1 Ere chiney e yibi buch u tomuren ni ke muʼ Alma i yoeg e pi thin ney ngoraed me paer nga butʼ nga dakean e buutʼ, me sakʼiy Amulek nge tabab i fil ngoraed, ni gaʼar:

2 Pi walageg, gube lemnag ni dariy liyiben me yog ni mu pired nib minaenʼmed ko pinʼen ni kan weliy ni morngaʼagen fare wub rokʼ Kristus, niʼir e kug filed iyaen ni morngaʼagen fachaʼ ni Fak Got; arragon, gumnang ni pinnʼey e ni fil ngomed nib yoʼor yay u mʼon ko pi togopluw romed u fithikʼ daed.

3 Ere bachan e gimed baʼadag ni walageg nib tʼuf rog e ire nge yoeg ngomed ko mang e ngam rinʼed, ni bachan e pi kirbaenʼ romed; ma ke weliy boech banʼen ngomed ni nge yarmiy e tafnaey romed; arragon, me ning chilen ngomed ni nge michaenʼmed me gumʼaenʼmed—

4 Arragon, ma ngki gel e mich romed nge madaʼ nga napʼan ni kam yunged fare bugithin nga lan gumʼirchaʼmed, ni nge yog rogon ni ngam nanged falʼngin.

5 Ere gamaed e kug guyed ni re duwer ni thʼabi gaaʼ u laniyaenʼmed e, gulley bay fare bugithin rokʼ fachaʼ ni Fak Got, ara dabi yib Kristus.

6 Ma kum guyed ni walageg e kar micheged ngomed, ni ke yoʼor yay, ni fare bugithin e bay rokʼ Kristus ni woʼen e thap.

7 Pi walageg e karoeged fapi thin ku Zenos, ni bayul e ra yib u dakean fachaʼ ni Fak Got, ma ki yoeg fapi thin ku Zenock; nge ku arragon ni chiyliy ngak Moses, ni nge micheg ni pinnʼey e ba riyulʼ.

8 Ere chiney, e musap gaed, bay gu micheg ngomed ni pinnʼey e ba riyulʼ. Musap gaed, gube yoeg ngomed, ni gumnang ni Kristus e bay yib nga fithikʼ e gidiiʼ, ni nge fek nga dakean malngin e pi denen ko gidiiʼ rokʼ, ma bayi piiʼ ir ni bayul ni fan ko pi denen ko gidiiʼ nu fayleng; ya fare Somoel ni Got e ke yoeg.

9 Ya rib tʼuf ni thingar ni falʼeg ba bayul; ya rogon e dumʼmidil ko fare Got ni manechubog e thingar ni falʼeg bbayul, ara gubin e gidiiʼ ma thingar ra mʼaed ni dabisiy; arragon, yaed gubin ma kar ʼelʼel niged gumʼirchaʼraed; arragon, ma yaed gubin ma kar mul gaed ma kar malog gaed, ma thingar ra mʼaed ma kemus ni faʼanra bay ba bayul niʼir e rib tʼuf ni ngan falʼeg.

10 Ya rib tʼuf ni thingari yib ba maligach nib gaaʼ ma bin tomur; arragon, gathi maligach ni gidiiʼ, ara gamanman, ara yugub mit e chachngeg; ya gathi ba maligach ko gidiiʼ; ya thingari aw ni ba maligach ni dariy tungun mab manechubog.

11 Ere dariy beeʼ nib moʼon ni rayog rokʼ ni nge piiʼ rachaʼen ni maligach ni nge bayul nag e pi denen rokʼ beeʼ. Ere, faʼanra thang beeʼ e pogofan, musap gaed rayog ni motochiyel rodaed, nib matʼaw, e nge fek e pogofan rokʼ walagen? Gube gaʼar ngomed, Dabiyog.

12 Machane fare motochiyel e ngan fek e pogofan rokʼ e chaʼ ni ke thang e pogofan; ere dariy banʼen nib achig u bbayul ni dariy napʼan, ni rayog riy ni nge bayuliy e denen ko gidiiʼ nu fayleng.

13 Ere, rib tʼuf ni thingari moʼ ba maligach nib gaaʼ ma bin tomur, ma arame bayi buch, ara rib tʼuf ni nge buch, ni ngan toffan ko puʼoeg rachaʼ ni maligach; ma arame fare motochiyel ku Moses e bayi muguʼul; arragon, ra muguʼul ni gubin, ni gubin e nochiyang riy ni achichig, ma dariy bang riy ni nge yaen nga bang.

14 Ere musap gaed, ireray fan fare motochiyel ni poloʼ, gubin e nochiyang nib achichig riy ma be powiʼiy laninʼuy ko fabin thʼabi gaaʼ mab tomur e maligach; ma re maligach nem ni thaʼbi gaa ma ba tomur e ra yaeni aw ni faʼen ni Fak Got, arragon, ni dariy tungun mab manechubog.

15 Ere aray rogon nra fek iyib e woʼen e thap ngakʼ gubin e piʼin ni ra michaenʼraed nga fithingan; ma ireray fan e biney ni tomur e maligach, nge yib nag e murnguy, ni nge gelfen ko justice, me yib nag woʼen ko gidiiʼ ni nge yog ni yog ngoraed e mich u dakean e kalngaenʼ.

16 Ere aray rogon ni murnguy e rayog ni nge ayliy e pinʼen nibe yoeg e justice, me chalongbiy raed nga paʼ ni ayuw ngoraed, ma en dargay rogon e mich nga dakean e kalngaenʼ e ke maʼaywol ko fare motochiyel ni poloʼ ko pinʼen nibe yoeg e justice; ere kemus ni chaʼ ni bay e mich rokʼ nga dakean e kalngaenʼ e rayog ni ngan bayuliy ni manechubog.

17 Ere gomanga yigi piiʼ Got ngomed, pi walageg, ni nge yog ni ngam tabab gaed i gay rogon e mich romed nga dakean e kalngaenʼ, ni ngam tabab gaed i pining fithingan nib thothup, ni nge yog ni runguymed;

18 Arragon, mu meybil gaed ngakʼ ni nge wurngaenʼ ngomed; ya ire rayog rokʼ ni nge thapegey.

19 Arragon, mu muding niged gimed, mi gimed ʼulʼul ko meybil ngakʼ.

20 Mmeybil gaed ngakʼ u napʼan ni gimed bay u lan e pi falang romed, arragon, ni fan ko pi gamanman romed.

21 Mmeybil gaed ngakʼ u lan e pi naʼun romed, arragon, ni fan ko pi chon e tabinaew romed, ni kakadbul, nge misiwʼ, nge balayalʼ.

22 Arragon, mmeybil gaed ngakʼ ni fan ko gelingin e pi toʼogor romed.

23 Arragon, mmeybil gaed ngakʼ ni nge ayuwegmed rokʼ moʼoniyanʼ, niʼir e toʼogor ko gubin banʼen nib matʼaw.

24 Mmeybil gaed ngakʼ ni fan ko pi wuldug u lan e maʼarow romed, ni nge yog ni felʼ rogmed riy.

25 Mmeybil gaed ni fan ko pi gamanman u lan e falang romed, ni nge yog nra yoʼor gaed.

26 Machane gathi kemus aray; thingar mu piiʼed gimed ni poloʼ ngakʼ u lan e singgil romed, nge yungin ni gimed ma miith riy, ngo lan e pi wuruʼ e binaw romed.

27 Arragon, ma napʼan ni damur meybil gaed ngakʼ Somoel, ma ngam paged e pi gumʼirchaʼ romed nge sug ko lʼagaenʼ ngak, u lan e meybil ni gubin e ngiyalʼ ni fan ko paer romed, nge ku fan ko paer rokʼ e piʼin ni yaed bay u taʼab med.

28 Ere chiney e musap gaed, pi walageg nib tʼuf rog, gube gaʼar ngomed, dab mu lemniged ni kemus aray; ya tomuren ni kam muʼ gaed i rinʼ e pinnʼey, ma faʼan gimed ra siyeg e ayuw ngakʼ e piʼin ni ke tʼuf banʼen roraed, nge piʼin dariy e mad roraed, mi gimed yaen ngam nanged salapen e piʼin nib mʼar nge piʼin nib kirbaenʼraed, mi gimed piiʼ boech banʼen romed, ni faʼanra bay, ngakʼ e piʼin nib tʼuf roraed—ma gube gaʼar ngomed, faʼanra dab mu rinʼed reb e pinnʼey, ma musap gaed, meybil romed e ba mʼay fan, ma dariy falʼngin ngomed, ma gimed boed e piʼin ni yaed ma dak dake, ni ireram e piʼin ni kar keruʼuyed fare mich.

29 Ere, faʼanra dar yib ngaenʼmed ni ngam tʼufeged raed, ma arame gimed boed e dow, ni ma nʼaeg e piʼin ma falʼeg e wasey, (ni bachan e dakuriy angin) ma kan nʼaeg nga butʼ nga iyaen e gidiiʼ u dakean.

30 Ere chiney, pi walageg, gubaʼadag nu tomuren ni kam guyed e michriy nib yoʼor, ni kam guyed ni fapi chep nib thothup e ke micheg e pinnʼey, mi gimed yib ni kam daged waʼamngin e kalngaenʼ.

31 Arragon, gubaʼadag ni ngam baed iyib ma dab kum ʼelʼel niged e pi gumʼirchaʼ romed nge nʼuw napʼan; ya musap gaed, chiney e ireray e re ngiyalʼ i nʼen nge re rran ni ngam thap gaed riy; ere arame, faʼan gimed ra kalngaenʼ ma dab mu ʼelʼel niged e pi gumʼirchaʼ romed, ma rib gur ni yira fek fare woʼen e bayul iyib ngomed.

32 Ya musap gaed, biney e yafos e ireray e re ngiyalʼ i nʼen ni fan ko gidiiʼ ni ngar muguʼuliyed yaed ni ngar madaʼ gaed Got; arragon, musap gaed fare rran ko biney e yafos e ireram e re rran ni fan ko gidiiʼ ni ngar ngongoliyed e pi muruwel roraed.

33 Ere chiney, e boed ni kugog ngomed faram ko sommʼon, bachan e ke yoʼor e pi mich riy romed, ere, gube wenig nag ngomed ni dab ku munʼed yaran e rran ko kalngaenʼ romed nge yaeni madaʼ ko tomur; ya tomuren fare rran ko biney e yafos, ni kan piiʼ ngodaed ni ngad muguʼuliyed gadaed riy, ni fan ko gubinechuboeg, e musap gaed, faʼanra dab da gonopiyed napʼdaed u napʼan ni gadaed bay u lan e biney e yafos, ma napʼan ni bay yib fare nepʼ ko lumor ma dakuriy e muruwel ni rayog ni ngan rinʼ riy.

34 Dabiyog ni nga moeged, u napʼan ni kan fekmed iyaen nga tafen e yaʼel, ni ngam gaʼar gaed: gura kalngaenʼ, ma gura sul ko Got rog. Dangay, dabiyog ni nga moeged e biney; ya fare yaʼel ni ke gabliy doewmed u napʼan ni ngam chuw gaed u lan e biney e yafos, e ku ireray e re yaʼel ni ra gabliy doewmed u lan e re fayleng nem ni manechubog.

35 Ya musap gaed, faʼan gimed ra yinʼ yaran e rran ko kalngaenʼ romed nge yaeni madaʼ ko ngiyalʼ ni kam mʼaed, musap gaed, kam mʼing gaed nga tanpaʼ fare yaʼel ku moʼoniyanʼ, ma arame ke gabliy med ngakʼ; ere, fare Kan ni Thothup ku Somoel e ke chuw romed, ma dakuriy tagilʼ u fithikʼmed, ma fare moʼoniyanʼ e ke poloʼ gelingin nga dakeanmed; ma arame ireray e bin tomur e dodow ko gidiiʼ nib tadenen.

36 Ma biney e gumnang, ni bachan e fare Somoel e ke yoeg ni dar ma paer u lan e pi temple ni de thothup, machane lan gumʼirchaʼen e piʼin nib matʼaw e ire ma paer riy; arragon, ma ki yoeg ni piʼin nib matʼaw e yaedra paer nga butʼ u lan gilʼilungun, ma dab kur chuw gaed; ma mad roraed e yira wechwech nag nga rachaʼen fare Saaf.

37 Ere chiney, o pi walageg nib tʼuf rog, gube athapeg ni thingar mu tayed u wunʼmed e pinnʼey, ni thingar mu muruwliyed woʼen e thap romed u fithikʼ e madguw u pʼoewchen Got, ma thingar dab kum feked yathin fare wub rokʼ Kristus;

38 Ma kudab kum togopluw gaed ko fare Kan ni Thothup, ya ngam thapeged, mi gimed fek nga dakeanmed fithingan Kristus; ni ngam sobutʼ niged gimed nge taʼareb tolngimed ko fiyath u butʼ, mi gimed taʼfan Got, ni demutrug e re ginʼen ni gimed bay riy, ni yaʼel romed nge fanamed yulʼyulʼ; mi gimed paer ni gimed be oge magaer ni gubin e rran, ko pi murnguy nge tawaʼath nib yoʼor ni ke piiʼ ngomed.

39 Arragon, ma kug be ning chilen ngomed, pi walageg, ni ngam tayedaenʼmed ko meybil ni gubin e ngiyalʼ, ni nga dabiyog ni wawliymed fapi lumel ku moʼoniyanʼ iyaen nga orel, ni nga dabiyog ni poloʼ nag gelingin nga dakeanmed, ni nga dabiyog ni ngam mʼing gaed nga tanpaʼ ko bin tomur e rran; ya musap gaed, ya ra tawaʼath nagmed ko tin kireb banʼen.

40 Ere chiney o pi walageg nib tʼuf rog, gube ning chilen ngomed ni ngam gumʼaenʼ gaed, ma ngam gumʼaenʼ gaed u fithikʼ gubin mite pi gafgow; ni nga dab mu togopluw gaed ngakʼ e piʼin ni kar yinʼed gimed nga wean ni bachan fanmed gafgow, ara dangay ma gimed ra mang tadenen ni boed yaed;

41 Machane nge yog e gumʼaenʼ ngomed, mi gimed athamgiliy e paer u fithikʼ e gafgow, u fithikʼ ba athap nib miyuluy ni nge rebo rran mi gimed toffan ko gubin e pi gafgow nge kirbaenʼ romed.