Scriptures
3 Nephi 30


Kapitulo 30

An manga Gentil sa huring aldaw pinagbotan na magsorolsol, magdurulok ki Cristo, asin mabilang sa harong kan Israel. Manga A.D. 34–35.

1 Magdangog, O kamong manga Gentil, asin himation an manga tataramon ni Jesu-Cristo, an aki kan buhay na Dios, na saiyang ipinagboot sakuya na ako magtaram manunungod sa saindo, huli, totoo saiyang pinagbotan ako na magsurat, na sabihon:

2 Tumalikod, gabos kamong manga Gentil, sa saindong manga maraot na manga paagi; asin magsorolsol kan saindong mararaot na manga gibo, kan saindong manga pagputik asin manga pandaya, asin kan saindong manga karaksotan, asin kan saindong hilom na manga karumpotan, asin kan saindong manga dios-diosan, asin kan saindong manga panggagadan, asin kan saindong manga bakong tunay na pagkapadi, asin kan saindong manga pag-uri, asin kan saindong pagpasuruhayan, asin kan saindong gabos na kasumbikalan asin manga karumpotan, asin dumurulok sa sakuya, asin magpaburunyag sa sakuyang pangaran, tanganing makakua kamo nin kapatawaran kan saindong manga kasalan, asin mapano kan Espiritu Santo, na kamo mabilang sa sakuyang manga tawo na nasa harong kan Israel.