1 Oh met kilang, sohte emen aramas en Mehn Nihpai kan me momour me peikasaliki ekis mahsen kan me soukohp sarawi koaros mahsaniher; pwe irail ese me e udahn pahn pweida.

2 Oh irail ese me e udahn pahn konehng me Krais pahn ketido, pwehki kilel tohto kan me pwaradahr, nin duwen mahsen kan en soukohp kan; oh pwehki soahng kan me pweidahr irail wehwehkier me udahn soahng koaros pahn pweida nin duwen dahme mahsendahr.

3 Eri irail monokehla diparail kan, oh arail tiahk suwed kan, oh arail nenek kan, oh ahpw loaloapwoatieng papah Koht nihrahn oh nihpwong.

4 Oh met kedekedeo ahnsou me re koledier oh saliedi pwihn lipirap ko, kahrehda koaros me sohte kamala sohte emen pitila, irail kesehlong neirail me selidi ko nan imweteng, oh ahpw kehrehd mahsen en Koht en kalohk ong irail; oh koaros me men koluhkihla diparail kan oh wiahda inou me re sohla pahn kamaramas re kin kasaledekla.

5 Ahpw koaros me sohte men wiahda inouo, oh me kin men uhsehlahte kolokol tiahk riri en kamaramas nan mohngiongarail kan, ei, koaros me kin dierekda kamakamasak riarail kan kin pakadeikda oh kalokolok nin duwen kosonnedo.

6 Oh met irail ahpw kauhdi suwed, oh riri, oh tiahk en mour suwed koaros, me kin kahrehda suwedlaud, oh kamaramas tohto wiawi.

7 Oh met kaimwsekalahr pahr rieisek riau, oh pil pahr rieisek siluh, oh rieisek pahieuo, oh rieisek limauo; oh met kaimwsekala pahr rieisek limao.

8 Oh soahng tohto wiawiher me, ekei aramas pahn wiahki me, e udahn kesempwal oh kapwuriamwei; ahpw, koaros sohte kak ntingdi nan pwuhk wet; ei, pwuhk wet sohte kak audaukihda pali epwiki en dahme wiawiher rehn aramas tohto nan erein sounpar rieisek limao;

9 Ahpw kilang mie poadoapoad kan me audaudkihda wiewia koaros en aramas pwukat; oh soi mwotomwot ahpw mehlel me Nihpai wiahda.

10 Eri I ntingihda ei poadoapoad en mepwukat nin duwen poadoapoad en Nihpai, me ntingdi pohn pileit kan me adaniki pileit en Nihpai.

11 Oh kilang, I wiahda poadoapoad pohn pileit me I pein wiahda sang pehi kat.

12 Oh kilang, edei Mormon, pwehki edeiet kohsang eden sahpw en Mormon, nan sahpw me Alma wiahda mwomwohdiso rehn aramas akan, ei, tepin mwomwohdiso me wiawihda rehrail mwurin arail dipada.

13 Kilang, ngehi tohnpadahk en Sises Krais, Sapwellimen Kohto. I malipilipda sang ih pwe en kalohngki sapwellime mahsen rehn sapwellime aramas, pwe irail en kak alehdi mour poatoapoat.

14 Oh e pahn konehng me ngehi, nin duwen kupwur en Koht, me kapakap en irail akan me melahr, me wia aramas sarawi kan, pahn pweida nin duwen arail pwoson, pahn wiahda poadoapoad en mepwukat me wiawiher—

15 Ei, poadoapoad tikitik ehu me wiawihda sang ni ahnsou me Lihai mwesel sang Serusalem, lao lel ahnsou wet.

16 Eri I pahn wiahda ei poadoapoad sang soi kan me wiawihda sang irail kan me tiengdohr mwohi, lao lel tepidahn ei ahnsou;

17 Oh ngehi ahpw pahn wiahda poadoapoad en soahng kan me I pein kilangki mesei kat.

18 Oh I ese me poadoapoad kan me I wiahda wia poadoapoad pwung oh mehlel; ahpw mie soahng tohto m, nin duwen aht lokai, se sohte kak ntingihdi.

19 Oh met I pahn uhdi koasoakoasoia duwen pein ngehi, oh doula wiahda soi en soahng kan me mihmi mwohi.

20 Ngehi Mormon, oh I wia udahn kadaudok en Lihai. Mie kahrepen ei pahn kepinga ei Koht oh ei Sounkomour Sises Krais, pwehki eh ketin wahdo atail pahpa ko sang nan sahpw en Serusalem, (oh sohte me ese ihte pein ih oh irail kan me e ketin wahdosang nan sahpwo) oh me e ketikihong ie oh nei aramas kan kamarain laud ong komourpen palingenatail kan.

21 Mehlel e ketin kapaiada peneinei en Seikop, oh ketin kupwuramwahi kadaudok en Sosep kan.

22 Oh ni ahnsou me nein Lihai seri kan kin kapwaiada sapwellime kosonned kan e kin ketin kapaiada irail oh ketikihong irail pai nin duwen sapwellime mahsen.

23 Ei, oh ni mehlel e pahn ketin pwurehng kapwurehdo luhwen kadaudok en Sosep ong marain en Kauno arail Koht.

24 Oh ni mehlel Kauno e ketin ieias, e pahn ketin kapwurepene luhwen kadaudok en Seikop koaros sang ni keimw pahieu en sampah, me mwerpeseng wasa koaros pohn sampah.

25 Oh pwehki e ketin inouwehng peneinei en Seikop koaros, eri inouo me e ketin inoukihongehr peneinei en Seikop udahn pahn pweida nin duwen sapwellime ahnsou, ong kopwurupwurdohn peneinei en Seikop koaros ong marain en inou me e ketin inoukihongehr irail.

26 Oh re ahpw pahn esehda arail Soundoaro, me iei Sises Krais, Sapwellimen Kohto; oh re ahpw pahn kopwurupwurdohng pein sapwarail sang ni keimw pahieu en sampah, sang wasa me irail kohla ie; ei, nin duwen Kauno e ketin ieias e udahn pahn wiawi. Ahmen.