ជំពូកទី ២
ហេលេមិន ជាកូននៃហេលេមិនក្លាយទៅជាមេចៅក្រម — កាឌីអានតុនដឹកនាំបក្សពួកគិសគូមេន — អ្នកបម្រើរបស់ហេលេមិនសម្លាប់ គិសគូមេនចោល ហើយបក្សពួកកាឌីអានតុនរត់គេចចូលទៅក្នុងទីរហោស្ថាន។ ប្រមាណជាឆ្នាំ ៥០–៤៩ ម.គ.ស.។
១ហើយហេតុការណ៍បានកើតឡើងថា នៅឆ្នាំទីសែសិបពីរក្នុងរជ្ជកាលនៃពួកចៅក្រម ក្រោយពីមរ៉ូណៃហាបានកសាងសន្តិភាពឡើងវិញរវាងពួកសាសន៍នីហ្វៃ និងពួកសាសន៍លេមិន មើលចុះ គ្មាននរណាម្នាក់បំពេញវេទិកាជំនុំជំរះទេ ហេតុដូច្នេះហើយ ក៏ចាប់ផ្ដើមមានការទាស់ទែងគ្នាមួយទៀតនៅក្នុងចំណោមប្រជាជនថា តើនរណាត្រូវបំពេញវេទិកាជំនុំជំរះ។
២ហើយហេតុការណ៍បានកើតឡើងថា ហេលេមិនដែលត្រូវជាកូនរបស់ហេលេមិន ត្រូវបានតែងតាំងឡើងឲ្យបំពេញវេទិកាជំនុំជំរះដោយសំឡេងរបស់ប្រជាជន។
៣ប៉ុន្តែមើលចុះ កគិសគូមេន ជាអ្នកដែលធ្វើឃាតពេហូរ៉ាន បានដេកចាំបំផ្លាញហេលេមិនដែរ ហើយវាត្រូវបានគាំទ្រដោយបក្សពួករបស់វា ដែលបានចុះសេចក្ដីសញ្ញាមួយថា ពុំឲ្យនរណាម្នាក់ដឹងនូវអំពើទុច្ចរិតរបស់វាឡើយ។
៤ព្រោះមានតែកកាឌីអានតុនម្នាក់ ដែលជាមនុស្សប៉ិនប្រសប់ខាងពាក្យសម្ដី និងខាងកលល្បិចផង ដើម្បីប្រព្រឹត្តកិច្ចការសម្ងាត់នៃការឃាតកម្ម និងការប្លន់ ហេតុដូច្នេះហើយ វាបានក្លាយទៅជាមេដឹកនាំបក្សពួករបស់គិសគូមេន។
៥ហេតុដូច្នេះហើយ វាបានបញ្ជោរពួកគេ និងគិសគូមេនផងថា បើសិនជាពួកគេដាក់វានៅក្នុងវេទិកាជំនុំជំរះ នោះវានឹងអនុញ្ញាតដល់ពួកអ្នកដែលនៅក្នុងបក្សពួកវាថា ពួកគេនឹងត្រូវបានដាក់ឲ្យមានអានុភាព និងសិទ្ធិអំណាចនៅក្នុងចំណោមប្រជាជន ហេតុដូច្នេះហើយ គិសគូមេនបានស្វែងរកបំផ្លាញហេលេមិនចោល។
៦ហើយហេតុការណ៍បានកើតឡើងថា នៅពេលដែលវាដើរឆ្ពោះទៅវេទិកាជំនុំជំរះ ដើម្បីបំផ្លាញហេលេមិន មើលចុះ អ្នកបម្រើម្នាក់របស់ហេលេមិន ដោយចេញទៅក្រៅនៅពេលយប់ ហើយដោយបានក្លែងខ្លួន ក៏បានដឹងអំពីផែនការទាំងនោះ ដែលបានគ្រោងទុកដោយបក្សពួកនេះ ដើម្បីបំផ្លាញហេលេមិន។
៧ហើយហេតុការណ៍បានកើតឡើងថា គាត់បានជួបនឹងគិសគូមេន ហើយគាត់បានធ្វើសញ្ញាមួយឲ្យវា ហេតុដូច្នេះហើយ ទើបគិសគូមេនឲ្យគាត់ដឹងនូវគោលដៅនៃបំណងរបស់វា ចង់ឲ្យគាត់នាំទៅឯវេទិកាជំនុំជំរះ ដើម្បីវាអាចធ្វើឃាតហេលេមិនបង់។
៨ហើយកាលអ្នកបម្រើរបស់ហេលេមិន បានដឹងចិត្តទាំងអស់របស់គិសគូមេន ហើយដឹងថា បំណងរបស់វា គឺធ្វើឃាត ហើយដឹងដែរថា បំណងរបស់ពួកជនទាំងអស់ដែលនៅក្នុងបក្សពួករបស់វា គឺដើម្បីធ្វើឃាត និងដើម្បីប្លន់ និងដើម្បីបានអំណាច (ហើយនេះ គឺជាផែនការកសម្ងាត់របស់ពួកគេ និងការរួមគំនិតរបស់ពួកគេ) នោះអ្នកបម្រើរបស់ហេលេមិនបាននិយាយទៅកាន់គិសគូមេនថា ៖ ចូរយើងទៅឯវេទិកាជំនុំជំរះ។
៩ឥឡូវនេះ ការនេះធ្វើឲ្យគិសគូមេនពេញចិត្តជាខ្លាំង ព្រោះវាបានគិតស្មានថា វានឹងសម្រេចផែនការរបស់វាហើយ ប៉ុន្តែមើលចុះ អ្នកបម្រើរបស់ហេលេមិន នៅពេលពួកគេកំពុងតែដើរឆ្ពោះទៅឯវេទិកាជំនុំជំរះ បានចាក់គិសគូមេនត្រង់បេះដូង ធ្វើឲ្យវាដួលស្លាប់ដោយគ្មានបានស្រែកថ្ងូរឡើយ។ ហើយគាត់បានរត់ទៅជម្រាបហេលេមិននូវគ្រប់ការណ៍ទាំងអស់ ដែលគាត់បានឃើញ និងបានឮ និងបានធ្វើ។
១០ហើយហេតុការណ៍បានកើតឡើងថា ហេលេមិនបានចាត់ឲ្យទៅចាប់បក្សពួកចោរប្លន់ និងពួកឃាតករសម្ងាត់នេះ ដើម្បីអាចប្រហារជីវិតពួកវាចោលតាមច្បាប់។
១១ប៉ុន្តែមើលចុះ កាលកាឌីអានតុនបានដឹងថា គិសគូមេនមិនបានត្រឡប់មកវិញទេ នោះវាខ្លាចក្រែងវាត្រូវគេបំផ្លាញបង់ ហេតុដូច្នេះហើយ វាបានបញ្ជាឲ្យបក្សពួកវាមកតាមវា។ ហើយពួកវាបានរត់ចេញទៅក្រៅដែនដីតាមផ្លូវសម្ងាត់មួយ ចូលទៅក្នុងទីរហោស្ថាន ម្ល៉ោះហើយ ពេលហេលេមិនបានចាត់ឲ្យទៅចាប់ពួកវា ក៏មិនអាចរកពួកវាឃើញឡើយ។
១២ហើយកាឌីអានតុននេះនឹងត្រូវបាននិយាយដល់ទៀតនៅពេលក្រោយ។ ម្ល៉ោះហើយ ក៏ចប់ឆ្នាំទីសែសិបពីរក្នុងរជ្ជកាលនៃពួកចៅក្រមទៅលើប្រជាជននីហ្វៃ។
១៣ហើយមើលចុះ នៅទីបញ្ចប់នៃគម្ពីរនេះ អ្នករាល់គ្នានឹងឃើញថា កកាឌីអានតុននេះ គឺជាមូលហេតុនៃការរលំ មែនហើយ សឹងតែការបំផ្លិចបំផ្លាញទាំងស្រុងនៃប្រជាជននីហ្វៃ។
១៤មើលចុះ ពុំមែនខ្ញុំនិយាយថា ទីបញ្ចប់នៃគម្ពីរហេលេមិនទេ ប៉ុន្តែខ្ញុំចង់និយាយអំពីទីបញ្ចប់នៃគម្ពីរនីហ្វៃវិញ ដែលខ្ញុំបានយកពីនោះនូវដំណើររឿងទាំងអស់ ដែលខ្ញុំបានសរសេរមកនេះ៕