqla, ink’a’ naqanaw, a’b’an wankeb’ oob’ li ke’b’aanunk re li kamsink, li kiqatz’ap sa’ tz’alam.

13 Ut kik’ulman naq eb’ laj raqol aatin ke’raj naq te’k’ame’q chaq, ut ke’k’ame’ chaq, ut k’ehomaq reetal, a’aneb’ li oob’ li ke’taqlaak chaq, ut k’ehomaq reetal, eb’ laj raqol aatin ke’xpatz’ reheb’ chirix li na’leb’ a’an, ut ke’xye reheb’ chixjunil li ke’xb’aanu chaq, ut ke’xye:

14 Koo’alinak ut koowulak sa’ xna’aj li raqleb’aal aatin, ut naq kiqil chixjunil li k’a’aq re ru jo’ chanru kixch’olob’ chaq laj Nefi, kisach qach’ool jo’kan naq koot’ane’ chi ch’och’; ut naq koo’usa rik’in xsachik qach’ool, k’ehomaq reetal, koohe’xtz’ap sa’ tz’alam.

15 Anajwan, chirix xkamik li winq a’in, ink’a’ naqanaw ani xb’aanunk re, ut ka’ajwi’ a’in naqanaw, koo’alinak ut koochal jo’ chanru keraj, ut k’ehomaq reetal naq ak kamenaq chaq, jo’ chanru li raatin laj Nefi.

16 Ut anajwan kik’ulman naq eb’ laj raqol aatin ke’xch’olob’ li na’leb’ chiru li tenamit, ut ke’xjap re chixjitb’al laj Nefi, ut ke’xye: K’ehomaq reetal, naqanaw naq laj Nefi a’in kixk’uub’ tana’ xna’leb’ rik’in junaq chik re xkamsinkil laj raqol aatin, re naq chirix a’an taaruuq tixch’olob’ chiqu laa’o, re naq tixjal qach’ool rik’in lix paab’aal a’an, re naq tixtaqsi rib’ jo’ xnimal ru winq, sik’b’il ru xb’aan li Dios, ut jun profeet.

17 Ut anajwan k’ehomaq reetal, laa’o taqatz’il rix li winq a’in, ut a’an tixch’olob’ xmaak ut tixk’e chiqanaw li tz’aqal aj kamsihom re laj raqol aatin.

18 Ut kik’ulman naq li oob’ ke’ach’ab’aak chaq sa’ xkutankil li muquk. A’b’anan eb’ a’an ke’xch’iilaheb’ laj raqol aatin sa’ li aatin ke’xye chaq chirix laj Nefi, ut ke’wech’ok rik’ineb’ chixjunjunqaleb’, toj reetal naq ke’xsach xna’leb’eb’.

19 A’b’anan ke’xtaqla naq laj Nefi taachape’q ut taab’ak’e’q ut taak’ame’q chiru li ch’utch’uukil tenamit, ut ke’ok chixpatz’inkil li na’leb’ re, chi jalan jalanq chaq re ru, re te’xchap sa’ aatin, re taaruuq te’xjit re taakamsiiq—

20 Ut ke’xye re: Xak’uub’ aana’leb’ rik’in jalan chik; ani li winq li xb’aanunk re li kamsink a’in? Anajwan ye qe, ut ch’olob’ laa maak, ut ke’xye, K’e reetal, wahi’ li tumin, ut jo’kan ajwi’ tatqakanab’ chi yo’yo wi taaye qe, ut taach’olob’ li na’leb’ xat-ok wi’ rik’in.

21 A’b’an laj Nefi kixye reheb’: Ex ajip, ex li moko xek’ul ta reetalil li sumwank sa’ eech’ool, ex mutz’, ut ex tenamit bjip eek’a’uxl, ma nekenaw jo’ najtil chik li Qaawa’ lee Dios tixkanab’ naq toj texb’eeq sa’ lee b’e a’in re maak?

22 Aay, tento raj tex’ayaynaq ut atexyaab’aq, xb’aan li nimla sache’k li na’oyb’enink eere sa’ li kutan a’in, wi ink’a’ nekejal eek’a’uxl.

23 K’ehomaq reetal nekeye naq xink’uub’ inna’leb’ rik’in jun winq re naq a’an tixkamsi laj Seetzoram, xb’eenil qaraqol aatin. A’b’an k’ehomaq reetal, ninye eere naq a’in xb’aan naq kinch’olob’ cheru re taaruuq teenaw chirix li na’leb’ a’in; relik chi yaal, re xk’utb’al ajwi’ xyaalal cheru, naq kinnaw chirix li maa’usilal ut tz’eqb’eetalil li wan sa’ eeyanq.

24 Ut xb’aan naq kinb’aanu a’in, nekeye naq xink’uub’ inna’leb’ rik’in jun winq naq tixb’aanu li na’leb’ a’in; relik chi yaal, rik’in naq kink’ut cheru li eetalil a’in, yoo eejosq’il wik’in, ut teeraj xsachb’al inyu’am.

25 Ut anajwan k’ehomaq reetal, tink’ut jun chik eetalil cheru, ut ilomaq ma rik’in li na’leb’ a’in teesik’ insachb’al.

26 K’ehomaq reetal, ninye eere: Ayuqex sa’ rochoch laj Seantum, a’an ariitz’in laj Seetzoram, ut yehomaq re—

27 Laj Nefi, li naxb’aanu rib’ jo’ profeet, li naxyeechi’i jo’ profeet xnimal li rahilal chirix li tenamit a’in, ma xk’uub’ xna’leb’ aawik’in, sa’ li xakamsi wi’ laj Seetzoram, a’an laa was?

28 Ut k’ehomaq reetal, a’an tixye eere, Ink’a’.

29 Ut laa’ex teeye re: Ma xakamsi laa was?

30 Ut a’an taaxaqliiq rik’in xiw, ut moko tixnaw ta k’a’ru xyeeb’al. Ut k’ehomaq reetal, tixye eere naq ink’a’; ut tixb’aanu rib’ chanchan naq sachso xch’ool; a’b’anan tixch’olob’ cheru naq maak’a’ xmaak.

31 A’b’an k’ehomaq reetal, teetz’il rix, ut teetaw kik’ chiru xmaril lix b’aatal.

32 Ut naq xeril a’in, teeye: B’ar xchal li kik’ a’in? Ma ink’a’ naqanaw naq a’an xkik’el laa was?

33 Toja’ ut naq taasiksotq, ut taasaqpetz’q li rilob’aal, chanchan naq xchal li kamk sa’ xb’een.

34 Toja’ ut naq teeye: Xb’aan li xiw a’in ut li saqpetz’ a’in xchal sa’ laa wilob’aal, k’e reetal, naqanaw naq wan aamaak.

35 Toja’ ut naq taachalq wi’chik xnimal xxiw sa’ xb’een; toja’ ut naq tixch’olob’ lix maak cheru, ut moko tixye ta chik naq ink’a’ xb’aanu li kamsink a’in.

36 Toja’ ut naq tixye eere naq laa’in, aj Nefi, maak’a’ kinnaw chirix li na’leb’, ka’ajwi’ wi k’eeb’il we xb’aan xwankil li Dios. Toja’ ut naq teenaw naq laa’in jun winq maak’a’ xb’alaq’, ut naq taqlanb’ilin eere xb’aan li Dios.

37 Ut kik’ulman naq xkoheb’ ut ke’xb’aanu jo’ chanru ajwi’ kixye laj Nefi reheb’. Ut k’ehomaq reetal naq yaal li aatin kixye chaq; xb’aan naq jo’ chanru li aatin, kixye naq ink’a’ kixb’aanu, ut jo’ chanru ajwi’ li aatin, kixch’olob’ xmaak.

38 Ut kik’ame’ chixk’utb’al xyaalal naq a’an ajwi’ laj b’aanuhom re li kamsink, jo’kan naq li oob’ ke’ach’ab’aak, ut jo’kan ajwi’ laj Nefi.

39 Ut wankeb’ junjunq reheb’ laj Nefita li ke’paab’ank re li raatin laj Nefi, ut wankeb’ ajwi’ junjunq li ke’paab’an xb’aan li ke’xch’olob’ xyaalal li oob’, xb’aan naq eb’ a’an ke’jale’ chaq xch’ool naq wankeb’ sa’ tz’alam.

40 Ut anajwan wankeb’ junjunq sa’ xyanq li tenamit, li ke’yehok re naq laj Nefi a’an profeet.

41 Ut ke’wan jalan chik li ke’yehok re: K’ehomaq reetal, a’an jun dios, xb’aan naq wi ta maawa’ jun dios ink’a’ raj taaruuq chixnawb’al chirix chixjunil li k’a’aq re ru. Xb’aan naq k’ehomaq reetal, a’an xye qe lix k’oxlahom li qach’ool, ut kixye k’a’aq re ru qe, ut kixk’e ajwi’ chiqanaw ani tz’aqal aj kamsihom re li xb’eenil qaraqol aatin.