1 Kedekedeo pahr keduweisek limau ahpw pil imwisekla, oh aramas kan ahpw tepida manokehla kilel kan oh soahng kapwuriamwei kan me irail rongehr, oh tepida sohla pwuriamweiki kilel de soahng kapwuriamwei me sang nanleng, kahrehda nan mohngiongarail kan tepida kekeluwakala, oh masukunla nan arail madamadau kan, oh tepida sohla kamehlele soahng koaros me re rongehr oh kilangehr—

2 Medemedewehda soahngen mehkot likamw kan nan mohngiongarail kan, me dene aramas oh sang ni manaman en tepilo me elehiong, pwe en kahluwahsang oh pitihdi mohngiong en aramas kan; oh met iei me Sehdan pwurehng kolkihdier mohngiong en aramas akan, kahrehda e kamaskunialahr masarail kan oh kahluwahlahng irail en kamehlele me padahk mehlel en Krais kan likamw oh sohte katepe.

3 Kedekedeo aramas kan ahpw kehkehlaila nan arail wiewia suwed oh tiahk suwed kan; oh irail sohte kamehlele me pahn miehte ekei kilel de soahng kapwuriamwei kan pahn wiawi; oh Sehdan ahpw kohseli, kakaluwahsang mohngiong en aramas kan, kasongosongih irail oh kahkahrehiong irail en wia mwekid suwed kan nan sahpwo.

4 Oh met kaimwisekalahr pahr duweisek weneuo; oh pil pahr duweisek isuh; oh pil pahr duweisek waluho; oh pil pahr duweisek duwau;

5 Oh pil sounpar epwiki daulilahr mwehin Mosaia, me wia nanmwarki en aramas en Nihpai kan.

6 Oh sounpar wenepwiki duwau daulilahr ahnsou me Lihai mweselsang Serusalem.

7 Oh sounpar duwau daulilahr ahnsou me kilelo pwaradao, me soukohp kan kohpada, me Krais pahn ketdihdo pohn sampah.

8 Met Mehn Nihpai kan tepida wadek ahnsou sang ni ahnsou me kilelo pwarada, de sang ni ipwidi en Krais; eri, sounpar duwau dauliher.

9 Oh Nihpai, me wia semen Nihpai, me pwukoahki poadoapoad ko, sohte pwurala nan sahpw en Saraemla, oh e sohte kak dierek nan sahpwo pwon.

10 Kedekedeo aramas kan pil duduwehte nan arail mour suwed kan, mendahte kalkalohk oh kokohp me pekederdohng irail; oh me pil kaimwisekalahr pahr keiseko; oh pahr keisek ehuo pil imwisekla nan arail dipan.

11 Kedekedeo nan pahr keisek siluho mahwin oh pingiping tepida wiawi nan sahpwo pwon; pwe pwihn en Kadiendon lipirap ko wie tohtohla, oh ahpw kemehla aramas tohto, oh kawehla kahnihmw tohto, oh wiwiahda mehla oh kamaramas nan sahpwo pwon, me kahrehda anahnepen aramas koaros, Mehn Nihpai kan oh Mehn Leimen kan koaros, re en alehda neirail dipwisou en mahwen kan pwe re en doare irail.

12 Eri, Mehn Leimen kan koaros me weliakapwehng Kauno ahpw ehupenehng riarail kan, Mehn Nihpai kan, pwehki anahnepen, perehrehn arail mour oh arail pwoud kan oh neirail seri kan, me karehda re alehda dipwisou en mahwin pwe re en pelian pwihn en Kadiendon lipirap kan, ei, oh pwe re en pil doandoare arail pwuhng, oh arail kapai en ahneki mwomwohdiso oh arail kaudok, oh arail saledek oh saledek en momour.

13 Kedekedeo mwohn pahr keisek siluh eh imwisekla Mehn Nihpai kan kereniong re pahn kamwomwala pwehki mahwin wet, me kapahtoula mehlel.

14 Kedekedeo Mehn Leimen kan me miniminiongehr Mehn Nihpai kan iang wadawadiongehr rehn Mehn Nihpai kan;

15 Oh arail keriah kohsang rehrail, oh kilirail kan pwetepwetala duwehte Mehn Nihpai kan;

16 Oh neirail mwahnakapw kan oh peinakapw kan pil linganla mehlel, oh re wadawadiongehr Mehn Nihpai kan, oh adanikihla Mehn Nihpai. Oh met kaimwisekala pahr keisek siluh.

17 Kedekedeo ni tepin pahr keisek pahieuo, mahwin nanpwungen lipirap ko oh aramas en Nihpai kan ahpw doudoulahte oh kapahtoula mehlel; ahpw, aramas en Nihpai kan ekis paiamwahu sang lipirap ko, kahrehda re pwakihirailsang nan sapwarail sahpw kan kohla nan nahna kan oh nan wasahn arail rukula kan.

18 Oh met kaimwisekala pahr keisek pahieu. Oh nan pahr keisek limauo re pwurehng kohdohng aramas en Nihpai kan; oh pwehki wiewia suwed en aramas en Nihpai, oh pwehki arail pingiping tohto kan oh pwupwidi kan, pwihn en Kadiendon lipirap ko kin kaloweiraildi wasah kei.

19 Oh met kaimwisekalahr pahr keisek limau, oh met aramas kan mihmi nan irair en kahpwal tohto; oh kedlahs en kamwomwala wie tentenek pohrail, kahrehda kereniong irail pahn kamakamkihla, oh met pwehki diparail kan.