1 Pea ko ʻeni ko e ngaahi lea ʻeni naʻe malanga ʻaki ʻe ʻAmuleki ki he kakai ʻa ia naʻe ʻi he fonua ko ʻAmonaihaá, ʻo pehē:

2 Ko au ko ʻAmuleki; ko e foha au ʻo Kitiona, ʻa ia ko e foha ʻo ʻIsimeli, ʻa ia ko e hako ʻo ʻAminatai; pea ko ia ʻa e ʻAminatai ko ia ʻa ia naʻá ne lau ʻa e tohi naʻe tuʻu ʻi he holisi ʻo e temipalé, ʻa ia naʻe tohi ʻe he toʻukupu ʻo e ʻOtuá.

3 Pea ko ʻAminataí ko e hako ia ʻo Nīfai, ʻa ia ko e foha ʻo Līhaí, ʻa ia naʻe haʻu mei he fonua ko Selusalemá, ʻa ia ko e hako ʻo Manase, ʻa ia ko e foha ʻo Siosefa, ʻa ia naʻe fakatau ki ʻIsipite ʻe hono ngaahi tokuá.

4 Pea vakai, ko e tangata foki au ʻoku ongoongolelei lahi ʻiate kinautolu kotoa pē ʻoku ʻiloʻi aú; ʻio, pea vakai, ʻoku ʻi ai hoku kāinga tokolahi mo e ngaahi kaumeʻa, pea kuó u maʻu foki ha fuʻu koloa lahi ʻi heʻeku faʻa ngāué.

5 Ka neongo iá, neongo ʻa e ngaahi meʻá ni kotoa, kuo teʻeki ai te u ʻilo lahi ki he ngaahi hala ʻo e ʻEikí, pea mo ʻene ngaahi meʻa liló mo e māfimafi fakaofó. Ne u pehē kuo teʻeki ai te u ʻilo lahi ki he ngaahi meʻá ni; kae vakai, kuó u faihala, he kuó u mamata ki ha ngaahi meʻa lahi ʻo ʻene ngaahi meʻa liló mo hono māfimafi fakaofó; ʻio, ʻi hono fakahaofi foki ʻo e moʻui ʻa e kakaí ni.

6 Ka neongo iá, ne u fakafefeka pē hoku lotó, he naʻe tuʻo lahi hono ui au kae ʻikai te u fie fanongo; ko ia ne u ʻilo ki he ngaahi meʻá ni, ka naʻe ʻikai te u fie ʻilo; ko ia ne u fai atu ʻi he angatuʻu ki he ʻOtuá, ʻi he fai angahala ʻa hoku lotó, ʻio, ʻo aʻu mai ki hono fā ʻo e ʻaho ʻo e māhina hono fitu ko ʻení, ʻa ia ko hono hongofulu ʻo e taʻu ʻo e pule ʻa e kau fakamāú.

7 Lolotonga haʻaku fononga ke ʻaʻahi ki ha kāinga ofi ʻaupito, ʻiloange naʻe hā mai kiate au ha ʻāngelo ʻa e ʻEikí, ʻo pehē: ʻE ʻAmuleki, foki atu ki ho fale, he te ke fafanga ha palōfita ʻa e ʻEikí, ʻio, ko ha tangata māʻoniʻoni, ʻa ia ko ha tangata kuo fili ʻe he ʻOtuá; he kuó ne ʻaukai ʻi he ngaahi ʻaho lahi koeʻuhi ko e angahala ʻa e kakai ní, pea ʻokú ne fiekaia, pea ke ke tali ia ʻi ho falé mo fafanga ia, pea te ne tāpuakiʻi koe mo ho falé; pea ʻe nofo ʻa e tāpuaki ʻa e ʻEikí ʻiate koe mo ho falé.

8 Pea naʻe hoko ʻo pehē ne u talangofua ki he leʻo ʻo e ʻāngeló, peá u liu mai ki hoku falé. Pea lolotonga ʻeku foki ki aí ne u feʻiloaki mo e tangata ʻa ia naʻe fakahā mai kiate au ʻe he ʻāngeló: Ke ke tali ia ʻi ho falé—pea vakai ko ia ia ʻa e tangata kuo lea kiate kimoutolu ʻo kau ki he ngaahi meʻa ʻa e ʻOtuá.

9 Pea naʻe pehē mai ʻe he ʻāngeló kiate au ko ha tangata māʻoniʻoni ia; ko ia ʻoku ou ʻiloʻi ai ko ha tangata māʻoniʻoni ia, he naʻe lea ʻaki ia ʻe ha ʻāngelo ʻa e ʻOtuá.

10 Pea ko e tahá, ʻoku ou ʻiloʻi foki ʻoku moʻoni ʻa e ngaahi meʻa kuó ne fakamoʻoni ki aí; he vakai ʻoku ou pehē kiate kimoutolu, ʻoku hangē ʻoku moʻui ʻa e ʻEikí, pehē kuó ne fekau mai haʻane ʻāngelo ke fakahā mai ʻa e ngaahi meʻá ni kiate au; pea kuó ne fai ʻeni lolotonga ʻa e nofo ʻa e ʻAlamā ko ʻení ʻi hoku falé.

11 He vakai, kuó ne tāpuakiʻi hoku falé, kuó ne tāpuakiʻi au, mo ʻeku kau fefiné, mo ʻeku fānaú, mo ʻeku tamaí pea mo hoku kāingá; ʻio, naʻa mo hoku kāinga kotoa pē kuó ne tāpuakiʻi, pea kuo nofo ʻiate kimautolu ʻa e tāpuaki ʻa e ʻEikí ʻo fakatatau mo e ngaahi lea kuó ne lea ʻakí.

12 Pea ko ʻeni, hili ʻa e lea ʻaki ʻe ʻAmuleki ʻa e ngaahi lea ní naʻe kamata ke ʻohovale ʻa e kakaí, ko e meʻa ʻi he ʻi ai ha fakamoʻoni ʻoku tokolahi hake ʻi ha toko taha pē ʻoku fakamoʻoni ki he ngaahi meʻa kuo talatalaakiʻi ai ʻa kinautolú, kae ʻumaʻā foki mo e ngaahi meʻa ʻe hoko, ʻo fakatatau ki he laumālie ʻo e kikite naʻe ʻiate kinauá.

13 Ka neongo iá, naʻe ʻi ai hanau niʻihi ʻa ia naʻe toka ʻi honau lotó ke fakafehuʻi ʻa kinaua, koeʻuhí ke nau tauheleʻi nai ʻa kinaua ʻi heʻena ngaahi leá tuʻunga ʻi heʻenau ngaahi lea kākā fakaolooló, koeʻuhi ke nau ʻiloʻi ha fakamoʻoni ke talatalaakiʻi ʻaki ʻa kinaua, koeʻuhi ke nau lava ʻo tukuange ʻa kinaua ki heʻenau kau fakamāú ke fakamāuʻi ʻa kinaua ʻo fakatatau ki he fonó, pea ke lava ai ʻo tāmateʻi pe lī ʻa kinaua ki he fale fakapōpulá, ʻo fakatatau mo e hia te nau lava ʻo fakamoʻoniʻi kuó na faí.

14 Pea ko e kau tangata naʻe feinga ke tāmateʻi ʻa kinauá, ko e kau taukapo ʻa ia naʻe nō pe fili ʻe he kakaí ke fakafofongaʻi ʻa e fono ʻi he lolotonga fai ʻa e ngaahi hopo ʻo e ngaahi hia ʻa e kakai ʻi he ʻao ʻo e kau fakamāú.

15 Naʻe poto foki ʻa e kau taukapo ko ʻení ʻi he ngaahi faiva kātoa mo e olopoto ʻo e kakaí; pea naʻe pehē ia koeʻuhi ke nau lava ai ʻo poto taukei ʻi heʻenau ngāué.

16 Pea naʻe hoko ʻo pehē naʻe kamata ke nau fakafehuʻi ʻa ʻAmuleki, koeʻuhi ke nau lava ai ʻo ngaohi ia ke ne fakahalaʻi ʻa ʻene ngaahi leá, pe fakakikihiʻi ʻa e ngaahi lea te ne lea ʻakí.

17 Pea ko ʻeni naʻe ʻikai te nau ʻilo ʻoku lava ʻe ʻAmuleki ʻo ʻilo ki heʻenau ngaahi fakakaukaú. Ka naʻe hoko ʻo pehē ʻi heʻenau kamata ke fakafehuʻi iá, naʻá ne ʻiloʻi ʻenau ngaahi fakakaukaú, ʻo ne pehē kiate kinautolu: ʻA kimoutolu ʻa e toʻu tangata angakovi mo paongataʻa, ʻa kimoutolu ʻa e kau taukapo mo e kau mālualoi, he ʻoku mou fai ʻa e ngaahi ngāue ʻa e tēvoló; he ʻoku mou fokotuʻu ha ngaahi tauhele mo ha ngaahi hele ke ʻefihia ai ʻa e kau māʻoniʻoni ʻa e ʻOtuá.

18 ʻOku mou fokotuʻu ha ngaahi fakakaukau ke fakakoviʻi ʻaki ʻa e ngaahi ngāue ʻa e kau māʻoniʻoní, pea fakatupu ha tō mai ʻa e houhau ʻo e ʻOtuá kiate kimoutolu, ʻo aʻu ki he fakaʻauha kotoa ʻo e kakaí ni.

19 ʻIo, ʻikai naʻe totonu ʻa e folofola ʻa Mōsaia ko hotau tuʻi fakamuimuí, ʻi heʻene teu tukuange ʻa e puleʻangá, ʻi he ʻikai haʻane tokotaha ke tuku ia ki ai, ʻo ne tuʻutuʻuni ke puleʻi ʻa e kakaí ni ʻi honau loto ʻonautolú—ʻio, naʻá ne folofola ka ʻiloange kuo hokosia ʻa e taimi ʻe fili ʻe he loto ʻo e kakaí ni ʻa e angahalá, ʻa ia ko e pehē, kapau ʻe hokosia ʻa e taimi ʻe hinga ʻa e kakaí ni ki he maumau-fonó, kuo nau taau ai mo e fakaʻauhá.

20 Pea ʻoku ou pehē foki kiate kimoutolu, ʻoku ai ha ʻuhinga lelei ki hono fakamāuʻi ʻe he ʻEikí ʻa hoʻomou ngaahi angahalá; ʻoku ngali tonu ʻene folofola ki he kakaí ni, ʻi he leʻo ʻo ʻene kau ʻāngeló: mou fakatomala, fakatomala, he ʻoku ofi ke hoko mai ʻa e puleʻanga ʻo e langí.

21 ʻIo, ʻoku ʻuhinga lelei ʻene folofola, ʻi he leʻo ʻo ʻene kau ʻāngeló ʻo pehē: Te u ʻaʻahi ki hoku kakaí ʻaki ʻa e faitotonu mo e fakamaau totonu ʻi hoku nimá.

22 ʻIo, pea ʻoku ou pehē kiate kimoutolu ka ne taʻeʻoua ʻa e ngaahi lotu ʻa e kau māʻoniʻoni ʻoku lolotonga ʻi he fonuá, ʻe tauteaʻi leva ʻa kimoutolu ʻaki ʻa e fakaʻauha ʻaupito; ka ʻe ʻikai hoko ia ʻi he lōmaki, ʻo hangē ko ia naʻe hoko ki he kakaí ʻi he ngaahi ʻaho ʻo Noá, ka ʻe hoko ia ʻi he honge, mo e mahaki fakaʻauha, pea mo e tau.

23 Ka ko e meʻa ʻi he ngaahi lotu ʻa e kau māʻoniʻoní ʻoku fakamoʻui ai ʻa kimoutolú; ko ia ai, kapau te mou kapusi ki tuʻa ʻa e kau māʻoniʻoní meiate kimoutolu, ʻe ʻikai taʻofi ʻe he ʻEikí ʻa hono toʻukupú; ka te ne hāʻele mai ʻi hono houhau kakahá kiate kimoutolu; pea ʻe toki teʻia ʻaki ʻa kimoutolu ʻa e honge, mo e mahaki fakaʻauha, pea mo e tau; pea ʻoku vave mai ʻa e taimí ʻo kapau ʻe ʻikai te mou fakatomala.

24 Pea ko ʻeni naʻe hoko ʻo pehē naʻe ʻita ʻo lahi ange ʻa e kakaí kia ʻAmuleki, ʻo nau kaila ʻo pehē: ʻOku lauʻikoviʻi ʻe he tangatá ni ʻa ʻetau ngaahi fono ʻa ia ʻoku totonú, pea mo ʻetau kau taukapo poto kuo tau filí.

25 Ka naʻe mafao atu ʻe ʻAmuleki ʻa hono nimá, ʻo kalanga ʻo mālohi ange kiate kinautolu, ʻo pehē: ʻA kimoutolu ʻa e toʻu tangata angakovi mo paongataʻa, ko e hā kuo maʻu ai ʻe Sētane ha mālohi lahi pehē ʻi homou lotó? Ko e hā ka mou ka fakavaivaiʻi ai ʻa kimoutolu kiate ia ke ne maʻu ai ha mālohi kiate kimoutolu, ke fakakuihi homou matá, koeʻuhi ke ʻoua naʻa mahino kiate kimoutolu ʻa e ngaahi lea ʻoku faí, ʻo fakatatau ki honau moʻoní?

26 Pea vakai, kuó u fakamoʻoni kovi koā ki hoʻomou fonó? ʻOku ʻikai mahino kiate kimoutolu; ʻoku mou pehē kuó u lauʻikovi ʻa hoʻomou fonó; ka kuo ʻikai, ka kuó u lea ʻo poupou ki hoʻomou fonó ʻo fakahā ai kiate kimoutolu ʻene fakahalaiaʻi ʻa kimoutolú.

27 Pea ko ʻeni vakai, ʻoku ou pehē kiate kimoutolu, kuo ʻosi fai ʻa e teuteu ki hono fakaʻauha ʻo e kakai ní ʻi he taʻe-māʻoniʻoni ʻa homou kau taukapó pea mo homou kau fakamāú.

28 Pea ko ʻeni naʻe hoko ʻo pehē ʻi he ʻosi lea ʻaki ʻe ʻAmuleki ʻa e ngaahi lea ko ʻení, naʻe lauʻikovi ia ʻe he kakaí, ʻo nau pehē: Ko ʻeni ʻoku tau ʻiloʻi ko e fānau ʻa e tēvolo ʻa e tangatá ni, he kuó ne loi kiate kitautolu; koeʻuhi he kuó ne lauʻikovi ʻetau fonó. Pea ko ʻeni ʻokú ne pehē kuo ʻikai ke ne lauʻikoviʻi ia.

29 Pea ko e tahá, kuó ne lauʻikoviʻi ʻetau kau taukapó pea mo ʻetau kau fakamāú.

30 Pea naʻe hoko ʻo pehē naʻe fakapapau ʻe he loto ʻo e kau taukapó te nau manatuʻi ʻa e ngaahi meʻá ni ko hono talatalaakiʻi.

31 Pea naʻe ʻi ai hanau tokotaha ko Sisolome hono hingoá. Ko e taki foki ia ʻi hono talatalaakiʻi ʻo ʻAmuleki mo ʻAlamaá, he ko ha taha ia ʻi honau kau poto tahá, he naʻe lahi ʻene ngāue ne maʻu mei he kakaí.

32 Pea ko e holi ʻa e kau taukapó ni ke maʻu ʻa e totongi; pea naʻa nau maʻu ʻa e totongi ʻo fakatatau ki heʻenau ngāué.