1 Cʼo chi na ri quinbij chawe, nu cʼojol, rumal quinwilo chi latzʼ cʼo wi ri a chomabal che ri cʼastajibal que ri cäminakib.

2 Chawilampeʼ, quinbij chawe chi are majaʼ petinak ri Cristo, man cʼo taj ri cʼastajibal. O mas utz cäbixic, we tiojil, ri cäcäm na, man cuban tä junalic, mawi ri u tukaril cuban tä tzʼakat cʼä cäpe na ri Cristo.

3 Chawilampeʼ, ri areʼ cucʼam na ulok ri cʼastajibal que ri cäminakib. Tzare chawilampeʼ, nu cʼojol, ri cʼastajibal majaʼ petinak. Wachanim quinwesaj na chi sak chawäch jun jasäch ri man etamatal taj. E cʼo sibalaj jastak ri man etamatal taj, ri e cʼuʼtalic, ri xak xuwi ri Dios retaʼm. Tzare quincʼut na chawe jun jasäch ri nu taʼom che ri Dios rucʼ nu sacʼajinic chretamaxic. Are waʼ chrij ri cʼastajibal.

4 Chawilampeʼ, cojom retal jun kʼij aretak conojel quecʼastaj na chquixol ri cäminakib, tzare man cʼo tä jun ri retaʼm jampa cäpe na we jun kʼij riʼ. Xak xuwi ri Dios retaʼm ri kʼijal ri cojom retal che.

5 Wachanim man cʼo taj u patan we cʼo jun nabe cʼastajibal, o jun u cab o wene jun urox aretak quecʼastaj ri cäminakib. Ri Dios baʼ retaʼm ronojel we jastak. Cuban cʼu chwe we in wetaʼm chi are waʼ u banic chi cojom retal che ri kʼij aretak conojel quecʼastaj chquixol ri cäminakib.

6 Xane rajwaxic chi cʼo jun cʼolibal chquixol ri kʼij re ri cämical cʼu ri kʼij rech ri cʼastajibal.

7 Wachanim quintaʼ ri in: ¿Jas cäban na chque ri canimaʼ ri achijab tza pa ri kʼij rech ri qui cämical, cʼä pa ri kʼij ri cojom retal che ri cʼastajibal?

8 Wachanim, man cʼo tä u patan ri etamabal we cʼo mas cho jun kʼij cojom retal che rech ri cʼastajibal que ri achijab, rumal chi man conojel taj quecämic xaʼ jumul. Man cʼo tä u patan waʼ etamabal. Je cʼu waʼ, wonojel je jas jun kʼij che ri Dios. Xak xuwi ri achijab cäcajilaj ri qui kʼij.

9 Rumal riʼ, cojom retal jun kʼij chque ri achijab rech quecʼastaj na chquixol ri cäminakib. Cʼo cʼu jun cʼolibal chquixol ri kʼijal re ri cämical, y ri kʼij rech ri cʼastajibal. Xintaʼ che ri Dios rucʼ nu sacʼajinic chrij we cʼolibal, y jas cäban na chque ri canimaʼ ri achijab riʼ, y are waʼ ri jasäch ri wetaʼm chic.

10 Aretak copan ri kʼij aretak conojel quecʼastaj na, cäquil na chi ri Dios retaʼm ronojel kʼijal cojom retal chque ri achijab.

11 Wachanim chawilampeʼ, jun ángel xchʼaw ulok wucʼ chrij ri u cʼojical ri animaʼ chquixol ri cämical y ri cʼastajibal. Ri areʼ xucʼut chwe chi ri cuxlabal conojel achijab quecʼam bic chuwäch ri Dios ri xuyaʼ qui cʼaslemal, jeʼ, ri cuxlabal conojel ri achijab we tä utz o we tä itzel. Are waʼ cäbantaj na aretak e tastajinak chic pa we tiojil.

12 Cäcʼulmataj cʼu na chi ri cuxlabal ri sucʼalaj tak winak quecʼulataj pa ri jun cʼojical rech quicotemal, are u biʼ ri cʼolibal que ri utzalaj tak uxlabal. Are jun cʼojical rech uxlanem, y rech utzilal. Chilaʼ quebuxlan na ri e areʼ chque conojel ri qui cʼäxcʼol, che ronojel kʼoxom y bixonem.

13 Cʼäte cʼu riʼ, cäcʼulmataj na chi ri cuxlabal ri ajmaquib, jeʼ, ri itzel tak winak ri man cʼo tä jun chakapil mawi jubikʼ che ri Ruxlabal ri Ajawaxel, ri qui chaʼom ri man utz taj chquiwäch ri utzalaj tak chac, rumal riʼ ri ruxlabal ri itzel xoc chque, y xuban ri rajchakʼe che ri cachoch. Ri e areʼ queqʼuiak na pa ri kʼekumal apanok. Chilaʼ cʼo na okʼem, y nimalaj bisonem, y cäquikuchʼuchʼej na qui wareʼ. Y waʼ, rumal ri etzelal quech, xquitzak quib pa ri u rayibal ri itzel.

14 Jeriʼ baʼ, ri cʼojical que ri canimaʼ ri itzel tak winak, jeʼ, pa ri kʼekumal, pa jun cʼolibal rech cʼäxalaj xibinem jawiʼ cäqueyej wi chi cäkaj paquiwiʼ ri kʼakʼalaj royowal ri Dios. Jeriʼ quecanajic pa we cʼojical riʼ, aretak cʼu ri sucʼalaj tak winak quecanajic pa ri cʼolibal que ri utzalaj tak uxlabal, cʼä pa ri kʼij re ri qui cʼastajibal.

15 E cʼo jujun ri qui chʼobom chi waʼ cʼojical re quicotem, y waʼ cʼojical re bisonem ri cʼo na nabe cho ri kastzijalaj cʼastajibal, are cʼu waʼ qui chʼobom pa qui cʼux chi are ri nabe cʼastajibal. Jeʼ, quincʼam ri tzij ri cubij chi ri jun u qʼuexbal ri uxlabal o ri animaʼ, o ri u takic bic pa ri quicotem o pa ri bisonem, quincʼam cʼu waʼ chi cuyaʼ cäbixic cʼastajibal che. Are jas ri cubij ri tzij ri bim canok.

16 Chawilampeʼ cʼut, xukujeʼ u bim canok chi cʼo jun nabe cʼastajibal, are jun cʼastajibal que conojel ri e cʼojinak, o ri quecʼojiʼc, o ri quecʼojiʼ na cʼä pa ri u cʼastajibal ri Cristo chquixol ri cäminakib.

17 Tzare man cäkachomaj taj chi we nabe cʼastajibal, ri bitajinak rucʼ we tzij, are jun cʼastajibal que ri animaʼ, y qui takic che quicotem o bisonem. Machomaj chi jeriʼ sucʼ riʼ.

18 Chawilampeʼ, quinbij chawe, man jeʼ tä riʼ, xane are u sucʼumal waʼ, ri qui mulin ib ri animaʼ rucʼ ri tiojil que conojel ri winak ri e cʼojinak pa ri u kʼij ri Adán, cʼä pa ri u cʼastajibal ri Cristo.

19 We cäquimulij na quib chi jumul ri animaʼ y ri tiojil quech conojel ri e areʼ ri nu bim canok, ri sucʼalaj winak o ri itzel tak winak, in quinbij tä riʼ. Cuban chwe quinbij chi conojel quewalij na. Mas utz cäbix, are ri qui cʼastajibal cäbantaj na nabe che ri qui cʼastajibal ri e areʼ ri quecäm na cʼäte ri u cʼastajibal ri Cristo.

20 Man quinbij taj, nu cʼojol, chi ri qui cʼastajibal cäbantaj na pa ri kʼij re ri u cʼastajibal ri Cristo. Xak xuwi quinchomaj in, chi ri canimaʼ y ri qui tiojil ri sucʼalaj tak winak cäquimulij na quib pa ri kʼij rech ri u cʼastajibal ri Cristo, y ri u pakalisabal chicaj.

21 Man quinbij taj we cäcʼulmataj waʼ are bantajinak ri u cʼastajibal, tzare quinbij chi cʼo jun u xol chquixol ri u cämical y ri u cʼastajibal ri tiojil. Xukujeʼ cʼo na jun cʼojical rech quicotemal o rech bisonem che ri animaʼ, cʼä pa ri kʼij ri cojom retal rumal ri Dios chi quecʼastajic ri cäminakib, rech cäquimulij quib ri canimaʼ rucʼ ri qui tiojil, rech quecʼam bic chuwäch ri Dios rech quekʼat tzij paquiwiʼ je jas ri qui banom.

22 Jeʼ, waʼ cuban na chi quetzʼakatisaxic ri jastak ri e bim cumal ri qui chiʼ ri kʼalajisanelab che ri cäpe na.

23 Ri animaʼ cätzelej na rucʼ ri tiojil, cʼu ri tiojil cätzelej na rucʼ ri animaʼ, jeʼ, ronojel u tzʼakatil ri tiojil, y ri u bakilal, cätzelej na rucʼ ri tiojil. Jeʼ, y ronojel cäsucʼumax che ri kas sucʼ u banic nabe canok.

24 Wachanim cʼut, nu cʼojol, are waʼ ri cʼastajibal ri bitajinak cumal ri qui chiʼ ri kʼalajisanelab che ri cäpe na.

25 Cʼäte cʼu riʼ, ri sucʼalaj tak winak quejuluwic na qui wäch pa ri rajawibal ri Dios.

26 Tzare chawilampeʼ, cäpe na jun cʼäxalaj cämical paquiwiʼ ri itzel tak winak, rumal rech chi quecämic chque ri jastak rech suqʼuilal. Ri areʼ e tzʼil, y man cʼo tä jun tzʼil jasäch ri cärechbej ri rajawibal ri Dios. Xak queqʼuiak apanok y cäyaʼic chque cäquitij ri u wäch ri qui banom, o ri qui chac, ri kas itzel. Cäquikumuj na ri u tzʼilol che ri cʼailaj kumubal.