1 Je ba waʼ chi ri takbal tak u tzij ri Mosiah cubij chi ronojel tak ri kʼatal tzij, o ri cäbix tak kʼatal tzij chque, takal chque chi cäquicʼam ulok chque ri tojbal qui chac, waʼ je jas ri kʼij ri quechacun na wi che u kʼatic tzij paquiwiʼ areʼ cʼu ri quecʼamic lok chquiwäch rech cäkʼat tzij paquiwiʼ.

2 We cʼu cʼo jun achi ri cʼo u cʼas rucʼ jun chic we man cutajo, cäbix che ri kʼatal tzij. Are waʼ xucoj u takanic che u bixic chque ri u chajinelab rech cäquicʼam ulok chuwäch ri jun ri cʼo u cʼas. Waʼ rech cukʼat tzij puwiʼ je jas ri cubij ri takbal tak tzij, y ri kastzij ri u bim chrij ri u mac. Jeriʼ cʼut qui cojom qui chukʼab che ri achi rech cutojo u cʼas, we man cutoj tä quesaxic ri u jastak, xukujeʼ xesaxic aponok chquixol ri winak, rumal chi areʼ subunel, elakʼom.

3 Cʼu ri kʼatal tzij xuchʼeco ri tojbal je jas ri kʼij ri xchacunic. Jun senine re kʼän puak che tojbal jun kʼij, o jun senum re sak puak, are waʼ junam rucʼ jun senine re kʼän puak. Cäbantaj cʼu waʼ je jas ri cubij, ri takbal tak tzij ri yatajinak.

4 Are cʼu tak waʼ ri qui biʼ conojel ri qui puak rech kʼän puak y rech sak puak, waʼ je jas ri cajil. Ri aj Nefitas xquiyaʼ qui biʼ chque, rumal chi e are man quebajilanic taj junam cucʼ ri aj Judeyib ri xecʼoji pa Jerusalén, xukujeʼ man e junam tä ri qui pajbal cucʼ ri quech ri aj Judeyib, xane qui qʼuexom u sucʼ ri cajilanic cʼu ri qui pajbal je ri u beyal ri qui chomanic y ri qui banic ri winak, pa conojel ri quijaʼlil, cʼä pa ri xbantaj ri qui takanic, ri kʼatal tak tzij ri xtacʼabax can rumal ri Ajawinel Mosiah.

5 Are je waʼ ri u banic che ajilaxic: Jun senine rech kʼän puak, jun seón rech kʼän puak, jun shum re kʼän puak xukujeʼ jun limna rech kʼän puak.

6 Jun senum rech sak puak, jun amnor rech sak puak, jun ezrom rech sak puak y jun onti rech sak puak.

7 Jun senum rech sak puak junam rajil rucʼ jun senine rech kʼän puak, ri e quieb cʼut junam ri cajil rucʼ jun almul re cebada xukujeʼ rucʼ jun almul ri nicʼaj tak u bokʼwäch ijaʼ chic ri cäyaʼic pa ri cʼuja.

8 Cʼu ri rajil jun seon rech kʼän puak cuban quieb rajil che jun senine.

9 Cʼu ri rajil jun shum re kʼän puak cuban quieb rajil che jun seon.

10 Cʼu ri jun limna re kʼän puak junam rucʼ cajil conojel.

11 Cʼu ri jun amnor re sak puak junam rajil rucʼ quieb senumes.

12 Cʼu ri jun ezrom re sak puak junam rajil cajib senumes.

13 Cʼu jun ontí xak junam ri cajil conojel.

14 Are cʼu waʼ ri cajil ri chʼutin tak u wäch qui puak:

15 Jun xiblón pa nicʼaj che jun senum; rumal riʼ, jun xiblón u rajil nicʼaj almul ri cebada;

16 Cʼu ri jun xiblum pa nicʼaj che jun xiblón.

17 Cʼu ri jun léah pa nicʼaj che jun xiblum.

18 Are cʼu waʼ u sucʼ ri cajilanic.

19 Cʼu ri jun antión re kʼän puak junam rucʼ ri rajil oxib xiblón.

20 Are waʼ, ri qui rayibal xak xuwiʼ qui chʼecbal qui rajil, are je quetoj cʼu riʼ rumal xetoj cʼu baʼ jas sucʼ ri qui chac, rumal waʼ xquicoj qui chukʼab che u walajisaxic ri itzel tak noʼj chquixol ri winak. Rech cäpe wi chʼoʼj y ri itzel tak jastak rech cʼo na qui chac, rech cäpe wi sibalaj qui puak je ri u beyal ri cäquichʼoʼjij quib ri quecʼamom lok chquiwäch. Rumal riʼ, xquibano yacbal oyowal chquixol ri winak chquij ri Alma y ri Amulek.

21 Cʼu ri jun Zeezrom ri bim canok, xuchaplej u cʼotic u chiʼ ri Amulek, xubij che: ¿La cabij na waʼ chwe ri jastak ri quintaʼ na chawe? Cʼu ri Zeezrom sibalaj cʼo itzel tak u noʼj rech ri itzel, rech cusach u wäch ri utz. Rumal riʼ, xubij che ri Amulek: ¿La cabij chwe ri jastak ri quintaʼ chawe?

22 Cʼu ri Amulek xubij che: Jeʼ, we cäterenexic ri Uxlabaixel ri Ajawaxel ri cʼo wucʼ in, rumal man cʼo tä quinbij na ri cukʼatij ri Uxlabixel ri Ajawaxel. Cʼu ri Zeezrom xubij che: Chawilampeʼ, wakib onti re sak puak quinyaʼ chawe we cabij chi man cʼo tä jun nimalaj Dios.

23 Amulek xutzelej u bixic: O ri at, ralcʼual ri xibalba, ¿Jasche quinatakchij che mac? ¿La man awetaʼm taj chi ri sucʼalaj tak winak man caquiyaʼ tä quib pa tak takchibal che mac?

24 ¿La cacojo chi man cʼo taj jun Dios? Quinbij chawe: No. Xane ri at kas awetaʼm chi cʼo ri jun Dios, tzare Benak wi a cʼux che ri u chʼequic ri puak chuwäch ri lokʼokʼebal che areʼ.

25 Y wachanim cʼut, a banom tak tzij chwe, chuwäch ri Dios; At xabij chwe, chawilampeʼ, quinyaʼ na chawe, waʼ wakib ontib, are nim rajil waʼ. Are pa awanimaʼ xabij chi man cayaʼ taj, xak xuwiʼ carayij chwij, chi quinbij ri in chi man cʼo tä ri cʼaslic kastzij Dios, xu rech cʼolic jas rucʼ cäsach nu wäch. Xane chawilampeʼ, chacʼama na a tojbal che ri nimalaj itzel a banom.

26 Y Zeezrom xubij che: ¿La cabij at chi cʼo jun cʼaslic kastzij Dios?

27 Xutzelej u bixic cʼut ri Amulek: Jeʼ, cʼo jun cʼaslic kastzij Dios.

28 Y Zeezrom xutaʼ che, ¿la cʼo chic na Dios chuwäch ri jun?

29 Are xutzelej u bixic: Man cʼo taj.

30 Cʼäte riʼ Zeezrom xubij che jun mul chic: ¿Jas u sucʼ at xawetamaj we jastak riʼ?

31 Are xutzelej u bixic: Jun ángel xubij waʼ chwe.

32 Cʼu ri Zeezrom xutaʼ chic jumul: ¿Jachin ri cäpena? ¿La areʼ ri ralcʼual ri Dios?

33 Are cʼut xutzelej u bixic: Jeʼ.

34 Cʼu ri Zeezrom xutaʼ jumul chic: ¿La quebucʼolo na ri u winak pa ri qui mac? Y ri Amulek xutzelej cʼut u bixic, xubij che: Quinbij chawe chi man are taj, rumal man yatal tä che chi cukʼatej u wäch ri u tzij.

35 Cʼäte riʼ Zeezrom xubij chque ri winak: Chichajij iwib, nataj chiwe waʼ jastak, rumal chi areʼ xubij chi xak xuwi jun Dios cʼolic. Pune taj u kʼalajisam chi ri u Cʼojol ri Dios cäpe na, xane man cucʼol tä na ri u winak, je tä xak areʼ cʼo ri u cuinem rech cätakan puwiʼ ri Dios.

36 Cʼu ri Amulek xubij chic jumul che. Chawilampeʼ, a banom tzij, cabij chi xinchʼawic je tä in cʼo na nu cuinem chuwäch ri Dios, rumal xinbij chi man cucʼol tä na u winak pa ri qui mac.

37 Y quinbij chic jumul chawe chi man cäcuin taj quebucʼolo ri winak pa ri qui mac, in cʼut quincuin taj quinkʼatij ri u tzij, areʼ cʼu baʼ xubij chi majun tzʼilalaj winak cärechbej ri rajawibal ri caj. Rumal waʼ, ¿jas u banic quixcolotajic na, we tä quiwechbej na ri rajawibal ri u pa ri caj? Jeʼ u beyal riʼ, man quixcuin taj quixcolotajic pa ri i mac.

38 Cʼäte riʼ Zeezrom xucʼot chic jumul u chiʼ: ¿La areʼ ri u Cʼojol ri Dios ri kastzij junalic Tataxel.

39 Amulek xubij cʼut che: Jeʼ, areʼ ri kas junalic Tataxel jeʼ, cʼu ri caj pa ri uwächulew, cʼu ronojel ri jastak ri cʼo chquiwäch, areʼ ri tiquiritajic y ri qʼuistajic, areʼ ri nabe y ri qʼuisbal.

40 Y cäpe na areʼ cʼut cho ri ulew rech cäresaj qui mac ri u winak, y cucʼam puwiʼ ri qui mac ri quecojon che ri u biʼ. Areʼ tak waʼ ri cäquicʼam na junalic qui cʼaslemal, man cʼo tä jun chic curiko ri colotajibal.

41 Rumal riʼ, ri itzel winak quecanajic jeriʼ we man cʼo tä esabal macaj, xuwi quetzokopitajic che ri ximabal re ri cämical. Chiwilampeʼ cäpe na ri kʼij chi juntir ri quewalajic na chquixol ri cänimakib, y quetaqʼuiʼ na cʼut chuwäch ri Dios rech cukʼat tzij paquiwiʼ che tak ri qui banom.

42 Cʼo baʼ jun cämical ri u biʼ ri cämical re uxlanem. Y ri cämical ri Cristo cutur na ri ximabal rech we cämical re uxlanem rech quewalajic conojel pa waʼ cämical.

43 Ri uxlabal y ri tiojil cäquirik na quib jumul chic pa ri sucʼalaj qui banic, ri u tzʼakatil u tiojil jun y ri u bakilal cätzelej che ri sucʼalaj qui banic cäquirik na quib, je ri ka banic wacamic, cujcʼam bic che ka tacʼabaxic chuwäch ri Dios. Y cäkachʼob na waʼ je jas ri uj cujchʼobonic wacamic, cʼo na jun kʼalajalaj ka chomabal rech conojel ri ka mac.

44 Camic cʼut, waʼ tzelejibal u banic cäpe na paquiwiʼ conojel, ri riʼjab o alabom, ri e cʼo pa qui kʼab ri qui cʼulel che ri patanixic, y ri e tzokopitalic, achijab o ixokib, itzel o sucʼalaj winak man cäsach tä jun wiʼ re ri qui jolom, juntir cʼu waʼ quenucʼutajic pa ri sucʼumalaj qui banic, are je pa ri tiojil, o jas u beyal camic, quecʼam bic, quebetacʼal na chuwäch ri u kʼatbal tzij ri Cristo ri Cʼojolaxel, y ri Dios ri Tataxel, y ri Lokʼalaj Uxlabixel, areʼ e xak jun junalic Dios, rech cäkʼat tzij paquiwiʼ, jas ri qui banom, we utz o man utz taj.

45 Chawilampeʼ, xatinchʼabej chrij ri cämical rech ri tiojil, ri cäcämic, y xukujeʼ chrij ri cʼastajibal rech ri tiojil, ri cäcämic. Quinbij chawe chi waʼ jun tiojil, ri cäcämic, cäwalij na jun tiojil chi man cäcäm taj, waʼ cubij, tzpa ri cämical. Jeʼ, tzpa ri nabe cämical, che ri cʼaslemal rech man cäcäm taj chic jumul. Ri cuxlabal cäquirik na quib cucʼ ri qui tiojil, rech man cäquitas tä quib chic jumul, waʼ jun rikow ib cuqʼuex na rib che junalic y pa ri jastak re ri uxlabal, rech man cätzelej tä chic ri u kʼayinakil.

46 Are cʼu riʼ Amulek u bim canok waʼ tak tzij, ri winak xquichaplej xquimayij quib jumul chic, y Zeezrom xuchaplej xukujeʼ xuchaplej u birbitem. Je cʼu riʼ xqʼuisic ri u chʼabal ri Amulek, o are waʼ juntir ri nu bim.