Iralaud 25
Ni Ketido Keriauo, me pohnmwahso oh suwed kan pahn isihsla duwehte mwutin dihpw meng—Ilaisia pahn pwurodo mwohn rahn lapalap oh kamasapwehko—Karasahiong Malakai 4. Ele Sounpar 34 Mwurin Ipwidi en Krais.
1 Pwe kilang, rahno pahn kohdo me pahn lulida duwehte uhmw ehu, oh koaros me pohnmwahso, ei, irail koaros me kin wiahda suwed pahn duwehla mwuten dihpw meng; rahno pahn pwarodo me re pahn isihsla, oh sohte kalowe ehu de rah ehu pahn luhwehdi, Kauno Wasa Lapalap ketin mahsanih.
2 Ahpw ong irail me kin lemwiki edei, iei me Sapwellime Mourpwungo pahn ketin pwarada iangahki kamaiauda sang nin lime pehnpihr kan; oh kumwail pahn kohwei oh kekeirada duwehte kou pwulopwul akan me kin mi nan kehlo.
3 Oh kumwail pahn kin tiakidi irail me suwed akan; pwe irail pahn wia mwalus pahn nehmwail akan ni rahn me I pahn wia met, Kauno Wasa Lapalap ketin mahsanih.
4 Kumwail tamataman kosonned en Moses, ei laduo, me I kihongehr ih nan Orep ong Israel koaros, iangahki koasondi kan oh kosonned en kopwung kan.
5 Kilang I pahn kadarewei soukohp Ilaisia mwohn rahn kesempwal oh kamasepwehk en Kauno;
6 Oh e pahn kapwurehla mohngiong en sahm akan ong neirail seri kan, oh mohngiong en seri kan ong samarail kan, pwe ma soh, I pahn kohdo oh kariahla sampah.