1 Mo i bin hapen se ol pipol oli divaedem olgeta long ol grup, gogo blong mekem se oli seraot i go long ples ia mo long ples ia, mo oli go long ol defren rod blong olgeta, mo livim Nifae i stap hemwan, olsem we hem i stanap long medel blong olgeta.

2 Mo i bin hapen se Nifae i go long rod blong hem i go long haos blong hem, hem i stap ^atingting hevi long ol samting we Lod i bin soem long hem.

3 Mo i bin hapen se taem we hem i stap tingting hevi olsem ia nao—hem i harem nogud plante from fasin nogud blong ol pipol blong Ol Man blong Nifae, ol sikret wok blong olgeta blong tudak, mo ol fasin blong kilim man i ded blong olgeta, mo ol stil blong olgeta, mo evri kaen rabis fasin—mo i bin hapen se taem we hem i stap tingting hevi olsem ia long hat blong hem, luk, wan voes i bin kam long hem, i talem se:

4 “Mi mi blesem yu, Nifae, from ol samting ia we yu bin mekem; from mi luk se yu no bin ^aslak blong talemaot toktok, we mi bin givim long yu, long ol pipol ia. Mo yu no bin fraet long olgeta, mo yu no bin lukaot blong holemtaet ^blaef blong yu, be yu lukaotem wanem we mi mi ^dwantem, mo blong obei ol komanmen blong mi.

5 Mo nao, from yu no bin slak blong mekem samting ia, luk, bae mi blesem yu blong oltaem; mo bae mi mekem yu wan strong man long ol toktok mo long aksen, long fet mo long ol wok; yes, iven blong mekem se ^aevri samting bae i hapen long yu folem ^btoktok blong yu, from bae yu ^dno askem samting we i agensem tingting blong mi.

6 Luk, yu yu Nifae, mo mi mi God. Luk, mi talemaot samting ia long yu long fes blong ol enjel blong mi, se bae yu gat paoa ova long pipol ia, mo bae yu kilim graon wetem ^ahadtaem blong kasem kaekae mo wetem ol sik, mo fasin blong prapa spolem gud samting, folem fasin nogud blong ol pipol ia.

7 Luk, mi givim long yu paoa, se wanem we yu ^asilim long wol bae mi silim long heven; mo wanem we yu tekemaot long wol bae mi tekemaot long heven; mo olsem ia nao bae yu gat paoa long medel blong pipol ia.

8 Mo olsem ia nao, sapos bae yu talem long tempol ia se bae i brokbrok long tu, bae i hapen.

9 Mo sapos bae yu talem long ^abigfala hil ia, ‘Yu foldaon mo kam smut,’ bae i hapen.

10 Mo luk, sapos bae yu talem se God bae i kilim ol pipol ia, bae i kam blong hapen.

11 Mo nao luk, mi givim oda long yu, se bae yu go mo talemaot long ol pipol ia, se olsem ia nao Lod God i talem, hem We I Gat Olgeta Paoa: ‘Sapos yufala i no sakem sin bae Lod i kilim yufala kasem taem we yufala i ^aded.’”

12 Mo luk, nao i bin hapen se taem we Lod i talem ol toktok ia long Nifae, Nifae i stop mo i no go long haos blong hem, be i gobak long ol grup blong ol pipol we oli bin seraot olbaot long fes blong graon, mo i stat blong talemaot long olgeta toktok blong Lod we Lod i bin talem long hem, long saed blong ded blong olgeta sapos oli no sakem sin.

13 Nao luk, i nomata long bigfala merikel ia we Nifae i bin mekem blong talem long olgeta long saed blong ded blong jif jaj, oli mekem hat blong olgeta i kam strong, mo oli no lisin long ol toktok blong Lod.

14 From hemia, Nifae i bin talemaot long olgeta toktok blong Lod, se: “Sapos yufala i no sakem sin, olsem ia nao Lod i talem, bae mi kilim yufala kasem taem we yufala i ded”.

15 Mo i bin hapen se taem we Nifae i talemaot long olgeta trutok ia, luk, oli gohed blong mekem hat blong olgeta i kam strong mo oli no wantem lisin long ol toktok blong hem; from hemia, oli go agensem hem, mo oli lukaot long putum han blong olgeta long hem blong oli save sakem hem i go long kalabus.

16 Be luk, paoa blong God i bin stap wetem hem, mo oli no save tekem hem blong sakem hem i go long kalabus, from Spirit i tekem hem mo i karem hem i gowe, i aot long medel blong olgeta.

17 Mo i bin hapen se olsem ia nao hem i go tru long Spirit, long wan grup blong pipol i go long narafala grup blong pipol, hem i talemaot toktok blong God, go kasem taem we hem i talemaot samting ia long olgeta evriwan, o i sendem toktok ia i go long medel blong evri pipol.

18 Mo i bin hapen se oli no wantem lisin long ol toktok blong hem; mo i stat blong gat ol rao, inaf blong mekem se oli seraot agensem olgeta bakegen, mo oli stat blong kilimded olgetawan bakegen wetem naef blong faet.

19 Mo olsem ia nao seventi mo fas yia blong rul blong ol jaj ova long ol pipol blong Nifae i bin en.