Kapitulu 25
King Kaduang Pamaniatang, ding palalu at marok masilab la antimong are — I Elias mibalik ya bayu itang dakila at makapangilabut a aldo — Ikumpara king Malaquias 4.
1 Uling lawan, ing aldo datang a mitau yang anting metung a hornu; at ding anggang palalu, wa, at ding anggang gagawang, marok, maging anti lang are, at ing aldo a daratang silaban nala, sasabian nang Guinu da ring ejercitos, bang e ya milakuan karela ni wakat o sanga man.
2 Dapot kekayung tatakut king kanakung lagiu, talakad ya ing Anak na ning Kayapan a maki pamipakayap karing keang bagwis; at umayun kayu at dagul kayu anti ring biserung baka king tubungan.
3 At damusakan yu la ding marok; uling ila maging abu la king lalam da ring talampakan da ring kekayung bitis, king aldo a gawan ku ini, sasabian nang Guinu da ring ejercitos.
4 Ganakan yu ing kautusan nang Moises, ing kanakung talasuyu, a inutus ku kea king Horeb para king mabilug a Israel, kayabe ding tuntunan at kautusan.
5 Lawan, itubud ke kekayu i Elias ing propeta bayu datang ing dakila at makapangilabut a aldo ning Guinu;
6 At papibalikan nala pusu ding pengaring lalaki karing anak, at ding pusu da ring anak karing karelang pengaring lalaki, uling nung ali datang ku at sugatan ke ing yatu king metung a sumpa.