Scriptures
3 Nephi 8


Kapitulo 8

Manga bagyo, manga linog, manga sulo manga buhawi, asin manga pagbabago kan daga nagpapatunay sa pagpako ki Cristo—Kadakol na tawo an napara—Natahoban an daga nin kadikloman sa laog nin tulong aldaw—Idtong manga natada nagtangis sa saindang inabotan. Manga A.D. 33–34.

1 Asin ngonian ta uminagi an panahon na sunod sa samuyang kasuratan, asin ta samuyang aram na an samuyang kasuratan totoo, huli totoo, na sarong matanos na tawo an nagsurat kan kasuratan—huli ta siya naggibo nin kadakol na manga milagro sa pangaran ni Jesus; asin daing ibang tawo na makagibo nin milagro sa pangaran ni Jesus kun dai pa siya nalinigan sa lambang sadit na bagay kan gabos niyang kasumbikalan—

2 Asin ngonian uminagi an panahon, na kun dai nasala an tawong ini sa pagbilang kan samuyang panahon, an ika-tulong pulo may tulong taon nakaagi na;

3 Asin an manga tawo nagpoon na maghanap nin maigot sa manga tanda na itinao kan propetang si Samuel, an Lamanite, iyo, sa panahon na magkakaigwa nin pagdiklom sa laog nin tulong aldaw sa ibabaw kan daga.

4 Asin nagkaigwa nin dakulang manga pagduwa-duwa asin manga pagpasuruhay-suhay an manga tawo, maski na kadakol nang manga tanda an itinao.

5 Asin ta uminagi an panahon na kan ika-tulong pulo may apat na taon, sa enot na bulan, sa ika-apat na aldaw kan bulan, igwang uminabot na makusog na bagyo, siring sa dai pa lamang naaraman sa bilog na daga.

6 Asin nagkaigwa man nin makusog asin makuring bagyo; asin nagkaigwa man nin makatatakot na daguldol, sagkod na nayugyog an bilog na kinaban na garo na magkabaranga idto.

7 Asin igwa nin makatatakot na manga kikilat, siring sa dai pa naaraman sa bilog na daga.

8 Asin an siudad kan Zarahemla nasulo.

9 Asin an siudad kan Moroni luminubog sa kairaroman kan dagat, asin an manga nag-eerok duman nagkaralamos.

10 Asin an daga nadara paitaas sa siudad kan Moronihah, na sa namumugtakan kan siudad nagkaigwa nin dakulang bulod.

11 Asin nagkaigwa nin dakula asin makuring pagkararaot sa daga pasiring sa sur.

12 Alagad totoo, na orog pa kadakol asin makuring pagkararaot sa daga pasiring sa norte; huli ta an bilog na daga naliwat, huli sa bagyo asin sa manga buhawi, asin sa manga daguldol, asin manga kikilat, asin sa labi kakusog na paglinog sa bilog na kinaban;

13 Asin an manga lansangan nagkawarasak, asin an manga pantay na manga agihan nagkaturupag, asin kadakol na manga malinig na lugar an naging burubunton.

14 Asin kadakol na darakula asin bantog na manga siudad an nagkarulubog, asin kadakol an nagkasurulo, asin kadakol na nagkaruyugyog na sagkod an manga kaharongan duman nagkagaraba, asin an manga nag-eerok duman nagkagaradan, asin an lugar nabayaan na dai na nin manga tawo asin manga harong.

15 Asin igwang manga siudad na nagkatarada; alagad an pagkaraot kaidto labi kadakula, asin dakol duman an nagkagaradan.

16 Asin igwa sa sainda na nadara kan buhawi; asin kun sain sinda napaduman daing tawo na nakakaaram, basta aram ninda na sinda dinara paharayo.

17 Asin siring an ibabaw kan kinaban naraot, huli sa manga bagyo, asin sa manga daguldol, asin sa manga kikilat, asin sa pagyugyog kan kinaban.

18 Asin totoo, an manga bato nagkabaranga; an manga idto nagkabaraak sa ibabaw kan bilog na kinaban, sagkod na an manga idto magkahiriling na rurunot, asin baratak, sa ibabaw kan gabos na daga.

19 Asin ta uminagi an panahon na kan an manga pagdaguldol, asin an manga pagkikilat, asin an bagyo, asin an baha, asin an manga paglinog kan kinaban nag-ontok—huli totoo, an manga idto nangyari sa laog nin tulong oras; asin sinabi kan iba na halawig pa kaini; alagad, an gabos na darakula asin makuring manga bagay na ini nagibo sa laog nin tulong oras—asin totoo, na igwa nin pagdiklom sa ibabaw kan daga.

20 Asin ta uminagi an panahon na igwang mahibog na kadikloman sa ibabaw kan daga, sagkod na an manga tawo duman na dai nagkagaradan namatean an dampog nin kadikloman.

21 Asin ta dai nagkaigwa nin liwanag, huli sa kadikloman, ni manga kandila, ni manga karaba; ni dai makapagmakot nin kalayo sa paagi kan mararahay asin labi kaalang na manga kahoy, kaya dai nanggad nagkaigwa nin liwanag;

22 Asin ta daing liwanag, na nahiling ni kalayo, ni aniag, ni an aldaw, ni an bulan, ni an manga bitoon, huli ta labi an pagkahibog kan dampog nin kadikloman na nasa ibabaw kan daga.

23 Asin ta uminagi an panahon na uminabot sa laog nin tulong aldaw na daing liwanag na mahihiling; asin ta padagos na nagkaigwa nin labi-labing pagmundo asin pag-agrangay asin pagtangis sa gabos na manga tawo; iyo, dakula an pagsakit kan manga tawo, huli sa pagdiklom asin sa dakula na pagkarumpag na nangyari sa sainda.

24 Asin sa sarong lugar nadadangog sinda na nagkukurahaw, na an sabi: O kutana nagsorolsol na kita bago kan dakula asin makuring aldaw na ini, asin an satuyang manga katugangan nakaligtas kutana, asin dai kutana sinda nasulo sa dakulang siudad kan Zarahemla.

25 Asin sa ibang lugar nadangog sinda na nagkukurahaw asin nagmumurundo, na an sabi: O kutana nagsorolsol na kita bago kan dakula asin makuring aldaw na ini, asin dai ginadan asin ginarapo an manga propeta, asin pinahali sinda, saka kutana an satuyang manga ina asin an satuyang magagayon na manga aking babae, asin an satuyang manga kaakian nakaligtas, asin dai kutana natahoban duman sa dakulang siudad kan Moronihah. Asin siring an manga inagrangay kan manga tawo dakula asin makuri.