1 Me yibi buch u napʼan ni kar yarmiyed ba galasia u lan e re binaw nem, ma fare pilung i Lamoni e adag ni nge un Ammon ngakʼ iyaen ko fare binaw ku Nephi, ni nge yog ni madaʼ nag e chitamangin.

2 Ere yib lungun Somoel ngakʼ Ammon, ni be gaʼar: Gur e dab mman ko fare binaw ku Nephi, ya musap, fare pilung riy e ra guy rogon ni nge fek e yafos rom; machane ngam man ko fare binaw nu Middoni; ya musap, walagem i Aaron, nge Muloki nge Ammah e yaed bay u kalbus.

3 Ere chiney e yibi buch u napʼan ni Ammon e ke rungʼag e biney, me gaʼar ngakʼ Lamoni: Musap, walageg nge pi gidiiʼeg e yaed bay u kalbus u Middoni, ere ngguwon gupagraed u kalbus.

4 Chiney e Lamoni e gaʼar ngakʼ Ammon: Gumanang, nu gelingin fare Somoel me gur e rayog ni ngam rinʼ gubin banʼen. Machane musap, nggu un ngom nga darow ko fare binaw nu Middoni; ya fare pilung ko fare binaw nu Middoni, ni fithingan e Antiomno, e ba tafafil rog; ere nggu ʼun ko fare binaw nu Middoni, ni gomanga yog ni ngug pingegaenʼ fare pilung ko fare binaw, me chuweg pi walagem u kalbus. Ere chiney e gaʼar Lamoni ngakʼ: Miniiʼ e ke yoeg ngom ni bay pi walagem u kalbus?

5 Me gaʼar Ammon ngakʼ: Dariy beeʼ ni ke yoeg ngog, ya kemus ni Got; ni gaʼar ngog—Mman ngam pag pi walagem u kalbus, ya yaed bay u kalbus u lan fare binaw nu Middoni.

6 Ere chiney e napʼan ni rungʼag Lamoni e biney me yoeg ko fapi tapigpig rokʼ ni ngar falʼeged rogon e os rokʼ nge pi karro ko os rokʼ.

7 Me gaʼar ngakʼ Ammon: Moy, nggu un ngom nga darow ko fare binaw nu Middoni, mug wenig ngakʼ fare pilung ni nge wurengaenʼ nge pag pi walagem u kalbus.

8 Me yibi buch u napʼan ni be milekag Ammon nge Lamoni iyaen e ngaram, mar madaʼ nigew e chitamangin Lamoni, niʼir e pilung u gaʼangin yang fare nam.

9 Ere musap gaed, fachaʼ ni chitamangin Lamoni e gaʼar ngakʼ: Mangfan ni damub ko fare mur ko fare rran u napʼan ni kug tay e madnom ni fan ngakʼ e pi pagael ni fakag, nge pi gidiiʼ rog?

10 Ma ki gaʼar: Uw e ngam marow e biney e Nephite ngay, niʼir reb e pi bitir ni fak e sasalap lʼugun?

11 Me yibi buch ni Lamoni e tamilngeg i weliy ngakʼ ko uw e be sor ngay, ya be rus ni nge kʼaring e puwaenʼ ngakʼ.

12 Ma ki weliy gubin i fan niki i sasagaʼal ni nge chuw ko gilʼelungun rokʼ, ma de yaen ngakʼ e chitamangin ko fare mur ni ke piiʼ.

13 Ere chiney e napʼan ni Lamoni e ke yoeg ngakʼ gubin e pinnʼey, ere, me faʼtal laniyaenʼ, ngakʼ e chitamangin ni ke damomuw ngakʼ, me gaʼar: Lamoni, gur e ngam man mu pag e pi Nephites ney, ni yaed fak beeʼ nib sasalap lʼugun. Musap, ire moroʼroʼ ngakʼ e pi chitamangdaed; ere chiney e pi bitir rokʼ e karbaed nga fithikʼ daed ni nge yog, u dakean e sasaliyeb roraed nge baen roraed, ni ngar sabaenbaen niged gadaed, ni nge yog nra iringed e chugum rodaed.

14 Chiney e fare chitamangin i Lamoni e chiyliy ngakʼ ni nge liiʼ Ammon nge yimʼ ko sayden. Ma ki chiyliy ngakʼ ni nga dabi yaen ko fare binaw nu Middoni, ma nge un ngakʼ ngar suloew ko fare binaw ku Ishmael.

15 Machane Lamoni e gaʼar ngakʼ: Dab gulii Ammon, ara gusul ko fare binaw ku Ishmael, ma ngguwon ko fare binaw nu Middoni ni nggu pag pi walagen Ammon, ya gumnang ni yaed bogi pumoʼon nib matʼaw nge profet nib thothup ko fare Got nib riyulʼ.

16 Ere chiney e napʼan ni rungʼag e chitamangin e pi thin ney, me damomuw ngakʼ, me girngiy e sayden rokʼ ni nge toey nge aw butʼ.

17 Machane Ammon e sakʼiy nga mʼon me gaʼar ngakʼ: Musap, gur e dab mu liiʼ fakam; machane, kab felʼ niʼir e nge yimʼ ko bin gur e nga mumʼ, ya musap, ire kalngaenʼ ko pi denen rokʼ; ma faʼanra gur e nga mumʼ ko ngiyalʼ ney, nga fithikʼ e damomuw rom, ma dabiyog ni gara thap.

18 Ma ku bayay, rib tʼuf ni gur e ngam tal; ya faʼanra ngam liiʼ fakam, niʼir e beeʼ nib felʼ e rokʼ, ma rachaʼen e ra yoer u fithikʼ e butʼ ngakʼ fare Somoel ni Got rokʼ, nge sul wengan ngom; ma sana ra thaey e yafos u paʼam.

19 Ere chiney e napʼan ni yoeg Ammon e pi thin ney ngakʼ, me fulweg ngakʼ ni gaʼar: Gumanang ni faʼanra nggu liiʼ fakag, ma nggu puʼoeg rachaʼen beeʼ nib felʼ e rokʼ; ya gur e gabe guy rogon ni ngam liiʼ ngemʼ.

20 Me kʼiyeg paʼ ni nge liiʼ Ammon. Machane Ammon e piloewʼ rokʼ, me thʼaeb paʼ ni nge dab kiyog ni nge cham ngay.

21 Ere chiney e napʼan ni guy fare pilung ni Ammon e rayog ni nge liiʼ, me wenig ku Ammon ni nga dabi liiʼ ngemʼ.

22 Machane Ammon e pug e sayden rokʼ ngalang, me gaʼar ngakʼ: Musap, gura liiʼem nga mumʼ machane faʼan gara pag pi walageg u kalbus ma dab gurinʼ.

23 Ere fare pilung, ni ke rusnag e yafos rokʼ, e gaʼar: Faʼan gara pageg ni dab mu liiʼeg ma gura piiʼ ngom ni demutrug ko manga gara ning, ni mus iyaen nge madaʼ nga barbaʼ fare lung ni gube gagyeg nag.

24 Ere chiney e napʼan ni guy Ammon ni ke mʼing fare pilung ngakʼ ni rogon ni baʼadag, me gaʼar ngakʼ: Faʼan gara guy rogon ni ngan pag pi walageg u kalbus, nge Lamoni ni ngki paer ko lung rokʼ, ma nga dabi buch anʼum ngakʼ, mag pag ngakʼ nge rinʼ ni rogon ni baʼadag ni demutrug ko mang e be lemnag, ma fin gura pagem ni dab guliiʼem; ara dangay ma nggu liiʼem ngam aw nga butʼ.

25 Ere napʼan ni Ammon e ke yoeg e pi thin ney, ma fare pilung e ri falfalaenʼ ni bachan e pogofan rokʼ.

26 Ma napʼan ni guy Ammon ni dakir lemnag ni nge liiʼ, nge napʼan ni guy gelingin e adag rokʼ ngakʼ fak i Lamoni, me faʼtal laniyaenʼ ngay, me gaʼar: Bachan e karimus ni ireray e nʼen ni gabe athapeg, ni nggu pag pi walagem, ma nggu pag fakag ni ngki paer ko lung rokʼ, ere musap, bay gurinʼ ni boed ni kamoeg ni fakag e nge paer ko lung rokʼ e chiney nge gubinfen; ma dab kug gagyeg nag—

27 Ma bay gurinʼ ni boed ni kamoeg ni ngan pag pi walagem u kalbus, ma gur nge pi walagem e rayog ni ngam baed ngog, nga langgin gilʼilingug; ya rug baʼadag ni ngug guyem. Ya fare pilung e kari faʼtal laniyaenʼ ko fapi thin ni ke weliy, nge fapi thin ni ke weliy fachaʼ ni fak i Lamoni, ere ri baʼadag ni nga kur weliyew boech ngakʼ nge nang.

28 Me yibi buch ni Ammon nge Lamoni ra ululiyew e milekag rorow i yaen ko fare binaw nu Middoni. Ere Lamoni e mʼagaenʼ fare pilung ko fare binaw ngakʼ; ere fapi pagael ni walagen Ammon e ni chuwegraed u kalbus.

29 Ma napʼan ni madaʼ nagraed Ammon ma ri kirbaenʼ nib gel, ya musap gaed, dariy e mad u dakeanraed, nge doewngiraed ni ke pal e biyech riy ni bachan e kuʼun mʼag raed ko gaf nib el. Ma kur gafgow gaed ni bilig, nge balel, nge gubin mite gafgow; machane ri i gumʼaenʼ raed u fithikʼ gubin e pi gafgow ni ur tayed.

30 Ere, aram rogon ni buch, machane ba wol roraed ni ngar mul gaed nga lani paʼ e pi gidiiʼ ni rib ʼelʼel gumʼirchaʼraed mab ʼelʼel laniyaenʼraed; ere dabra motoyil gaed ko thin roraed, mar chuweged raed, min liiʼraed, min tuluf raed u rebo naʼun ngo reb, ngu bayang ngo bayang, ni aram rogon ni yaen nge madaʼ ko ngiyalʼ ni kar taw gaed nga lan e fare binaw nu Middoni; ma ireram e gin nni koelraed riy ma ninʼraed nga kalbus, min mʼag raed ko gaf ni rib el, min tayraed u kalbus ni bukun e rran, me yibi pagraed Lamoni nge Ammon.