Scriptures
3 Nephi 16


Kapitulo 16

Si Jesus madalaw sa ibang nawara na manga karnero kan Israel—Sa huring manga aldaw an ebanghelio mapapaduman sa manga Gentil asin dangan sa harong kan Israel—An manga tawo kan Kagurangnan magkakauruyon asin magkakasararo sa pagbalik niya giraray kan Zion. Manga A.D. 34.

1 Asin totoo, totoo, sakuyang sinasabi sa saindo na ako igwang ibang karnero, na dai digdi sa daga na ini, ni sa daga kan Jerusalem, ni sa arin man na kabtang kan daga sa palibot na kun sain ako hali sa paglingkod.

2 Huli ta sinda na sakuyang sinasabi, iyo sinda na dai pa nakadangog kan sakuyang tingog; ni sa arin man na panahon ako nagpahiling na sa sainda.

3 Alagad ako nakakua nin katugonan hali sa Ama na ako magduman sa sainda, asin tanganing sinda makadangog kan sakuyang tingog, asin ta sinda mabilang na kairiba kan sakuyang karnero, na tanganing magkaigwa nin sarong pag-iriba asin sarong pastor; kaya ako mapahiling kan sakuyang sadiri sa sainda.

4 Asin sakuyang pinagbobotan kamo na isurat an manga tataramon na ini pagkatapos na ako dai na, na kun mangyari na an sakuyang manga tawo sa Jerusalem, sinda na nakahiling sakuya asin nakaibahan ko sa sakuyang paglingkod, dai naghahagad sa Ama sa sakuyang pangaran, na sinda makakua man nin kaaraman manunungod sa saindo sa paagi kan Espiritu Santo, asin man kaidtong ibang manga tribo na dai ninda aram, tanganing ining manga tataramon na saindong isusurat maingatan asin maipahiling sa manga Gentil, na sa paagi kan kabilogan kan manga Gentil, an natada kan saindang manga bunga, na iwawaragas sa ibabaw kan daga huli sa saindang dai pagtubod, tibaad magkabiriyo, o tibaad madara sa pagkaaram sa sakuya, na saindang Paratubos.

5 Asin dangan ko sinda titiripunon maghali sa apat na kabtang kan kinaban; asin dangan ko uutobon an tipan na ginibo kan Ama sa gabos na tawo kan harong kan Israel.

6 Asin paladan an manga Gentil, huli sa saindang pagtubod sa sakuya, sa asin sa paagi kan Espiritu Santo, na nagpapatotoo sakuya asin kan Ama sa sainda.

7 Totoo, huli sa saindang pagtubod sa sakuya, sabi kan Ama, asin huli sa dai pagtubod nindo, O, harong kan Israel, sa huring aldaw an katotoohan maabot sa manga Gentil, na an kabilogan kan manga bagay na ini maipapaaram sa sainda.

8 Alagad herak man, sabi kan Ama, sa dai nagtutubod na manga Gentil—huli ta maski sinda uminabot sa ibabaw kan daga na ini, asin iwinaragas an sakuyang manga tawo na nasa harong kan Israel; asin an sakuyang manga tawo na nasa harong kan Israel na pinahali sa sainda, asin saindang tinurungtongan kan saindang manga bitis;

9 Asin huli sa pagkaherak kan Ama sa manga Gentil, asin man an manga paghukom kan Ama sa sakuyang manga tawo na manga nasa harong kan Israel, totoo, totoo, sakuyang sinasabi sa saindo, na pagkatapos kan gabos na ini, asin sakuyang itinugot na an sakuyang manga tawo na nasa harong kan Israel na pasakitan, asin papagtioson, asin garadanon, asin paharalion sa sainda, asin ikaungis ninda, asin pagbasang-basangon asin pagrilibakon sa katiripunan ninda—

10 Asin sa siring nagboot an Ama na sakuyang sabihon sa saindo: Sa aldaw na idto na an manga Gentil magkasala tumang sa sakuyang ebanghelio, asin sayumahan an kabilogan kan sakuyang ebanghelio, asin madara sa kapaabaw-abawan kan saindang manga puso sa ibabaw kan gabos na manga nasion, asin sa ibabaw kan gabos na manga tawo sa bilog na kinaban, asin mapano nin gabos na paagi nin pagputik, asin kan manga pagdaya, asin kan manga pagpasaway, asin gabos na paagi nin manga pagsagin-sagin, asin manga panggagadan, asin manga bakong tunay na pagkapadi, asin manga karaksotan, asin manga hilom na karumpotan, asin ta kun gigibohon ninda an gabos na manga bagay na idto, asin sasayumahan an kabilogan kan sakuyang ebanghelio, magdangog, sabi kan Ama, sakuyang dadarahon an kabilogan kan sakuyang ebanghelio na pahali sa sainda.

11 Asin dangan sakuyang marurumdoman an sakuyang pakipagtipan na ginibo sa sakuyang manga tawo, O harong kan Israel, asin sakuyang dadarahon an sakuyang ebanghelio sa sainda.

12 Asin sakuyang ipapahiling sa saimo, O harong kan Israel, na an manga Gentil dai magkakaigwa nin kapangyarihan sa saindo; alagad sakuyang rurumdomon an pakipagtipan ko sa saindo, O harong kan Israel, asin kamo maabot sa kaaraman kan kabilogan kan sakuyang ebanghelio.

13 Alagad kun an manga Gentil magsorolsol asin magbaralik sa sakuya, sabi kan Ama, totoo sinda mabibilang sa sakuyang manga tawo, O harong kan Israel.

14 Asin dai ko matitios na an sakuyang manga tawo, na nasa harong kan Israel, na makairiba sinda asin pagkurihan sinda, sabi kan Ama.

15 Alagad kun sinda dai magbaralik sa sakuya, asin magdarangog kan sakuyang tingog, sakuyang titioson sinda, iyo, sakuyang titioson an sakuyang manga tawo, O harong kan Israel na makairiba sinda, asin pagkurihan sinda, asin magigi sindang siring sa asin na nawaraan nin namit, na poon ngonian dai na nin kamugtakan alagad iapon na sana, asin turungtongan kan manga bitis kan sakuyang manga tawo, O harong kan Israel.

16 Totoo, totoo, sakuyang sinasabi sa saindo, siring an ipinagboot kan Ama sa sakuya—na sakuyang itao sa manga tawong ini an dagang ini para sa saindang panunod.

17 Asin dangan an manga tataramon kan propetang si Isaias mauutob, na an sabi:

18 An saindong manga bantay iiritaas an tingog; sarabay an tingog sinda makaranta, huli ta magkakauruyon asin magkakasararo sinda sa pagbalik giraray kan Kagurangnan kan Zion.

19 Mag-orogma kamo, magsarabay sa pagkaranta, kamo na nagkururumpag na manga lugar kan Jerusalem; huli ta an Kagurangnan rinanga an saiyang manga tawo, saiyang tinubos an Jerusalem.

20 Ipinahiling kan Kagurangnan an saiyang banal na kapangyarihan sa manga mata kan gabos na manga nasion; asin an gabos na manga kasagkuran kan kinaban makakahiling kan kaligtasan kan Dios.