1 Mo i bin hapen se taem we siksti mo tu yia blong rul blong ol jaj i en, evri samting ia oli bin hapen mo Ol Man blong Leman, bigfala pat blong olgeta, oli kam wan stret mo gud pipol, inaf blong mekem se ^astret mo gud fasin blong olgeta i bitim hemia blong Ol Man blong Nifae, from fasin blong olgeta blong stanap strong mo fasin blong olgeta blong stap strong long fet.

2 From luk, i bin gat plante long Ol Man blong Nifae we oli kam ^astronghed mo oli no wantem sakem sin mo oli nogud bigwan, inaf blong mekem se oli sakemaot toktok blong God mo evri prijing mo profesi we i bin kam long medel blong olgeta.

3 Nomata long hemia, pipol blong jos i bin gat bigfala glad from Ol Man blong Leman oli bin jenisim laef, yes, from jos ia blong God, we i stanap long medel blong olgeta. Mo oli ^afelosip, wan wetem narawan, mo oli hapi wan wetem narawan, mo oli gat bigfala glad.

4 Mo i bin hapen se plante long Ol Man blong Leman oli kam daon long graon blong Sarahemla, mo oli talemaot long ol pipol blong Ol Man blong Nifae olsem wanem we oli bin ^ajenisim laef blong olgeta, mo oli askem strong long olgeta blong gat fet mo blong sakem sin.

5 Yes, mo plante oli prij wetem paoa we i bigwan tumas mo atoriti, we i mekem tingting blong plante long olgeta i stap daon olgeta, blong stap olsem ol man we oli folem God mo Sipsip wetem tingting we i stap daon.

6 Mo i bin hapen se plante long Ol Man blong Leman oli go long graon long Not; mo tu, Nifae mo Lihae i go long ^agraon long Not, blong prij long ol pipol. Mo olsem ia nao siksti mo nambatri yia i bin en.

7 Mo luk, i bin gat pis long evri graon, inaf blong mekem se Ol Man blong Nifae oli go long eni pat blong graon we oli wantem, oli go long Ol Man blong Nifae o long Ol Man blong Leman.

8 Mo i bin hapen se Ol Man blong Leman tu oli go long eni ples we oli wantem, oli go long Ol Man blong Leman o long Ol Man blong Nifae; mo olsem ia nao oli fri blong wok wan wetem narawan long olgeta, blong pem mo salem samting, mo blong winim samting, folem wanem oli wantem.

9 Mo i bin hapen se oli kam rij tumas, Ol Man blong Leman tugeta wetem Ol Man blong Nifae; mo oli gat ol gol, mo ol silva, mo evri defren kaen aean we i gudgudfala, we i plante tumas tugeta long graon long Saot wetem graon long Not.

10 Nao graon long Saot oli bin singaotem Lihae, mo graon long Not oli bin singaotem ^aMyulek, we i folem nem blong boe blong Sedekaea; from Lod i bin tekem Myulek i go long graon long Not, mo Lihae i go long graon long Saot.

11 Mo luk, i gat evri kaen gol long tufala graon ia, mo silva, mo ol gudgudfala aean blong evri kaen; mo i gat tu ol gudgudfala wokman, we oli wok long ol defren kaen aean mo oli wokem gud olgeta; mo olsem ia nao oli kam rij.

12 Oli planem plante plante sid, long Not tugeta wetem long Saot; mo oli gro gud tumas; long Not tugeta wetem long Saot. Mo ol pipol ia oli kam plante mo kam strong tumas long graon. Mo oli fidim plante grup blong animol mo ol buluk, yes, plante animol we oli fatfat.

13 Luk ol woman blong olgeta oli bin wok mo mekem tred, mo oli mekem evri kaen kaliko, kaliko we oli somap gud mo ol kaliko blong evri kaen, blong kavremap bodi blong olgeta we i neked. Mo olsem ia nao siksti mo fo yia i bin pas i go wetem pis.

14 Mo long nambasiksti mo faef yia oli bin gat bigfala glad mo pis tu, yes, plante prijing mo plante profesi long saed blong ol samting we bae i kam. Mo olsem ia nao siksti mo faef yia i bin pas i go.

15 Mo i bin hapen se long nambasiksti mo sikis yia blong rul blong ol jaj, luk, wan han we oli no save hem i bin kilimded ^aSesoram long taem we hem i bin sidaon long jea blong jajmen. Mo i bin hapen se long semfala yia, we boe blong hem, we ol pipol oli bin jusum blong tekem ples blong hem, oli kilim hem i ded tu. Mo olsem ia nao siksti mo sikis yia i bin en.

16 Mo long stat blong siksti mo seven yia ol pipol oli bin stat blong kam nogud tumas bakegen.

17 From luk, Lod i bin blesem olgeta longtaem wetem ol rij samting blong wol mekem se oli no mekem olgeta oli kam kros, oli faet, o mekem blad i ron; from hemia, oli stat blong putum hat blong olgeta long ol rij samting blong olgeta; yes, oli stat blong lukaotem blong kasem samting blong mekem se oli save leftemap olgeta, blong wan i moa hae long narafalawan; from hemia, oli stat blong mekem ol fasin blong kilim man i ded long ^asikret, mo blong stil mo blong tekem ol samting long taem blong faet, blong oli save kasem mane.

18 Mo nao luk, olgeta man blong kilim man i ded mo olgeta blong tekem ol samting long taem blong wo, oli wan grup we Kiskumen mo ^aGadianton i bin statem. Mo nao i bin hapen se i gat plante long olgeta, we long medel blong Ol Man blong Nifae, oli blong grup blong Gadianton. Be luk, oli moa plante long medel blong Ol Man blong Leman we oli moa nogud. Mo oli bin singaotem olgeta Ol Man blong Gadianton blong stil mo kilim man i ded.

19 Mo hem i olgeta ia we oli bin kilimded jif jaj Sesoram, mo boe blong hem, taem we oli stap long jea blong jajmen; mo luk, oli no faenemaot olgeta.

20 Mo nao i bin hapen se taem we Ol Man blong Leman oli faenem se oli gat ol man blong stil long medel blong olgeta, oli harem nogud tumas; mo oli yusum evri wei long paoa blong olgeta blong prapa spolem gud olgeta blong oli aot long fes blong wol.

21 Be luk, Setan i bin tanem hat blong pat we i moa bigwan blong Ol Man blong Nifae, inaf blong mekem se oli joen wetem ol grup blong ol man blong stil, mo oli mekem ol kavenan blong olgeta mo ol strong promes blong olgeta, se bae oli lukaotem gud mo sevem wanwan long olgeta long eni kaen problem we bae oli fesem, blong mekem se oli no mas safa from ol fasin blong olgeta blong kilim man i ded, mo ol fasin blong olgeta blong tekem ol samting long taem blong wo, mo ol fasin blong olgeta blong stil.

22 Mo i bin hapen se oli gat ol saen blong olgeta, yes, ol ^asikret saen blong olgeta, mo ol sikret toktok blong olgeta; mo hemia blong oli save luksave wan brata we i bin mekem kavenan, blong eni kaen fasin nogud we brata blong hem bae i mekem, bae hem i no kasem trabol long brata blong hem, o olgeta we oli blong grup blong hem, we oli bin mekem kavenan ia.

23 Mo olsem ia nao oli save kilim man i ded, mo stil long taem blong wo, mo stil, mo mekem ol fasin blong stap slip olbaot mo evri kaen fasin nogud, agensem ol loa blong kantri blong olgeta, mo tu, ol loa blong God blong olgeta.

24 Mo eni man long olgeta we i blong grup blong olgeta we i talemaot long wol long saed blong ol ^afasin nogud blong olgeta mo ol rabis sin blong olgeta, bae hem i mas pas long kot, i no folem ol loa blong kantri blong olgeta, be folem ol loa blong fasin nogud blong olgeta, we Gadianton mo Kiskumen nao i bin givim.

25 Nao luk, hem i ol sikret ^astrong promes mo ol kavenan ia nao we i mekem Alma i givim oda long boe blong hem se oli no mas go olbaot long wol, from nogud ol samting ia bae oli wan wei blong karem ol pipol oli go daon go kasem taem oli prapa spolem nogud olgeta we oli ded evriwan.

26 Nao luk, ol ^asikret strong promes mo ol kavenan ia oli no bin go long Gadianton aot long ol histri we Hileman i bin kasem; be luk, oli bin go long hat blong Gadianton tru long ^bsemfala man we i bin giaman long ol fas mama mo papa blong yumi blong tekem mo kakae frut we i no blong kakae—

27 Yes, semfala man ia we i bin plan wetem ^aKen, se sapos hem i kilimded brata blong hem Ebel, bae wol i no save. Mo hem i stap plan wetem Ken mo olgeta we oli folem hem stat long tetaem ia i go.

28 Mo tu, hem i bin semfala man ia we i putum insaed long hat blong ol pipol blong ^abildim wan taoa we i hae inaf blong oli save go long heven. Mo hem i semfala man we i lidim ol pipol we i kam long taoa ia oli kam insaed long graon ia; we i pulpulum ol wok blong tudak mo ol rabis sin i go olbaot long ful fes blong graon kasem taem we hem i pulum ol pipol oli go daon blong prapa spolem gud olgeta blong oli lus ^bfulwan, mo blong go long wan hel we i no gat en.

29 Yes, hem i semfala man we i bin putum insaed long hat blong ^aGadianton blong gohed long ol wok blong tudak, mo blong kilim man i ded long sikret; mo hem i karem samting ia i go stat long stat blong man i go kasem taem ia.

30 Mo luk, hem i hem we i ^astamba blong sin. Mo luk, hem i stap gohed long ol wok blong tudak blong hem mo kilim man i ded long sikret, mo i pasem daon ol plan blong olgeta, mo ol strong promes blong olgeta, mo ol kavenan blong olgeta, mo ol plan blong olgeta blong fasin nogud we i rabis stret, stat long wan jeneresen i go long narafala jeneresen folem olsem we hem i save kasem blong holem hat blong ol pikinini blong ol man.

31 Mo nao luk, hem i bin gat bigfala kontrol long hat blong Ol Man blong Nifae; yes, inaf blong mekem se oli kam nogud tumas; yes, bigfala pat long olgeta i tanem olgeta aot long rod blong stret mo gud fasin, mo oli ^apurumbut andanit long ol leg blong olgeta, ol komanmen blong God, mo oli tanem olgeta i go long ol rod blong olgetawan nomo, mo oli bildimap long olgeta bakegen, ol aedol long ol gol blong olgeta mo ol silva blong olgeta.

32 Mo i bin hapen se ^ai no afta plante yia, evri rabis fasin ia i kam long olgeta, inaf blong mekem se wan bigfala pat blong samting ia i kam long olgeta long nambasiksti mo seven yia blong rul blong ol jaj ova long ol pipol blong Nifae.

33 Mo oli gro long ol rabis fasin blong olgeta long nambasiksti mo eit yia tu, hemia i bin mekem se olgeta we oli gat stret mo gud fasin oli harem nogud bigwan mo kraekrae bigwan.

34 Mo olsem ia nao yumi luk se Ol Man blong Nifae oli stat blong kam slak from oli lusum bilif, mo gro long fasin nogud mo ol rabis sin, taem we Ol Man blong Leman oli stat blong gro bigwan tumas long save long saed blong God blong olgeta; yes, oli stat blong holem ol loa mo ol komanmen blong hem, mo blong wokbaot folem trutok mo stret fasin long fored blong hem.

35 Mo olsem ia nao yumi luk se Spirit blong Lod i stat blong ^akamaot long Ol Man blong Nifae, from ol fasin nogud mo strong hat blong olgeta.

36 Mo olsem ia nao yumi luk se Lod i stat blong kapsaetem Spirit blong hem long Ol Man blong Leman, from fasin blong olgeta we i isi mo oli wantem blong biliv long ol toktok blong hem.

37 Mo i bin hapen se Ol Man blong Leman oli lukaotem grup blong Ol Man Gadianton blong stil blong; mo oli prijim toktok blong God long medel blong olgeta moa nogud man, inaf blong mekem se, grup ia blong ol man blong stil, oli prapa spolem gud olgeta fulwan, oli aot long medel blong Ol Man blong Leman.

38 Mo i bin hapen se long narafalasaed, Ol Man blong Nifae oli bildimap olgeta mo sapotem olgeta, stat long olgeta we oli moa nogud, kasem taem we oli kavremap evri graon blong Ol Man blong Nifae, mo oli trikim bigfala pat long olgeta we oli gat stret mo gud fasin, kasem taem we oli kam daon blong biliv long ol wok blong olgeta, mo kasem mo tekem ol samting we oli stilim, mo blong joen wetem olgeta long ol sikret fasin blong olgeta blong kilim man i ded mo mekem ol sikret plan.

39 Mo olsem ia oli bin tekem stamba paoa blong gavman, inaf blong mekem se oli purumbut andanit long ol leg blong olgeta, mo wipim, mo smasem gud, mo tanem ol baksaed blong olgeta long ol ^apuaman, mo olgeta we i no stap flas, mo olgeta we oli stap folem God wetem tingting we i stap daon.

40 Mo olsem ia nao yumi luk se oli stap long wan rabis ples, mo oli kam ^araep blong kasem wan panis we i no gat en.

41 Mo i bin hapen se olsem ia nao nambasiksti mo eit yia blong rul blong ol jaj ova long ol pipol blong Nifae i bin en.