Scriptures
3 Nephi 24


Kapitulo 24

An sugo kan Kagurangnan ihahanda an dalan para sa Ika-duwang Pag-abot—Si Cristo matukaw sa paghukom—An Israel pinagbotan na magbayad nin himuloan asin manga atang—Sarong libro nin pagrumdom an isinurat—Ibaing sa Malaquias 3. Manga A.D. 34.

1 Asin ta uminagi an panahon na siya nagboot sainda na saindang isurat an manga tataramon na sinabi kan Ama ki Malaquias, na saiyang isasabi sa sainda. Asin ta uminagi an panahon na pagkatapos na idto maisurat saiyang ipinaliwanag an manga idto. Asin iyo ini an manga tataramon na saiyang sinabi sa sainda, na an sabi: Siring an sabi kan Ama ki Malaquias—Totoo nanggad, sakuyang ipapadara sa saindo an sakuyang sugo, asin saiyang ihahanda an dalan bago sako, asin an Kagurangnan na saindong hinahanap bigla na maabot sa saiyang templo, na iyo an sugo kan tipan, na saindong nawiwilihan; totoo, siya maabot, sabi kan Kagurangnan nin manga Hukbo.

2 Alagad siisay an makakatagal sa aldaw kan saiyang pag-abot, asin siisay an makakatindog kun siya magpahiling? Huli ta siya siring sa kalayo kan paradalisay asin siring sa sabon kan parakula.

3 Asin ta siya magtutukaw siring sa sarong paradalisay asin sa paralinig nin plata; asin saiyang lilinigan an manga aking lalaki ni Levi, asin hahalian sinda nin ati siring sa bulawan asin plata, tanganing sinda makadulot sa Kagurangnan nin atang nin katanusan.

4 Dangan na an dulot kan Juda asin kan Jerusalem magiging kawiliwili sa Kagurangnan, siring sa manga daan na aldaw, asin siring sa nakalipas na manga taon.

5 Asin ta ako marani sa saindo sa paghukom; asin ta ako magiging sarong mabagsik na tagapatotoo laban sa manga salamangkero, asin laban sa manga parasambay, asin laban sa manga parasaksing putik, asin laban sa paradaya sa manga nagpapatangdan sa saiyang bayad, sa balo asin sa daing ama, asin idtong minatalikod sa manga dayo, asin dai natatakot sakuya, sabi kan Kagurangnan nin manga Hukbo.

6 Huli ta ako an Kagurangnan, ako dai nagbabago; kaya kamong manga aking lalaki ni Jacob dai matutunaw.

7 Maging poon pa sa aldaw kan saindong manga kamagurangan kamo nagrayo na sa sakuyang manga kapagbotan, asin dai nindo idto sinunod. Magbalik sa sakuya asin ta ako mabalik sa saindo, sabi kan Kagurangnan nin manga Hukbo. Alagad kamo nagsabi: Sain kami mabalik?

8 Maghabon daw an tawo sa Dios? Alagad ako hinabonan nindo. Alagad kamo nagsabi: Sain ika niamo hinabonan? Sa manga himuloan asin sa manga dulot.

9 Kamo sinumpaan nin sumpa, huli ta hinabonan nindo ako, sagkod ining bilog na nasion.

10 Darahon nindo an gabos na himuloan sa tambobong tanganing magkaigwa nin kakanon sa sakuyang harong; asin batida ako nindo ngonian kaini, sabi kan Kagurangnan nin manga Hukbo, kun dai ko buruksan an manga bintana kan kalangitan, asin paulaan kamo nin biyaya na dai na nin bubugtakan na magkakanigo para digdi.

11 Asin sasawayon ko man an manga parahamil huli sa saindo, asin dai niya raraoton an manga bunga kan saindong daga; ni an saindong manga ubas sa bukid dai mabunga na sala sa panahon, sabi kan Kagurangnan nin manga Hukbo.

12 Asin an gabos na nasion aapodon kamong manga paladan, huli ta magigi kamong dagang kawiliwili sabi kan Kagurangnan nin manga Hukbo.

13 An saindong manga tataramon makusog tumang sa sakuya, sabi kan Kagurangnan. Alagad kamo minasabi: Ano an samuyang itinaram laban saimo?

14 Kamo nagsabi: Daing kamugtakan an maglingkod sa Dios, asin ano an pakikinabangon na kita nagkuyog kan saiyang manga rito asin na kita naglakaw na nagmumundo sa atubangan kan Kagurangnan nin manga Hukbo?

15 Asin ngonian satuyang inaapod an manga mapaharo-haralangkawon na maogma; iyo, idtong manga naggigibo nin manga mararaot an napapakarahay; iyo, idtong manga nagtutukso sa Dios iyo pa an nakakaligtas.

16 Dangan sinda na may takot sa Kagurangnan danay na nagpapaorolay-olay sa lambang saro, asin an Kagurangnan nanghimati asin nagdangog; asin sarong libro nin pagrumdom an isinurat sa atubangan niya para sa sainda na may takot sa Kagurangnan, asin idtong nagsaisip kan saiyang pangaran.

17 Asin sinda magiging sakuya, sabi kan Kagurangnan nin manga Hukbo, sa aldaw na iyan kun sakuyang gigibohon an sakuyang manga alahas; asin sakuya sindang papadangaton siring sa sarong tawo na pinapadangat an saiyang sadiring aki na naglilingkod saiya.

18 Dangan kamo mabalik asin makakamidbid kan matanos sa masumbikal, siya na naglilingkod sa Dios asin siya na dai naglilingkod saiya.