1 Ut kik’ulman sa’ li xkab’ roxk’aal chihab’ rawa’b’ejileb’ laj raqol aatin, chirix naq laj Moronihah kixxaqab’ wi’chik li tuqtuukilal reheb’ laj Nefita rik’ineb’ laj Lamanita, k’ehomaq reetal naq maajun kiwan re taa’ok sa’ li raqleb’aal aatin; jo’kan naq ki’ok wi’chik chi wank wech’ok-ib’ sa’ xyanq li tenamit chirix ani taa’ok sa’ li raqleb’aal aatin.

2 Ut kik’ulman naq laj Helaman, a’an ralal laj Helaman, kixaqab’aak re taa’ok sa’ li raqleb’aal aatin, xb’aan xyaab’ xkux li tenamit.

3 A’b’an k’ehomaq reetal, laj ^aKixkumen, li kikamsink chaq re laj Pahoran, ki’ok chiroyb’eninkil xsachb’al ajwi’ laj Helaman; ut xaqab’anb’il xwankil xb’aan lix molam, li ke’ok chaq sa’ jun sumwank naq maa’ani taanawoq re lix maa’usilal.

4 Xb’aan naq kiwan jun aj ^aGadianton, li q’axal seeb’ xna’leb’ rik’in k’iila aatin, ut rik’in ajwi’ xk’anjel, re xk’anjelankil li muqmuukil k’anjel re kamsink ut re maq’ok; jo’kan naq a’an ki’ok choq’ aj jolominel re lix molam laj Kixkumen.

5 Jo’kan naq kixq’unb’esiheb’ xch’ool, jo’ ajwi’ laj Kixkumen, naq wi te’xk’ojob’ a’an sa’ li raqleb’aal aatin, a’an tixk’e reheb’ li wankeb’ sa’ lix molam naq te’k’eemanq sa’ wankilal ut sa’ awa’b’ejil sa’ xyanq li tenamit; jo’kan naq laj Kixkumen kixsik’ xsachb’al laj Helaman.

6 Ut naq yoo chi xik sa’ xjayal li raqleb’aal aatin re xsachb’al laj Helaman, k’ehomaq reetal, kik’ulman naq jun reheb’ lix moos laj Helaman, rik’in naq a’an wanjenaq chaq aran chi q’eq, ut kixtaw chaq xnawom, chi jalb’il ru li rilob’aal, chirix li k’uub’anb’il na’leb’ li k’ojob’anb’il xb’aan li molam a’in re xsachb’al laj Helaman—

7 Ut kik’ulman naq kixk’ul laj Kixkumen, ut kixk’ut jun eetalil chiru; jo’kan naq laj Kixkumen kixk’e chixnaw k’a’ru li rajom, ut kiraj naq tixb’eresi a’an sa’ li raqleb’aal aatin re taaruuq tixkamsi laj Helaman.

8 Ut chirix naq lix moos laj Helaman kixnaw chixjunil lix ch’ool laj Kixkumen, ut chan ru naq li rajom a’an kamsink, ut naq a’an rajomeb’ chixjunil li wankeb’ sa’ lix molam kamsink, ut maq’ok, ut xk’ulb’al xwankileb’ (a’an ut a’in lix ^amuqmuukil k’uub’anb’il na’leb’eb’, ut lix molameb’) lix moos laj Helaman kixye re laj Kixkumen: Yo’o aran sa’ li raqleb’aal aatin.

9 Anajwan kisaho’ xch’ool laj Kixkumen chi numtajenaq rik’in a’in, xb’aan naq kixk’oxla naq tixtaw lix k’oxlahom; a’b’an k’ehomaq reetal, lix moos laj Helaman, naq yookeb’ chi xik sa’ li raqleb’aal aatin, kixk’ob’ laj Kixkumen toj chi raam, jo’kan naq kit’ane’ chi kamenaq chi ink’a’ na’aanak. Ut a’an xko’o sa’ aanil ut kixye re laj Helaman chixjunil li k’a’aq re ru kiril chaq, ut kirab’i chaq, ut kixb’aanu chaq.

10 Ut kik’ulman naq laj Helaman kooxtaqla xchapb’al li jun molam a’an chi aj maq’onel ut muqmuukil aj kamsinel, re naq taataqlamanq xkamsinkileb’ jo’ chanru li chaq’rab’.

11 A’b’an k’ehomaq reetal, naq kixtaw laj Gadianton naq ink’a’ kisutq’i laj Kixkumen, kixuwak maare anchal taasache’q; jo’kan naq kixtaqla naq lix molam te’xik chirix. Ut ke’eelelik chaq sa’ li ch’och’, chiru jun muqmuukil b’e, sa’ li yamyookil ch’och’; ut chi jo’kan, naq laj Helaman kixtaqla xchapb’aleb’ maab’ar ke’ru chi tawmank.

12 Ut moqon taayeemanq chik resil laj Gadianton a’in. Ut chi jo’kan kiraqe’ li xkab’ roxk’aal chihab’ rawa’b’ejileb’ laj raqol aatin sa’ xb’een lix tenamit laj Nefi.

13 Ut k’ehomaq reetal, sa’ xraqik li hu a’in teeril naq laj ^aGadianton a’in kiwan choq’ xsachikeb’, relik chi yaal, ka’ch’in chik ma xb’aan a’an kisache’ chixjunil lix tenamit laj Nefi.

14 K’ehomaq reetal, moko ninye ta xraqik lix hu laj Helaman, ninye b’an xraqik lix hu laj Nefi, li xwisi wi’ chaq chixjunil li esilal xintz’iib’a.