1 Na ɔbaa dɛ Ether n’aber do no nna ^aCoriantumr tse nkwa mu; na Coriantumr na odzii hen wɔ asaase no nyina do.

2 Na ^aEther yɛ Ewuradze no nkɔnhyɛnyi; dɛm ntsi Ether bae wɔ Coriantumr n’aber do, na ɔhyɛɛ ase hyɛɛ nkɔm kyerɛɛ dɔm no, na woenntum ^bammpem no adze no osian Ewuradze no Sunsum a ɔwɔ no mu ntsi.

3 Na ^aɔtsẽatsẽaa mu fitsi adzekyee dze kesii ber a ewia kɔtɔree mpo; dze tuu dɔm no fo dɛ wɔngye Nyankopɔn ndzi na wonya nnuho amma ^bwɔannsɛɛ hɔn, na ɔsee hɔn dɛ ɔnam ^cgyedzi do na ndzɛmba nyina hyɛ mã—

4 Dɛm ntsi nyia ɔgye Nyankopɔn dzi no nya ^aenyidado a osi pi dɛ wiadze papa bi wɔ hɔ ma no, nyew, bea a ɔwɔ Nyankopɔn n’abanyimfa hɔ no mpo, dza yɛnam gyedzi do dze nya enyidado no, yɛ ^bsekyɛ dze ma adasamba hɔn akra, dza ɔma wohu nokwar no na wogyina pintsinn, na daa wɔbor do wɔ ^cndwuma pa mu, na ɔgye hɔn ma ^dwɔhyɛ Nyankopɔn enyimnyam.

5 Na ɔbaa dɛ Ether hyɛɛ nkɔm kyerɛɛ dɔm no wɔ ndzɛmba akɛse a ɔyɛ nwanwa ho, na wɔanngye enndzi, osiandɛ woennhu bi.

6 Na afei, emi, Moroni, mebɛkã biribi a ɔfa dɛm ndzɛmba yi ho; mebɛkyerɛ wiadzemba dɛ ^agyedzi nye adze a ^benyi da do na ^cenyi nnhunii; dɛm ntsi, mma hom nngye kyim osiandɛ hom nnhunii ntsi na hom rinnya dasegye biara kesi dɛ ^dwɔasɔ hom gyedzi ahwɛ ekyir no.

7 Na ɔnam gyedzi do na Christ yii noho kyerɛɛ hɛn egyanom, ber a ɔsoɛree fii ewufo mu no; na oennyi noho annkyerɛ hɔn kodur dɛ wonnyaa gyedzi wɔ no mu; dɛm ntsi na okehiaa dɛ binom nyaa gyedzi wɔ no mu, osiandɛ oennyi noho annkyerɛ wiadzemba.

8 Na mbom osian adasamba hɔn gyedzi ntsi oeyi noho akyerɛ wiadzemba, na ɔhyɛɛ Egya no ne dzin enyimnyam, na osiesiee kwan too hɔ ama binom so nam do eebenya kyɛfa wɔ sor akyɛdze no mu, ama woeenya enyidado wɔ dɛm ndzɛmba no a wonnhunii no ho.

9 Dɛm ntsi sɛ hom so hom nya gyedzi a hom botum enya enyidado na kyɛfa wɔ akyɛdze no mu.

10 Hwɛ ɔnam gyedzi do na ^awɔfrɛɛ tsetsemba baa Nyankopɔn ne nhyehyɛɛ krɔnkrɔn no mu.

11 Dɛm ntsi, wɔnam gyedzi do na wɔdze Moses mbra no mae. Mbom Nyame nam akyɛdze a ɔyɛ ne Ba no mu esiesie ^akwan a oye kyɛn biribiara; na wɔnam gyedzi do na iyi ahyɛ mã.

12 Na sɛ ^agyedzi nnyi adasamba mu a nkyɛ Nyankopɔn ronntum nnyɛ ^banwanwadze wɔ hɔn mu; dɛm ntsi, oennyi noho annkyerɛ kesii dɛ wonyaa gyedzi.

13 Hwɛ, Alma nye Amulek hɔn gyedzi na ɔmaa ^aefiadze dwuruwii guu famu.

14 Hwɛ, Nephi nye Lehi hɔn gyedzi na ɔmaa Lamanfo no nyaa ^ansakyer, ma wɔdze gya nye ^bSunsum Krɔnkrɔn numaa hɔn.

15 Hwɛ, ^aAmmon na no nuanom hɔn gyedzi na ^bɔyɛɛ anwanwadze akɛse wɔ Lamanfo no mu.

16 Nyew, na dodowara mpo a wɔyɛɛ ^aanwanwadze no nam ^bgyedzi do yɛe, hɔn mpo a wodzii Christ n’enyim bae nye hɔn so a wosii n’ekyir bae.

17 Na ɔnam gyedzi do na esuafo baasa no nyaa anohoba dɛ ^awɔronnsɔ owu nnhwɛ; na woennya anohoba no kesii dɛ wonyaa gyedzi.

18 Na hɔn mu biara nnyi hɔ wɔ aber biara mu a otumii yɛɛ anwanwadze kodu dɛ onyaa gyedzi; dɛm ntsi wodzii kan nyaa gyedzi wɔ Nyankopɔn ne Ba no mu.

19 Na binom wɔ hɔ a nna hɔn gyedzi yɛ dzen kɛse mpo ^aansaana Christ reba, hɔn a biribiara nnkesiw hɔn kwan dɛ wɔbɛhɛn ^bntwamutam no mu na mbom nokwar wɔdze hɔn enyiwa hun ndzɛmba a wɔdze gyedzi enyiwa hu, na hɔn enyi gyee.

20 Na hwɛ, yehu wɔ kyerɛwsɛm yi mu dɛ dɛm nkorɔfo yi mu kor nye Jared no nuabanyin no; na osiandɛ ne gyedzi a ɔwɔ no wɔ Nyankopɔn mu no sõ kɛse ntsi ber a Nyankopɔn tseen ne ^ansatseaba no oenntum ammfa ennsuma Jared no nuabanyin no, osian n’asɛm a nna ɔakã akyerɛ no no ntsi, asɛm a ɔnam gyedzi do nyae no.

21 Na Jared no nuabanyin no nyaa hun Ewuradze ne nsatseaba ekyir no, na osian ^aanohoba a Jared no nuabanyin no nam gyedzi do enya no ntsi, Ewuradze enntum ammfa biribiara ennsuma no; dɛm ntsi oyii ndzɛmba nyina kyerɛɛ no, osiandɛ nna obiara nnkotum ama ɔaka ^bntwamutam no ekyir.

22 Na ɔnam gyedzi do na m’egyanom hɔn nsa kãa ^aanohoba dɛ dɛm ndzɛmba yi bodua Amanamamfo do aba hɔn enuanom hɔ; dɛm ntsi Ewuradze ahyɛ me, nyew Jesus Christ mpo.

23 Na mesee no dɛ; Ewuradze, Amanamamfo no besi me atwetwe wɔ dɛm ndzɛmba yi ho, osian hɛn ^amberɛwyɛ wɔ akyerɛw mu ntsi; na Ewuradze ɔwo nam gyedzi do ayɛ hɛn ekunyin wɔ kasa mu, mbom ɔwo annyɛ hɛn ^bekunyin wɔ akyerɛw mu; na ɔwo ayɛ nkorɔfo yi nyinara ma wotum kasa ara yie, osian Sunsum Krɔnkrɔn no a edze ama hɔn ntsi;

24 Na ɔwo ayɛ hɛn ma yetum kyerɛw kakraabi, osiandɛ hɛn nsaano kyeakyea ntsi. Hwɛ, ɔwo annyɛ hɛn ^aekunyin wɔ akyerɛw mu tse dɛ Jared no nuabanyin no, na ɔwo yɛɛ no ma ɔkyerɛɛw ndzɛmba pii tse dɛ ɔwoara; ma nyimpa kenkan a ɔtɔ no do.

25 Ɔwo ama tum na ahoɔdzen aba hɛn nsɛm mu araa ma yenntum nnkyerɛw mpo; dɛm ntsi, sɛ yɛkyerɛw a ɔma yehu hɛn mberɛwyɛ, na yɛfom, osian bea a yɛdze hɛn nsɛm bɛhyɛ ntsi; bɛyɛ na Amanamamfo no ^aesi hɛn atwetwe.

26 Na ber a mekãa dɛm no, Ewuradze kasaa kyerɛɛ me dɛ: Nkwasea si ^aatwetwe, na mbom wobedzi awerɛhow; na m’adom dɔɔ sõ ma hɔn a wɔdwe, dɛm ntsi wɔronnhwɛ hom mberɛwyɛ ho.

27 Na sɛ adasa ba me nkyɛn a mebɛma woehu hɔn ^amberɛwyɛ. ^bMema adasa mberɛwyɛ ama wɔaabrɛ hɔn ho adze, na ^cm’adom sõ adasamba nyina a ^dwɔbrɛ hɔnho adze wɔ m’enyim no do; na sɛ wɔbrɛ hɔnho adze wɔ m’enyim, na wonya gyedzi wɔ mo mu a, nna mebɛyɛ ma ^endzɛmba a ɔyɛ mberɛw no ahyɛ dzen ama hɔn.

28 Hwɛ, mebɛma Amanamamfo ehu hɔn mberɛwyɛ na mama woehu dɛ ^agyedzi, enyidado na ayamuyie yɛ medze—emi a meyɛ tsenenee nyina nsunyiwa no.

29 Na emi, Moroni, metsee dɛm nsɛm yi no; minyaa awerɛkyekyer na mekãa dɛ: O Ewuradze, wo tsenenee pɛ nyɛ hɔ, na minyim dɛ ɔwo idzi dwuma ma adasamba dɛ mbrɛ hɔn gyedzi tse.

30 Na Jared no nuabanyin no see bepɔw Zerin dɛ, ^aTutu—na otutui. Na sɛ onnyi gyedzi a nkyɛ oenntutu; dɛm ntsi ɔwo idzi dwuma wɔ ber a adasa enya gyedzi.

31 Na dɛm na idua dze da woho edzi kyerɛ w’esuafo; na ber a wonyaa ^agyedzi, na wɔkasaa wɔ wo dzin mu no, ɔwɔ iyii woho kyerɛɛ hɔn wɔ tum kɛse mu.

32 Na mekaa so dɛ ɔwo akã dɛ esiesie fi ama ɔdasanyi, nyew, wɔ w’egya ne ^atsenabew hɔ mpo, iyi na ɔma ɔdasanyi nya ^benyidado mapã bi; dɛm ntsi ɔwɔ dɛ ɔdasanyi nya enyidado, annyɛ dɛm a ne nsa rennkã egyapadze wɔ bea no a ɔwo esiesie ato hɔ no do.

33 Na mekaa bio dɛ, akã dɛ ^aadɔ wiadze araa ma edze wo nkwa mpo ato hɔ ama wiadze, ama eetum afa no bio na edze eesiesie bea dze ama adasamba.

34 Na afei minyim dɛ dɛm ^aɔdɔ yi a ewɔ no wɔ adasamba ho yi yɛ ayamuyie; dɛm ntsi gyedɛ adasa yɛ ayamuyie annyɛ dɛm a worinnya dɛm bea no a ɔwo esiesie wɔ w’egya ne fie no nntsena.

35 Dɛm ntsi, dza akã yi ma muhu dɛ, sɛ Amanamamfo annyɛ ayamuyie, osian hɛn mberɛwyɛ ntsi a, ɔwo ebɔsɔ hɔn ahwɛ na agye hɔn ^atalent, nyew, dza hɔn nsa akã no mpo, na edze ama hɔn a wɔwɔ no mbordo.

36 Na ɔbaa dɛ mobɔɔ mpaa maa Ewuradze dɛ ɔmma Amanamamfo ^aadom, ama wɔaayɛ ayamuyie.

37 Na ɔbaa dɛ Ewuradze see me dɛ: Sɛ wɔannyɛ ayamuyie a ɔmmfa woho, ɔwo edzi nokwar; dɛm ntsi, wo ntar ^abɛtsew. Na osiandɛ ehu wo ^bmberɛwyɛ ntsi wɔbɛma woho ayɛ dzen, araa mpo ma edze aakɛtsena bea a mesiesie wɔ m’egya fie no.

38 Na afei emi, Moroni, menye Amanamamfo no ridzi nkra, nyew, nye mo nuanom so a modɔ hɔn no, kɛpem aber a yebehyia mu wɔ Christ ^an’atsɛmbu egua no enyim, hɔ na adasa nyina bohu dɛ hom ^bbɔgyaa nnkekãa me ntar mu.

39 Na aber no na hom bohu dɛ ^amehu Jesus, na dɛ ɔnye me akasa ^benyim na enyim, na ɔkasaa kyerɛɛ me pefee wɔ botooyɛ mu mpo tse dɛ mbrɛ nyimpa kasa kyerɛ obi wɔ mankasa me kasaa do a, ɔfa dɛm ndzɛmba yi ho.

40 Na no mu kakraabi na makyerɛw osian me mberɛwyɛ wɔ akyerɛw mu ntsi.

41 Na afei, mekamfo kyerɛ hom dɛ hom ^anhwehwɛ Jesus yi a nkɔnhyɛfo nye asomafo akyerɛw noho nsɛm yi ama adom a ofi Egya Nyankopɔn no, nye Ewuradze Jesus Christ, nye Sunsum Krɔnkrɔn a ^bɔgye hɔn ho dase no aaba na ɔaabɛtsena hom mu afebɔɔ. Amen.