Pi Chep nib Thothup
Alma 29


Guruy Ni 29

Alma e athapeg ni nge yoeg ni boed ni yoeg e angel ni ngan kalngaenʼ—Fare Somoel e piiʼ e sensey ni fan ko gubin e nam—Alma e falfalaenʼ ko fare muruwel ku Somoel nge muruwel ni muguʼuliy Ammon nge pi walagen. Napʼan 76 M.K.

1 O manga gub angel, ma rayog ngog e athap ko gumʼirchaʼ rog, ni ngguwon iyaen ni gube non ko fare yabul ku Got, u balam nra rurug e fayleng, ni nggog ngakʼ gubin e gidiiʼ ni ngar kalgaed ngaenʼraed!

2 Arragon, gura yoeg ngakʼ gubin e gidiiʼ, nib gaaʼ lamag ni boed gaʼangin i lingan e dirraʼ, morngaʼagen e kalngaenʼ nge woʼen e bayul, ni thingar ra kalgaed ngaenʼraed marbaed ngakʼ Got, ni gomanga yigi dabki gel e gafgow u dakean gaʼangin yang e fayleng.

3 Machane musap gaed, gag beeʼ ni gub gidiiʼ, ma gube denen ko pinʼen ni gube athpeg; ya thingar gu falfalaenʼ ko pinʼen ni ke piiʼ Somoel ngog.

4 Thingar dabi wagaey laninʼug i athapeg e thin rokʼ ba Got nib matʼaw, ya gumnang ni ma piiʼ ngakʼ e gidiiʼ nrogon ni yaed baʼadag, ko yamʼ fa yafos; arragon, gumnang ni ma piiʼ ko gidiiʼ, arragon, ma piiʼ ngoraed e thin ni dabi thil, u rogon ni yaed baʼadag, ni woʼen e thap fa gafgow.

5 Arragon, ma gumnang ni felʼ nge kireb e ba puf-rogon e gidiiʼ ngay; ma chaʼ ni denang i kiiʼeg e felʼ ko kireb e dariy kirbin; machane chaʼ ni manang e felʼ nge kireb, e ireram e chaʼ ni yira piiʼ ngakʼ nrogon ni baʼadag, ko be athapeg e felʼ fa kireb, yafos fa yamʼ, falfalaenʼ fa mʼingaenʼ ko nangaenʼ.

6 Ere chiney, ni gube guy ni gumnang e pinnʼey, mangfan ni thingar gu athapeg nge pag rogon ni nggu rinʼ fare muruwel ni kan piningeg ngay?

7 Mangfan ni nggu athapeg ni nggu mang rebe angel, ni nge yog nug non ngakʼ gubin e gidiiʼ ko tin tomur e rran u fayleng?

8 Ya musap gaed, fare Somoel e ke piiʼ ngakʼ gubin e pi nam, e nam roraed nge thin roraed, ni ngar filed iyaen e thin rokʼ, arragon, u fithikʼ e gonop, gubin e pinʼen ni be guy nib mʼag ni nge yog ngoraed; ere kad guyed ni fare Somoel e ma fonow u fithikʼ e gonop, u rogon e tin nib matʼaw mab riyulʼ.

9 Gumanang ni pinʼen ni ke chiyliy Somoel ngog, ma gube ʼuf u fithikʼ. Dagur ʼuf ngog, machane gube ʼuf u fithikʼ e pinʼen ni fare Somoel e ke chiyliy ngog; arragon, ma ireray e ʼuf rog, ni sana rayog ni nggu mang talin e muruwel u lan paʼ Got ni nggu fek boech e gidiiʼ iyib ko kalngaenʼ; ere ireray e falfalaenʼ rog.

10 Ma musap gaed, napʼan nug guy nib yoʼor i walageg ni riyulʼ ni kar kalgaed ngaenʼraed, marbaed ngakʼ fare Somoel ni Got roraed, ma arame risug dugreg ko falfalaenʼ; ma arame yib nganʼug e nʼen ni ke rinʼ Somoel ni fan ngog, arragon, ma ki yib nganʼug ni ke rungʼag e meybil rog; arragon, ma arame ki yib nganʼug paʼ nib sug ko murnguy ni be kʼiyeg ngog.

11 Arragon, ma ki yib nganʼug fare kalbus ntay ngakʼ e pi chitamag; ya ri gumnang ni fare Somoel e ire chuwegraed u kalbus, mu dakean e biney me sunmiy e galasia rokʼ; arragon, fare Somoel ni Got, fare Got ku Abraham, niʼir fare Got ku Isaac, niʼir fare Got ku Jacob, e chuwegraed u kalbus.

12 Arragon, gubin e ngiyalʼ ma ma yib nganʼug e kalbus ntay ngakʼ e pi chitamag; ma ku fare Got ni chuwegraed u paʼ fapi Egyptian e ku ire chuwegraed u kalbus.

13 Arragon, ma ku ireram e re Got ni sunmiy e galasia rokʼ nga fithikʼraed; arragon, ma ireram fare Got ni piningeg nga ba muruwel nib thothup, ni nggu machib nag fare thin ngakʼ e pi gidiiʼ ney, ma ke ayuwegeg nggu muguʼuliy e muruwel rog, ni arame kar gu falfalaenʼ ngay.

14 Machane dagur falfalaenʼ ko muruwel rog ni ke muguʼul ni yigoʼ gag ngay, ya kar gu falfalaenʼ ni bachan e ke muguʼul e muruwel rokʼ pi walageg, ni yaed e kuʼur moyed ko fare binaw ku Nephi.

15 Musap gaed, kar muruwel gaed ni rib gel, ma kar yog niged boʼor e waʼamngin; ere rib felʼ e tawaʼath roraed!

16 Chiney, e napʼan ni gura lemnag e muruwel rokʼ pi walageg ni muguʼul ma yaʼel rog e arame kan fek iyaen, nge yaeni madaʼ ko ngiyalʼ ni ke kiiʼ ko dagur, nrogon niʼ immoy, ere rib gel e falfalaenʼ rog.

17 Ere chiney manga yigi piiʼ Got ngomed, ni pi walageg, ni gomanga yog nra pired nga butʼ u lan gilʼilungun Got; arragon, nge ku ngak gubin pi waʼamngin e muruwel romed ni nge yog ni nga dab kur chuw gaed, ma nge yog nra oged e soerokʼ ngakʼ ni gubinfen. Ere manga yigi pag Got ni nge buch ni boed e thin rog, ni boed rogon ni kug weliy. Amen.