1 Mo nao mi, Moronae, i gohed blong givim histri blong Jared mo brata blong hem.

2 From i bin hapen se afta we Lod i bin mekem rere ol ston we brata blong Jared i bin karem i go long bigfala hil, brata blong Jared i kam daon aot long bigfala hil, mo hem i putum ol ston insaed long ol sip we oli mekem rere, wan long evri en blong olgeta; mo luk, oli bin givim laet long ol sip.

3 Mo olsem ia nao Lod i bin mekem ol ston blong saen long tudak, blong givim laet long ol man, ol woman, mo ol pikinini, blong mekem se oli no save krosem ol bigfala solwota long tudak.

4 Mo i bin hapen se afta we oli mekem rere evri kaen kaekae, blong oli save laef wetem long solwota, mo tu, ol kaekae blong ol grup blong ol animol blong olgeta mo ol buluk, mo eni kaen bigfala animol, o animol, o pijin we bae oli karem wetem olgeta—mo i bin hapen se taem we oli mekem evri samting ia, oli go insaed long ol sip blong olgeta o ol baj, mo oli go aot long solwota, oli putum tras blong olgeta long Lod, God blong olgeta.

5 Mo i bin hapen se Lod God i mekem se i mas gat wan strong win i blo long fes blong ol wota, i go long promes graon; mo olsem ia nao win i pusum olgeta tru long ol wef blong solwota.

6 Mo i bin hapen se oli draon plante taem long ol dip ples blong solwota, from ol bigfala hil blong ol wef we i bin brok long olgeta, mo tu, ol bigfala mo nogud hariken we i bin hapen from strong paoa blong win.

7 Mo i bin hapen se taem we oli draon long ol dip ples, i no gat eni wota we i save smasem olgeta, from ol sip blong olgeta i strong mo i sat gud olsem wan dis, mo tu, oli strong mo sat gud olsem bigfala sip blong Noa; from hemia, taem we plante wota i raonem olgeta, oli prea long Lod, mo hem i bin karem olgeta oli go antap long ol wota bakegen.

8 Mo i bin hapen se win i neva stop blong blo i go long promes graon taem we oli bin stap antap long ol wota; mo olsem ia nao win i bin pusum olgeta i go fored.

9 Mo oli bin singsing ol pres long Lod; yes, brata blong jared i singsing blong presem Lod, mo hem i talem tangkyu mo presem Lod long ful dei; mo taem we naet i kam, oli no stop blong presem Lod.

10 Mo olsem ia nao win i pusum olgeta i go fored; mo i no gat bigfala animol blong solwota i save brekem olgeta, o i no gat welfis we i save smasem olgeta; mo oli gat laet oltaem, nomata we oli stap antap long wota o andanit long wota.

11 Mo olsem ia nao win i bin pusum olgeta i go fored, tri handred mo foti mo fo dei long wota.

12 Mo oli bin kam so long so blong promes graon. Mo taem we oli putum ol leg blong olgeta long ol so blong promes graon, olgetawan oli bodaon long fes blong graon, mo oli putum tingting blong olgeta i stap daon long fored blong Lod, mo wota blong ae blong olgeta i bin ron from glad long fored blong Lod, from plante sore mo lav blong hem ova long olgeta.

13 Mo i bin hapen se oli go aot long fes blong graon, mo oli stat blong wok long graon.

14 Mo Jared i gat fo boe; mo oli bin singaotem olgeta, Jakom, mo Gilga, mo Maha, mo Oraeha.

15 Mo brata blong Jared tu i gat ol boe mo ol gel.

16 Mo ol fren blong Jared mo brata blong hem, namba blong olgeta i kolosap twante mo tu sol; mo olgeta tu oli gat ol boe mo ol gel bifo oli kam long promes graon; mo from hemia, oli stat blong kam plante.

17 Mo oli tijim olgeta blong wokbaot wetem tingting we i no hae long fored blong Lod; mo tu oli kasem tijing we i kam long heven.

18 Mo i bin hapen se oli stat blong go olbaot long fes blong graon, mo blong kam plante mo blong wok long graon; mo oli kam strong long graon.

19 Mo brata blong Jared i stat blong kam olfala, mo i luk se i no longtaem bae hem i mas go daon long gref; taswe, hem i talem long Jared: “Bae yumi karem i kam tugeta ol pipol blong yumi blong yumi save kaontem olgeta, blong yumi save long olgeta, wanem bae oli wantem long yumi, bifo yumi go daon long ol gref blong yumi.”

20 Mo folem hemia, oli bin karem ol pipol oli kam tugeta. Nao namba blong ol boe mo ol gel blong brata blong Jared i twante mo tu sol; mo namba blong ol boe mo ol gel blong Jared hem i twelef, from hem i gat fo boe.

21 Mo i bin hapen se oli kaontem ol pipol blong tufala; mo afta we oli kaontem olgeta, oli wantem olgeta blong talemaot ol samting we bae oli wantem se tufala i mas mekem bifo tufala i go daon long ol gref blong tufala.

22 Mo i bin hapen se ol pipol oli wantem long tufala se tufala i mas anoentem wan long ol boe blong tufala blong kam wan king ova long olgeta.

23 Mo nao luk, samting ia i bin mekem tufala i harem nogud. Mo brata blong Jared i bin talem long olgeta: “I tru we bae samting ia i lid i go long fasin blong kam slef.”

24 Be Jared i bin talem long brata blong hem: “Letem olgeta blong oli save gat wan king.” Mo from hemia, hem i bin talem long olgeta: “Yufala i jusum, aot long ol boe blong mitufala, wan king, eniwan we yufala i wantem.”

25 Mo i bin hapen se oli jusum fasbon blong brata blong Jared; mo nem blong hem, i Pegag. Mo i bin hapen se hem i talem no, mo hem i no wantem kam king blong olgeta. Mo ol pipol oli wantem se papa blong hem i mas fosem hem, be papa blong hem i no wantem; mo hem i givim oda long olgeta se oli no mas fosem eni man blong kam king blong olgeta.

26 Mo i bin hapen se oli jusum evri brata blong Pegag, mo oli no wantem.

27 Mo i bin hapen se, i semmak long ol boe blong Jared, oli no bin wantem, evriwan be wan nomo i wantem, mo Oraeha nao, oli bin anoentem hem blong kam king ova long ol pipol.

28 Mo hem i stat blong rul, mo ol pipol oli stat blong kam antap gud; mo oli kam rij tumas.

29 Mo i bin hapen se Jared i ded, mo brata blong hem tu.

30 Mo i bin hapen se Oraeha i wokbaot wetem tingting we i stap daon long fored blong Lod, mo hem i tingbaot hamas nao ol bigfala samting we Lod i bin mekem blong papa blong hem, mo tu, i tijim ol pipol blong hem, hamas nao ol bigfala samting we Lod i bin mekem blong ol papa blong olgeta.