1 Xcʼulmataj cʼut chi aretak bitajinak cʼut we tzij chque rumal ri Alma, ri areʼ xtʼuyiʼc cho ri ulew. Xwalajic cʼut ri Amulek, xuchap qui tijoxic ri e areʼ, xubij:

2 Wachalal, quinwilo chi man cuyaʼ taj chi quinbij chi man cʼo taj ri iwetamabal chque ri jastak ri e bitajinak chrij ri u petic ri Cristo, ri u Cʼojol ri Dios je jas cubij ri ka tijonic. Jeʼ, in wetaʼm chi xtijox we jastak riʼ chiwe nabe chi xixtastaj kucʼ.

3 Ix i rayim quitaʼ che ri lokʼalaj wachalal chi cukʼalajisaj chiwe jas quibano rumal ri cʼäxcʼolil i rikom. Cʼu ri areʼ ix u tzijom jubikʼ chusucʼumaxic ri i chomabal. Jeʼ, ix u pixabam chi quixcojonic, u pixabam chi quikʼiʼ che reyexic.

4 Jeʼ, chi cʼo ri i cojobal rech chi quiticʼ ri tzij pa ri iwanimaʼ chrilic na ri rutzilal.

5 Y kilom chi ri ix quiwaj quiwetamaj pa ri i chomanic we tä ri tzij cäriktajic rucʼ ri u Cʼojol ri Dios, o we tä man cʼo tä na jun Cristo.

6 Xukujeʼ iwilom chi ri wachalal u cʼutum chiwäch, che qʼui u beyal, chi ri tzij cäriktajic rucʼ ri Cristo che colotajic.

7 Ri wachalal chʼawinak chiwe chrij ri u tzijobal ri Zenós, chi ri esabal macaj cäpe na rumal ri u Cʼojol ri Dios, y xukujeʼ u kʼalajisam ri u tzijobal ri Zenoc. Xukujeʼ xchʼaw chrij ri Moisés rech cucʼut chiwe chi kastzij we jastak riʼ.

8 Wachanim cʼut, quekʼalajisataj we jastak wumal, chi e kastzij. Chiwilampeʼ, quinbij chiwe chi wetaʼm chi ri Cristo cäpe ne chquixol ri calcʼual ri winak chucʼamic puwiʼ ri qui xalkʼatinic che ri u takbal ri Dios ri u winakil, y rech cutoj ri qui mac ri e aj uwächulew. Waʼ rumal u bim canok ri Dios.

9 Rajwaxic chi cäbantaj jun tojbal macaj. Je jas cäraj ri nimalaj beyal ri u chomam can ri Junalic Dios, cʼo chi cäbantaj jun tojbal macaj. We tä ma tä jewaʼ, conojel ri winak aj uwächulew kas cäsach na qui wäch. Jeʼ, conojel e cowirinak canimaʼ. Jeʼ, conojel e tzakinak e sachinak, y we cʼu man cʼo taj ri tojbal macaj ri rajwaxic chi cäbantaj na, cʼo na chi quecämic che junalic.

10 Rumal riʼ, rajwaxic chi cäbantaj na jun nimalaj qʼuisbal tabal tokʼob. Tzare man areʼ tä jun tabal tokʼob bantajinak rumal jun achi, mawi rech jun chicop aj uwo caj. Man areʼ tä riʼ jun tabal tokʼob bantajinak cumal ri winak, xane jun junalic tabal tokʼob ri man cäqʼuis tä u wäch.

11 Man cʼo tä cʼut jun achi ri takal che cuyaʼ ri u quiqʼuel chutojic ri u mac jun chic. We jun achi cäcämisanic, chiwilampeʼ, ¿la cäraj ri ka kʼatbal tzij, ri kas sucʼ, cäresaj ri u cʼaslemal ri rachalal? Quinbij chiwe chi man cäraj tä jeriʼ.

12 Tzare ri kʼatbal tzij cutaʼ ri u cʼaslemal ri jun ri xcämisanic. Rumal cʼu riʼ, majun jasäch, we man areʼ tä ri junalic tojbal macaj, cäcuinic cuban u qʼuexwäch rumal ri macaj rech ri uwächulew.

13 Rumal cʼu riʼ, rajwaxic chi cʼo jun nimalaj qʼuisbal tabal tokʼob. Cʼäte cʼu riʼ, cʼo na, o rajwaxic chi cäbantaj ri u qʼuisbal ri u turuwic quiqʼuel. Cʼäte cʼu riʼ, cätzʼakatisax na ri ri u pixab ri Moisés. Jeʼ, kas ronojel cätzʼakatisax na, y man cäcanaj majun u bokʼwäch tzij, o quieb bokʼwäch tzij, ri man tzʼakatinak taj. Y majun cocʼow na wi che.

14 Chiwilampeʼ cʼu riʼ, are waʼ ri tzʼakat u sucʼ ri takbal tzij, ronojel u bokʼwäch tzij cucʼut ri jun nimalaj qʼuisbal tabal tokʼob. Y ri jun nimalaj qʼuisbal tabal tokʼob riʼ, areʼ ri u Cʼojol ri Dios, ri kas junalic, y man cäqʼuis tä na u wäch.

15 Y jeriʼ, cucʼam na ulok ri colotajic chque conojel ri quecojon che u biʼ. Areʼ ri u rayibal we qʼuisbal tabal tokʼob, rech cucʼam ulok ri u cuinem ri elbal cʼuxaj, ri cächʼecan na ri kʼatbal tzij, y xukujeʼ cucʼam na ulok ri beyal chque ri achijab rech quecojon che ri qʼuexbal cʼuxaj.

16 Je cʼu waʼ, ri elbal cʼuxaj cutzʼakatisaj ri cätaʼic ri kʼatbal tzij, y quebusutij ri e areʼ rucʼ ri u kʼab ri chajibal. Tzare ri winak ri man cuchacuj tä ri cojobal cʼä pa ri qʼuixbal u cʼux che ri u mac, cäyaʼtaj canok chuxeʼ ronojel ri cutaʼ ri kʼatbal tzij. Rumal riʼ, xak xuwi cäbantaj na ri nimalaj junalic u beyal che ri colotajic che ri cʼo u cojobal rech cuqʼuex u cʼux.

17 Rumal riʼ, wachalal, chuyaʼ ri Dios chiwe rech quichaplej u chacuxic ri i cojobal cʼä quiqʼuex i cʼux, rech quichaplej u siqʼuixic ri lokʼalaj u biʼ, rech quel u cʼux chiwe.

18 Jeʼ, chitzʼonoj ri relbal cʼuxaj, rumal ri areʼ cʼo u cuinem che ri colotajic.

19 Jeʼ, chimachʼachʼej iwib, y chitakej u banic ri chʼawem rucʼ.

20 Chibanaʼ chʼawem rucʼ aretak ix cʼo pa tak ri iwulew, jeʼ, paquiwiʼ conojel ri jumulaj i chij.

21 Chitzʼonoj che cho ri iwachoch, pa nim akʼab, pa nicʼaj kʼij, y pa chakʼab, jeʼ, paquiwiʼ conojel ri e cʼo cho iwachoch.

22 Jeʼ, chitzonoj che rech man cʼo tä qui cuinem ri i cʼulel chiwij.

23 Jeʼ, chitzʼonoj che rech man cʼo tä u cuinem ri itzel piwiʼ, areʼ ri u cʼulel ronojel suqʼuilal.

24 Chitzʼonoj che puwiʼ ri u kʼataj ri iwulew, rech quixnimaric chi utz.

25 Chibanaʼ chʼawem rucʼ ri Dios paquiwiʼ ri jumulaj tak chij rech ri iwulew, rech queqʼuiyaric.

26 Tzare man are tä waʼ conojel. Rajwaxic chi quijaʼrisaj iwanimaʼ cho ri i warabal, y chupam ri tak i cʼolibal jawiʼ ix cʼo i tuquiel, y pa ri iwulew tzʼinowinak.

27 Jeʼ, y aretak man quisiqʼuij tä ri u biʼ ri Ajawaxel, chinimarisaj ri iwanimaʼ rucʼ ri chʼawem rucʼ ri Dios. Amakʼel chibanaʼ rech cʼo utzil i wäch, y xukujeʼ che ri rutzil qui wäch ri e cʼo iwucʼ.

28 Chiwilampeʼ, lokʼalaj tak wachalal, quinbij chiwe, michomaj chi are waʼ ronojel. Cʼäte i banom ronojel waʼ jastak, we quixutuj ri mebaʼib, y ri e chʼaʼnalic, y we man quixbe tä chquixolixic ri e yawab y ri qui rikom cʼäx, y we man quiyaʼ tä ri rajwaxic chque we cʼo iwucʼ, quinbij chiwe, we man quiban waʼ jastak, chiwilampeʼ, man cʼo tä u patan ri i chʼawem che ri Dios, xane quixux na junam cucʼ ri e quieb qui wäch, ri cäquixutuj ri cojobal.

29 Rumal riʼ, we man cänataj chiwe chi quiyaʼ i sipanic, ix junam rucʼ ri mes ri cäquiqʼuiak apan ri chʼayol tak chʼichʼ (rumal chi man cʼo tä u patan) y cätacʼalex cumal ri achijab.

30 Wachanim, wachalal, cʼäte i cʼamom sibalaj tak kʼalajisabal, y rumal ri lokʼalaj tak tzij cäquikʼalajisaj we jastak, quinwaj chi quixpe ulok chuyaʼic ri wächinic rech ri qʼuexbal cʼuxaj.

31 Jeʼ, quinwaj chi quixpetic, y chi man quicowirisaj tä chic ri iwanimaʼ. Kas wacamic, are ri kʼij re ri i colotajic. Rumal riʼ, we quiqʼuex i cʼux, y we man quicowirisaj tä chic iwanimaʼ, kas cächacun na iwucʼ ri nimalaj u beyal ri esabal macaj.

32 Chiwilampeʼ, we cʼaslemal riʼ are ri kʼij yatal chque ri achijab cäquisucʼumaj quib rech quebec chuwäch ri Dios. Jeʼ, ri kʼij re we cʼaslemal, are ri kʼij yatal chque ri achijab chubanic ri qui chac.

33 Wachanim cʼut, je jas xinbij nabe, rumal i cʼamom sibalaj tak kʼalajisabal, quintzʼonoj chiwe chi man quixbeyetaj tä che ri kʼij re ri qʼuexbal i cʼux cʼa pa ri qʼuisbal kʼij. Rumal we ocʼowinak chic we kʼij re cʼaslemal, ri cäyaʼ chke rech cäkasucʼumaj kib che ri junalic cʼaslemal, y we man cäkutzirisaj ri ka kʼijal aretak uj cʼo pa we cʼaslemal, cʼäte cʼu riʼ, coc na ri akʼab re ri kʼekumal jampa man cäyaʼ tä chic chque ri winak chubanic chac.

34 Aretak ix cʼo na pa ri jun cʼäxalaj cʼolem riʼ, man quixcuin tä na che u bixic: Quinqʼuex na nu cʼux che ri nu mac. Quintzelej na rucʼ ri nu Dios. Man jeʼ taj, man quixcuin taj che u bixic waʼ. Ri jun uxlabal ri rajchakʼe ri i tiojil pa ri kʼij are quixel bic pa we cʼaslemal, junam riʼ cucʼam na i tiojil pa ri junalic uwächulew are bantajinak chic ri i cʼaslemal.

35 Are cʼu we quixbeyetaj cʼä pa ri cämical ri kʼij re ri qʼuexbal i cʼux che i mac, chiwilampeʼ, ix oquinak chuxeʼ ri u takanic ri ruxlabal ri itzel ri quixuximo. Rumal riʼ, ri Ruxlabal ri Ajawaxel quixuyaʼ cnaok, y man cʼo tä na u cʼolibal iwucʼ, cʼu ri itzel cʼo ronojel cuinem piwiʼ. Are cʼu waʼ ri qʼuisbal qui canajic ri itzel tak winak.

36 Wetaʼm cʼu waʼ rumal ri Ajawaxel u bim chi man cäcʼojiʼ taj pa tzʼilalaj tak ja, xane xak xuwi pa ri canimaʼ ri sucʼalaj tak winak. Xukujeʼ u bim canok chi ri sucʼalaj tak winak quetʼuyiʼ na pa ri rajawibal, y man quebal tä chic. Cʼu ri catzʼiak cäsakirisax na rumal ri u quiqʼuel ri Alaj Chij.

37 Wachanim, lokʼalaj wachalal, quinwaj chi cänataj chiwe we jastak, chi quichʼec ri i colotajic rucʼ jun xenib chuwäch ri Dios, y chi man quibij tä chic chi man cʼo taj ri u petic ri Cristo.

38 Quinwaj chi man quixchʼoʼjin tä chic rucʼ ri Lokʼalaj Uxlabixel. Utz na we quicʼam riʼ, y chi quicʼam piwiʼ ri u biʼ ri Cristo, chi quimachʼachʼej iwib cʼä cho ri cʼajcʼajic ulew, y chi quikʼijilaj ri Dios apawije cʼu ri ix cʼo wi, pa uxlabal, y rucʼ ri kastzij. Xukujeʼ quinwaj chi quixmaltioxin che ri Dios ronojel kʼij rumal ri qʼui tak tewichibal y utzilal ri cuyaʼ chiwe.

39 Jeʼ, xukujeʼ quixinpixabaj, wachalal, chi amakʼel quicoj i chukʼab chubanic chʼawem rucʼ ri Dios rech man quixcʼam tä bic rumal ri takchibal che mac rech ri itzel, chi man quixuchʼec taj, rech man quixtzak taj chuxeʼ ri u takanic pa ri qʼuisbal kʼij. Chiwilampeʼ, ri areʼ man cuyaʼ tä majun jasäch ri cʼo rutzil che tojbal iwe.

40 Wachanim cʼut, lokʼalaj wachalal, quinwaj quixinpixabaj chi quixeyenic, chi quikʼiʼ ronojel cʼäxcʼolil ri quiriko, chi man quixyokʼon taj chque ri e areʼ ri ix qui xutum rumal ri nimalaj i mebaʼil, rech jeriʼ man quixux taj ajmaquib junam cucʼ.

41 Xane quixeyenic, quikʼiʼ ronojel tak we cʼäxcʼolil, y quixcojon pa iwanimaʼ chi cäpe na jun kʼij are quixuxlan na cho ronojel i cʼäxcʼolil.