1 Me yibi buch niki yol bayay ngakʼ fare am ko nam, niʼir Pahoran, ere baʼaray e pi thin ni yoloey, ni gaʼar: Musap, kug piiʼ e babyor rog nge yaen nib puluw ngakʼ Pahoran, u lan fare binaw nu Zarahemla, niʼir e pilung ko tapuf-oloboch nge am u gaʼangin yang e nam, nge gubin e piʼin ni kan melʼegraed ni ngar gagyeg gaed mar yarmiyed e pi gagyeg ko re mael ney.

2 Ya musap, bay banʼen ni nggog ngoraed ni de mʼag u wunʼug; ya musap gaed, gimed manang ni gimed e kan dugliymed ni ngam kunuyed nga taʼabang e gidiiʼ, ma ngam tayed e sayden nga paʼraed, nge sarey, nge gubin mit e talin e mael ni urngin mit, mi gimed piiʼraed ngar baed ko fapi Lamanites, ko re ginʼen ni gomanga bay rabaed riy nga lan e binaw romaed.

3 Ere chiney e musap, gube yoeg ngomed ni gag, nge ku gidiiʼ rog, nge ku Helaman nge gidiiʼ rokʼ, e kar gu gafgow gaed u fithikʼ e pi gafgow ni almarin; arragon, ni mus ko makʼiy, nge balel, nge magaer, nge gubin yalen e kirbaenʼ ko gubin mit.

4 Machane musap gaed, faʼanra kemus urngin aray ni nggu gafgow gaed riy ma dabgu gunʼgunʼ gaed ara gu nonnon gaed.

5 Machane musap gaed, rib almarin e ldoew ni ke aw nga fithikʼ e gidiiʼ romaed; arragon, yu biyuʼ ni kar awgaed nga butʼ ko sayden, ni manga nʼen ma ra thil ni faʼan gomanga mu piiʼed gelingin e salthaw romaed ma kam ayuwegedraed. Arragon, rib nʼuw napʼan ni kam feked oewchmed romaed.

6 Ere chiney e musap gaed, gamaed baʼadag ni nggu nanged ko mang tapgin e biney ni kam feked oewchmed romaed; arragon, gamaed baʼadag ni nggu nanged tapgin ni gimed be fekyathmaed.

7 Rayog ni ngam pired nga gilʼilungmed ni damur lemgaed, u napʼan ni bay e pi toʼogor romed ni yaed be mun sarey ngar liiʼed e gidiiʼ u taʼabmed iyaen? Arragon, u napʼan ni yaed be thang e pogofan rokʼ yu biyuʼ i walagmed—

8 Arragon, ni mus ko piʼin ni yaed be sap ngomed ko ayuw, arragon, ma kar tayed gimed nga ba dodow ni gomanga yog ni ngam ayuweged yaed riy, arragon, manga nʼen ma kam piiʼed e salthaw ngoraed, ni ngar ayuweged yaed, ma ke yog ni ngam ayuweged bukun e biyuʼ i yaed nge siy ra mʼaed ko sayden.

9 Machane musap gaed, gathi kemus aray—kum tiled e ggan romed roraed, ni arame rib yoʼor i yaed e cham nge mapʼ rachaʼraed ngar mʼaed ni bachan e gelingin e athap roraed ko paer rokʼ e pi gidiiʼ ney; arragon, biney e nʼen e ur rinʼed u napʼan nibe chugur ni ngar mʼaed ni makʼiy, ni bachan e kam feked oewchmed roraed.

10 Ere chiney, o pi walageg nib tʼuf rog—ya thingar ni tʼufegmed; arragon, ma thingar mu pasig niged gimed boech ni fan ko paer nge yalen e paer nib puf rogon ko pi gidiiʼ ney; machane musap gaed, kam feked oewchmed roraed ni arame rachaʼen bukun e biyuʼ e piʼin ni kar mʼaed e rasul labgen ngomed; arragon, ya manang Got gubin e mayoer roraed, nge gubin e gafgow ni amith roraed—

11 Musap gaed, gimed be lemnag ma rayog ni ngam pired u gilʼilungmed, nge bachan e finifelʼ Got ma arame rayog ni ngam pired ni dab mu rinʼed banʼen ma rayog ni nge thapegmed? Musap gaed, faʼanra kam lemgaed ni aray rogon ma kam lemgaed nib kireb rogon.

12 Gimed be lemnag ni, bachan e boʼor i pi walagmed e kar mʼaed ni bachan e pi ngongol roraed nib kireb? Gube gaʼar ngomed, faʼanra kam lemniged e biney ma kam lemgaed nib kireb rogon; ya gube gaʼar ngomed, boʼor e piʼin ni kar mʼaed ko sayden; ere musap gaed gimed e ngam feked wengan.

13 Ya fare Somoel e mapag e piʼin nib matʼaw ngan liiʼraed ya nge yog ni justice nge pufthin rokʼ e nge yibi aw nga dakean e piʼin kireb; ere dab mu lemniged ni piʼin nib matʼaw e kar malog gaed ni bachan e kan liiʼraed; machane musap gaed, ka ranoed nga tagilʼ e toffan ku Somoel ni Got roraed.

14 Ere chiney e musap gaed, gube yoeg ngomed, ni rug be rus nib gel ya fare pufthin ku Got e bay yibi aw nga dakean e pi gidiiʼ ney, ni bachan e malmal roraed nib gel, arragon, ni aram rogon ko malmal ko am romaed, nge fekyath roraed nib gel ngakʼ pi walagraed, arragon, ngakʼ e piʼin ni kan liiʼraed kar mʼaed.

15 Ya faʼan manga boech ni gathi bachan e kireb ni tabab ni sommʼon ko am romaed, ma ke yog ni nggu maʼngech gaed ko pi toʼogor romaed me yaeni aw ni dabiyog ni ngar gelgaed ngomaed.

16 Arragon, faʼan manga boech ni gathi bachan fare mael ni sum u fithikʼmaed; arragon, faʼan manga boech ni gathi bachan fapi King-men, ni yaed e kar kʼaringed e puʼoeg rachaʼ nga fithikʼmaed; arragon, ko ngiyalʼ ni gamaed be togopluw u fithikʼmaed, ma faʼan gomanga gu chagiliyed gelingmaed nga taʼabang ni boed ni kuʼug rinʼed; arragon, faʼan manga boech ni gathi bachan fare athap ko gelingin nge matʼawon niʼir e ke gagyeg nag fapi King-men nga dakeanmaed; ma faʼan gomanga kuʼur yulʼyulʼ gaed nga rogon yalen e paer nib puf, mar cheag gaed ngomaed, ngug togopluw gaed ko pi toʼogor romaed, ko bin baʼaray ni ngar feked e sayden roraed ngar cham gaed ngomaed, ni ireram tapgin e rachaʼ ni yoʼor ni mapʼ u fithikʼmaed; arragon, faʼan gomanga guwaroed u taʼabang nggu togopluw gaed ngoraed u gelingin Somoel, ma kug wereged e pi toʼogor romaed, ya arame ke yaeni aw ni kan rinʼ u rogon ni nge muguʼul e thin rokʼ.

17 Machane musap gaed, chiney e fapi Lamanites e karbaed ngomaed, ni yaed be fek e pi binaw ni suwmaed, ma yaed be thang e pogofan rokʼ e pi gidiiʼ romaed ko sayden, arragon, pi ppin romaed nge pi bitir romaed, ma kuyaed be fekraed ni kalbus, ma yaed be guy rogon ni nga ur gafgow gaed ni gubin mit e gafgow, ni fan e biney e bachan gelingin e kireb rokʼ e piʼin ni yaed be gay e gelingin nge matʼawon, arragon, ni ireram fapi King-men.

18 Ere mangfan ni nge yoʼor banʼen ni nggu weliy u morngaʼagen e biney gagyeg? Ya dagur nanged fan ni gimed be gay, e matʼawon. Dagur nanged fan, ya kagmed e pi toʼogor ko nam romed.

19 Fa bachane kam sabalbalyang gaed romaed ni bachan e gimed bay u lulukungun e nam rodaed mab liyegmed e matanag, ma dam piiʼed e ggan nge yib ngomaed, nge salthaw ni nge piiʼ gelingin e pi salthaw romaed?

20 Kam paged talin fapi motochiyel ku Somoel ni Got romed? Arragon, ma kam paged talin fare kalbus nni tay ngakʼ e pi chitamangdaed? Kam paged talin fini yoʼor yay ni kan chuweg daed u paʼ pi toʼogor rodaed?

21 Fa gimed be lemnag ni Somoel e kura chuweg daed u paʼraed, ni baʼaram ni kad pired nga gilʼilungdaed, ma daryog ni ngad muruwel gaed ko pinʼen ni ke piiʼ Somoel ni fan ngodaed?

22 Arragon, rayog ni ngam pired nga fithikʼ e malmal u napʼan nib liyegmed yu biyuʼ e gidiiʼ, arragon, nge yu ragag e biyuʼ, ni ku yaed be paer nga fithikʼ e malmal, u napʼan ni bay, yu biyuʼ e gidiiʼ u lan e mathil ko binaw ni be thikiyraed e sayden nga butʼ, arragon, ma kar madʼad gaed ma be mapʼ rachaʼraed?

23 Gimed be lemnag nra guymed Got ni dariy thibngimed u napʼan ni kam pired ni damur mithmith gaed, ma gimed be guy e pinnʼey? Musap gaed gube gaʼar ngomed, Dabiyog. Ere chiney e gubaʼadag ni nge yib ngaenʼmed ni Got e ke yoeg ni fithikʼ i doewdaed e gidiiʼ e thingari beʼech ko sommʼon, ma fin arame rayog ni ngan beʼech nag wuruʼ i doewdaed.

24 Ere chiney, faʼanra dab mu kalgaed ngaenʼmed ko pinʼen ni kam rinʼed, magmed sakʼiy ngam muguʼuliyed e tin ni ngam rinʼed, magmed piiʼ e ggan nge salthaw nge yib ngomaed, nge ngakʼ Helaman, ni nge yog ni ayuweg e yungin baʼaram e nam rodaed ni ke sulweg, ni gomanga yog niki yog ni ngug sulweged e yungin ni ke magaey ko yuyang ney ni tafadaed, ma musap gaed, ratʼuf ni nggu tileged e mael ngakʼ fapi Lamanites nge yaen i madaʼ ko ngiyalʼ ni kad beʼech niged fithikʼ i doewdaed ko sommʼon, arragon, nge loelugen e am rodaed.

25 Ere faʼanra gimed ra piiʼ e tin gube yoeg u lan e babyor rog, mi gimed yib mmʼug gaed ngam daged ngog ba yalen e paer nib puf-rogon nib riyulʼ, magmed athamgil ngam piiʼed gelingin magmed noemow nag e pi salthaw rodaed, magmed piiʼ e ggan ni fan ngoraed, meʼere musap gaed gura pag bang ko Freemen rog ngar matangiyed e giney ko nam rodaed, ma gura tay gelingin nge tawaʼath ku Got roraed, ya nge dariy rebo gelingin ni nge gagyeg nib togopluw ngoraed—

26 Ma fan e biney e bachan e mich roraed nib gel, nge gumʼaenʼ u fithikʼ e pi gafgowaenʼ roraed—

27 Ere gura yib ngomed, ma faʼanra bay boech i gimed u fithikʼmed ni baʼadag e yalen e paer nib puf rogon, arragon, faʼanra kubay boechi yang ni ke magaey ko adag u yalen e paer nib puf rogon, ma musap gaed gura kʼaring e wagaey nga fithikʼmed, nge yaeni madaʼ ko ngiyalʼ ni piʼin baʼadag ni nge gagyeg nag e gelingin nge matʼawon ni dematʼaw e kar mʼaed kar chuw gaed.

28 Arragon, musap, dagur rus ko gelingin romed ara matʼawmed, machane ri Got rog e ire gube rus ngakʼ; ma rarogon e pi motochiyel rokʼ e nggu fek e sayden rog nggu yororiy e gagyeg ko nam rog, ere rib yoʼor i gamaed ni ke yimʼ ni bachan e kireb romed.

29 Musap gaed ke taw nga napʼan, arragon, fare ngiyalʼ innʼem e bay u paʼay e chiney, ni faʼanra dab mu mithmith gaed ngam yororiyed e nam romed nge piʼin bitir romed, ma fare sayden ko justice e kan tining nga dakeanmed, arragon, ma ra yibi aw nga dakeanmed nge yaeni madaʼ ko ngiyalʼ ni kan gatheaymed.

30 Musap gaed, gube soen nag e ayuw ni nge yib romed; ma faʼanra dab mu piiʼed e gapas nga laniyaenʼ maed, ma musap gaed, gura yib ngomed, nga lan fare binaw nu Zarahemla, mug liiʼmed ko sayden, nge yaeni madaʼ ko ngiyalʼ ni dakuriy gelingmed ni ngam tileged e monʼog ko pi gidiiʼ ney u yalen e paer nib puf rogon.

31 Ya musap gaed, fare Somoel e dabi pag ni nga um pired ni gimed bafos magmed ba almarin ko pi denen romed ni ngam gatheay e pi gidiiʼ rokʼ nib matʼaw.

32 Musap gaed, gimed be lemnag ni fare Somoel e rayog ni nge pagmed me yib nge pufthin nag fapi Lamanites, ni bachan fare yalen ko pi chitamangraed niʼir e ke kʼaring e fananikan ngoraed, arragon, ma ke almarin boech ni bachan fa piʼin ni kar chuw gaed rodaed, u napʼan ni tiromed e kireb e yib ko adag romed ko rir nge pinʼen ni dariy fan nu fayleng?

33 Gimed manang ni gimed be rinʼ e kireb nib togopluw ko pi motochiyel ku Got, ma gimed manang ni gimed be yitʼ nga butʼ ngam maroed u dakean. Ere musap gaed, fare Somoel e gaʼar ngog: Faʼanra piʼin ni kam dugiliyedraed ni ngar manged am romed e dabra kalgaed ngaenʼraed ko pi denen roraed nge pi kireb roraed, ma ngam man ngoraed ko mael.

34 Ere chiney e musap gaed, gag, Moroni, e thingar gurinʼ u rogon e mʼag nug tay ni nggu fol ko pi motochiyel rokʼ e Got rog; ere gubaʼadag ni ngam fol gaed ko thin ku Got, magmed piiʼ e ggan romed nge salthaw romed nge yib ngog nib papay, ma ku aram rogon ngakʼ Helaman.

35 Ere musap gaed, faʼanra dab mu rinʼed e biney ma bay gub ngomed nib papay; ya musap gaed, Got e dabi pag ni nggu mʼaed ko makʼiy; ere ra piiʼ ngomaed boech e ggan romed, ni faʼanra ba tʼuf ni nge mithmith e sayden. Ere chiney e muguyed rogon ngam muguʼuliyed e thin ku Got.

36 Musap gaed, I gag Moroni, ni pilung ko kapten romed. Dagur gay e gelingin ni nge yog ngog, ya gube gay ni nggu miliy nga butʼ. Dagur gay ni nga noeg ngog e soerokʼ nu fayleng, machane gube gay fare rir ko Got rog, nge yalen e paer nib puf rogon nge waʼathan e paer ko nam rog. Ere aray rogon nug museg e babyor rog.