1 Chiney e yibi buch u napʼan ni thap e gi babyor ney ku Moroni ma rigel boech e damomuw rokʼ, ni bachan e manang ni Ammoron e rib tamilngaenʼ ko sasalap rokʼ; arragon, manang ni Ammoron e manang ni dematʼaw tapgin ni ke fek e mael iyib ngakʼ fapi gidiiʼ ku Nephi.

2 Ere gaʼar: Musap gaed, dab gu thilyegew Ammoron e kalbus ma kemus ni faʼanra thilyeg e lem rokʼ nge sul, ni boed ni kug weliy u lan e babyor rog; ya dabgu pag ngki gel boech nga rogon ni bay e chiney.

3 Mu sapgaed i gumnang e gini bay fapi Lamanites riy ni yad be matangiy e gidii rog ni kar feked ni kalbus, ere bachan e Ammoron e dabi piiʼ ngog e tin ni kuggog u lan e babyor rog, ere musap gaed, nggu rinʼ ngakʼ ni boed rogon e thin ni kuggog; arragon, bay gguy rogon nga urmʼaed nge yaeni madaʼ ko ngiyalʼ ni kar wenig niged e gapas.

4 Ere chiney e yibi buch u napʼan ni yoeg Moroni e pi thin ney, me yoeg ni nge aw ba mogow u fithikʼ e gidiiʼ rokʼ, ni gomanga yog ni pirʼeg beeʼ ni yib ko ganong ku Laman u fithikʼraed.

5 Me yibi buch ni ra pirʼeged beeʼ, ni fithingan e Laman; ma ir reb fapi tapigpig ko fare pilung niʼir e thang Amalickiah e fan rokʼ.

6 Chiney e Moroni e yoeg ni Laman nge buchʼuw e gidiiʼ rokʼ e nga ranoed ngakʼ fapi matanag ni yaed be matangiy fapi Nephites.

7 Chiney e fapi Nephites e yibe matangiyraed u lan e binaw ku Gid; ere Moroni e dugliy Laman nge buchʼuw e gidiiʼ rokʼ ni ngar uned ngakʼ.

8 Ere napʼan ni balayalʼ me yaen Laman ngakʼ fapi matanag ni yaed be matangiy fapi Nephites, ere musap gaed, mar guyed nibe yib mar pininged; machane gaʼar ngoraed: Dab murus gaed; ya musap gaed, I gag rebo Lamanite. Musap gaed, kug miil gaed ko fapi Nephites, ma yaed be mol; ma musap gaed kug feked e waeyin roraed ke un ngomaed.

9 Chiney e napʼan ni rungʼag fapi Lamanites e pi thin ney mar feked ngoraed u fithikʼ e falfalaenʼ; mar gaʼar gaed ngakʼ: Mu piiʼ boech e waeyin rom ngomaed, nggu unumed; kug falfalaenʼ gaed ni kam feked e waeyin nge un ngomed ya kar gu magaer gaed.

10 Ere gaʼar Laman ngoraed: Ngad tayed e waeyin rodaed nge madaʼ ko ngiyalʼ ni nga daroed ngakʼ fapi Nephites ko mael. Machane bugney e thin e rigel nag e kʼokʼoy roraed nga kur unumed boech e pi waeyin nem.

11 Ya ragaʼar gaed: Kad magaer gaed, ere ngad unumed boech e waeyin, bayi taʼaboch me yog e waeyin ngodaed ni napʼdaed, ni ra piiʼ gelingdaed ni nga daroed ngakʼ fapi Nephites.

12 Ma Laman e gaʼar ngoraed: Rayog ni ngam rinʼed ni boed rogon ni gimed baʼadag.

13 Me yibi buch nra unumed boech e waeyin nib yoʼor; ma riyaed baʼadag lamen, ere ruʼunumed niki yoʼor boech; ma rib gel, ya kan falʼeg ni nge gel.

14 Me yibi buch nra unumed ma yaed be falfalaenʼ, munmun nge madaʼ ko ngiyalʼ ni yaed gubin ni kar ching gaed.

15 Ere chiney e napʼan ni guy Laman nge gidiiʼ rokʼ ni yaed gubin ni kar ching gaed, ma kari mol arraed, mar suloed ngakʼ Moroni nga roeged ngakʼ gubin banʼen ni ke buch.

16 Ere chiney e aray rogon ni lemnag Moroni. Ere Moroni e falfalʼeg rogon e gidiiʼ rokʼ ko talin e mael; me yaen ko fare binaw ku Gid, u napʼan ni fapi Lamanites e kari mol arraed ni yaed ba chingaw, mar yinʼed e talin e mael ngakʼ fapi kalbus nga lan e kalbus, ni arame yaed gubin ma bay talin e cham roraed;

17 Arragon, ni mus ko pi ppin roraed, nge gubin e pi bitir roraed, ni urngin e piʼin ni rayog rokʼ ni nge cham, ma napʼan ni piiʼ Moroni tatalin e mael ngakʼ gubin fapi kalbus; ma gubin e pinnʼem nrinʼ ni yibe sinʼaegnʼaeg lingay.

18 Machane faʼan gomanga ra puged fapi Lamanites, ni aram rogon ni yaed ba chingnag ma fapi Nephites e rayog ni ngar liiʼed raed ngar mʼaed.

19 Machane musap gaed, gathi ireray e nʼen ni baʼadag Moroni; de mʼagaenʼ ngay ni nge thang e pogofan ara puʼoeg e rachaʼ, machane rib adag i ayuweg e gidiiʼ rokʼ ni nge siy ra mʼaed; ya nga dabi miliy e gechig nga dakean, dabi yaen ko fapi Lamanites nge liiʼraed u napʼan ni yaed ba chingnag.

20 Machane ke yog ngakʼ e tin ni athapeg; ya ke piiʼ talin e cham ngakʼ fapi gidiiʼ ni kalbus ko Nephites ni yaed bay u lan e yoror ko binaw, ma ke piiʼ gelingraed ni nge yog ni ngar suweyed e yungin baʼaram ni yaed bay riy u lan e yoror.

21 Ma arame yoeg ko fapi gidiiʼ ni yaed bay rokʼ ni ngar malʼaf niged yaed roraed, mar liyeged fapi salthaw ko Lamanites.

22 Chiney e musap gaed biney e nʼen e nrinʼ ni ke nepʼ, ma arame napʼan ni yaeni od fapi Lamanites ni kakadbul mar guyed ni ke liyegraed fapi Nephites u wuruʼ e yoror, ma pi kalbus roraed e ni piiʼ talin e cham roraed ngoraed nga naʼun.

23 Ere aray rogon ni ruguyed ni fapi Nephites e kar gelgaed ngoraed; ma biney e dodow ni kar taw gaed ngay e daki thog roraed ni ngar cham gaed fapi Nephites; ere fapi pilung ko kapten roraed e roeged ngoraed ni ngar piiʼed e pi talin e mael roraed ngoraed, mar kunuyed ngar feked nga ranoed riyinʼed nga butʼ nga charen i rifrifanʼay fapi Nephites, mar wenig niged ni nge wureng anʼuy ngoraed.

24 Ere musap gaed, aray rogon ni athapeg Moroni. Me fekraed ni kalbus ko mael, mar suweyed fare binaw, me yoeg ni ngan pag gubin fapi kalbus, nni Nephites; mar peth gaed ko fapi salthaw ku Moroni, ma rib gaaʼ angiraed ko salthaw rokʼ.

25 Me yibi buch ni guy rogon ni fapi Lamanites, ni ke fekraed ni kalbus, e ngar tabab niged ba muruwel ni ngan gelnag fapi yoror nge liyeg fare binaw nu Gid.

26 Me yibi buch u napʼan ni ke noemow nag fare binaw nu Gid, u rogon ni baʼadag, me guy rogon ni ngan fek fapi kalbus rokʼ ko fare binaw ni Galwog; ma ki matangiy fare binaw nga buʼulung i salthaw nib gel.

27 Me yibi buch ni rinnʼed ni aray rogon, ni yug aram rogon ni bay gubin fapi liyeb ko Lamanites, mar ayuweged gubin fapi kalbus ni kar feked, ma ki paer roraed gubin e binaw nge liw riy ni kar koeled kar feked bayay.

28 Me yibi buch ni fapi Nephites e ra tabab gaed bayay ni ngar gelgaed, me sul ngoraed e pi matʼawraed nge pi yalraed ko gubin banʼen.

29 Rib yoʼor yay ni gay rogon fapi Lamanites ni ke nepʼ ni ngar longbiyed raed, machane napʼan ni yaed be dorom ma boʼor i yaed e ni koel ngan kalbus nag.

30 Ma rib yoʼor yay ni ur nomeged ni ngar piiʼed e waeyin roraed nge unum fapi Nephites, ni gomanga yog nra liiʼed raed ko yub ara chingnag.

31 Machane musap gaed, fapi Nephites e de sasagaʼal ni nge yib ngaenʼraed fare Somoel ni Got roraed u napʼan e gafgow ni yaed be tay. Daryog ni ngan liyeb nagraed; arragon, dabra unumed e waeyin roraed, nge madaʼ ko ngiyalʼ ni kar piiʼed nge unum fapi kalbus ni Lamanites ko sommʼon.

32 Ma yaed ma kolchiyaʼ ngay ni nge siy nnangraed u fithikʼraed; ya faʼanra waeyin roraed e ra yub nag reb e Lamanite, ma ra yub nag reb e Nephite; ere aray rogon ni ra sikeng niged gubin e rrom roraed.

33 Ere chiney yibi buch ni ke taw nga napʼan u waenʼ Moroni ni nge falfalʼeg rogon e mael nge yaen ko fare binaw ni Morianton; ya musap gaed, fapi Lamanites e kar noemow niged fare binaw ni Morianton, u dakean e muruwel ni kar tayed ngay ke yaeni madaʼ ko ngiyalʼ ni kari noemow.

34 Ma kuyaed be ʼulʼul ngay e fek boech e salthaw nga lan fare binaw, nge ggan.

35 Ere aray rogon ni mus e bin riliwʼ nge mereb e duw ko fare lung ko fapi tapuf-oloboch nga dakean fapi gidiiʼ ku Nephi.