1 Wachanim cʼut, nu cʼojol, cʼo chi na ri quinbij chawe chuwäch ri xinbij che ri awachalal. Chawilampeʼ, ¿la ma tä awilom chi ri awachalal man cäcos taj, chi amakʼel areʼ nimanel, chi cäsacʼajanic chunimaxic ri u takbal ri Dios? Chawilampeʼ, ¿la ma tä u yaʼom jun utzalaj cʼutbal chawe?

2 Cʼu ri at man a tom taj ri nu tzij chquixol ri winak ri aj Zoramitas, je jas xuban ri awachalal. Are waʼ ri quinnaʼ pa wanimaʼ chawij, ri at xaʼ canimarisaj awib rumal ri a chukʼabil, y ri awetamabal.

3 Man are tä waʼ ronojel, nu cʼojol. Ri at xaban jun nimalaj cʼäx che wanimaʼ. Ri at xayaʼ can ri lokʼalaj chac yaʼom chawe, y xatel bic cho ri ulew ri Sirón, ri cʼo chuxcut ri ulew que ri aj Lamanitas, chuterenexic ri wacatel ixok, Isabel, ri cuyaʼ rib chque ri achijab.

4 Jeʼ, ri areʼ u chʼecom ri canimaʼ qʼuialaj achijab. Tzare waʼ man yatal tä chawe chi caban jeriʼ, nu cʼojol. Rajwaxic chawe chi caban ri lokʼalaj chac ri xyaʼ chawe.

5 ¿La ma tä awetaʼm nu cʼojol, chi itzel we jastak cho ri u bokʼwäch ri Ajawaxel? Jeʼ, itzel na riʼ chquiwäch ronojel ri macaj. Xak xuwi ri u turuwisaxic ri quiqʼuel rech jun ri man cʼo tä u mac, o ri u xutuxic ri Lokʼalaj Uxlabixel mas nim na chuwäch ri a banom.

6 Chawilampeʼ cʼut, we cabij chi man cʼo taj ri Lokʼalaj Uxlabixel cʼäte cʼojinak chic awucʼ, y awetaʼm chi tajin cabij chi man cʼo taj, chawilampeʼ, are jun mac ri man cʼo tä u cuyubal. Y jachin cäcämisan, y cʼo chic ri u sakil y ri retamabal ri Dios rucʼ, kas cʼäx curik na ri cuyubal rech ri u mac, jeʼ, nu cʼojol, quinbij chawe chi cʼäx na u rikic ri cuyubal re.

7 Wachanim nu cʼojol, ri u rayibal ri wanimaʼ are chi ma tä a banom we nimalaj mac riʼ. Man quinchʼaw tä jewaʼ chrij ri a mac chuyaʼic kʼoxom che awanimaʼ we tä ma tä kas quinbano che ri awutzil.

8 Tzare chawilampeʼ, man catcuin taj cawawaj ri a mac chuwäch ri Dios. Y we tä ma tä caqʼuex a cʼux, quewalajisax na je u banic jun kʼalajisanel chawij pa ri qʼuisbal kʼij.

9 Wachanim nu cʼojol, quinwaj chi caqʼuex a cʼux, chi cayaʼ can ri a mac, y man catzucuj tä na ri itzel u rayibal ri a bokʼwäch, xane chaxutuj ronojel we jastak. Rumal we ma cabano, man cʼo tä na jun beyal chawe rech cawechbej ri rajawibal ri Dios. Chnataj waʼ chawe, y chacʼamaʼ pa ri a cʼux, chaxutuj we jastak.

10 Quintakan cʼu chawe chi cacoj a chukʼab chutaʼic ri qui noʼj ri awätz che ri cabano. Rumal, chawilampeʼ, at cʼä acʼal, y rajwaxic chawe ri qui toʼbanic ri awätz. Chatatabej cʼu ri qui tzij.

11 Man cayaʼ tä awib chque ri conalaj tak jastak ri man cʼo taj qui patan. Man cayaʼ tä che ri itzel chi cutakchij ri awanimaʼ che mac rech catbe cucʼ we itzel tak ixokib. Chawilampeʼ nu cʼojol, nimalaj ri mac ri a banom chque ri aj Zoramitas, rumal chi aretak xquilo ri a banom, man xcaj tä quecojon che ri nu tzij.

12 Cʼu ri Ruxlabal ri Ajawaxel cubij chwe: Chattakanok chque ri awalcʼual chi cäquiban ri utz rech man cäquicʼam qui be ri winak che ri u sachbal qui wäch. Rumal riʼ, nu cʼojol, quintakan chawe, rucʼ ri xen ib rech ri Dios, chi man caban tä chic ri a mac.

13 Quintakan chawe chi cattzelej chuwäch ri Ajawaxel rucʼ ronojel ri a chomanic, ri a cuinem, y ri a chukʼab, rech man cacʼam tä qui be ri winak chubanic ri itzel. Xane chattzelejok cucʼ, y cakʼalajisaj ri a mac chque, y ri man utz taj ri a banom.

14 Matzucuj ri kʼinomal, mawi ri jastak ri man cʼo tä qui patan rech ri me uwächulew. Chawilampeʼ, man catcuin taj cacʼam bic awucʼ.

15 Wachanim, nu cʼojol, quinwaj quinbij jubikʼ chrij ri u petic ri Cristo. Chawilampeʼ, quinbij chawe chi areʼ kas cäpe na chresaxic ri qui mac ri e cʼo cho ri ulew. Jeʼ, ri areʼ cäpe na che u kʼalajisaxic chque ri u winak ri jeʼlalaj cʼacʼ tzij rech ri colotajic.

16 Wachanim cʼut, nu cʼojol, at xatsiqʼuix che we lokʼalaj chac, chi cakʼalajisaj we cʼacʼ tzij re quicotemal chque we winak rech cäquisucʼumaj ri qui chomabal. O utz cäbix na, rech cäpe ri colotajic cucʼ, rech quecuinic cäquisucʼumaj ri qui chomabal ri calcʼual chutatabexic ri tzij pa ri kʼij.

17 Wachanim, quinyaʼ utzil pa ri a chomabal chrij we jasäch riʼ. Ri at catmayinic rumal chi etamatal waʼ jastak qʼui junab nabe chi quecʼulmatajic. Chawilampeʼ, ¿la ma tä kas nim u kʼij jun animaʼ cho ri Dios je jas ri cäban na pa ri kʼij rech ri u petic?

18 ¿La ma tä rajwaxic chi cäyaʼic ri retamabal ri beyal rech ri colotajic chomam ulok chque re winak, y xukujeʼ chque ri calcʼual?

19 ¿La ma tä xaʼ junam cäcuin ri Ajawaxel cutak na camic jun u ángel rech cukʼalajisaj we cʼacʼ tzij re quicotemal chke je jas cutako chque ri kalcʼual, o je jas cutak na chque ri winak cʼäte ri kʼij rech ri u petic?