Kapitulu 20
I Jesus miukul yang tinape at alak king milagru at pasibayu biniye ne ing sacramentu karing tau — Ding mitagan nang Jacob datang la king beluan ning Guinung karelang Dios at manan de ing America — I Jesus ya ing propetang kalupa nang Moises, at ding Nephite ilang anak da ring propeta — Ding aliwa karing tau ning Guinu matipun la king Jerusalem.
1 At milyari a inutus nala ding keraklan a dapat lang tuknang king pamanalangin, at makanian mu naman ding keang alagad. At inutus nala a ela dapat tuknang manalangin king karelang pusu.
2 At inutus nala a mibangun la at talakad karing karelang bitis. At mibangun la at tinalakad karing karelang bitis.
3 At milyari a pasibayu nalang pemirasu ding tinape at binindisyunan nala, at biniye nala karing alagad para kanan.
4 At kaibat dang mengan inutus nalang dapat dalang pamirasuan ding tinape, at ibiye karing keraklan.
5 At kaibat dalang biniye karing keraklan biniye na naman karela ing alak para inuman, at inutus nala a dapat ibiye da karing keraklan;
6 Ngeni, ala nang tinape, ni alak, a dela da ring alagad, ni ding keraklan.
7 Dapot tutung biniye nala karela ding tinape para kanan, at makanian mu naman ing alak para inuman.
8 At sinabi na karela: Ya a mamangan king tinape a ini mamangan ya king kakung katawan para king keang kaladua; at ya a miminum king alak a ini miminum ya king kakung daya para king keang kaladua; at ing keang kaladua ene kapilanman dumanup at mangawa, dapot kumabsi ya.
9 Ngeni anyang ding keraklan mengan at mininum nala, tutu, kinatmu la king espiritu; at ginulisak la king metung a siwala, at miniye lang kapurian kang Jesus, a karelang ikit at dimdam.
10 At milyari a anyang meyari nalang memiye papuri kang Jesus, sinabi na karela: Lawan ngeni ayari ku na ing kautusan a ing Ibpa inutus na kaku agpang karing tau, a mitagan king bale ning Israel.
11 Aganaka yu a sinabi ku kekayu, at mesabi a nung ding amanu nang Isaias matupad la — tutu makasulat la, atiu la arapan yu, uli na niti saliksikan yula.
12 At katutuan, katutuan, sasabian ku kekayu, a potang deni matupad la kanita ya ing katuparan ning pangaku a gewa na ning Ibpa karing keang tau, O bale ning Israel.
13 At kanita ding mitagan, a mikalat kabilugan ning yatu, matipun la ibat king aslagan at ibat king albugan, at ibat king paroba at ibat king paralaya; at miras king beluan ning Guinung karelang Dios, a menatbus karela.
14 At ing Ibpa inutus na kaku a dapat kung ibiye kekayu ing gabun a ini, para king kekayung mana.
15 At sasabian ku kekayu, a nung ding Gentil ela sumisi kaibat ning biyayang karelang tanggapan, kaibat dalang kinalat ding kakung tau —
16 Kanita ikayu, a mitagan king bale nang Jacob, munta kayu busal da; at mibusal kayu karela a maging marakal; at mibusal kayu karela anti ing leon busal da ring animal king gubat, at anti ing anak a leon busal da ring kawan da ring tupa, a nung milub ya king kawan mangadamusak ya at mangapirasung mangalati, at alang makapagligtas.
17 Ding kekang gamat mitas la karing kekang kalaban, at ding kekang anggang kasalang mangamate la.
18 At tipunan ku la ding kakung tau anti ing metung a tau a titipun karing keang aptas king lande.
19 Uling gawan ku la ding kakung tau a nung kaninu ing Ibpa mengaku ya, wa, gawan ku lang bakal ding kekang sagu, at gawan ku lang tangsu ding kekang kuku. At keka lang dakurakan ding dakal a tau; at kaku lang ibiye ding pakinabang king Guinu, at ing karelang pibandian king Guinu ning kabilugan a yatu. At tutu, aku ing gawa kanini.
20 At milyari a, sinabi ning Ibpa, a ing ispada ning kakung justicia mibitin ya babo da king aldo ita; at nung ela sumisi mibagsak ya karela, sinabi ning Ibpa, wa, anggiyang karing anggang bansa da ring Gentil.
21 At milyari a italakad ku la ding kakung tau, O bale ning Israel.
22 At lawan, italakad ku la dening taung deni king gabun a ini, angga king katuparan na ning pangakung gewa ku king kekayung ibpang i Jacob; at ini maging metung yang Bayung Jerusalem. At ding kayupayan ning banua mibusal la karing taung deni; wa, anggiyang aku mibusal ku kekayu.
23 Lawan, aku ing sasabian nang Moises, a sasabing: Metung yang propeta ing isadia ning Guinu yung Dios kekayu ibat karing kekayung kapatad, anti aku; ya ing kekayung pakiramdaman karing anggang bage nanuman ing sabian na kekayu. At ini malyari a ing balang kaladua a e makiramdam king propetang ita mikawani ya ibat king busal ding tau.
24 Katutuan sasabian ku kekayu, wa, at ding anggang propetang ibat kang Samuel at detang tutuki pa kanita, a migsalita, migpatutu la tungkul kanaku.
25 At lawan, ikayu ring anak da ring propeta; at kabilang kayu king bale ning Israel; at ikayu sakup kayu king pangakung gewa ning Ibpa karing kekayung ninunu, nung sanu ing sinabi na kang Abraham: At king kekang bini ding anggang mikakamaganak mipanuanan la.
26 Ing Ibpa mumuna pepalto na ku kekayu, at tinubud na ku bang panuanan da kayu king pamangulut ning balang metung kekayu ibat king keang karokan; at ini megawa uling ikayu ding anak ning pangaku —
27 At kaibat yung mipanuanan kanita ing Ibpa tuparan na ing pangaku a gewa na kang Abraham, a sasabing: King kekang bini ding anggang mikakamaganak king yatu mipanuanan la — kayabe ing pamanugtug king Espiritu Santo king kapamilatan ku karing Gentil, a nung sanung biyaya karing Gentil ing gawa karelang mayupaya karing eganagana, angga king pamangalat karing kakung tau, O bale ning Israel.
28 At ila maging pasakit la karing tau ning labuad a ini. Makanian man, potang atanggap da ne ing kabilugan ning kakung ebanghelio, kanita nung pasiasan dala ding karelang pusu laban kaku ibalik ku la ding karelang karokan karing karelang sariling buntuk, sinabi ning Ibpa.
29 At ganakan ku ing pangaku a gewa ku karing kakung tau; at apangaku ku karela a tipunan ku la king kakung sariling panaun, bang ibiye karelang pasibayu ing gabun ding karelang ninunu para king karelang mana, ya ing labuad ning Jerusalem, ya ing pangakung labuad para karela kapilanman, sinabi ning Ibpa.
30 At milyari a ing panaun datang ya, potang ing kabilugan ning kakung ebanghelio mituru ya karela.
31 At maniwala la kaku, a aku i Jesucristo ing anak ning Dios, at manalangin la king Ibpa king kakung lagiu.
32 At kanita ding karelang bante magtas lang siwala, at magkanta lang miabeabe; uling mikit lang mata king mata.
33 Kanita ing Ibpa tipunan na la pasibayu, at ibiye karela ing Jerusalem para king gabun ning karelang mana.
34 Kanita magsaya la king tula — Magkanta lang miabeabe, ilang atiu karing mesayang a lugal ning Jerusalem; uling ing Ibpa pepasnawan nala ding keang tau, ayatbus ne ing Jerusalem.
35 Ing Ibpa apakit nala ding keang banal a gamat bang akit da ring anggang bansa; at ding anggang sepu ning yatu akit da ing pamagligtas ning Ibpa; at ing Ibpa at aku metung ya mu.
36 At kanita malyari itang misulat: Migising, migising pasibayu, at tipunan ing sikan yu, O Zion; isulud yu la ding mangasanting yung imalan, O Jerusalem, ing banal a siudad, uling manibat ngeni ala nang lumapit keka a e tuli at e malinis.
37 Pagpagan mu ing alikabuk king sarili mu; talakad, lukluk, O Jerusalem, ibulus me ing sarili mu king pangatali ning batal mu, O mesukul a anak nang babai ning Zion.
38 Uling makanian sinabi ning Guinu: Pisali yu ing kekayung sarili king alang pera, at mayatbus kayu king alang pera.
39 Katutuan, katutuan, sasabian ku kekayu, a ding kakung tau abalu de ing kakung lagiu; wa, king aldo ita abalu da a aku itang magsalita.
40 At kanita sabian da: Pangasanting da karing bunduk detang bitis na ning magdalang mangayap a balita karela, a maglimbag kapayapan; ning magdalang mangayap a balita karela a mangayap, a maglimbag kaligtasan; a sasabi king Zion: Ing kekayung Dios magari ya!
41 At kanita metung yang gulisak ing maramdam: Mako kayu, mako kayu, lual kayu king busal da, eye tatagkilan itang e malinis; lual kayu king busal na; maging malinis kayu a magdala karing lulanan ning Guinu.
42 Uling eko lual king piragli ni king pamanakas; uling i Guinu manimuna ya kekayu, at ing Dios ning Israel maging kekayu yang bante king gugulutan.
43 Lawan, ing kakung alipan magobra yang makimayap a pamanatul; ya dakilan de at purian de at maging masyadu yang matas.
44 Nung makananu la karakal ding mengapamulala kekayu-ing keang lupa mesira ya, migit kaninu mang tau, at ing keang itsura migit karing tau —
45 Anya mandilig ya karing dakal a bansa; ding ari mitikum la ring karelang asbuk kea, uling itang epa mesabi karela akit da; at itang eda pa dimdam isipan da.
46 Katutuan, katutuan, sasabian ku kekayu deting anggang bage siguradu lang datang, anti ing Ibpa inutus na kaku. Kanita ining pangaku a ing Ibpa apangaku na karing keang tau matupad ya; at kanita ing Jerusalem mituknangan yang pasibayu karing kakung tau, at iti yang maging gabun ning karelang mana.