1 Mo i bin hapen se taem we Koriantuma i kam oraet bakegen long ol kil blong hem, hem i stat blong tingbaot ol toktok we Ita i bin talem long hem.

2 Hem i bin luk se kolosap tu milian finis long ol pipol blong hem, oli kilimded olgeta wetem naef blong faet; mo hem i stat blong harem nogud bigwan insaed long hat blong hem; yes, i bin gat tu milian long ol strong man blong hem oli ded, mo tu, ol waef mo ol pikinini blong olgeta.

3 Hem i stat blong sakem nogud fasin we hem i bin mekem; hem i stat blong tingbaot ol toktok we maot blong evri profet i bin talem, mo hem i luk ol samting ia se oli bin hapen kasem taem ia, evri smol pis; mo sol blong hem i krae sore, mo hem i no bin wantem blong oli leftemap tingting blong hem.

4 Mo i bin hapen se hem i raetem wan leta i go long Sis, we i wantem se hem i letem ol pipol oli stap laef, se bae hem i mas givim kingdom blong gud blong laef blong ol pipol.

5 Mo i bin hapen se taem we Sis i kasem leta blong hem, hem i raetem wan leta long i go long Koriantuma, se sapos bae hem i sarenda, blong hem i save kilimded hem wetem naef blong faet blong hem, nao bae hem i letem ol pipol blong hem oli stap laef.

6 Mo i bin hapen se ol pipol i no sakem rabis fasin blong olgeta; mo ol pipol blong Koriantuma oli bin kam blong kros agensem ol pipol blong Sis; mo ol pipol blong Sis oli bin kam blong kros agensem ol pipol blong Koriantuma; taswe, ol pipol blong Sis oli faet agensem ol pipol blong Koriantuma.

7 Mo taem we Koriantuma i luk se kolosap bae hem i foldaon, hem i ronwe bakegen i aot long fored blong ol pipol blong Sis.

8 Mo i bin hapen se hem i kam long ol wota blong Ripliankum, we, long lanwis ia, i minim bigwan, o i bitim evriwan; taswe, taem we oli kam long ol wota ia, oli stanemap ol tenet blong olgeta; mo Sis tu i stanemap ol tenet blong hem kolosap long olgeta; mo taswe, long nekis dei oli kam blong faet.

9 Mo i bin hapen se oli faet long wan faet we i strong tumas, long faet ia Koriantuma i kasem kil bakegen, mo ae blong hem i dak from hem i lusum blad.

10 Mo i bin hapen se ol ami blong Koriantuma oli faet strong agensem ol ami blong Sis mekem se oli winim olgeta, mekem se oli mekem olgeta oli ronwe oli aot long fored blong olgeta; mo oli ronwe i go long Saot, mo oli stanemap ol tenet blong olgeta long wan ples we oli singaotem Ogat.

11 Mo i bin hapen se ami blong Koriantuma i stanemap ol tenet blong olgeta kolosap long hil Rama; mo i semfala hil ia we papa blong mi Momon i bin haedem ol histri wetem Lod, we oli bin tabu.

12 Mo i bin hapen se oli bin karem i kam tugeta evri pipol long ful fes blong graon, we oli no bin kilim ded olgeta, be Ita nomo i stap.

13 Mo i bin hapen se Ita i luk evri aksen blong ol pipol; mo hem i luk se ol pipol we oli sapotem Koriantuma, oli kam tugeta wetem ami blong Koriantuma; mo ol pipol we oli sapotem Sis, oli kam tugeta wetem ami blong Sis.

14 Taswe, oli bin tekem wan taem blong fo yia blong karem ol pipol oli kam tugeta, blong mekem se oli save tekem evriwan we i stap long fes blong graon, mo mekem se oli save kasem evri paoa we i posibol blong oli save kasem.

15 Mo i bin hapen se taem we olgeta evriwan oli kam tugeta, evriwan long ami we hem i wantem sapotem, wetem ol waef blong olgeta mo ol pikinini blong olgeta—ol man, ol woman tugeta wetem ol pikinini oli bin rere wetem ol tul blong faet, oli bin gat ol sil, mo ol jesplet, mo ol hat blong faet, mo oli werem klos folem fasin blong faet—oli bin maj i go wan agensem narawan blong faet; mo oli faet long ful dei ia, mo oli no win.

16 Mo i bin hapen se taem we hem i naet, oli taed, mo oli gobak long ol kamp blong olgeta; mo afta we oli gobak long ol kamp blong olgeta, oli stat blong krae singaot mo oli kraekrae from lus blong ol pipol blong olgeta we oli kilimded olgeta; mo ol krae blong olgeta oli bigwan tumas, ol krae singaot blong olgeta, mo ol kraekrae blong olgeta oli bigwan tumas, mekem se noes blong olgeta i faerap bigwan long ea.

17 Mo i bin hapen se long nekis dei oli go bakegen blong faet, mo dei ia i bigwan mo i nogud tumas; be, oli no win, mo taem we naet i kam bakegen, oli mekem noes long ea wetem ol krae blong olgeta, mo ol krae singaot blong olgeta, mo ol harem sore blong olgeta, from lus blong ol pipol blong olgeta we oli kilimded olgeta.

18 Mo i bin hapen se Koriantuma i raetem bakegen wan leta i go long Sis, hem i wantem se hem i no kam bakegen blong faet, be se bae hem i tekem kingdom, mo i no tekemaot laef blong ol pipol.

19 Be luk, Spirit blong Lod i bin stop blong wok wetem olgeta, mo Setan i gat ful paoa ova long hat blong ol pipol; from oli folem fulwan hat blong olgeta we i strong, mo tingting blong olgeta we i blaen, mekem se oli save prapa spolem gud olgeta; taswe, oli bin go bakegen blong faet.

20 Mo i bin hapen se, oli bin faet long ful dei ia, mo taem we naet i bin kam, oli bin slip antap long ol naef blong faet blong olgeta.

21 Mo long nekis dei, oli bin faet kasem taem we naet i bin kam.

22 Mo taem we naet i kam oli drong long kros, semmak olsem wan man we i drong long waen; mo oli bin slip bakegen antap long ol naef blong faet blong olgeta.

23 Mo long nekis dei oli bin faet bakegen; mo taem we naet i kam, olgeta evriwan i bin foldaon tru long naef blong faet be fifti mo tu long ol pipol blong Koriantuma nomo i stap, mo siksti mo naen nomo long ol pipol blong Sis i stap.

24 Mo i bin hapen se oli slip antap long ol naef blong faet blong olgeta long naet ia, mo long nekis dei, oli faet bakegen, mo oli faet wetem evri paoa blong olgeta wetem ol naef blong faet blong olgeta, mo wetem ol sil blong olgeta, long ful dei ia.

25 Mo taem we naet i kam, i gat teti mo tu long ol pipol blong Sis, mo twante mo seven long ol pipol blong Koriantuma i stap.

26 Mo i bin hapen se, oli kakae mo oli slip, mo oli rere blong ded long nekis dei. Mo olgeta, oli ol bigfala mo ol strong man olsem long saed blong paoa blong ol man.

27 Mo i bin hapen se oli faet blong spes blong tri aoa, mo ae blong olgeta i dak from oli bin lusum blad.

28 Mo i bin hapen se taem we ol man blong Koriantuma i bin kasem inaf paoa blong mekem se oli save wokbaot, oli stap rere blong ronwe from laef blong olgeta; be luk, Sis i girap, mo tu, ol man blong hem, mo hem i promes long kros blong hem se, bae hem i kilimded Koriantuma o bae hem i ded tru long naef blong faet.

29 Taswe, hem i bin ronem olgeta, mo long nekis dei hem i kasem olgeta; mo oli faet bakegen wetem naef blong faet. Mo i bin hapen se taem we olgeta evriwan i foldaon tru long naef blong faet, be i no Koriantuma mo Sis, luk ae blong Sis i dak from hem i bin lusum blad.

30 Mo i bin hapen se taem we Koriantuma i lei long naef blong faet blong hem, blong hem i spel smol, hem i katem hed blong Sis.

31 Mo i bin hapen se afta we hem i katemaot hed blong Sis, nao Sis i bin girap long ol han blong hem mo i bin foldaon; mo afta we hem i bin traem had blong pulum win, hem i ded.

32 Mo i bin hapen se Koriantuma i foldaon long graon, mo i kam olsem se hem i no gat eni laef.

33 Mo Lod i bin toktok long Ita, mo i talem long hem: “Yu go.” Mo hem i bin go, mo hem i luk se ol toktok blong Lod oli hapen evriwan; mo hem i finisim histri blong hem; (mo wan handred pat mi no bin raetemdaon) mo hem i haedem olgeta long wan fasin we ol pipol blong Limhae oli bin faenem olgeta.

34 Nao ol las toktok we Ita i bin raetem oli olgeta ia: “Sapos we Lod bae i wantem blong tekemaot mi taem mi stap laef yet, o we bae mi harem nogud long wanem we Lod i wantem long bodi blong mit mo bun, i nomata, sapos hem i sevem mi long kingdom blong God. Amen.”