1 Mo nao i bin hapen se long foti mo tri yia blong rul blong ol jaj, i no bin gat rao long medel blong ol pipol blong Nifae, be i gat wan smol fasin blong hae tingting we i stap insaed long jos, we i mekem se i gat sam smol fasin blong pulaot long medel blong ol pipol, we ol problem ia oli stretem kolosap long en blong nambafoti mo tri yia.

2 Mo i no bin gat rao long medel blong ol pipol long nambafoti mo fo yia; mo tu, i no bin gat tumas rao long nambafoti mo faef yia.

3 Mo i bin hapen long nambafoti mo sikis yia, yes, i gat plante rao mo plante fasin blong pulaot; long ol samting ia, i bin gat wan bigfala namba we i aot long graon blong Sarahemla, mo oli go long graon long ^aNot blong tekem graon.

4 Mo oli bin wokbaot i go longwe tumas, inaf blong mekem se oli kam kasem ol ^abigfala wota mo plante reva.

5 Yes, mo tu, oli bin go long evri pat blong kantri, long eni pat we oli no mekem i emti yet mo i gat timba, from plante pipol we oli bin stap long graon bifo.

6 Mo nao i no bin gat wan pat blong graon we i emti, be long saed blong timba nomo; be from oli bin ^aprapa spolem gud ol pipol we oli bin stap long graon ia bifo, nao oli singaotem graon ia, ^bemti.

7 Mo from we i bin gat smol namba nomo blong ol timba long fes blong graon, be ol pipol we oli go aot oli kam blong gat fulap save long ol wok blong simen; from hemia, oli bin bildim ol haos simen, oli stap long ol haos ia.

8 Mo i bin hapen se oli kam plante mo oli go olbaot, mo oli aot long graon long Saot i go long graon long Not, mo oli go olbaot inaf blong mekem se oli stat blong kavremap fes blong ful wol, stat long solwota long Saot kasem solwota long Not, stat long ^asolwota long Wes kasem long solwota long Is.

9 Mo ol pipol we oli bin stap long graon long Not, oli bin stap long ol tenet, mo long ol haos simen, mo oli letem eni kaen tri we i kam antap long fes blong graon se bae i mas gro i kam antap, blong mekem se long taem we bae i kam oli save gat ol timba blong bildim ol haos blong olgeta, yes, ol bigtaon blong olgeta, mo ol tempol blong olgeta, mo ol haos blong prea blong olgeta, mo ol ples blong wosip blong olgeta, mo evri kaen haos blong olgeta.

10 Mo i bin hapen se from we timba i no plante tumas long graon long Not, oli mekem plante oli kam tru long ^asip.

11 Mo olsem ia nao oli bin mekem blong ol pipol long graon long Not, blong oli save bildim plante bigtaon, long wud tugeta wetem simen.

12 Mo i bin hapen se i gat plante long ol ^apipol blong Amon, we oli Ol Man blong Leman folem laen we oli bon long hem, olgeta tu, oli go long graon ia.

13 Mo nao, i gat plante histri we oli raetem long saed blong ol wok blong pipol ia, plante long ol pipol ia nomo oli bin raetem, mo ol buk ia oli plante tumas mo oli tokbaot evri smolsmol samting long saed blong olgeta.

14 Be luk, wan handred pat blong ol wok blong pipol ia, yes, histri blong Ol Man blong Leman mo Ol Man blong Nifae, mo ol wo blong olgeta, mo ol rao, mo ol fasin blong pulaot, mo ol prijing blong olgeta, mo ol profesi blong olgeta, mo ol wok blong sendem ol saplae long sip blong olgeta, mo ol wok blong olgeta blong bildim ol sip, mo ol wok blong olgeta blong bildim ol ^atempol, mo blong ol haos blong prea mo ol ples blong wosip blong olgeta, mo ol stret mo gud fasin blong olgeta, mo ol fasin nogud blong olgeta, mo ol fasin blong olgeta blong kilimded man, mo ol fasin blong stil blong olgeta, mo ol fasin blong stil blong olgeta long taem blong faet, mo evri kaen fasin blong ol rabis sin mo ol fasin blong stap slip olbaot wetem man o woman, oli no save stap insaed long buk ia.

15 Be luk, i gat plante buk mo plante histri blong evri kaen, mo Ol Man blong Nifae nao oli bin raetem olgeta moa.

16 Mo Ol Man blong Nifae oli bin ^apasem ol histri ia long wan jeneresen i go daon long narafala jeneresen, go kasem taem we oli foldaon long fasin blong brekem loa mo ol enemi blong olgeta oli kilimded olgeta, oli stilim olgeta long taem blong faet, mo oli lukaotem olgeta blong kasem olgeta, mo oli ronem olgeta i go, mo oli kilimded olgeta, mo oli seraotem olgeta long fes blong wol, mo oli miksim olgeta wetem Ol Man blong Leman kasem taem we oli ^bnomo singaotem olgeta Ol Man blong Nifae, oli kam ol nogud man, mo wael, mo prapa wael, yes, oli kam Ol Man blong Leman.

17 Mo nao mi gobak bakegen long histri blong mi; from hemia, wanem we mi bin tokbaot i hapen afta we i gat ol bigfala rao, mo ol fasin blong gat trabol, mo ol wo, mo ol fasin blong pulaot, long medel blong ol pipol blong Nifae.

18 Foti mo sikis yia blong rul blong ol jaj i bin en;

19 Mo i bin hapen se i stil gat bigfala rao long graon, yes, iven long nambafoti mo seven yia, mo tu, long nambafoti mo eit yia.

20 Be Hileman i tekem jea blong jajmen wetem jastis mo stret jastis; yes, hem i wokhad blong obei ol loa, mo ol jajmen, mo ol komanmen blong God; mo hem i mekem ol samting we i stret long ae blong God oltaem; mo hem i wokbaot folem ol fasin blong papa blong hem, inaf blong mekem se hem i kam antap gud long graon.

21 Mo i bin hapen se hem i gat tu boe. Hem i givim long fas bon nem blong ^aNifae, mo long las bon nem blong ^bLihae. Mo tufala i stat blong gro i kam antap, long Lod.

22 Mo i bin hapen se ol wo mo ol rao oli stat blong stop, smol nomo, long medel blong ol pipol blong Ol Man blong Nifae, long en blong foti mo eit yia blong rul blong ol jaj ova long ol pipol blong Nifae.

23 Mo i bin hapen long nambafoti mo naen yia blong rul blong ol jaj, i gat pis oltaem i stanap long graon, evri ples, be ol sikret grup nomo we ^aGadianton man blong stil i stanemap long ol pat blong graon we moa pipol i stap long olgeta, we long taem ia olgeta we oli lidim gavman oli no bin save long olgeta; from hemia, oli no bin prapa spolem gud olgeta blong oli nomo gat long graon ia.

24 Mo i bin hapen se long sem yia ia i gat fasin blong kam antap gud long jos we i bigwan tumas, inaf blong mekem se i gat ol taosen we oli joenem olgeta nomo long jos mo oli kasem baptaes afta we oli sakem sin.

25 Mo sakses blong jos i bigwan tumas, mo ol blesing we Lod i kapsaetem long ol pipol oli plante tumas, mekem se ol hae pris mo ol tija olgeta bakegen oli bin sapraes i bitim mak.

26 Mo i bin hapen se wok blong Lod i kam antap gud mekem se oli baptaesem mo joenem plante sol i kam long jos ia blong God, yes, go kasem ol ten blong ol taosen man.

27 Olsem ia nao yumi save luk se Lod i gat sore long olgeta evriwan we bae oli singaotem tabu nem blong hem wetem ol tru hat blong olgeta.

28 Yes, olsem ia nao yumi luk se ^aget blong heven i open long ^bevri man, long olgeta tu we bae oli biliv long nem blong Jisas Kraes, we i Pikinini blong God.

29 Yes, yumi luk se eni man we i wantem, i save holemtaet ^atoktok blong God, we i ^blaef mo i gat paoa, we bae i save brekem ol trik mo ol rop blong trap mo ol plan blong devel, mo lidim man blong Kraes long wan rod we i stret mo i ^dno isi i go long narasaed long ^ebigfala hol blong harem nogud we i no gat en, we oli rere i stap blong solemdaon ol nogud man—

30 Mo putum sol blong olgeta, yes, sol blong olgeta we oli nomo save ded bakegen, long ^araet han blong God long kingdom blong heven, blong sidaon wetem Ebraham, mo Aesak, mo wetem Jekob, mo wetem evri tabu papa blong yumi, blong oli nomo go aot.

31 Mo long yia ia, i bin gat glad oltaem long graon blong Sarahemla, mo long evri eria raonabaot, mo tu, long evri graon we Ol Man blong Nifae oli holemtaet.

32 Mo i bin hapen se i gat pis mo bigfala glad we i tumas long ol narafala pat blong foti mo naen yia; yes, mo tu, i bin gat pis oltaem mo bigfala glad long fifti yia blong rul blong ol jaj.

33 Mo long fifti mo wan yia blong rul blong ol jaj i bin gat pis tu, be i gat hae tingting we i stat blong go insaed long jos—i no go insaed long jos ia blong God, be insaed long hat blong ol pipol we oli stap talemaot se oli blong jos ia blong God—

34 Mo oli bin leftemap olgeta long ^ahae tingting, kasem we oli givim hadtaem long plante long ol brata blong olgeta. Nao hemia i wan nogud fasin we i bigwan, we i mekem se ol pipol we tingting blong olgeta i stap daon moa blong oli safa ol bigfala hadtaem, mo blong wokbaot tru long plante hadtaem.

35 Be oli bin ^alivim kakae mo oli bin ^bprea plante taem, mo oli kam moa strong mo moa strong long fasin blong olgeta blong ^dputum tingting i stap daon, mo oli kam moa strong moa mo moa strong moa long fet blong Kraes, mekem se oli fulumap sol blong olgeta wetem glad mo fasin blong leftemap tingting blong harem gud bakegen, hem i mekem se hat blong olgeta i kam ^eklin mo ^ftabu, we fasin blong mekem i kam tabu i kam from we oli ^ggivim hat blong olgeta long God.

36 Mo i bin hapen se fifti mo seken yia i en wetem pis tu, be ol fasin blong hae tingting we i bigwan tumas i go insaed long hat blong ol pipol; mo hemia i from ol ^arij samting blong olgeta we oli bigwan tumas mo oli kam antap gud long graon; mo bigfala hae tingting ia i bin gro long olgeta long evri dei.

37 Mo i bin hapen long fifti mo tri yia blong rul blong ol jaj, Hileman i ded, mo fas bon boe blong hem Nifae i stat blong rul long ples blong hem. Mo i bin hapen se hem i tekem jea blong jajmen wetem jastis mo stret jastis; yes, hem i obei ol komanmen blong God, mo hem i wokbaot folem ol fasin blong papa blong hem.