1 Quinwil cʼut, nu cʼojol, chi cʼo latzʼ a chomanic chrij jun chic jasäch, ri man catcuin taj cachʼobo. Are riʼ chrij ri u kʼatbal tzij ri Dios, y ri cʼajisabal qui wäch ri ajmaquib. At cachomaj chi man sucʼ taj chi cäyaʼic che ri ajmac jun cʼojical rech etzelal.

2 Chawilampeʼ, nu cʼojol, quinkʼalajisaj na waʼ chawäch. Cʼäte ri Ajawaxel xeresaj ri nabe ka nan ka tat pa ri jeʼlalaj xoral re Edén, rech cäquitic ri ulew jawiʼ e esam wi/ Jeʼ, xresaj ri achi pa ri jeʼlicalaj xoral re Edén, y xucojo pa u xcut pa ri relbal kʼij lokʼalaj tak chajinelab, y jun machet ri cärepowic, ri cäsalabic pa ronojel tak cʼolibal rech cuchajij ri cheʼ re ri cʼaslemal.

3 Cäkil baʼ chi ri achi xux junam rucʼ ri Dios, xretamaj ri utz y ri man utz taj, y rech man cuyuk tä ri u kʼab chuchapic ri cheʼ re ri cʼaslemal, rech cutij re ri u wäch, y rech cäcʼasiʼ che junalic, ri Ajawaxel xucojo ri lokʼalaj tak chajinelab, y ri jun lokʼalaj machet ri cärepowic, rech man cutij tä ri achi ri u wäch ri cheʼ.

4 Je cʼu riʼ, cäkilo chi xyataj jun kʼijal che ri achi rech cuqʼuex u cʼux. Jeʼ, xyataj jun kʼijal rech cärilic jas cuban na, jun kʼijal rech cuqʼuex u cʼux y rech cupatanij ri Dios.

5 Chawilampeʼ, we tä ri Adán xuyuk ri u kʼab chanim, y we tä xutijo re ri cheʼ rech ri cʼaslemal, jeriʼ cäcʼasiʼc na che junalic je jas cubij ri u tzij ri Dios, y man cʼo tä rucʼ jun kʼijal rech cuqʼuex u cʼux. Jeʼ, xukujeʼ jerʼ man cʼo taj u patan ri u tzij ri Dios, y man cächucun tä chic ri u beyal chomam canok che ri colotajic.

6 Tzare chawilampeʼ, xyataj che ri achi chi cäcämic. Rumal riʼ, je jas xetastaj cho ri cheʼ rech ri cʼaslemal, jeriʼ xukujeʼ quetastaj na cho ri u wäch ri ulew. Cʼu ri achi xsachtajic che junalic. Jeʼ, xux jun achi tzakinak.

7 Wachanim cʼut, cawilo chi ri nabe ka nan ka tat man xyaʼ chic chque chi quecʼojiʼc chuwäch ri Ajawaxel, mawi pa ri qui tiojil y pa ri cuxlabal. Jeriʼ cäkilo chi rajwaxic chque cäquiterenej ri qui rayibal ri e areʼ, y man cʼo tä toʼbal chque.

8 Tzare chawilampeʼ, man utz taj we cätzokopitajic ri achi cho we cämical rech ri tiojil, rumal rech chi are waʼ cäsach na ri u wäch ri beyal rech ri quicotemal.

9 Rumal riʼ, je jas mawi jumul cuyaʼ chi cäcämic ri ranimaʼ jun, y ri tzakibal u cʼamom ulok chque conojel winak jun cämical rech ri uxlabal, jeriʼ xukujeʼ jun cämical rech ri tiojil, xetastaj chuwäch ri Ajawaxel. Rumal riʼ, rajwaxic chi quetzokopitajic ri winak cho waʼ cämical rech ri uxlabal.

10 Rumal rech chi xebux winak ri xquiban ri u rayibal ri qui tiojilal, xquiban winak aj ri uwächulew, y xak xuwi xquiban ri itzel. We jun cʼojical xux jun cʼojical rech cäquisucʼumaj quib, rech cäril na jas cäquibano.

11 Wachanim cʼut, chanatajisaj, nu cʼojol, we tä ma tä rumal ri u beyal chomam canok rech ri colotajic (ri cäyaʼ pa jun cʼolibal chic) xak xecämic ri canimaʼ, xetzeletajic, rumal xetastaj chuwäch ri Ajawaxel.

12 Man cʼo tä cʼut jun u beyal rech cätzokopitaj ri achi cho we cʼojical jawi e tzakinak wiʼ ri areʼ kas xucʼam ulok puwiʼ rumal man nimanel taj.

13 Rumal riʼ, je jas ri cäraj ri kʼatbal tzij, man cuyaʼ tä che chi cäbantajic ri esabal macaj, xak xuwi we tä ri winak cäquiqʼuex qui cʼux pa we cʼaslemal. Rumal we tä ma tä cʼo we beyal, ri elibal cʼuxaj xak cächacunic we cusach u wäch ri kʼatbal tzij. Tzare man cuyaʼ taj cäsachtaj u wäch ri kʼatbal tzij. We tä jeriʼ, ri Dios, man areʼ tä ne lo ri Dios.

14 Jeriʼ cʼut cäkilo chi conojel ri winak e tzakinak, e cʼo pa u kʼab ri kʼatbal tzij. Jeʼ, ri u kʼatbal tzij ri Dios xbanic chi quetastajic che junalic chuwäch.

15 We tä ma tä banom jun tojbal macaj, man cuyaʼ taj chi cäbantajic jun beyal rech ri elibal cʼuxaj. Ri Dios cutoj ri qui mac ri e cʼo cho ri ulew, rech cäbantajic ri u beyal rech ri elibal cʼuxaj, rech cätojic ri u rayibal ri kʼatbal tzij, y rech ri Dios cux jun tzʼakatalaj Dios, ri kas sucʼ, ri quel u cʼux chke.

16 Tzare ri qʼuexbal cʼuxaj man cäcuin taj cäpetic cucʼ ri achijab we tä man cʼo taj jun cʼajisabal wächaj. Junalic riʼ, junam rucʼ ri cʼaslemal re ri animaʼ. Waʼ man rucʼ tä ri u beyal ri quicotemal. Areʼ junalic xukujeʼ je jas ri u cʼaslemal ri animaʼ.

17 ¿Jas modo cʼut cäcuin jun achi cuqʼuex u cʼux we tä man u banom taj ri u mac? ¿Jas u sucʼ cäcuin cämacunic, we man cʼo taj ri pixab? ¿Jas u sucʼ cäyaʼic chi cʼo jun takbal tzij, we tä man cʼo taj jun cʼajisabal wächaj?

18 Tzare xcojic jun cʼajisabal wächaj, y xyataj jun sucʼalaj pixab, ri xcʼam ulok ri u kʼoxom ri canimaʼ ri achijab rumal ri qui banom.

19 Wachanim cʼut, we tä man xyaʼ taj jun pixab ri cubij we jun cäcämisanic, rajwaxic chi cäcäm na, ¿la kas cuxej rib jun che ri cämical are cäcämisanic?

20 We man cʼo taj cʼu jun pixab chrij ri mac, man cäquixej tä quib ri achijab quemacunic.

21 We man cʼo tä cʼu ri jun pixab, ¿jas cuban na ri kʼatbal tzij we quemacun ri achijab? Xukujeʼ we man cʼo tä ri pixab, ¿jas cuban na ri elbal cʼuxaj? Are we quieb riʼ man cʼo tä baʼ quech puwiʼ ri achi.

22 Tzare yatal canok jun takbal tzij, y xcojic jun cʼajisabal wächaj, y yaʼom canok jun qʼuexbal cʼuxaj, ri cutaʼ ri elbal cʼuxaj. We tä ma tä jeriʼ, ri kʼatbal tzij cuchap na ri jun, y cukʼat tzij puwiʼ, y ri pixab cuyaʼ ri cʼajisabal u wäch. We tä ma tä jeriʼ, ri Dios man areʼ tä ne lo jun Dios.

23 Tzare ri Dios amakʼel jun Dios, y ri elbal cʼuxaj cucʼam apachin cuqʼuex u cʼux. Cʼu ri elbal cʼuxaj cucʼulmaj ri cʼastajibal que ri cäminakib. Cʼu ri cʼastajibal que ri cäminakib cuban chi ri achijab quetzelej na chuwäch ri Dios. Je cʼu riʼ quetzelej qui banic chuwäch rech cäkʼat tzij paquiwiʼ je jas ri qui banom, je jas ri cubij ri pixab y ri kʼatbal tzij.

24 Chawilampeʼ, ri kʼatbal tzij cuban ronojel ri u rayibal. Xukujeʼ ri elbal cʼuxaj cutaʼ ronojel ri rech. Je cʼu riʼ, man cʼo taj jachin cucolotaj rib, xak xuwi jachin cuqʼuex u cʼux che ri u mac.

25 ¿La cachomaj chi ri elbal cʼuxaj cärelakʼan che ri kʼatbal tzij? Quinbij chawe, man jeʼ tä riʼ. Ni jubikʼ cärelakʼanic. We tä jeriʼ, ri Dios man areʼ tä ne lo jun Dios.

26 Rucʼ cʼu we beyal riʼ, ri Dios cuban ri nimalaj junalic u rayibal ri sucʼumam can tzpa ri u tiquiritajic ri uwächulew. Je cʼu riʼ, cäbantajic ri colotajic y ri esabal macaj que ri achijab, xukujeʼ ri sachbal qui wäch y ri quetzelal.

27 Rumal riʼ, nu cʼojol, apachin curayij cäpetic, yatal che chi cäpetic rech cutij ri jaʼ rech ri cʼaslemal, areʼ tzokopitalic. Y apachin ri man curayij taj cäpetic, man cäcoj tä chukʼab puwiʼ rech cäpetic, xane pa ri qʼuisbal kʼij, cätzelej na rucʼ ri u banom.

28 We u rayim ri u banic ri itzel, y man u qʼuexom tä u cʼux pa tak u kʼij, chawilampeʼ, cäbantaj na itzel che je jas ri cubij ri tzelejibal u banic rech ri Dios.

29 Wachanim cʼut, nu cʼojol, quinwaj chi man cäyaʼ tä latzʼ chawe cumal we jastak, xak cachomaj chrij ri a mac rucʼ ri kʼoxom ri cucʼam na a be che ri qʼuexbal cʼuxaj.

30 Nu cʼojol, quinwaj chi man cabij tä chic chi man cʼo taj ri u kʼatbal tzij ri Dios. Mabij chi man cʼo taj ri a mac, rech cabij chi man cʼo taj ri u kʼatbal tzij ri Dios. Chayaʼ chi cuban re pa awanimaʼ ri kʼatbal tzij rech ri Dios, y xukujeʼ ri relbal cʼuxaj, y ri nimalaj u kʼiʼnic. Chayaʼ chi catquimachʼachʼej cʼä pa ri cʼajcʼajic ulew.

31 Wachanim, nu cʼojol, at siqʼuim rumal ri Dios rech catzijobej ri tzij chque we winak. Jat pa ri a be, nu cʼojol, chakʼalajisaj ri tzij rucʼ ri kastzij, y ri kastzij a rayibal, rech cacʼam ulok tak animaʼ che ri qʼuexbal cʼuxaj, rech ri nimalaj beyal re ri elbal cʼuxaj cʼo rech paquiwiʼ. Cʼu ri Dios cuyaʼ chawe je jas ri nu bim. Amen.