1 Kedekedeo e ahpw mahsanihong pokono me irail pahn uhdihsang kapakap, oh pil sapwellime tohnpadahngko. Oh e mahsanihong irail me irail sohte pahn uhdihsang kapakap nan mohngiongarail kan.

2 Oh e mahsanihong irail me irail pahn uhda oh kesihnenda. Oh irail ahpw uhda oh kesihnenda.

3 Kedekedeo e ahpw pwurehng pilitikihpeseng pilawa oh kapaiada, oh ketikihong tohnpadahngko re en tungoale.

4 Oh ahnsou me irail tungoalehier, e ahpw mahsanihong irail me irail pahn pilitikihpeseng pilawa, oh kihong pokono.

5 Oh ahnsou me irail kihongehr pokono, e ahpw pil ketikihong irail wain pwe re en nim, oh mahsanihong irail en kihong pokono.

6 Met, tohnpadahngko oh pil pokono sohte wahdo pilawa, de pil wain;

7 Ahpw ni mehlel e ketikihong irail pilawa pwe re en tungoale, oh pil wain pwe re en nim.

8 Oh e mahsanihong irail: Mehmen me pahn tungoale pilawa wet tungoalehier udukei ong palingene; oh mehmen me pahn nim wain wet nimalahr ntahi ong palingene; oh palingene sohte pahn pwurehng men mwongehda de men nimpilda, ahpw pahn medkihla.

9 Met, ahnsou me pokono pwon tungoalehr oh nimpilehr, kilang, irail direkihla Ngehno; oh irail wiahkintehieu werikihla, oh kapinga Sises, me irail kilang oh rong.

10 Kedekedeo ahnsou me irail pwon kepingahier Sises, e ahpw mahsanihong irail: Kilang met I pahn kaunsekehla kosonned me Sahmo mahsanihong ie duwen aramas pwukat, me wia kisehn luhwen peneinei en Israel.

11 Kumwail tamataman me I lokaiahng kumwail, oh ndahiong kumwail me ahnsou me mahsen en Aiseia pahn pweida—kilang e ntingdier, kumwail kolokol mwohmwail, eri kumwail rapahki loale—

12 Oh mehlel, mehlel, I ndahiong kumwail, me ahnsou me e pahn pweida eri inouo pahn pweida me Sahmo ketin inoukihong sapwellime aramas, kumwail peneinei en Israel.

13 Oh kisehn luhwe kan, me pahn mwerpeseng wasa koaros pohn sampah, ahpw pahn kopwurupwurpene sang palimese oh sang palikapi, oh sang palieir oh sang paliepeng; oh irail pahn kohdo wehwehkihda Kauno arail Koht, me pahn doareirailla.

14 Oh Sahmo ketin mahsanihong ie me I pahn kihong kumwail sahpwet, pwe en wia amwail sohso.

15 Oh I ndahiong kumwail, ma Mehn Liki kan sohte pahn koluhla mwurin arail alehdi kapai, mwurin arail kamwerepeseng nei aramas akan—

16 Eri kumwail me wia kisehn peneinei en Seikop pahn kohwei rehrail; oh kumwail pahn mih nanwerengarail me pahn tohto; oh kumwail pahn mih nanpwungarail duwehte laion men nan pwungen mahn en nanwel kan, oh duwehte laion pwulopwul men nan pwungen pelin sihpw, me, ma e pahn kohwei e pahn tiakiraildi oh tehrirailpeseng, oh sohte me kak doarehla.

17 Pehmwail kan pahn kohdahng pohn amwail imwintihti kan, oh amwail imwintihti koaros pahn kamala.

18 Oh I pahn kihpene nei aramas akan duwehte aramas men me kin kihpene kapakap en tuhke kan pohn tato.

19 Pwe I pahn wiahiong nei aramas, me Sahmo ketin inouieng, ei, I pahn wiahiong irail kode mete oh I pahn wiahiong neh pirahs. Oh kumwail pahn kawehla aramas tohto; oh I pahn kasarawihla arail pai kan ong Kauno, oh arail dipwisou kan ong Kaun en sampah pwon. Oh kilang, ngehi me pahn ketin wia met.

20 Oh e pahn wiawi, Sahmo ketin mahsanih, me kedlahs en ei kopwung pahn tenekda pohrail ni rahno; oh ma irail sohte pahn koluhla, e pahn pwupwidi pohrail, Sahmo ketin mahsanih, iei, pohn wehin Mehn Liki kan koaros.

21 Oh e pahn wiawi me I pahn koasonehdi nei aramas, kumwail peneinei en Israel.

22 Oh kilang, aramas pwukat me I pahn koasonehdi nan sahpwet, pwe en kapwaiada inouo me I inoukihong samamwail Seikop; oh e pahn wia Serusalem Kapw. Oh manaman en nanleng pahn mih nanpwungen aramas pwukat; iei, I pahn mih nan pwungamwail.

23 Kilang, ngehi iei me Moses koasoia, ndinda: Soukohp men Kauno amwail Koht pahn apwaliada ong riomwail akan, me pahn duwehte ngehi; ih me kumwail pahn rong nan mehkoaros me e pahn mahsanihong kumwail. Oh e pahn wiawi me aramas koaros me sohte pahn rong soukohpo pahn lekideksang rehn aramas akan.

24 Mehlel I ndahiong kumwail, ei, oh soukohp kan koaros sangete Samuel oh koaros me kohdo mwuri, koaros me wiahier kokohp, kadehdehkin ie.

25 Oh kilang, kumwail iei seri en soukohp oko; oh kumwail iei peneinei en Israel; oh kumwail iei kisehn inouo me Sahmo ketin inoukihong samamwail ko, mahsanihong Eipraam: Oh sang kadaudokomw kan peneinei en sampah pwon pahn kapaikihda.

26 Sahmo ketin apwaliheda ong kumwail mahs, oh ketin kadariehdohng kumwail pwe I en wekidkumwailsang amwail wiewia suwed kan; oh met pwehki amwail wia seri en inouo—

27 Oh mwurin amwail pahn kapaida, sapwellimen Sahmo inouo ahpw pahn pweida me e ketin inoukihong Eipraam, mahsanih: Sang kadaudokomw kan peneinei en sampah pwon pahn kapaikihda—sang ni ei pahn ketikihong Mehn Liki kan Ngehn Sarawio, me pahn wia kapai me elehiong Mehn Liki kan en kehlailsang koaros, me kahrehda kamweremwerpeseng en nei aramas akan, kumwail peneinei en Israel.

28 Oh irail pahn wia kalokepen aramas en pohn sahpwet. Ahpw, ahnsou me irail pahn alehdi ei rongamwahu unseko, irail ahpw keptakaiala mohngiongarail akan ong ie, I pahn kapwurehiong pohrail diparail kan, Sahmo ketin mahsanih.

29 Oh I pahn tamanda inouo me I wiahiongehr nei aramas akan; oh I inoukihong irail me I pahn kapwureirailpene ni ahnsou me I pahn koasonehdi, me I pahn pwurehng kapwurehiong irail sapwen arail pahpa pwe irail en sohsohki, me iei sahpw en Serusalem, me iei sapwen inou ong irail kohkohlahte, Sahmo ketin mahsanih.

30 Kedekedeo ahnsou ahpw pahn lelledo, ahnsou me unsek en ei rongamwahu pahn kalohk ong irail;

31 Oh irail pahn kamehlele ie, me ngehi iei Sises Krais, Sapwellimen Kohto, oh pahn kapakap ong Sahmo ni mwarei.

32 Eri neirail silepen kahnihmwo kan pahn werkihda, oh ni ngihl ehu irail pahn koul; pwe irail pahn kilangki pein meserail.

33 Eri Sahmo ahpw pahn pwurehng kapwureirailpene, oh ketikihong irail Serusalem pwe en wia sapwarail sahpw en sohso.

34 Irail ahpw pahn ngisingiski arail peren—kumwail ehupene koul, kumwail wasa me apwal kan en Serusalem; pwe Sahmo ketin kaloalamwahwihala sapwellime aramas akan, e ketin doarehla Serusalem.

35 Sahmo pahn ketin doadoahngki lime kan nan mesen wehi kan koaros, oh wasa koaros nan sampah pahn kilang komour en Sahmo; oh Sahmo oh ngehi ehute.

36 Oh e ahpw pahn pweida dahme ntingdiero: Saion, pirida, pwourda oh kehlailada; pwuhrieng nan ahmw likou kaselel kan, kowe Serusalem, kahnihmw sarawi, pwe sang met kohla me samin kan solahr pahn pidolong nan omw kahnihmw.

37 Serusalem, sipedasang rehmw pwelipar akan; kesihnenda, mwohndieng nan dewemwen; sapwadasang sahl me pire tepinweremwen, kowe serepein lohdi en Saion.

38 Pwe Kauno ketin mahsanih: kumwail netikinkumwailahr ni sohte mehkot, oh kumwail pahn sohte pahn pweipweikihda mwohni.

39 Mehlel, mehlel, I ndahiong kumwail, me nei aramas akan pahn ese mwareiet; ei, ni rahno irail pahn ese me ngehi iei ih me mahmahsen.

40 Oh re ahpw pahn nda: Meid lingan oh kaselel pohn nahna kan en paten nehn ih me pahn wahdo rongamwahu ong irail, me kin kalakalohngki popohl; me kin wahdo rongamwahu ong me mwahu, me kin kalohngki duwen komourla; oh ndahiong Saion: Omwi Koht me ketin kakaun!

41 Oh ngihl ehu ahpw pahn mahsanih: Kumwail mweselda, kumwail mweselda kohkohwei sang met, dehr doahke mehkot me keinapwi kan; kumwail pidohi sang reh; kumwail me kin kolokol sapwellimen Kauno manaman.

42 Pwe kumwail sohte pahn kohwei ni karuaru de sopohla; pwe Kauno pahn ketin tiengwei mwohmwail, oh Koht en Israel pahn sinsile mwurumwail.

43 Kilang, ei laduwo pahn wia doadoahk mwahu; e pahn lapalapala oh pahn waunla kowahlahpie.

44 Aramas tohtohie pwuriamweikihla ahr kilangkomwihda—mwomwehu inenen wekila mehlel, lingansang mwomwen aramas koaros, oh wekilahn paliwerehu lingansang aramas koaros—

45 Eri e pahn kamwakelehda wehi tohto; nanmwarki kan pahn pwuriamweikihla uhdiahl ih, nan ahr pwuriamwei, re sohla pahn kak mahsen, pwe re pahn mahsanihada oh mwahngihada mehkot me re sohte kin karonge oh mwahngih sang mahs kohdo.

46 Mehlel, mehlel, I ndahiong kumwail, mepwukat koaros udahn pahn pweida, iei duwen me Sahmo ketin mahsanih ong ie. Eri inouo me Sahmo ketin inoukihong aramas pwukat ahpw pahn pweida; oh nei aramas akan ahpw pahn pwurehng kousoanla nan Serusalem, oh e pahn wia sapwarail sahpw en sohso.