1 Me yibi buch u napʼan ni tabab fare lal i duw u napʼan e lung roraed, ma arame tabolngin e maleʼeg thin nga fithikʼ fapi gidiiʼ; ya bay beeʼ nib moʼon, ni kanoeg Amlici ngakʼ, niʼir beeʼ nib moʼon ni rib sasaliyeb, arragon, beeʼ nib moʼon nib luk ko gonop nu fayleng, ni boed rarogon fare moʼon ni liiʼ Gideon ko sayden, niʼir e nliiʼ ngemʼ u tan e motochiyel—

2 Chiney, e chaʼaney i Amlici, e ke miliy boʼor e gidiiʼ kar uned ngakʼ, u dakean e sasaliyeb rokʼ; ni ri yaed bayoʼor ni arame gel madguwraed; mar gelgaed ngay ni nge paer Amlici ni nge mang pilung ko fapi gidiiʼ.

3 Chiney e banaʼab e gidiiʼ ko fare galasia ko biney e paʼ, nge ku aram rogon ngakʼ e piʼin ni de yog ni pingeg Amlici laniyaenʼraed ngar uned ngakʼ; ya yaed manang nrogon e motochiyel roraed e thingar nrinʼ banʼen ni aram rogon u lungun e gidiiʼ ni yoʼor.

4 Ere, faʼanra yaeni chey ni yog ni Amlici e nge mʼagaenʼ lungun e yoʼor ngakʼ, niʼir, beeʼ nib moʼon nib kireb, ma ra chuweg e pi matʼawraed nge yalraed ko fare galasia; ya ireram e athap rokʼ ni be nomeg ni nge gatheay fare galasia rokʼ Got.

5 Me yibi buch ni fapi gidiiʼ e ra kunuyed yaed nga taʼabang u dakean gaʼangin yang fare nam, ni gubin e gidiiʼ nra beeʼ ma be yaen u rogon e tafnaey rokʼ, ko nge mang fa nge togopluw ngakʼ Amlici, nib kiiʼ ni ruw rabaʼ u butʼ, u tomuren nib yoyoʼor e welthin nge togopluw ni ke yaen u thilraed.

6 Ere aray rogon nra kunuyed yaed nga taʼabang ni nga roeged laniyaenʼraed ni morngaʼagen e biney e gagyeg; min fek iyaen ko fapi tapuf-oloboch.

7 Me yibi buch ni lungun e gidiiʼ ni yoʼor e yib nib togopluw ngakʼ Amlici, ma arame deyog ni nge mang pilung ko fapi gidiiʼ.

8 Chiney e biney e paʼ e yib nag e falfalaenʼ nga langgin gumʼirchaʼen e piʼin ni yaed ba togopluw ngakʼ; machane Amlici e kʼaring e piʼin ni yaed ba fol ngakʼ ngar damomuw gaed ngakʼ e piʼin ni dar fol gaed ngakʼ.

9 Me yibi buch ni ra kunuyed yaed nga taʼabang, ngar bangbeng niged Amlici ni nge mang pilung roraed.

10 Chiney e napʼan ni Amlici e ke mang pilung roraed me yoeg ngoraed ni ngar feked talin e cham roraed ngar cham gaed pi walagraed; ma biney e rinʼ ni bachan e nge yog nra mʼing gaed ngakʼ.

11 Chiney e gidiiʼ ku Amlici e un nangraed u fithingan Amlici, ni kanoeg e Amlicites ngoraed; nge tin ni magaey e kanoeg e Nephites ngoraed, ara fapi gidiiʼ ku Got.

12 Ere gidiiʼ ko Nephites e yaed banaʼab nga laniyaenʼ fapi Amlicites, ma arame ra falʼeged rograed ni ngar madaʼ gaed; arragon, mar feked talin e cham roraed ni sayden, nge sarey, nge gating, nge gane gating, nge malang, nge gawul, nge gubin mit e tatalin e mael, ni urngin mit.

13 Ere aray rogon nra falʼeged rograed ni ngar madaʼ gaed fapi Amlicites ko ngiyalʼ i nʼen ni yaedra yib. Ma immoy e kapten ni kan melʼeg, nge kapten ni thʼabi tolang, nge chaʼ ni thʼabi pilung ko kapten, ni be yaen u rogon urngiraed.

14 Me yibi buch ni Amlici e tay gubin mit e tatalin e cham ni urngin mit nga paʼ e gidiiʼ rokʼ; maki melʼeg e gidiiʼ ni nge mang gaaʼ nge chaʼ ni mite thin ko gidiiʼ rokʼ, ni nge powiʼiyraed ko mael nib togopluw ngakʼ piwalagraed.

15 Me yibi buch ni fapi Amlicites e rabaed nga dakean e falang nu Amnihu, ni bay ko ngek ko lulʼ nu Sidon, ni yaen u charen e binaw nu Zarahemla, ma ireram e gin ni ra tabab gaed riy ko mael ngakʼ fapi Nephites.

16 Ma chiney e Alma, niʼir e pilung ko tapuf-oloboch ma ire am ko fapi gidiiʼ rokʼ Nephi, ere ranoed fapi gidiiʼ rokʼ, arragon, nge pi kapten rokʼ, nge pi pilung ko kapten, arragon, ire be gamaliy e pi salthaw rokʼ iyaen ko fapi Amlici ni ngar mael gaed.

17 Mar tabab gaed i liiʼ fapi Amlicites u dakean e falang u baʼan ngek u Sidon. Ma fapi Amlicites e rib almarin ni ur cham gaed fapi Nephites, ni arame ri yoʼor fapi Nephites nra mʼaed nga paʼ fapi Amlicites.

18 Machane fare Somoel e piiʼ gelingin i paʼ fapi Nephites, ni arame ra liiʼed fapi Amlicites ni kari gaaʼ nga dakean e mathang fan, ma arame ra tabab niged e miil.

19 Me yibi buch ni fapi Nephites e ra tulufed fapi Amlicites ni poloʼ e rran, mar liiʼed raed nib gaaʼ nga dakean e mathang fan, ni arame urngin fapi Amlicites nni liiʼraed ngar mʼaed e ragag nge lʼagruw e biyuʼ nge lal miriʼay nge guyey nge lʼagruw e gidiiʼ; ma urngin fapi Nephites nni liiʼraed ngar mʼaed e nelʼ e biyuʼ nge lal miriʼay nge nelʼ i ragag nge lʼagruw e gidiiʼ.

20 Me yibi buch u napʼan ni Alma e dakiyog rokʼ ni nge tuluf fapi Amlicites me yoeg ko gidiiʼ rokʼ ni ngar nʼufed e pi tent roraed u lan fare loway nu Gideon, re loway nem e kan tunguy fithingan Gideon ngay niʼir faram e yimʼ ni Nehor e liiʼ ko sayden; ere lan e re loway ney e fapi Nephites e ra nʼufed e pi tent roraed riy ni ngar toffan gaed e re nepʼ nem.

21 Ma Alma e lʼoeg e pi spy ni ngar leaked e piʼin ni ke magaey ko fapi Amlicites, ni gomanga nang ko manga yaed be lemnag fa yaed be finey, ni gomanga yog ni ayuweg ir ko pichaʼanem, ni gomanga yog ni ayuweg e gidiiʼ rokʼ ni dab ni gafgow nagraed.

22 Chiney e pichaʼ ni piiʼraed ni ngar matangiyed fare tamagif ko Amlicites e kanoeg e Zeram, nge Amnor, nge Manti, nge Limher ngoraed; ireray rogon fapi chaʼanem ni ranoed nge gidiiʼ roraed ni ngar matangiyed fare tamagif ko fapi Amlicites.

23 Me yaen ni buch ni rebo rran riy mi yaed sul nga lan e fare tamagif ko fapi Nephites ni yaed ba gur, ni ke mat oewchraed, ni kar mʼaed ko murus, mi yaed gaʼar:

24 Musap, gamaed be leak fare tamagif ko fapi Amlicites, ma ki gin oewchmaed, u lan fare binaw nu Minon, ni bay ngalang ko fare binaw nu Zarahemla, nib sor ko fare binaw ku Nephi, u napʼan ni kug guyed e tin yoʼor ko salthaw ko fapi Lamanites; mug guyed, fapi Amlicites ni kar chagil gaed ngoraed;

25 Min ʼog ngakʼ fa piʼin walagmaed u lan e fare binaw; ma arame ra miil gaed ni yaed fapi gamanman roraed, nge pi leʼengiraed, nge pifakraed, iyaen ko fare binaw romaed, ni faʼanra dab ggur gaed ma yaedra suwey fare binaw romaed, nge pi chitamangmaed, nge pi leʼengimaed, nge pi fakmaed ni yira liiʼraed.

26 Me yibi buch ni fapi gidiiʼ ko Nephi e ra feked fapi tent roraed, ngar chuw gaed ko fare loway nu Gideon ni kar nomeged fare binaw roraed, ni ireram fare binaw nu Zarahemla.

27 Ere musap gaed, napʼan ni yaed be thʼaeb fare lulʼ ni Sidon nga barbaʼ, ma fapi Lamanites nge fapi Amlicites, nib chugur ni nge taʼareb urngiraed, ko yanʼ u maday, e rabaed ngoraed ni ngar liiʼedraed.

28 Machane, fapi Nephites e ke piiʼ Somoel gelingraed, ni bachan e ur meybil gaed nib almarin ngakʼ ni nge yog ni chuwegraed u paʼ fapi toʼogor roraed, ere Somoel e rungʼag e meybil roraed, me piiʼ gelingraed, ma fapi Lamanites nge fapi Amlicites e kar aw gaed nga butʼ u pʼoewchraed.

29 Me yibi buch ni Alma e ra cham gow Amlici ko sayden, ni kar sabol gow; ni yow be apin nga taʼabang.

30 Me yibi buch ni Alma, gidiiʼ rokʼ Got, nib gele mich rokʼ, ma meybil, ni gaʼar: O Somoel, mu runguyeg ngam tayeg ni dab gumʼ, ni nge yog ni nggu mang talin e muruwel u paʼam ni nge yog ni nggu thapeg mug ayuweg pi gidiiʼ ney.

31 Ma chiney e napʼan ni yoeg Alma e pi thin ney ma kur cham gow bayay Amlici; me yib gelingin, ni arame ri liiʼ Amlici ko sayden.

32 Ma kur cham gow fare pilung ko fapi Lamantes; machane fare pilung ko Lamanites e miil rokʼ Alma me lʼoeg e pi matanag rokʼ ni ngar cham gaed Alma.

33 Machane Alma, nge fapi matanag rokʼ, e ra cham gaed fapi matanag rokʼ fare pilung ko fapi Lamanites nge yaeni madaʼ ko ngiyalʼ ni ke liiʼ raed me tuluf raed ngar suloed.

34 Ere aray rogon ni tamilngeg dakean e binaw, ara binaw ni bay nga mirichlen e lulʼ, ni bay nga baʼan ngael fare lulʼ ni Sidon, ni yibe yinʼ e lldoew ko fapi Lamanites ni kan liiʼraed nga langgin fare lulʼ u Sidon, ni nge yog riy ni nge yib woʼen e gidiiʼ rokʼ ni ngar thʼibed nga barbaʼ ma ngar cham gaed fapi Lamanites nge fapi Amlicites u baʼan ngael fare lulʼ ni Sidon.

35 Me yibi buch u napʼan ni yaed gubin ni kar thʼibed fare lulʼ nga barbaʼ ma fapi Lamanites nge fapi Amlicites e ra tabab gaed ko miil, ni yug aram rogon nri yaed bayoʼor ni dabiyog i thiʼeg raed.

36 Ere ra miil gaed ko fapi Nephites iyaen nga wuruʼ e binaw ko ngael nge leluʼoch, nib palog mab kan nga orel ko mathil ko fare binaw; ma fapi Nephites e ra lʼoelʼged raed ngar liiʼed raed ngar mʼaed.

37 Arragon, nni liyeg raed, min liiʼ ma yibe tuluf raed, nge madaʼ ko ngiyalʼ ni kar garar gaed u lan e ngael ngo lan e leluʼoch, nge madaʼ ko ngiyalʼ ni kar taw gaed nga wuruʼ e binaw ni kanoeg Hermounts ngay; ni gin baʼaram u wuruʼ e binaw ni ke sug dakean ko gamanman nib malboch mab tamakʼad.

38 Me yibi buch nib yoʼor e gidiiʼ ni yimʼ u lan wuruʼ e binaw ni bachan e madʼad ni kar ted, me lunguy raed e pi gamanman nem nge archeʼ nu lang; ma yil roraed e pirʼeg, ni kan ufung u dakean e buutʼ.