1 Asin ngonian ta uminagi an panahon na kan si Jesus makatapos na kan manga pagtaram na ini saiyang itiningkalag an saiyang manga mata sa palibot kan katiripunan, asin nagsabi sa sainda: Totoo na nadangog nindo an manga bagay na sakuyang itinukdo bago ako nagpaitaas sa sakuyang Ama; kaya, an siisay man na makarumdom kan sakuyang manga tataramon na ini asin ginibo an manga ini, siya sakuyang ibabangon sa huring aldaw.

2 Asin ta uminagi an panahon na kan si Jesus makapagtaram na kan manga tataramon na ini saiyang nariparo na igwang nagkapira sa sainda na napangalas, asin naghapot kun ano an saiyang gigibohon manunungod kan katugonan ni Moises; huli ta dai ninda nasabutan an sasabihon na an daan na manga bagay napara na, asin ta an gabos na bagay naging bago.

3 Asin ta siya nagsabi sa sainda: Dai kamo magngalas na sakuyang sinabi sa saindo na an daan na manga bagay napara na, asin na an gabos na manga bagay nagi nang bago.

4 Totoo, sakuyang sinasabi sa saindo na an susundon na itinao ki Moises nautob na.

5 Totoo, ako iyo an nagtao kan susundon, asin ako idtong nakipagtipan sa sakuyang manga tawo na Israel; kaya, an susundon na nasa sakuya nautob na, huli ta nagpadigdi ako tanganing mag-utob kan susundon; kaya idto natapos na.

6 Totoo, ako dai nagraot kan manga propeta, huli ta kun gurano pa kadakol an dai pa nautob sa sakuya, totoo sakuyang sinasabi sa saindo iyan gabos mauutob.

7 Asin huli ta sakuyang sinabi sa saindo na an daan na manga bagay napara na, dai ko rinaraot an manga sinabi na manungod kan manga bagay na maabot pa.

8 Huli ta totoo, an tipan na sakuyang ginibo sa sakuyang manga tawo dai pa gabos nauutob; alagad an susundon na itinao ki Moises natapos na sakuya.

9 Totoo, ako an susundon, asin an liwanag. Maghiling sakuya asin magtagal sagkod sa katapusan, asin ika mabubuhay; huli ta sa saiya na makakatagal sagkod sa katapusan sakuyang itatao an buhay na daing-kasagkuran.

10 Totoo, sakuyang itinao na saindo an manga katugonan; kaya sunodon an sakuyang manga katugonan. Asin iyo ini an susundon asin an manga propeta, huli ta sinda tunay na nagpatotoo sa sakuya.

11 Asin ngonian ta uminagi an panahon na kan makapagtaram na si Jesus kan manga tataramon na ini, siya nagsabi sa dose na saiyang pinili:

12 Kamo an sakuyang manga disipulos; asin kamo an ilaw sa manga tawong ini, na manga natada kan gikan sa harong ni Jose.

13 Asin totoo, iyo ini an daga na saindong panunod; asin itinao ini kan Ama sa saindo.

14 Asin dai sa ano man na panahon nagtao an Ama nin katugonan sa sakuya na isabi ko ini sa manga katugangan nindo sa Jerusalem.

15 Ni sa ano man na panahon nagtao an Ama nin katugonan sa sakuya na isabi ko sa sainda an manunungod kan ibang manga tribo kan Harong kan Israel, na inantabayan kan Ama paluwas sa lugar ninda.

16 Iyo sana ini an pinagboot sakuya na itaram ko sa sainda:

17 Na igwa akong ibang manga karnero na bako sa pag-iribang ini; sinda kaipuhan man na sakuyang darahon, asin sinda makakadangog kan sakuyang tingog; asin magkakaigwa nin sarong pag-iriba, asin sarong pastor.

18 Asin ngonian, huli sa saindang pagkasutil asin dai pagtubod sinda dai nakasabot kan sakuyang tataramon; kaya pinagbotan ako kan Ama na dai na magtaram pa manunungod kan bagay na ini sa sainda.

19 Alagad, totoo, sakuyang sinasabi sa saindo na an Ama pinagbotan ako, asin sakuyang isabi ini sa saindo, na kamo isiniblag sa sainda huli sa saindang kasumbikalan; kaya idto huli sa saindang kasumbikalan na dai sindang pakaaram sa saindo.

20 Asin totoo, sakuyang sinasabi sa saindo giraray na an ibang manga tribo isiniblag kan Ama sa sainda; asin idto huli sa saindang kasumbikalan kaya dai sindang pakaaram sa saindo.

21 Asin totoo sakuyang sinasabi sa saindo, na kamo iyo sinda na sakuyang pinagsasabi: Igwa akong ibang karnero na bako sa pag-iribang ini, sinda man kaipuhan na sakuyang darahon, asin sinda makakadangog kan sakuyang tingog; asin magkakaigwa nin sarong pag-iriba, asin sarong pastor.

22 Asin ta dai ako ninda nasabutan, huli sa paghuna ninda idto an manga Gentil; huli ta dai ninda nasabutan na an manga Gentil mapapatubod sa paagi kan saindang paghulit.

23 Asin ta dai ako ninda nasabutan na sinabi ko na madadangog ninda an sakuyang tingog; asin ta dai ako ninda nasabutan na an manga Gentil dai sa ano man na panahon madadangog an sakuyang tingog—na dai ako magpapahiling sa sainda kundi sa paagi kan Espiritu Santo.

24 Alagad totoo, saindong nadangog an sakuyang tingog, asin ako saindong nahiling; asin kamo an sakuyang manga karnero, asin kamo nabibilang sa manga itinao kan Ama sa sakuya.