1 Asin ngonian totoo, sakuyang sinasabi sa saindo na kun nuarin mahiling kan Kagurangnan na tama, susog sa saiyang kadunungan, na an manga tataramon na ini mapaduman sa manga Gentil sunod sa saiyang tataramon, dangan nindo maaaraman na an tipan na ginibo kan Ama sa manga aki kan Israel, manunungod sa saindang pagbalik sa manga daga na saindang panundon, nagpoon nang mautob.

2 Asin saindong maaaraman na an manga tataramon kan Kagurangnan, na sinabi kan banal na manga propeta, gabos mauutob na; asin kamo dai na kaipuhan na magsabi na pinapahaloy kan Kagurangnan an saiyang pag-abot sa manga aki kan Israel.

3 Asin kamo dai na kaipuhan pang mag-isip sa saindong manga puso na an manga tataramon na sinabi daing manga kamugtakan, huli totoo, an Kagurangnan marurumdoman an saiyang tipan na saiyang ginibo sa harong kan Israel.

4 Asin kun saindong mahiling na an manga tataramon na ini na nangyayari sa saindo, dangan na kamo dai na kaipuhan pa na maungis sa manga gibo kan Kagurangnan, huli ta an espada kan saiyang kapantayan nasa saiyang toong kamot; asin totoo, sa aldaw na iyan, kun saindong kaungisan an saiyang manga gibo saiyang papangyarihon na kamo maabotan kaidto.

5 Herak man saiya na nauungis sa manga ginibohan kan Kagurangnan; iyo, herak man saiya na iindahan si Cristo asin an saiyang manga ginibohan.

6 Iyo, herak man sa saiya na maginda sa manga kapahayagan kan Kagurangnan, asin idtong manga masabi na an Kagurangnan dai na naggigibo sa paagi nin kapahayagan, o sa paagi nin propesia, o sa paagi nin manga balaog, o sa paagi nin manga tataramon, o sa paagi nin manga pagbulong, o sa paagi kan kapangyarihan kan Espiritu Santo!

7 Iyo, asin herak man sa saiya na magsasabi sa aldaw na iyan, tanganing magkinabang, na dai na magkakaigwa nin milagro na magigibo si Jesu-Cristo; huli ta siya na maggibo kaini makakaarog sa aki nin kariwaraan, na sa saiya dai nin pagkaherak, susog sa tataramon ni Cristo!

8 Iyo, asin kamo dai na kaipuhan pa na magtuya-tuya, ni maungis, ni pagkawatan an manga Judio, ni an siisay man na natada sa harong kan Israel; huli totoo, an Kagurangnan narurumdoman an saiyang tipan sa sainda, asin saiyang gigibohon sa sainda susog sa saiyang ipinangako.

9 Kaya kamo dai maghuna na saindong mabibirik an toong kamot kan Kagurangnan sa wala, tanganing dai niya magibo an saiyang paghukom sa pag-utob kan tipan na saiyang ginibo sa harong kan Israel.