Ebʼ li loqʼlaj hu
Helaman 5


Ch’ol 5

Laj Nefi ut laj Lehi neke’xk’e rib’ chi jultikank aatin—Xb’aan lix k’ab’a’eb’, na’aje’ chiruheb’ xb’aanunkil sa’ xyu’ameb’ jo’ chanru lix najter yuwa’eb’—Li Kristo naxtojeb’ rix li neke’xjal xk’a’uxl—Laj Nefi ut laj Lehi neke’xjal xch’ool naab’al ut neke’k’ehe’ sa’ tz’alam, ut li xam naxsutiheb’ rix—Jun choql re q’ojyin naxmoy oxib’ cient chi winq—Nachiiq’an li ch’och’, ut jun xyaab’ kuxej naxtaqlaheb’ li winq chixjalb’aleb’ xk’a’uxl—Laj Nefi ut laj Lehi neke’aatinak rik’ineb’ li anjel, ut neke’sutiik rix li ch’utch’uukil tenamit rik’in xam. Wan na 30 chihab’ ma nayo’la li Kristo.

1 Ut kik’ulman naq sa’ li chihab’ ajwi’ a’in, k’ehomaq reetal, laj aNefi kixq’axtesi li raqleb’aal aatin chiru jun winq aj Cetzoram xk’ab’a’.

2 Xb’aan naq jo’ naxaqab’aman lix chaq’rab’eb’ ut xjolomil lix tenamiteb’ xb’aan axyaab’ xkux li tenamit, ut eb’ li bneke’xsik’ ru li ink’a’ us k’iheb’ wi’chik chiruheb’ li neke’xsik’ ru li us, jo’kan naq yookeb’ chaq chi q’ano’k choq’ re li sache’k, xb’aan naq kikana li chaq’rab’ chi po’jenaq ru.

3 Relik chi yaal, ut moko chixjunil ta a’in; a’aneb’ jun tenamit jiip xk’a’uxl, jo’kan naq ink’a’ kiru xjolominkileb’ rik’in li chaq’rab’ chi moko rik’in tiik ruhil na’leb’, ka’ajwi’ choq’ re xsachlijikeb’.

4 Ut kik’ulman naq kikana laj Nefi chi tawajenaq xb’aan xmaa’usilaleb’; ut akixq’axtesi li raqleb’aal aatin, ut kixk’ul sa’ xb’een xjultikankil li raatin li Dios chiru chixjunil rela’ lix kutan, ut jo’kan ajwi’ aj Lehi li riitz’in, chiru chixjunil rela’ lix kutan a’an;

5 Xb’aan naq kijultiko’ reheb’ li aatin kixye laj Helaman lix yuwa’ reheb’. A’in ut li aatin li kixye:

6 K’ehomaq reetal, ex walal, nawaj raj naq chijultiko’q eere xpaab’ankil lix taqlahom li Dios; ut nawaj raj naq teech’olob’ chiru li tenamit li aatin a’in. K’ehomaq reetal, xink’e eere xk’ab’a’eb’ li xb’een aqayuwa’ li ke’el chaq sa’ li ch’och’ Jerusalen; ut a’in kinb’aanu re naq jo’q’e teek’oxla lee k’ab’a’ teek’oxlaheb’ a’an; ut naq nekek’oxlaheb’ a’an, teek’oxla lix k’anjeleb’; ut naq nekek’oxla lix k’anjeleb’ taaruuq teenaw chanru naq yeeb’il, ut tz’iib’anb’il ajwi’, naq bchaab’ileb’ chaq.

7 Jo’kan ut, ex walal, nawaj raj naq cheb’aanu li k’a’ru chaab’il, re naq taaruuq taayeemanq cherix laa’ex, ut taatz’iib’amanq ajwi’, jo’ chanru yeeb’il ut tz’iib’anb’il chirixeb’ a’an.

8 Ut anajwan ex walal, k’ehomaq reetal wan k’a’ruhaq chik li nawaj raj eerik’in, ut li wajom a’an naq ink’a’ teeb’aanu li k’a’aq re ru a’in re taaruuq teenima eerib’, re b’an taaruuq teeb’aanu li k’a’aq re ru a’in re xtamresinkil choq’ eere jun ab’ihomal sa’ choxa, relik chi yaal, li taawanq chi junelik, ut li ink’a’ nalaj chaq; relik chi yaal, re taawanq eerik’in li bloq’laj maatan a’an, a’ li junelik yu’am, li naru naqak’oxla naq k’eeb’il reheb’ li qayuwa’.

9 Aay, chijultiko’q, chijultiko’q eere, ex walal, li aaatin kixye li rey aj Benjamin re lix tenamit; relik chi yaal, chijultiko’q eere naq maajun chik b’e wan chi moko chan chik ru taaruuq taakole’q wi’ li winq, ka’ajwi’ chi btojb’il rix xmaak xb’aan xkik’el li Jesukristo, li taachalq; relik chi yaal, chijultiko’q eere naq a’an taachalq re cxtojb’al rix li druchich’och’.

10 Ut chijultiko’q ajwi’ eere li aaatin kixye laj Amulek re laj Tzeesrom, sa’ li tenamit Ammonihah; xb’aan naq a’an kixye re naq li Qaawa’ taak’ulunq chi yaal re xtojb’al rix lix tenamit, a’b’an naq ink’a’ taachalq re xtojb’aleb’ rix sa’ lix maakeb’; re b’an xtojb’aleb’ rix chiru chaq lix maakeb’.

11 Ut a’an wan xwankil k’eeb’il re xb’aan li Yuwa’b’ej re xtojb’aleb’ rix chiru lix maakeb’, xb’aan li jalb’a-k’a’uxlej; jo’kan naq akixtaqlaheb’ lix anjel re xch’olob’ankil resil li na’leb’ nachal wi’ li jalb’a-k’a’uxlej, li nak’amok rik’in xwankil laj Tojol-ix, re te’kole’q li raameb’.

12 Ut anajwan, ex walal, chijultiko’q, chijultiko’q eere naq a’ sa’ xb’een lix asaqoonaq laj Tojol qix, a’an li Kristo, li Ralal li Dios, naq tento teek’e beek’ojob’ankil; re naq jo’q’e tixtaqla laj tza lix kawil iq’, relik chi yaal, lix tzimaj sa’ li sut iq’, relik chi yaal, naq chixjunil lix saqb’ach ut lix kawil ckaq-sut-iq’ taatenoq sa’ eeb’een, maak’a’aq xwankil chekelonkil taq’a sa’ li jul re rahilal ut rahil ch’oolejil li maak’a’ roso’jik, sa’ xk’ab’a’ li saqoonaq li kab’lanb’ilex wi’, a’an jun k’ojleb’aal ch’olch’o ru, jun k’ojleb’aal b’ar wi’ wi te’kab’laq li winq sa’ xb’een ink’a’ taaruuq te’t’ane’q.

13 Ut kik’ulman naq a’in li aatin akixk’ut laj Helaman chiruheb’ li ralal; relik chi yaal, kixk’ut k’iila k’a’aq re ru chiruheb’ li moko tz’iib’anb’il ta, ut jo’kan ajwi’ k’iila k’a’aq re ru li tz’iib’anb’il.

14 Ut kijultiko’ reheb’ li raatin; jo’kan ut naq xkoheb’, rik’in xpaab’ankil lix taqlahom li Dios, re xk’utb’al li raatin li Dios sa’ xyanq chixjunil lix tenamit laj Nefi, ut ke’tikla chaq sa’ li tenamit Naab’alil;

15 Ut chirix aran sa’ li tenamit Gid, chirix li tenamit Gid sa’ li tenamit Mulek;

16 Ut jo’kan sa’ li junjunq chi tenamit, toj reetal naq xikenaqeb’ chaq sa’ xyanq chixjunil lix tenamit laj Nefi li wankeb’ sa’ li ch’och’ sa’ xjayal lix tz’e li saq’e; ut chirix aran sa’ li ch’och’ Tzarahemla, sa’ xyanqeb’ laj Lamanita.

17 Ut kik’ulman naq ke’jultikan aatin rik’in nimla wankilal, jo’kan naq ke’xsacheb’ xna’leb’ naab’al xkomoneb’ a’an ali ke’risi chaq rib’ li ke’el chaq rik’ineb’ laj Nefita, jo’kan naq eb’ a’an ke’chal chi uub’ej ut ke’xch’olob’ xmaakeb’ ut ke’kub’e xha’ choq’ re li jalb’a-k’a’uxlej, ut tikto ke’sutq’i rik’ineb’ laj Nefita re xyalb’aleb’ xq’e chixtuqub’ankil choq’ reheb’ li ink’a’ us li ke’xb’aanu chaq.

18 Ut kik’ulman naq laj Nefi ut laj Lehi ke’jultikan aatin chiruheb’ laj Lamanita chi k’a’jo’ xnimal lix wankileb’ ut li wankilal k’eeb’il chaq reheb’, xb’aan naq wankeb’ xwankil ut k’eeb’il xwankilaleb’ re te’ruuq chi aaatinak, ut k’eeb’il ajwi’ reheb’ k’a’ru li te’xye—

19 Jo’kan naq k’a’jo’ xsachikeb’ xch’ool laj Lamanita naq ke’aatinak, toj reetal naq ake’q’unb’esiik xch’ool, jo’kan naq ke’wan waqxaqib’ mil xkomoneb’ laj Lamanita li wankeb’ sa’ li ch’och’ Tzarahemla ut sa’ xsutam li ke’kub’e xha’ choq’ re li jalb’a-k’a’uxlej, ut ke’q’unb’esiik xch’ool chirix xmaa’usilal li na’leb’ kanab’anb’il chaq xb’aaneb’ lix yuwa’.

20 Ut kik’ulman naq laj Nefi ut laj Lehi ke’el chaq aran re te’xik sa’ li ch’och’ Nefi.

21 Ut kik’ulman naq ke’chape’ xb’aan jun teep aj pleet reheb’ laj Lamanita ut ke’tz’ape’ sa’ atz’alam; relik chi yaal, sa’ ajwi’ li tz’alam a’an b’ar wi’ ke’tz’ape’ chaq laj Ammon ut eb’ lix komon xb’aaneb’ lix moos laj Limhi.

22 Ut chirix naq tz’apb’ileb’ chaq k’iila kutan sa’ tz’alam chi maak’a’ li tzakemq, k’ehomaq reetal, koxe’okaq sa’ tz’alam re xchapb’aleb’ re taaruuq te’xkamsiheb’.

23 Ut kik’ulman naq laj Nefi ut laj Lehi ke’sute’ rix chanchan xb’aan axam, jo’kan naq moko ke’chal ta xch’ool xk’eeb’al li ruq’ sa’ xb’eeneb’ xb’aan xxiw naq maare anchal te’k’ate’q. A’b’an laj Nefi ut laj Lehi moko ke’k’ate’ ta; ut chanchan naq xaqxookeb’ sa’ xyi li xam ut moko ke’k’ate’ ta.

24 Ut naq ke’ril naq sutsuukeb’ rix xb’aan jun axaqal li xam, ut naq ink’a’ naxk’ateb’, ke’chal xkawileb’ xch’ool.

25 Xb’aan naq ke’ril naq eb’ laj Lamanita maak’a’eb’ xch’ool chixk’eeb’al li ruq’ sa’ xb’eeneb’; chi moko wankeb’ xch’ool chi nach’ok rik’ineb’; xaqxookeb’ b’an chanchan naq ke’memo’ chaq xb’aan xsachikeb’ xch’ool.

26 Ut kik’ulman naq laj Nefi ut laj Lehi ke’xxaqab’ rib’ chi uub’ej ut ke’ok chiraatinankileb’, ut ke’xye: Mexxuwak, xb’aan naq k’ehomaq reetal, a’an li Dios li xk’utuk cheru li sachb’a-ch’oolejil na’leb’ a’in, sa’ li kixk’ut wi’ cheru naq ink’a’ nekexru chixk’eeb’al eeruq’ sa’ qab’een re qakamsinkil.

27 Ut k’ehomaq reetal, chirix naq ke’xye li aatin a’in, li ch’och’ kichiiq’an chi numtajenaq, ut ke’chiq’ok xtz’akil li tz’alam chanchan naq okeb’ re chi uq’e’k chi ch’och’; a’b’an k’ehomaq reetal, ink’a’ ke’t’ane’. Ut k’ehomaq reetal, eb’ li wankeb’ sa’ li tz’alam a’aneb’ laj Lamanita ut laj Nefita li risihomeb’ chaq rib’.

28 Ut kik’ulman naq ke’moye’ xb’aan jun choql re aq’ojyin, ut kichal anchal jun xik’ob’aal xiw sa’ xb’eeneb’.

29 Ut kik’ulman naq kichal jun axyaab’ kuxej chanchan sa’ xb’een chaq li choql re q’ojyin, li kixye: Chejal eek’a’uxl, chejal eek’a’uxl, ut meesik’ chik xsachb’aleb’ inmoos li keb’intaqla eere re xch’olob’ankil li chaab’il esilal.

30 Ut kik’ulman, naq ke’rab’i lix yaab’ kuxej a’in, ut k’ehomaq reetal naq maawa’ xyaab’ li kaaq, chi moko xyaab’ li nimla kawil eek’ank; k’ehomaq b’an reetal, a’an jun aq’unil xyaab’ kuxej tz’aqal xq’unil xyaab’, chanchan naq sa’ hasb’ na’ab’iman, ut ki’ok toj sa’ xyi li aamej—

31 Ut us ta q’un li xyaab’ kuxej, k’ehomaq reetal, kichiiq’an li ch’och’ chi numtajenaq, ut ke’chiq’chot wi’chik xtz’akil li tz’alam, chanchan naq ok re chi uq’e’k chi ch’och’; ut k’ehomaq reetal, li choql re q’ojyin, li kimoyok reheb’, ink’a’ ki’isiik—

32 Ut k’ehomaq reetal, kichal wi’chik lix yaab’ kuxej, ut kixye: Chejal eek’a’uxl, chejal eek’a’uxl, xb’aan naq taanach’oq chaq li awa’b’ejihom re choxa; ut meesik’ chik xsachb’aleb’ inmoos. Ut kik’ulman naq kichiiq’an wi’chik li ch’och’, ut ke’chiq’chot li tz’ak.

33 Ut jo’kan ajwi’ rox sut kichal lix yaab’ kuxej, ut kixye reheb’ sachb’a-ch’oolejil aatin li ink’a’ naru nayehe’ xb’aan winq; ut ke’chiq’chot wi’chik li tz’ak, ut kichiiq’an li ch’och’ chanchan naq ok re chixjachb’al rib’ sa’ xyi.

34 Ut kik’ulman naq ink’a’ ke’ru laj Lamanita chi eelelik xb’aan li choql re q’ojyin li kimoyok reheb’; relik chi yaal, ut jo’kan ajwi’ ink’a’ ke’ru chi eek’ank xb’aan li xiw li kichal sa’ xb’eeneb’.

35 Anajwan kiwan jun sa’ xyanqeb’, aj Nefita naq kiyo’la chaq, li kiwan chaq junxil sa’ lix iglees li Dios, a’b’an kirisi chaq rib’ rik’ineb’.

36 Ut kik’ulman naq a’an kixsutq’isi rib’, ut k’ehomaq reetal, kiril chiru li choql re q’ojyin li rilob’aal laj Nefi ut laj Lehi; ut k’ehomaq reetal, ake’lemtz’un ru chi numtajenaq, chanchan rilob’aaleb’ li anjel. Ut kiril naq ke’xtaqsi rilob’aaleb’ sa’ choxa, ut wankeb’ chi chanchan naq yookeb’ chi aatinak malaj chixtaqsinkil xyaab’eb’ xkux chiru junaq li ani ilb’il xb’aaneb’.

37 Ut kik’ulman naq li winq a’in kixjap re chiru li ch’utch’uukil tenamit, naq te’xsutq’isi rib’ ut te’iloq. Ut k’ehomaq reetal, kik’ehe’ wankil reheb’ re te’xsutq’isi rib’ ut te’iloq, ut ke’xk’e reetal li rilob’aal laj Nefi ut laj Lehi.

38 Ut ke’xye re li winq: K’e reetal, k’a’ru xyaalalil chixjunil li k’a’aq re ru a’in, ut ani aj-ik’in neke’aatinak li winq a’in?

39 Anajwan aj Aminadab xk’ab’a’ li winq. Ut laj Aminadab kixye reheb: Neke’aatinak rik’ineb’ lix anjel li Dios.

40 Ut kik’ulman naq eb’ laj Lamanita ke’xye re: aK’a’ru taqab’aanu, re taa’isiiq chaq li choql re q’ojyin li namoyok qu?

41 Ut laj Aminadab kixye reheb: Tento ateejal eek’a’uxl, ut tex’elajinq chiru lix yaab’ kuxej, toj reetal naq taawanq beepaab’aal chirix li Kristo, li kik’ute’ xyaalal cheru xb’aan laj Alma, ut laj Amulek, ut laj Tzeesrom; ut naq teeb’aanu a’in, taa’isiiq chaq li choql re q’ojyin li namoyok eeru.

42 Ut kik’ulman naq chixjunileb’ ke’ok chi elajink chiru lix yaab’ xkux a’an li kichiq’ok chaq re li ch’och’; relik chi yaal, ke’elajin toj reetal naq ki’isiik chaq li choql re q’ojyin.

43 Ut naq ke’xb’eresi li rilob’aal chixsutameb’, ut ke’ril naq isinb’il li choql re q’ojyin li kimoyok chaq ruheb’, k’ehomaq reetal, kik’ulman naq ke’ril naq asutub’anb’ileb’, relik chi yaal, li junjunq chi aamej, xb’aan jun xaqal li xam.

44 Ut laj Nefi ut laj Lehi wankeb’ sa’ xyiheb’; relik chi yaal, sutsuukeb’; relik chi yaal, wankeb’ chanchan sa’ xyi jun xam naxamnak, a’b’an moko ke’rahob’tesiik ta xb’aan, chi moko kixk’at xtz’akil li tz’alam; ut ke’nujak rik’in li asahil ch’oolejil a’an li ink’a’ naru xyeeb’al, ut li nujenaq chi loq’alil.

45 Ut k’ehomaq reetal, lix aLoq’laj Musiq’ li Dios kikub’e chaq sa’ choxa, ut ki’ok sa’ xch’ooleb’, ut ke’nujak chanchan rik’in xam, ut ke’ru bchixyeeb’al sachb’a-ch’oolejil aatin.

46 Ut kik’ulman naq kichal jun xyaab’ kuxej rik’ineb’, relik chi yaal, jun sahil xyaab’ kuxej, chanchan jun hasb’, ut kixye:

47 aTuqtuukilal, tuqtuukilal chiwanq eerik’in, xb’aan eepaab’aal chirix li Q’axal Raaro inb’aan, li kiwan chalen chaq sa’ xk’ojlajik li ruchich’och’.

48 Ut anajwan, naq ke’rab’i a’in ke’xb’eresi li rilob’aal taqe’q chanchan naq te’ril b’ar kichal wi’ lix yaab’ kuxej, ut k’ehomaq reetal, ke’ril chi ateeliik li choxa; ut ke’kub’e chaq li anjel sa’ choxa ut ke’k’anjelak chiruheb’.

49 Ut ke’wan tana’ oxib’ cient chi aamej li ke’ilok ut ke’ab’ink re li k’a’aq re ru a’in, ut kiyehe’ reheb’ naq te’xik ut misach xch’ooleb’, chi moko taawiib’anq xch’ooleb’.

50 Ut kik’ulman naq xkoheb’, ut ke’k’anjelak chiru li tenamit, ut chiru chixjunil li na’ajej sa’ xsutam ke’xch’olob’ chixjunil li k’a’aq re ru ke’rab’i ut ke’ril chaq, jo’kan naq lix k’ihaleb’ laj Lamanita ke’q’unb’esiik xch’ool xb’aaneb’, xb’aan xnimal li rilomeb’ li ke’xk’ul chaq.

51 Ut jo’ k’ihaleb’ li ake’q’unb’esiik xch’ool ke’xkanab’ xk’anjeleb’aal re pleet, jo’ ajwi’ lix kaqaleb’ xch’ool ut li na’leb’ kanab’anb’il chaq xb’aan lix yuwa’eb’.

52 Ut kik’ulman naq ke’xq’axtesi reheb’ laj Nefita li ch’och’ kiwan wi’ chaq reechanihomeb’.