1 Na afei ^andom kɛse hyɛɛ ase dɛ ɔrekã asaase no nyina do osian dɔm no hɔn emumuyɛ ntsi. Iyi ntsi, sɛ obi dze n’edwindadze anaa n’afõwa to no pon do a, anaa beebi a ɔdze siei a, adze bɛkye no nna ɔhwehwɛ a onnhu, ndom a ɔbaa asaase no do no adze kɛse a.

2 Dɛm ntsi obiara dze nankasa ne nsa suoo adze biara a odzi wɔ no no mu yie, na ɔammpɛ dɛ ɔbɛfɛm anaadɛ ɔdze bɛfɛm; na obiara dze ne nsa enyimfa suoo n’afõwa ne nsa mu yie dze bɔɔ nankasa no nkwa nye ne yernom na ne mba ho ban.

3 Na afei Shared wui ekyir mfe ebien mu no, hwɛ, Shared no nuabanyin soɛree na ɔnye Coriantumr kɔkõe, na Coriantumr dzii no do nkonyim na otsiiw no araa dze kodur Akish sar do.

4 Na ɔbaa dɛ Shared no nuabanyin no nye no kõe wɔ Akish sar do; na ɔkõ no mu yɛɛ dzen ara yie, na mpempem na wɔtɔr afõwa ano.

5 Na ɔbaa dɛ Coriantumr weɔnee sar no do; na Shared no nuabanyin no fii sar no do anafua, na okokum Coriantumr no nsordaafo mu binom a nna wɔabobow.

6 Na ɔbaa Moron asaase do, na ɔdze nankasa noho sii Coriantumr n’ahengua no do.

7 Na ɔbaa dɛ Coriantumr nye no nsordaafo no tsenaa sar no do mfe ebien, na dɛm aber no mu no, no nsordaafo no nyaa ahoɔdzen kɛse.

8 Afei Shared no nuabanyin a ne dzin dze Gilead, no so nye no nsordaafo no nyaa ahoɔdzen osian nsumaamu fɛkuwbɔfo no ntsi.

9 Na ɔbaa dɛ no sɔfopanyin no kum no wɔ ber a ɔtse n’ahengua do.

10 Na ɔbaa dɛ nsumaamu fɛkuwbɔfo no hɔn mu kor nam nsumaamu kokum no, na ɔfaa ahenman no maa noho; na ne dzin dze Lib; na Lib yɛ ɔbarimba bi a ɔyɛ ɔkwabran sen ɔbarimba biara a ɔwɔ dɔm no mu.

11 Na ɔbaa dɛ Lib n’afe a odzi kan mu no, Coriantumr baa Moron asaase do na ɔnye Lib bɔkõe.

12 Na ɔbaa dɛ ɔnye Lib koe, na ɔkõ no mu no Lib twaa n’abasa ma opirae; naaso Coriantumr no nsordaafo no kɔr Lib do, ma oguanee kɔr ahẽ no a odzi kɔ mpoano afamu.

13 Na ɔbaa dɛ Coriantumr tsiiw no; na Lib nye no kõe wɔ mpoano hɔ.

14 Na ɔbaa dɛ Lib dzii Coriantumr na no nsordaafo no do nkonyim ma woguaan bio kɔr Akish sar no no do.

15 Na ɔbaa dɛ Lib tsiiw no araa kesii dɛ ɔbaa Agosh asaase a ɔda famu no do. Na Coriantumr faa dɔm no nyina kãa noho ber a oruguan efi Lib enyim no dze hɔn kɔr bea a oguanee kɔree no.

16 Na ber a ɔbaa Agosh asaase a ɔda famu no do no, ɔnye Lib kõe, na otwitwaa no araa kesii dɛ owui; na Lib no nuabanyin besii n’ananmu nye Coriantumr kõe, na ɔkõ no mu yɛɛ dzen dodow, afei ɔbaa dɛ Coriantumr guaan bio fii Lib no nuabanyin no n’asordaafo no enyim.

17 Afei Lib no nuabanyin no ne dzin dze Shiz. Na ɔbaa dɛ Shiz tsiiw Coriantumr, na ne nsa daa nkuropɔn pii do, na okunkum mbaa nye mbofra, na ɔhyeew nkuropɔn no.

18 Na Shiz noho suro petsee asaase nyina do; nyew, wɔtseatseaa mu wɔ asaase no do dɛ—Woana na obotum egyina Shiz no nsordaafo enyim? Hwɛ, ɔpra asaase a ɔda n’enyim nyina!

19 Na ɔbaa dɛ dɔm a wɔwɔ asaase no nyina enyi do no hyɛɛ ase dɛ wɔroboaboa hɔn nsordaafo ano ekuwekuw.

20 Na wɔkyɛɛ hɔn mu; hɔn mu fã guanee kɔdɔɔm Shiz no nsordaafo no, na hɔn mu fã a aka no so guanee kɔdɔɔm Coriantumr no nsordaafo no.

21 Na ɔkõ no mu yɛɛ dzen kɛse na ɔkyɛree ara so yie, na bɔgyaka nye ewudzi no so kɔr do kyɛree araa ma nyimpa a woewuwu no hɔn ^aefun hyɛɛ asaase n’enyi nyina do mã.

22 Na ɔkõ no mu yɛɛ hyew araa ma obiara annka ekyir a obesie ewufo no, mbom wotwuwii faa do kɔr hɔn enyim a nna bɔgya ara na wɔrekeka gu, na wogyaa mbarimba nye mbaa nye mbofra a woekuku hɔn no hɔn efun ma ɔpetsee asaase no enyi do ma ɔbɛyɛɛ ^ansaamaa dze.

23 Na nkã a ɔbaa hɔ no gyee asaase n’enyi do, ɔgyee asaase enyi nyina do mpo; dɛm ntsi dɔm no tseetsee adzekyee nye adzesaa nyina osian nkã a ɔwɔ hɔ no ntsi.

24 Naaso, Shiz enngyaa dɛ obetsiw Coriantumr; osiandɛ oedzi nsew dɛ oboku Coriantumr dze ahyɛ no nuabanyin a oeku no no ananmu, na Ewuradze n’asɛm baa Ether hɔ dɛ Coriantumr ronntɔ wɔ afõwa ano.

25 Na dɛm nna yehu dɛ Ewuradze seraa hɔn wɔ n’ebufuhyew ne mãhyɛ mu, na hɔn emumuyɛdze nye ekyiwadze na wɔabɔ kwan ato hɔ ama hɔn nsɛɛ a ɔwɔ hɔ daapem.

26 Na ɔbaa dɛ Shiz tsiiw Coriantumr dze faa boka afamu, dze kodur mpoano afamu mpo, na hɔ na ɔnye Shiz kõo ndaansa ntamu.

27 Na ɔsɛɛ a osii Shiz no nsordaafo mu wɔ hɔ no yɛɛ hu ara yie ma dɔm no hɔn akoma hyɛɛ ase dɛ orutu ntsi wɔhyɛɛ ase dɛ woruguan fi Coriantumr no nsordaafo no enyim; na woguanee kɔr Corihor asaase do, na wɔpraa dɔm a wɔtsetse hɔ no a wɔammpen dɛ wɔbɛkã hɔnho no nyina ase fii hɔn enyim.

28 Na wosisii hɔn ntamadan wɔ Corihor mbɔnsa no mu; na Coriantumr so sisii ne ntamadan wɔ Shurr mbɔnsa mu. Afei Shurr mbɔnsa bɛn koko Comnor dɛm ntsi Coriantumr boaboaa no nsordaafo ano wɔ koko Comnor do na ɔhɛɛn totorobɛnto dze frɛɛ Shiz no nsordaafo no dɛ wɔmbra ma wɔnkõ.

29 Na ɔbaa dɛ wɔbaa, na mbom wɔpaam hɔn bio; na wɔbaa mpɛn a otsĩa ebien, na wɔpaam hɔn bio. Na ɔbaa dɛ wɔbaa mprɛnsa na ɔkõ no mu yɛɛ dzen ara yie.

30 Na ɔbaa dɛ Shiz twitwaa Coriantumr ma onyaa ekur a no mu dɔ ara yie, na Coriantumr hweer bɔgya pii ma n’enyido siiw no, na wɔsoaa no dɛ owufo kɔree.

31 Afei mbarimba nye mbaa, nye mbofra a wɔhyewee wɔ afã na afã nyina dɔɔ sõ ara yie, ma dɛm ntsi Shiz kãa kyerɛɛ no dɔm no dɛ mma wonntsiiw Coriantumr no nsordaafo no; dɛm ntsi wɔsaan hɔn ekyir kɔr hɔn nseraban.