1 Oh met kedekedeo nin duwen aht poadoapoad, oh se ese me aht poadoapoad mehlel, pwe kilang, ohl pwung men me kin nekinekid poadoapoad pwukat—pwe ni mehlel e wia manaman kapwuriamwei tohto ni mwaren Sises; oh sohte emen aramas kak wia manaman kapwuriamwei ni mwaren Sises ma e sohte mwakelekelsang eh wiewia suwed kan—

2 Oh met kedekedeo, ma sohte sapwungala wiawi sang rehn ohl menet nan wadawad en aht ahnsou, pahr silihsek siluh imwiseklahr;

3 Oh aramas akan tepida ngoangki mehlel kilikilang kilel me soukohp Samuel, Mehn Leimen, kohpada, ei, ong ahnsou me e pahn rotorotki erein rahn siluh pohn sahpwo.

4 Oh e tepida mie peikasal oh akamai nan pwungen aramas akan, mehndahte kilel tohto kan me kohieng irailehr.

5 Kedekedeo nan pahr silihsek pahieuo, nan tepin sounpwungo, ni kapahieu en rahn en sounpwungo, kisinieng kehlail ehu wiawihda, me sohte pak ehu wiawi nan sahpwo pwon.

6 Oh pil mie melimel kamasepwehk oh kehlail ehu; oh pos en nansapwe me kamasepwehk, me kahrehda sahpwo pwon rerrer duwehte e pahn pwalpeseng.

7 Oh lioal piripir kehlail mehlel, me sohte pak ehu wiawi nan sahpwo pwon.

8 Oh kahnihmw en Saraemla lulida.

9 Oh kahnihmw en Moronai ahpw kihrla wasa loal en nan sehd, oh towe kan duhla.

10 Oh pwehl rengkidi pohn kahnihmw en Moronaia, oh wasa me kahnihmwo mih ie wiahla nahna lap ehu.

11 Oh kamwomwala kamasepwehk oh kehlail ehu wiawi nan sahpw en palieir.

12 Ahpw kilang, kamwomwala kamasepwehk oh kehlail laud wiawi nan sahpw en paliepeng; pwe kilang, pohn sahpwo pwon wekidekla, pwehki melimel oh elipip kan, oh pos en nansapwe oh piripir en lioal kan, oh mehlel rerrer kehlail en sahpwo pwon;

13 Oh ahl lap kan ohla, ahl patapat kan ohla, oh wasa medendel tohto mwangaingaila.

14 Oh kahnihmw kesempwal oh kehlail tohto pahn suhrla, oh tohto pahn isihsla, oh tohto me pahn rerrer lao ihmw kan mweredi nan pwehl, oh towe kan pahn kamala, oh wasa kan pahn tehnla.

15 Oh ekei kahnihmw kan pahn mihmihte; ahpw ohlao pahn laud mehlel, oh tohto me pahn kamala loale.

16 Oh ekei pahn wisiksang nan elipipo; oh wasa re pahn kohla sohte aramas wehwehki, ihte irail ese me re wisiksang.

17 Oh met pohn sahpwo pwon wekidekla, pwehki kisinieng kehlailo, oh posopos en nansapwe, oh piripir en lioal, oh rerrer en sahpwo.

18 Oh kilang, takai kan pwalpeseng; re pwalpeseng pohn sahpwo pwon, kahrehda e kak dierek me pwalasang, oh me elenpwal oh lipwenpwal, pohn sahpwo pwon.

19 Kedekedeo ahnsou me posopos en nansapwe, oh piripir en lioal kan, oh melimel, oh kisinieng kehlail, oh rerrer en sahpwo uhdi—pwe kilang, e wiawihki erein awa siluh; oh ekei nda me ahnsouo laudsang; ahpw, soahng kamasepwehk oh kehlail pwukat koaros wiawi nan erein awa siluh—oh kilang, mie rotorot ehu pohn sahpwo.

20 Kedekedeo mie rotorot mesul ehu kohda nan sahpwo pwon, kahrehda tohn sahpwo pwon me sohte mehla kak kehn edied en rotoroto;

21 Oh sohte marain kak pwarada, pwehki rotoroto, de pil kandel kan, de pil mehn ser kan; oh sohte kisiniei kak lulikihda arail tuwi meng oh kaselel mehlel, kahrehda sohte marain kak mie nan ahnsouo pwon;

22 Oh sohte marain kak sansal, de kisiniei, de kisin marain, de ketipino, de maram, de usu, pwehki kehlail en rotorot mosulo me kohda nan sahpwo.

23 Kedekedeo e ahpw wiawihki erein rahn siluh me sohte marail kak sansal; oh mie ngileng mwahmwahiei oh wie weriwer oh wie sengiseng nan pwungen aramas akan; ei, ahn aramas akan arail mwahiei me kehlail mehlel, pwehki rotorot oh kamwomwala lap me wiawihong irail.

24 Oh nan ehu wasa irail rong sengiseng, me ndinda: Oh ma kitail koluhla mwohn rahn kamasepwehk oh kehlail wet, oh mwein riatail kan pahn kakete komourla, oh irail sohte pahn isihsla nan kahnihmw en Saraemla.

25 Oh nan ehu wasa irail rong sengiseng oh mwahiei, ndinda: Oh ma kitail koluhla mwohn rahn kamasepwehk oh kehlail wet, oh sohte kemehla oh katehdi soukohp kan, oh keseirailla; eri mwein atail nohno kan oh neitail serepein masamwahu kan, oh neitail seri kan pahn komourla, oh sohte seridi nan kahnihmw lap en Moronaia. Oh met ahn aramas akan arail weriwer me kamasepwehk oh kehlail.