1 Wachanim, nu cʼojol, cʼo jubikʼ ri quinbij chawe chrij ri tzeletajibal u banic ri jastak ri bim canok. Chawilampeʼ, e cʼo jujun ri qui qʼuexom u wäch ri lokʼalaj tzʼibatalic. Rumal riʼ, sachinak qui cʼux che. Xukujeʼ quinwilo chi cʼo latzʼ a chomanic chrij waʼ jasäch. Tzare chawilampeʼ, quinkʼalajisaj na riʼ chawäch.

2 Quinbij baʼ chawe, nu cʼojol, chi ri u beyal ri tzeletajibal u banic ri jastak sibalaj rajwaxic che ri kʼatbal tzij rech ri Dios, rumal rajwaxic chi conojel ri jastak quetzeletaj che ri kas qui cholaj. Chawilampeʼ, are rajwaxic, y sucʼ, je jas ri u cuinem y ri u cʼastajibal ri Cristo, chi ri ranimaʼ jun achi cätzelej na rucʼ ri kas u tiojil, y chi ronojel u tzʼakatil cätzelej na u banic ri jastak che junam.

3 Rajwaxic cʼut che ri u kʼatbal tzij ri Dios, chi cäkʼat tzij paquiwiʼ ri achijab je jas ri qui banom. Xukujeʼ rajwaxic chi quetzelej che ri utzil pa ri kʼij ri cäpe na, we tä utz ri qui banom pa we cʼaslemal, y we tä utz ri qui rayibal pa canimaʼ.

4 Y we itzel ri qui banom, cätzelej na itzel paquiwiʼ. Rumal cʼu riʼ, ronojel cätzeletaj na u banic ri jastak che ri kas u cholaj, che ri kas u banic nabe canok. Ronojel ri cäcämic cäwalajisax na che ri junalic cʼaslemal. Ronojel ri cäkʼayic cuban man cäkʼay taj. Ronojel cʼut cäwalajisax na che junalic quicotem chrechbexic ri rajawibal ri Dios, o cäwalajisax na che junalic bisonem chrechebexic ri rajawibal ri itzel. Jun jasäch pa jun cʼolibal, jun chic pa ri jun cʼolibal chic.

5 Jun cäwalajisax che quicotemal je jas ri u reyibal che ri quicotemal, o che ri utzil, je jas ri u rayibal che ri utzil. Cʼu ri jun chic cäwalajisax che ri etzelal, je jas ri u rayibal che ri etzelal. Rumal chi xurayij cuban ri itzel ronojel kʼij, jeriʼ cucʼam na ri tojbal rech etzelal aretak coc ri akʼab.

6 Junam cäbantajic pa ri jun cʼolibal chic. We jun u qʼuexom u cʼux che ri u mac, y u tzucum ri suqʼuilal cʼä pa ri qʼuisbal u kʼij, jeriʼ, cucʼam na wu tojbal pa ri suqʼuilal.

7 Are tak waʼ ri quesax ri qui mac rumal ri Ajawaxel. Ri areʼ quesatajic, quetzokopitajic chupam ri kʼekumalaj chakʼab ri man cäqʼuis taj. Je cʼu riʼ, quetaqʼuiʼc o quetzakic, rumal rech chi ri e areʼ cäquikʼat tzij quib paquiwiʼ, we tä che u banic ri utz, o che u banic ri itzel.

8 Man cuyaʼ tä cʼut chi queqʼuexic ri u takbal ri Dios. Rumal riʼ sucʼumam chic ri be rech apachin ri cänaj cäbinic chilaʼ cäcolotaj na.

9 Wachanim, nu cʼojol, man caban taj chi cäpe jun cʼäx pawiʼ, man catyokʼon tä chic che ri Dios chquij we jastak che ri tijonem, je jas a banom che mac.

10 Machomaj chi ri tzeletajibal u banic ri jastak ri nu bim chawe cuyaʼ chi catzelej na rucʼ ri a mac che ri quicotemal. Chawilampeʼ, quinbij chawe, ri etzelalal mawi junam rucʼ ri quicotemal.

11 Wachanim, nu cʼojol, conojel ri achijab ri queriktajic kas quech wi ri qui noʼj, o quinbij, pa jun cʼojical re ri tiojilal, ri e areʼ cʼo pa ri cʼayil, e ximatalic rucʼ ri colob rech ri etzelal. Man cʼo tä ri Dios cucʼ cho ri uwächulew, man qui banom taj junam rucʼ ri u banic ri Dios. Rumal riʼ, quecʼojiʼ pa jun juleʼ cʼojical chic ri man junam tä rucʼ ri quicotemal.

12 Wachanim, ¿la cubij ri tzeletajibal u banic ri jastak chi cucʼam bic jun jasäch pa ri kastzij u banic rech cäyaʼic pa jun u banic ri man rech taj, o chi cäyaʼic pa jun u banic ri man junam tä rucʼ ri kas u banic.

13 Man jeʼ taj nu cʼojol, tzare ri u sucʼ ri tzij cʼastajibal are chi cätzelej ri man utz taj che u qʼuexel ri man utz taj, ri aj ri tiojilal che u qʼuexbal ri rech ri tiojilal, ri itzel che u qʼuexel ri rech ri itzel, ri utz che u qʼuexel ri utz, ri colom che u qʼuexel ri colom, ri elbal cʼuxaj che u qʼuexel ri elbal cʼuxaj.

14 Rumal riʼ, nu cʼojol, chacojoʼ a chukʼab rech quel a cʼux chque ri awachalal. Chatcʼolok pa ri suqʼuilal. Kas sucʼ chakʼataʼ tzij paquiwiʼ ri nicʼaj chic. Matcosic che u banic ri utz. We cʼu cnaimaj ronojel we jastak, cʼäte cʼu riʼ, cacʼam na ri a tojbal. Jeʼ, cätzelej na awucʼ ri elbal cʼuxaj, cätzelej na awucʼ ri suqʼuilal, cätzelej na u banic awucʼ jun tzʼakatalaj kʼatbal tzij, y cäyaʼ na chi jumul chawe jun tojbal re utzil.

15 Ri quel bic chawe cätzelej na chi jumul awucʼ. Rumal riʼ, ri tzeletajibal u banic ri jastak cäcʼajisaj u wäch ri ajmac pa ri u tzʼakatil, y man cuyaʼ tä cuyubal che ri macaj.