1 Me yibi buch u lan e bin ragag nge taʼareb e duw ko lung ko fapi tapuf-oloboch nga dakean e gidiiʼ ku Nephi, ko bin lal e rran ko bin lʼagruw e pul, u tomuren ni kar pired u fithikʼ e gapas nib nʼuw napʼan u lan fare binaw nu Zarahemla, ma tomuren ni kar pired ni dariy e mael ara maleʼeg thin nib ine duw, ni aram rogon iyaen nge madaʼ ko bin lal e rran ko bin lʼagruw e pul u lan e bin ragag nge taʼareb e duw, me wer thiin ba mael u dakean e binaw ni gaʼangin.

2 Ya musap gaed, fapi yu ulung i salthaw ko fapi Lamanites e rabaed nga lan e binaw u baʼan wuruʼ e binaw, nga lan e pi mathil ko binaw, iyib nge madaʼ nga lan fare binaw nu Ammonihah, mar tabab gaed i liiʼ e gidiiʼ mar gatheayed fare binaw.

3 Ere chiney e yibi buch, u mʼon ni nge gaman e salthaw ni ke kunuy fapi Nephites ni ngar suruyed raed nga wuruʼ e binaw, ma kar liiʼed e gidiiʼ ni ur moyed u lan fare binaw nu Ammonihah, nge ku boech ni yaed ba garar nga mathil nu Noah, mar feked boech iyaed ni kalbus nga lan wuruʼ e binaw.

4 Ere chiney e yibi buch ni fapi Nephites e ra athapeged ni ngar fulweged fapi chaaʼ ni kan fekraed ni kalbus nga lan wuruʼ e binaw.

5 Ere, chaʼ ni kan melʼeg ni mang pilung ko kapten ko fapi yu ulung i salthaw ko fapi Nephites, (ni fithingan e Zoram, ma lʼagruw e pagael ni fak, ni Lehi nge Aha)—ere chiney e Zoram nge fagal pagael ni fak, e bachan e yaed manang ni Alma e priest nib tolang ko fare galasia, ma bachan e kar rungʼaged ni bay fare nangaenʼ ko prophecy rokʼ, ere ranoed ngakʼ ma yaed be athapeg ni nge yoeg ngoraed e gin baʼadag Somoel ni ngar sor gaed ngay u lan wuruʼ e binaw ni ngar gayed pi walagraed, ni yaed faram e kefekraed fapi Lamanites ni kalbus.

6 Ere yibi buch ni Alma e meybil ngakʼ Somoel ni morngaʼagen e biney. Me sul Alma nge gaʼar ngoraed: Musap gaed, fapi Lamanites e yaedra thʼaeb fare lulʼ ni Sidon u baʼan yimuch i wuruʼ e binaw, nib palog ni bay nga wuruʼ e mathil ko fare binaw nu Manti. Ere musap gaed ireram e gin ni gimed ra madaʼ nagraed riy, u baʼan ngael fare lulʼ ni Sidon, ma ireram e gin nra piiʼ fare Somoel fa piʼin walagmed riy ngomed ni yaed faram e kan fekraed ni kalbus ni ke fekraed fapi Lamanites.

7 Me yibi buch ni Zoram nge fagal pagael ni fak e ra thʼaebed fare lulʼ ni Sidon nga barbaʼ, ni yaed fapi yu ulung i salthaw roraed, mar thelep gaed iyaen nga wuruʼ e mathil nu Manti iyaen nga lan yimuch i wuruʼ e binaw, ni bay nga baʼan ngael fare lulʼ ni Sidon.

8 Marbaed ngakʼ fapi yu ulung i salthaw ko fapi Lamanites, ere fapi Lamanites e ra garar gaed min suruy raed iyaen nga lan wuruʼ e binaw; mar feked fa piʼin walagraed ni yaed ba kalbus ni yaed faram e fekraed fapi Lamanites, ma dariy bagyaed e piʼin nni fekraed ni kalbus ni ke yaen nga bang. Me fekraed fa piʼin walagraed iyaen ko fapi yungi binaw roraed.

9 Ma aray rogon ni mus e bin ragag nge taʼareb e duw ko lung ko fapi tapuf-oloboch, ma fapi Lamanites ni kan suruy raed nga wuruʼ fare binaw, ma fapi gidiiʼ ku Ammonihah e nlii raed; arragon, gubin e gidiiʼ ko fapi ammonihahites e nliiʼraed, ma kun gatheay e binaw roraed nib felʼ rogon, niʼir e roeged ni dabiyog ni nge gatheay Got, ni bachan u rogon fini noemow nib paer.

10 Machane musap gaed, u lan taʼareb e rran min pag ni dakuriy beeʼ u dakean; nge pi ldoew u dakean e i guchguchuy e pilis nge gamanman ni malboch nu wuruʼ e binaw.

11 Machane, tomuren ni ke yoʼor e rran ni ke yaen, min ulunguy nga taʼabang e pi ldoew roraed u dakean e binaw, min tharey raed ni de dubʼag e butʼ nga dakeanraed. Ma ke madaʼ boen e meal riy ngalang ni dakiyog ni paer e gidiiʼ ko fare binaw nu Ammonihah nib yoʼor e duw. Min tunguy fithingan e gibinaw nem ku Nehors ni Kanpag; ya yaed buʼun ko fare mich nge taliw ku Nehor, ni faʼan liiʼraed faram ngar mʼaed; ma kanpag e pi binaw roraed ni dakuriy beeʼ riy.

12 Ere fapi Lamanites e dakur baed ko mael bayay ngakʼ fapi Nephites nge yaeni madaʼ ko bin ragag nge aningeg e duw ko lung ko fapi tapuf-oloboch nga dakean e gidiiʼ ku Nephi. Ma aray rogon u lan dalip e duw ni fapi gidiiʼ ku Nephi e kar pired u fithikʼ e gapas u lan gubin yang e binaw.

13 Ere Alma nge Amulek e ranow iyaen ni ngar machib nigew e kalngaenʼ ngakʼ e gidiiʼ u lan e pi temple roraed, ngu lan e pi galasia roraed, nge ku lan tagilʼ e pi moʼolung roraed, nni toey u rogon ni ma rinʼ fapi Jews.

14 Ma gubin e piʼin ni yaedra motoyil ko thin rorow, e ra weliyew fare thin ku Got ngoraed, ni dariy beeʼ ni yibe fol ngakʼ, ni aram rogon iyaen.

15 Ere aram rogon ni rinʼ Alma nge Amulek iyaen, nge ku boech e gidiiʼ nib yoʼor ni kan melʼeg raed ni ngar uned ko biney e muruwel, e ra machib niged fare thin u gaʼangin yang e nam. Ere monʼog ko fare galasia e garar u dakean gaʼangin yang e nam, u lan gubin yang e binaw nib liyegey, u fithikʼ gubin fapi gidiiʼ ko fapi Nephites.

16 Me yaeni aw ni dariy dodowen e gidiiʼ ni yuthal u fithikʼraed; me piiʼ Somoel fare Kan ni Thothup rokʼ nga dakean gaʼangin yang fare nam ni nge yarmiy laniyaenʼ e gidiiʼ, ara nge yarmiy gumʼirchaʼraed ni nge yog nra thapeged fare thin niʼir e bay ni fil iyaen u fithikʼraed ko fare ngiyalʼ i nʼen ni bay yib—

17 Me siy ra ʼelʼel niged gumʼirchaʼraed ko fare thin, me siy ra pired ni dabi michaenʼraed, nge yaeni madaʼ ko ngiyalʼ ni kar mʼaed, ma gomanga yog ni ra thapeged fare thin u fithikʼ e falfalaenʼ, ni woed ba paʼ i gakʼiy ni kan sulweg kan puthuy ko kenggin, ni nge yog ni nga ranoed nga gilʼ e toffan rokʼ Somoel ni Got roraed.

18 Ere chiney e fapi priests ni ranoed iyaen u fithikʼ fapi gidiiʼ e ur machib gaed nib togopluw ko gubin e sasalap, nge sabaenbaen, nge moʼowaenʼ, nge togopluw, nge fananikan, nge gathibthib, nge moroʼroʼ, nge iring, nge fek u matgael, nge mathang fan, nge iling, nge gubin mite dirngal, ni yaed be yoeg ni pinnʼey e thingar dab nrinʼ—

19 Ni yaed be yoeg e pinʼen ni ke chugur ni thingari yib; arragon, ni yaed be yoeg fare wub rokʼ fachaʼ ni Fak Got, nge gafgow nra tay nge yamʼ, nge ku fare foskoyamʼ ko pi yamʼ.

20 Ere boʼor i yaed fapi gidiiʼ e ra fithed morngaʼagen ko uw e ra yib fachaʼ ni Fak Got ngay; ere ni fil ngoraed nra mʼug ngoraed u tomuren ni ke foskoyamʼ; ere pi gidiiʼ ney e ra motoyil gaed u fithikʼ e falaenʼ nge falfalaenʼ.

21 Ere chiney u tomuren ni ke mʼay i yarmiy fare galasia u dakean gaʼangin yang fare nam—ma tomuren ni ke gel ngakʼ fare moʼoniyanʼ, ma fare thin ku Got e kan machib nag u fithikʼ e tamilang u dakean gaʼangin yang e nam, nge fare Somoel ni ke puʼoeg e tawaʼath rokʼ nga dakean fapi gidiiʼ—ere aray rogon ni mus e bin ragag nge aningeg e duw ko lung ko fapi tapuf-oloboch nga dakean e gidiiʼ ku Nephi.