1 Totoo, totoo, sakuyang sinsasabi na boot ko na kamo maglimos sa manga dukha; alagad na mag-ingat na kamo dai maglimos sa atubangan nin manga tawo sa pagpahiling sa sainda; kun bako, kamo daing balos sa saindong Ama na nasa langit.

2 Kaya kun kamo magririlimos dai magpataranog nin trumpeta sa saindong enotan, siring sa manga parasagin-sagin na naggigiribo kaiyan sa manga sinagoga asin sa manga lansangan, tanganing oromawon nin manga tawo. Totoo sakuyang sinasabi sa saindo, igwa na sinda kan saindang balos.

3 Alagad kun kamo nagririlimos dai na pagpaisihon an saindong walang kamot kan ginigibo kan too nindong kamot.

4 Tanganing an saindong paglimos mahilom; asin an saindong Ama na nakakahiling sa hilom, siya mabalos saindo nin hayag.

5 Asin kun kamo namimiribi dai kamo mag-arog sa manga parasagin-sagin, huli ta sinda boot magpamibi na nagtitirindog sa manga sinagoga asin sa manga likoan nin manga lansangan, tanganing mahiling nin manga tawo. Totoo sakuyang sinasabi sa saindo, igwa na sinda kan saindang balos.

6 Alagad kamo, kun magpamibi, lumaog sa saindong kuwarto, asin kun napintoan na nindo an saindong pintoan, magpamibi ka sa saindong Ama na nasa hilom; asin an saindong Ama, na nakakahiling sa hilom, mabalos saindo nin hayag.

7 Alagad kun kamo namimibi, dai kamo maggaramit nin basang na paulit-ulit na siring kan ginigiribo kan manga Gentil, huli ta sinda nag-iirisip na sinda hihinanyogon huli sa kadakolan kan saindang tataramon.

8 Kaya kamo dai mag-arog sa sainda; huli ta an saindong Ama nakakaisi na kan saindong manga pangangaipo, bago an manga iyan hagadon nindo saiya.

9 Kaya sa siring na paagi kamo magpamiribi: Ama niamo na yaon ka sa langit, kapabanalon an pangaran mo.

10 Magibo lugod an saimong boot digdi sa daga nin siring sa langit.

11 Asin patawadon mo kami kan samuyang manga kasalan, siring sa pagpatawad niamo sa manga nagkasala samuya.

12 Asin hari kami pagpabayai na madara nin sugot alagad agawon mo kami sa maraot.

13 Huli ta saimo an kahadean, asin an kapangyarihan, asin an kamurawayan, sagkod pa man. Amen.

14 Huli ta kun kamo magpatawad sa manga tawo kan saindang kalapasan saindo an saindong langitnon na Ama patatawadon man kamo;

15 Alagad kun kamo dai magpatawad sa manga tawo kan saindang kalapasan sa saindo dai man kamo patatawadon kan saindong kalapasan kan saindong Ama.

16 Asin man kun kamo mag-aarayuno dai kamo mag-arog kan manga parasagin-sagin, na manga murusdot, huli ta pinararaot ninda an saindang manga lalawgon, tanganing mahiling sinda kan manga tawo na sinda nag-aarayuno. Totoo sakuyang sinasabi sa saindo, igwa na sinda kan saindang balos.

17 Alagad kamo, kun nag-aayuno, lahidan nindo an saindong payo asin hugasan nindo an saindong lalawgon;

18 Tanganing dai mahiling kan manga tawo na kamo nag-aayuno, alagad kan saindong Ama na nasa hilom; asin an saindong Ama na nakakahiling sa hilom, mabalos saindo nin hayag.

19 Dai kamo magtiripon para sa saindo nin manga kayamanan sa kinaban, kun sain an bukbok asin an takla nakakaraot, asin kun sain an manga mahabon minasakat asin minahabon;

20 Alagad magtiripon para sa saindo nin manga kayamanan sa langit, kun sain duman an bukbok ni an takla dai makakaraot, asin an manga mahabon dai makakasakat ni makahabon.

21 Huli ta kun sain an saindong kayamanan yaon man an saindong puso.

22 An ilaw kan hawak iyo an mata; kaya kun an saimong panghiling sa Dios sana, an bilog mong hawak mapapano nin liwanag.

23 Alagad, kun an saimong mata maraot, an bilog mong hawak mapapano nin kadikloman. Kun, kaya, an ilaw na nasa saimo iyo an kadikloman, gurano kadakula an kadikloman na iyan!

24 Daing tawo na makakapaglingkod sa duwang kagurangnan; huli ta siya mauungis sa saro asin mamomoot sa ika-duwa, o kaya siya madayupot sa saro asin isisikwal an ika-duwa. Kamo dai makapagririlingkod sa Dios asin sa kayamanan.

25 Asin ngonian uminagi an panahon na kan si Jesus makatapos na magtaram kan manga tataramon na ini saiyang hiniling an dose na saiyang pinili, asin nagsabi sa sainda: Rumdomon an manga tataramon na sakuyang sinabi. Huli totoo, kamo an sakuyang pinili na maglingkod sa manga tawong ini. Kaya sakuyang sinasabi sa saindo, dai mahadit kan saindong buhay, kun ano an saindong kakarakanon, o kun ano an saindong iirinomon; ni dapit man kan saindong hawak o kun ano an saindong isusurulot. Bako an buhay orog pa ki sa kakanon, asin an hawak ki sa gubing?

26 Masdan an manga gamgam sa kaitaasan, na sinda dai nagsasarabwag, ni nag-aarani, ni nagtitiripon sa manga tambobong; alagad an saindong langitnon na Ama pinapakakan sinda. Bako kamo orog pa ki sa sainda?

27 Siisay sa saindo, na sa paghadit, makakadagdag nin sarong sukol sa saiyang langkaw?

28 Asin tadaw ta maghaharadit kamo sa saindong isusurulot? Isipon nindo an manga lirio sa uma kun paano sinda nagtatalubo; sinda dai nagpapagal ni naghahabol;

29 Asin alagad sakuyang sinasabi sa saindo, na maski si Solomon sa bilog niyang kamurawayan, dai pa nagubingan nin siring sa saro kan manga ini.

30 Kaya kun ginugubingan kan Dios nin siring an duot sa uma na ngonian buhay asin sa aga isusugba sa horno, kamo pa daw an dai niya paggubingan nin orog, kun kamo bakong diit an pagtubod.

31 Kaya dai mahadit, na masabi, ano an samuyang kakarakanon? o ano an samuyang iirinomon? o ano an samuyang gugurubingon?

32 Huli ta an saindong langitnon na Ama naaaraman na kaipuhan nindo an gabos na manga bagay na ini.

33 Alagad haranapa nguna nindo an kahadean kan Dios asin an saiyang katanusan, asin an gabos na manga bagay na ini idadagdag na sana sa saindo.

34 Kaya dai mahadit dapit kan sa aga, huli ta an sa aga mag-iisip man kan manga bagay na para sa aga. Tama na an aldaw na iyan para sa karaotan kaiyan.