1 Me yibi buch ni arame ratal gaed mar tayed thilraed. Ere Moroni e gaʼar ngakʼ Zerahemnah: Musap, o Zerahemnah, gamaed e dagur athapeged ni nggu manged gidiiʼ ni baʼadag e puʼoeg rachaʼ. Gimed manang ni gimed bay u lan paʼmaed, machane dagur athapeged ni nggu liiʼed gimed ngam mʼaed.

2 Musap, dawor gubaed ko mael ngomed ni nggu puʼoeged rachaʼmed ni bachan e nge gaaʼ lungmaed; ara dagur athapeged ni nggu feked beeʼ nga kalbus. Machane ireray fan ni kam baed ni cham ngomaed; arragon, kam damomuw gaed ngomaed ni bachan e taliw romaed.

3 Machane chiney, e kam guy ni fare Somoel e bay romaed; ma kam guy ni ke piiʼmed nga lan paʼmaed. Ere chiney e gubaʼadag ni ngam nang fan ni kan rinʼ e biney ngomaed ni bachan e taliw romaed nge mich romaed ngakʼ Kristus. Ere chiney e kam guy ni dabiyog ni ngam gatheay e mich romaed.

4 Ere kam guy ni ireray e bin riyulʼ e mich ku Got; arragon, kam guy ni Got e ra falʼeg waʼathmaed, me chaʼariy maed, me ayuweg maed, u nʼumngin i napʼan ni gamaed ba yulʼyulʼ ngakʼ, nge mich romaed, nge taliw romaed; ma dabi pagmaed Somoel ni ngan gatheaymaed ma kemus ni faʼan gamaed ra mul nga fithikʼ e denen ma gamaed keruʼuy e mich romaed.

5 Ere chiney, o Zerahemnah, gube chiyliy ngom, u fithingan fare Got ni gubin ma ra yog rokʼ, niʼir e ke piiʼ gelingin i paʼmaed ni ke yog nug gelgaed ngomed, u dakean e mich romaed, ngu dakean e taliw romaed, ngu dakean e gamʼingin e liyoer romaed, ngu dakean e galasia romaed, ngu dakean e ayuw nib thothup niʼir e gamaed ba yuʼnag ngakʼ pi leʼengimaed nge pi bitir romaed, u dakean fare puf-matʼawon niʼir e be mʼag maed ko pi binaw romaed nge nam romaed; arragon, nge ku dakean e ayuw ko fare thin ku Got nib thothup, niʼir e gamaed be yuʼnag gubin e falfalaenʼ romaed ngay; ngu dakean gubin banʼen ni rib tʼuf romaed—

6 Arragon, ma gathi kemus aray; gube chiyliy ngom u dakean gubin e pi athap ni bay romed ni fan ko yafos, ni ngam piiʼed pi talin e mael romed ngomaed, ma dab gu puʼoeged rachaʼmed, ma gamaed ra taymed ni dab ni liiʼmed ngam mʼaed, ni faʼan gimed ra yaen ngam chuw gaed ma dab kum suloed bayay ni mael ngomaed.

7 Ere chiney, e faʼanra dab murinʼ ni aray rogon, meʼere musap, gabay u lan paʼmaed, ma gura lʼoeg e salthaw rog ngar og gaed ngomed, mar tayed e madʼad ni yamʼ nga fithikʼ i doewmed, ni nge yog ni ngam mʼaed; ma arame bay dugyed ko miniiʼ e bayi gaaʼ lungun ko pi gidiiʼ ney; arragon, bay dugyed ko miniiʼ e bay ni fek nga kalbus.

8 Ere yibi buch u napʼan ni rungʼag Zerahemnah e pi thin ney me yib nga mʼon nge yibi tay e sayden rokʼ nge sarey rokʼ, nge gatʼing rokʼ nga lan paʼ Moroni, me gaʼar ngakʼ: Musap, baʼaray e pi talin e mael romaed; bay gu piiʼed ngom, machane dab gu paged gamaed nggu michmich gaed ngom, ni gamaed manang ni gamaed ra thʼaeb, nge ku aram rogon ngakʼ pifakmaed; machane mu fek e pi talin e mael romaed, mag pagmaed nggu waroed nga lan wuruʼ e binaw; ara dangay ma nggu feked e sayden romaed, ma rebe nggu mʼaed fa nggu gel gaed.

9 Musap, gathi gamaed gidiiʼen e taliw rom; dar mich u wunʼmaed ni Got e ke piiʼ maed nga lan paʼam; machane ba mich u wunʼmaed ni ireray e salap rom ni ke ayuwegem ko pi sayden romaed. Musap, pi breastplate rom nge shields rom e ire ke ayuwegem.

10 Ere chiney e napʼan ni muʼ Zerahemnah i weliy e pi thin ney, me sulweg Moroni fare sayden nge fapi tatalin e mael ngakʼ Zerahemnah, niʼir faram e kan piiʼ ngakʼ, me gaʼar: Musap, ngad mu niged e biney e mael.

11 Chiney e dab kug siyeg fapi thin ni kug weliy, ya woed nib fos Somoel, e aram rogon ni dabiyog ni ngam maroed ma kemus ni faʼanra ngam chuw gaed ni kam michmich gaed ni dab kum suloed bayay ngomaed ni mael. Chiney ni gimed bay u lan paʼmaed ma rayog nggu puʼoeged rachaʼmed nga dakean e buutʼ, ara ngam rinʼed ni boed rogon ni kug weliy faram.

12 Ere chiney e napʼan ni yoeg Moroni e pi thin ney, me fek Zerahemnah e sayden rokʼ, ma ke damomuw ngakʼ Moroni, me miil iyib nga mʼon ni nge liiʼ Moroni; machane faʼani pug e sayden rokʼ ngalang, ma musap, reb fapi salthaw ku Moroni e toey nge mul nga butʼ, ni ke mʼing u charen koelen; ma ki toey Zerahemnah nge thʼaeb e yalach u dakean loelugen me mul nge aw nga butʼ. Ere Zerahemnah e miil roraed nge yaeni paer nga fithikʼ e salthaw rokʼ.

13 Me yibi buch ni fare salthaw ni sakʼiy nib chugur ngoraed, niʼir e ke thʼaeb e yalach u dakean i loelugen Zerahemnah, e fek farengi yalach u butʼ ni ke koel e piy riy, nge tay nga taban e sayden rokʼ, me pug ngalang nga dakeanraed, me non ngoraed nib gaaʼ laman:

14 Boed rogon e rangi yalach ney ni ke mul nga butʼ, ni yalach u dakean i loelugen e chaʼ ni pilung romed, e aram rogon ni gimed ra aw nga butʼ ma kemus ni faʼan gimed ra piiʼ e pi tatalin e mael romed mi gimed yaen nga lan e mʼag ko gapas.

15 Chiney e boʼor i yaed, u napʼan ni rungʼag e pi thin ney mar guyed fare yalach ni bay u taban farengi sayden, mar rus gaed; ere boʼor i yaed ni yib ngar yinʼed e tatalin e mael roraed nga butʼ nga charen i rifrifanʼay i Moroni, mar pired nga lan ba mʼag ko gapas. Ere urngin e piʼin nra pired nga lan be mʼag e ni pagraed nga ranoed nga lan wuruʼ e binaw.

16 Ere chiney e yibi buch ni Zerahemnah e rigel e puwaenʼ rokʼ, me kʼaring e damomuw ngakʼ e tin kubay ko fapi salthaw rokʼ, mar almarin gaed boech ko cham ngakʼ fapi Nephites.

17 Ere chiney e ri damomuw Moroni, ni bachan e gelyuwan ko fapi Lamanites; ere yoeg ko gidiiʼ rokʼ ni ngar og gaed ngoraed ngar liiʼedraed ngar mʼaed. Me yibi buch ni arame ra tabab gaed i liiʼraed; arragon, ma fapi Lamanites e ra cham gaed ko sayden roraed nge gelingraed.

18 Machane musap, doewraed ni dariy e mad riy nge loelugraed e rib felʼ rogon nibe awe sayden nib mʼuth ko fapi Nephites ngay; arragon, musap un kuruf raed ma yibe thʼaebraed, arragon, mar thig gaed nga butʼ ni papay ko fayungi sayden ko fapi Nephites; min thirif raed u butʼ, ni boed rogon ni yiʼiy nag ko fare salthaw ku Moroni.

19 Chiney e faʼanem i Zerahemnah, e napʼan ni guy ni arame yaed gubin ni ke chugur ni ngan liiʼraed, me tolul nag e wenig ngakʼ Moroni, ni be michmicheg niʼir nge gidiiʼ rokʼ e ra mʼagaenʼraed ni nge paer ba mʼag nga thilraed, ni faʼan yaedra tayraed ni dab kun liiʼraed e piʼin ni kar magaey gaed, ma dab kur baed bayay ni mael ngoraed.

20 Me yibi buch ni Moroni e guy rogon ni fare cham ni yamʼ e nge tal bayay u fithikʼ fapi gidiiʼ. Me fek fapi tatalin e mael rokʼ fapi Lamanites; ere tomuren ni kar micheged e mʼag ko gapas ngakʼ min pagraed ngar chuw gaed nga ranoed nga lan wuruʼ e binaw.

21 Chiney, e oren pi ldoew roraed e dan thiʼeg ni bachan e kayigi yoʼor; arragon, oren e pi ldoew roraed e rib yoʼor, ni ruw rabaʼ ni fapi Nephites nge fapi Lamanites.

22 Me yibi buch ni arame riyinʼed e pi ldoew roraed nga lan farengi raen nu Sidon, mar ligil gaed iyaen ko yungin nib toʼaer u maday.

23 Ma fapi salthaw ko fapi Nephites, ara salthaw ku Moroni, e ra suloed ko tabinaew roraed nge binaw roraed.

24 Ere aray rogon ni mus e bin ragag nge meruk e duw ko fare lung ko fapi tapuf-oloboch nga dakean fapi gidiiʼ ku Nephi. Ma arame mus fare chep ku Alma, ni kan yoloey nga dakean fapi yungi plates ku Nephi.