Kapitulo 25
Sa Ika-duwang Pag-abot, an mapaharo-halangkawon asin an masumbikal susuloon na siring sa dagami—Si Elias mabalik bago an dakula asin makangurungirhat na aldaw—Iarog sa Malaquias 4. Manga A.D. 34.
1 Huli ta totoo, an aldaw magdadangadang na mag-iinit na siring sa hurno; asin an gabos na mapaharo-haralangkawon, iyo, asin an gabos na naggigibo nin kasumbikalan, magiging dagami; asin an aldaw na maabot susuloon sinda, sabi kan Kagurangnan nin manga Hukbo, na dai sinda tatadaan nin gamot ni sanga.
2 Alagad sa saindong nagkakatarakot sa sakuyang pangaran, an Aki nin Katanusan mabangon na igwang kaomayan sa saiyang manga pakpak; asin kamo maruluwas asin mataralubo na siring sa manga bakang ugbon sa sabsaban.
3 Asin saindong babatuyan an manga masusumbikal; huli ta sinda magiging abo sa irarom kan manga rapandapan kan saindong manga bitis sa aldaw na sakuyang gigibohon ini, sabi kan Kagurangnan nin manga Hukbo.
4 Rumdomon nindo an katugonan ni Moises, na sakuyang surogoon, na sakuyang itinugon sa saiya sa Horeb para sa gabos na Israel, kan manga ipapakuyog asin manga hatol.
5 Uya, sakuyang ipapadara sa saindo si Elias an propeta bago kan pag-abot kan dakula asin makangurungirhat na aldaw kan Kagurangnan;
6 Asin saiyang bibirikon an puso kan manga magurang pasiring sa manga aki, asin an puso kan manga aki pasiring sa manga magurang, ta tibaad ako umabot asin hampakon an daga nin sarong sumpa.