1 Na afei emi, Moroni, mokɔ do dze Jared nye no nuabanyin no hɔn kyerɛwsɛm no ma.

2 Na ɔbaa dɛ ekyir no a Ewuradze siesiee ^aabo a Jared no nuabanyin dze kɔr bepɔw no do wiei no, Jared no nuabanyin no fii bepɔw no do bae, na ɔdze abo no guu ahɛn a wɔpamee no mu, kor biara hyɛ, afã na afã; na hwɛ, wɔmaa kan wɔ ahɛn no mu.

3 Na dɛm na Ewuradze maa abo no hyerɛnee wɔ sum mu, yɛɛ kan dze maa mbarimba nye mbaa no, nye mbofra, amma woenntwa nsu kɛse no wɔ sum mu.

4 Na ɔbaa dɛ, ama woetum atsena ase wɔ nsu no do no wosiesiee edziban ahorow nyina, nye edziban so a wɔdze bɛma hɔn nguankuw nye anantwikuw no, nye abowa biara anaa hamu abowa anaa nnoma a ɔsɛ dɛ wɔfa hɔn kã hɔnho—na ɔbaa dɛ aber a wɔyɛɛ ndzɛmba yi nyina wiei no, wɔkɔr ahɛn anaa ahɛmba no mu, na wosii mu wɔ po no do, na wɔdze hɔnho hyɛɛ Ewuradze hɔn Nyankopɔn nsa.

5 Na ɔbaa dɛ Ewuradze Nyankopɔn maa ^aehum kɛse bi tui wɔ nsu no enyi, dze faa anohoba asaase no ne tsentsendo; na dɛm ntsi po asorɛkye no bɔ hɔn dzii akɔnaaba wɔ mframa no enyim.

6 Na ɔbaa dɛ mpɛn pii no wɔdɔɔ esukɔ kɔr po no ase, osian asorɛkye akɛse a obui faa hɔn do no ntsi, nye ehum dzendzen huhuuhu so a otui no ntsi.

7 Na ɔbaa dɛ ber a wɔdɔɔ esukɔ kɔr nsu no ase no, nsu biara annhaw hɔn, hɔn hɛn no wɔyɛɛ no ^apetsee so dɛ kyɛnse, na wɔyɛɛ no petsee dɛ Noah ne ^bhɛn no ara pɛr; dɛm ntsi sɛ nsu pii bu fa hɔn do a nna woesũ afrɛ Ewuradze ma oeyi hɔn epue nsu no enyi bio.

8 Na ɔbaa dɛ ber a wɔwɔ nsu no do no mframa no enngyaa dɛ ɔbɔ kɔ anohoba asaase no ne tsentsendo; na dɛm na mframa no bɔɔ hɔn dzii enyim kɔree.

9 Na ^awɔtoow ayɛyi ndwom maa Ewuradze; nyew, Jared no nuabanyin no toow ayɛyi ndwom maa Ewuradze, na ^bɔdaa no ase na ɔtoow ayɛyi ndwom maa Ewuradze adzekyee no nyina; na ber a adzesaa bae no, woenngyaa dɛ wobeyi Ewuradze ayɛw.

10 Na dɛm na wɔdze hɔn twae; na po mu abowa biara enntum ennsiw hɔn kwan, anaadɛ bonsu biara enndzi hɔn dzɛm; na wonyaa kan aber biara, dɛ ɔyɛ nsu no sor anaadɛ nsu no n’ase.

11 Na dɛm na wɔdze hɔn twae, na wodzii nda ahaebiasa eduanan anan wɔ nsu no do.

12 Na wobodwiir anohoba asaase no no mpoano. Na ber a wɔdze hɔn anan sii anohoba asaase no no mpoano hɔ no, wɔbɔɔ hɔn mu adze wɔ asaase n’enyi do, na wɔbrɛɛ hɔnho adze wɔ Ewuradze enyim, na wodzii dɛw mbordo wɔ Ewuradze enyim, osian n’ehumbɔbɔr kɛse a ɔwɔ hɔn do ntsi.

13 Na ɔbaa dɛ wɔkɔr asaase no do, na wɔhyɛɛ ase dɛ wɔrodɔw asaase n’enyi do.

14 Na Jared wɔ mbabanyin baanan; na wɔfrɛ hɔn Jacom, na Gilgah, na Mahah, na Orihah.

15 Na Jared no nuabanyin no so woo mbabanyin nye mbabaa.

16 Na Jared nye no nuabanyin no hɔn ^aanyɛnkofo no yɛ bɛyɛ akra eduonu ebien; na hɔn so woo mbabanyin nye mbabaa ansaana wɔreba anohoba asaase no do; na dɛm ntsi wɔhyɛɛ ase dɛ wɔrodɔr.

17 Na wɔkyerɛɛ hɔn dɛ ^awɔnantsew ahobrɛadze mu wɔ Ewuradze enyim; na ^bwonyaa nkyerɛkyerɛ so fii sor.

18 Na ɔbaa dɛ wɔhyɛɛ ase tserɛwee wɔ asaase no enyi do, na wɔdɔɔw asaase n’enyi do; na hɔnho yɛɛ dzen wɔ asaase no do.

19 Na Jared no nuabanyin no hyɛɛ ase dɛ ɔreyɛ akɔkora, na ohun dɛ ɔrennkyɛr na ɔakɔ nda mu; dɛm ntsi ɔsee Jared dɛ: Ma yɛmboa hɛn dɔm yi ano ama yeehu hɔn dodow, na yebisa hɔn dza wɔpɛ dɛ yɛyɛ ma hɔn ansaana yɛakɔ hɛn ndamu.

20 Na wɔboaboaa dɔm no ano dɛ mbrɛ wɔahyehyɛ no ara. Afei Jared no nuabanyin ne mbabanyin nye ne mbabaa no nyina hɔn dodow yɛ akra eduonu ebien; na Jared ne mbabanyin nye ne mbabaa no nyina hɔn dodow yɛ duebien; onyaa mbabanyin baanan.

21 Na ɔbaa dɛ wɔkaan hɔn dɔm no; na wɔkaan hɔn wiei no, wobisaa hɔn ndzɛmba a wɔpɛ dɛ wɔyɛ ma hɔn ansaana wɔakɔ hɔn ndamu.

22 Na ɔbaa dɛ dɔm no see hɔn dɛ ^awɔnsera hɔn mbabanyin no mu kor ngo ma ɔmbɛyɛ ɔhen wɔ hɔn do.

23 Na afei hwɛ, iyi yɛɛ hɔn awerɛhow. Na Jared no nuabanyin no see hɔn dɛ: Ampa dɛ dɛm adze yi ^aogya dɔm kɔ ndɔmmum mu.

24 Mbom Jared see no nuabanyin no dɛ: Ma hɔn kwan ma wonya hɔn hen. Na dɛm ntsi ɔkãa kyerɛɛ hɔn dɛ: Hom nyi hɛn mbabanyin yi mu kor a hom pɛ ma ɔnyɛ hom hen.

25 Na ɔbaa dɛ woyii Jared no nuabanyin n’abakan no, na ne dzin dze Pagag. Na ɔbaa dɛ ɔpopoo ne tsir dɛ ɔrennyɛ hɔn hen. Na dɔm no pɛɛ dɛ n’egya bɛhyɛ no, na mbom n’egya ammpɛ dɛ ɔbɛyɛ; na ɔhyɛɛ hɔn dɛ mma wɔnnhyɛ ɔdasanyi biara dɛ ɔnyɛ hɔn hen.

26 Na ɔbaa dɛ woyii Pagag no nuanom mbanyin nyina, na wɔammpen.

27 Na ɔbaa dɛ Jared ne mbabanyin no nyina so mpo ammpɛ gyedɛ hɔn mu kor pɛr; na wɔseraa Orihah ngo dɛ ɔmbɛyɛ ɔhen wɔ dɔm no do.

28 Na ɔhyɛɛ ase dɛ oridzi adze, na dɔm no hyɛɛ ase dɛ wɔreyɛ prɔmprɔm; na wɔbɛyɛɛ esikafo mbordo.

29 Na ɔbaa dɛ Jared wui, na no nuabanyin no so dɛmara.

30 Na ɔbaa dɛ Orihah nantseew ahobrɛadze mu wɔ Ewuradze enyim, na ɔkaa ndzɛmba akɛse a Ewuradze yɛe maa n’egya, na ɔkyerɛkyerɛɛ no dɔm no so ndzɛmba akɛse a Ewuradze ayɛ ama hɔn egyanom.